Spring 2024, ফিক্সন ইস্যু

ফিক্সন এন্দ পোইট্রি ক্লব, মণিপুরগী বেন্নর মখাদা ইং কুমজা ২০২৩ দা ফোঙখিবা কৈথেল্লাকপম লন্দননা ইবা ৱারীমচাগী লাইরিক অমনবা হি  দা ইরমদম মীয়ামগী অপূনবা খোর্জৈ লূপ (ইমাখোল), অৱাং পোৎশংবমনা পীবা ‘মোইরাংথেম চুড়ামোহন অমসুং মোইরাংথেম ওংবী থিয়াম নিঙোল মধুমতি দেবী নীংশিং খোরিরোল মনা ২০২৪’ অমসুং খোরিরোল শন্দোকলূপ, ৱাংজিংনা পীবা ‘থোকচোম অমুবা শাস্ত্রী নীংশিং খোরিরোল মনা, ২০২৪’ মথংশিৎনা ফংখ্রে।

মণিপুরী খোরিরোলদা ৱারীমচা ইবা অমা ওইনা থোইদোক্না লৈবাক মীয়াম্না শকখঙনরক্লিবা কৈথেল্লাকপম লন্দন ইং কুমজা ১৯৭৭ তা ইম্ফাল ইষ্টকী পৌরাবী খুঙ্গংদা পোকখি। অঙাং ওইরিঙৈ মতমদগী লৈবাক খুন্নাইগী থবক থৌরমদা মায়পুননা শরুক য়ারকই। ৱার্করস য়ুনিয়ন, মণিপুর (ৱুম) গী প্রসিদেন্ট ওইরম্মী।

অঙাং ওইরিঙৈগী মতমদগী ইববু পামজনা হৌরকখিবা অইবা অসিনা ইবা ৱারীমচা ‘ইঙাগী’ হায়না মিংথোনবা অসিদা পেট্রিওটিক রাইটর্স ফোরম, মণিপুরনা পীবা ‘আর খথিং তাংখুল লিটরেরি এৱার্দ, ২০০৯’ ফংখ্রে। ইং কুমজা ২০১৫ দা ক্লব অসিগী বেন্নর মখাদা ইহান হান্না ফোঙখিবা অইবা অসিগী অহানবা ৱারীমচাগী লাইরিক বোমদুনা পোকখায়খ্রবসু অসিদসু মণিপুরী সাহিত্য পরিষদ, ইম্ফালগী ৮৪ শুবা চহীগী থৌরমদা ‘য়ূম্নাম লালা অমসুং বিধুমুখি নীংশিং মনা, ২০১৯’ ফংখ্রবনি।

ইং কুমজা ২০১৬ তা সাহিত্য অকাদেমি এৱার্দ ফংখ্রবা ৱারীমচা ইবা মোইরাংথেম রাজেনগী ইং ২০২২ দা ফোঙখিবা ৱারীমচাগী লাইরিক মৈৱায়রক্লিবা নুমিদাংৱাই অমসুং অতৈ ৱারীশিং দা মণিপুরগী তোঙান-তোঙানবা সাহিত্যগী লূপশিংনা পীবা খোরিরোলগী মনা অনী ফংবা ঙমখ্রে। মনাশিং অদুদি—১) য়াইরিপোক থম্বালনু সাহিত্য লূপ, য়াইরিপোকনা পীবা ‘মাইবম মঞ্জুরী নীংশিং সাহিত্য মনা, ২০২৪’, ২) পব্লিক লাইব্রেরি ময়াং ইম্ফালনা পীবা ‘পব্লিক লাইব্রেরি লিটরেরি এৱার্দ, ২০২৪’ নি। লাইরিক অসিদা মণিপুরী সাহিত্য পরিষদ, ইম্ফালনসু ‘যামিনী সুন্দর গুহ গোল্ড মেদল, ২০২৪’ পীরগনি হায়নসু লাউথোকখ্রে।

অইবা অসিগী ইং ২০১১ দা ফোঙখিবা চেপথরবা ঈশিংপুন মিংথোনবা অনীশুবা ৱারীমচাগী লাইরিকসিদা মণিপুর সাহিত্য সমিতি, থৌবালনা ইং ২০১২ দা ‘অকোইজম চাউতোন রাজকুমারী মুক্তীসনা নীংশিং সাহিত্য মনা’, সাহিত্য সেবা সমিতি, ককচিংনা ইং ২০১৪ দা ‘সুরলতা পুরুস্কার এৱার্দ’ অমসুং সাহিত্য একাদেমী, ন্যু দিল্লীনা ইং ২০১৬ তা ‘সাহিত্য অকাদেমি এৱার্দ’ পীরকখ্রবনি।

মোইরাংথেম রাজেন ইং ১৯৫৯ গী জানুৱারী তাং ২৭ তা ককচিং ময়াই লৈকায়দা পোকই। অপোকপগী মিংনা মোইরাংথেম কোকঙাং অমসুং অপোকপীগী মিংনা মোইরাংথেম ওংবী রজনি দেবী কৌই। মাগী মথক্তা মচে মরি অমসুং নুপা অনী লৈরি। হৌজিক ককচিং নিংথৌ লৈকায়দগী মোইরাংথেম ওংবী জমুনাগা য়ূম্বানবগী লম্বীদা খোঙদামিন্নদুনা মচানুপী অমা, মচানুপা অমা লৈরে।

1. The Alchemist by Paulo Coelho

2. The Name of the Wind by Patrick Rothfuss

3. The Secret Life of Bees by Sue Monk Kidd

4. The Kite Runner by Khaled Hosseini

5. The Da Vinci Code by Dan Brown

6. The Pillars of the Earth by Ken Follett

7. The Road by Cormac McCarthy

8. The Time Traveler's Wife by Audrey Niffenegger

(লৌথোকফম: ইকোনোমিক্স টাইম)

ইং কুমজা ২০২২ গী মণিপুরী লোলগী সাহিত্য অকাদেমি যুব পুরস্কার নহা ওইরিবী ফিক্সন রাইটর সোনিয়া খুন্দ্রাকপমনা ফংখ্রে। চহী খূদিংগী সাহিত্য অকাদেমিনা শক খঙলবা ইন্দিয়াগী লোল ২৪ গী মশাগী চহী ৩৫ ফাওবগী মনুংদা লৈবা নহা ওইরিবা অইবশিংবা পীবা মনা অসি মণিপুরী লোলগী ওইনা সোনিয়া খুন্দ্রাকপমনা মহাক্কী লোয়ুম্বা মিংথোনবা নোভেল অসিদা ফংখিবনি।

ইং কুমজা ১৯৮৮ গী মার্চ ১ দা পোকখিবী সোনিয়ানা কম্প্যুটর এপ্লিকেসনদা বেচেল্লর দিগ্রী ফংলবসু মহাক্কী অঙাং ওইরিঙৈদগী পামজরকখিবা ইবগী লম্বী অসিদগী নাথৈখিবা তৌদনা লাকখিবগা লোয়ননা মহৌশাগুম হায়না মিংথোনবা নোভেল অমসু মমাঙথক্তা ফোঙখিবা লৈখ্রবনি।

লোয়ুম্বা হায়রিবা নোভেল অসিদা সাহিত্য অকাদেমি, ন্যু দিল্লীনা ‘সাহিত্য অকাদেমি যুব পুরস্কার’ পীবগী ৱারোলদা অসুম্না হায়রি: “Loyumba is a valuable work of fiction in contemporary Manipuri literature. The novel demonstrates the high level of sacrifice and creates such a situation that makes the readers experience the sublime. The absorbing lyrical pattern and the impressive use of phrases and idioms added to the richness of the novel. The author’s excellent plot construction, chiselled characterization, fertile imagination, deep sensibility and elegant sense of beauty make the novel a mesmerizing read. As such, Sahitya Akademi is happy to confer its Yuva Puraskar in Manipuri on Sonia Khundrakpam for her novel, Loyumba.”

সে: নং: নোভেল মমিং অইবা ফোঙখিবা চহী

1 The Daughter of Time Josephine Tey 1951

2 The Big Sleep Raymond Chandler 1939

3 The Spy Who Came

In From the Cold John le Carre 1963

4 Gaudy Night Dorothy L. Sayers 1935

5 The Murder of Roger Ackroyd Agatha Christie 1926

6 Rebecca Daphne du Maurier 1938

7 Farewell My Lovely Raymond Chandler 1940

8 The Moonstone Wilkie Collins 1868

9 The IPCRESS File Len Deighton 1962

10 The Maltese Falcon Dashiell Hammett 1930

হৌজিক্কী মতমদা এদভেঞ্চরগী ওইবা লাইরিকশিং অসি মীয়াম্না খ্বাইদগী অসি খ্বাইদগী পাম্নবা লাইরিকশিংগী মনুং চল্লক্লে। মালেমগী ওইনা খ্বাইদগী মমিং চৎলিবা এদভেঞ্চরগী লাইরিক খরগী মমিং পীজরি—

1. Treasure Island by Robert Louis Stevenson

2. The Call of the Wild by Jack London

3. The Hobbit by J.R.R. Tolkien

4. Around the World in Eighty Days by Jules Verne

5. The Lion, the Witch and the Wardrobe by C.S. Lewis

6. Hatchet by Gary Paulsen

7. Harry Potter and the Sorcerer’s Stone by J.K. Rowling

8. Percy Jackson & The Olympians: The Lightning Thief by Rick Riordan

9. The Adventures of Tom Sawyer by Mark Twain

10. Moby-Dick by Herman Melville

11. Into the Wild by Jon Krakauer

12. The Count of Monte Cristo by Alexandre Dumas

13. The Three Musketeers by Alexandre Dumas

14. Robinson Crusoe by Daniel Defoe

15. The Lost World by Arthur Conan Doyle

16. King Solomon’s Mines by H. Rider Haggard

17. The Little Prince by Antoine de Saint-Exupéry

18. Journey to the Center of the Earth by Jules Verne

19. The Jungle Book by Rudyard Kipling

20. Life of Pi by Yann Martel

হৌখিবা দিকেদ খরা অসিগী ওইনা মালেমগী ওইনা থোইদোক হেন্দোক্না ৱারীমচা ইবী অমা ওইনা শকখঙনখিবা অমসুং নোবেল লোরেট এলিজ মুনরো চৎলিবা চহী অসিগী হৌখিবা মেগী তাং ১৩ দা লৈখিদ্রে।

ইং কুমজা ১৯৩১ দা পোকখিবী, মশাগী চহী ৯২ শুবা মতমদা তাইবংপান থাদোকখিবী অইবী অসি ইং কুমজা ২০১৩ দা খোরিরোলগী নোবেল প্রাইজ ফংখিবনি। অইবী অসিগী মফমদা নোবেল কম্মিটিগী মায়কৈদগী থমখিবা মরুওইবা ৱারোল অমা হায়বা তারবদি, “মাষ্টর ওফ দি কন্টেম্পোররি শোর্ট ষ্টোরি” হায়বসিনি। অইবী অসিনা ফংখিবা অতোপ্পা শীংথানীংঙাই ওইরবা মনা-মথুমশিংগী মনুংদা—ও হেনরি এৱার্দ (২০১২), মেন বূকর ইন্টরনেসনেল প্রাইজ(২০০৯) নচিংবসু পনবা য়াই।

লৈখিদ্রবা অইবী অসিগী পনবা য়াবা ৱারীমচাগী লাইরিক খরদি—Dance of the Happy Shades (1968, winner of the 1968 Governor General’s Award for Fiction), Lives of Girls and Women (1971, winner of the Canadian Bookseller’s Award), Who Do You Think You Are? (1978, winner of the 1978 Governor General’s Award for Fiction), The Progress of Love (1986, winner of the 1986 Governor General’s Award for Fiction), Friend of My Youth (1990, winner of the Trillium Book Award), The Love of a Good Woman (1998, winner of the 1998 Giller Prize and the 1998 National Book Critics Circle Award), Runaway (2004, winner of the Giller Prize and Rogers Writers’ Trust Fiction Prize) নচিংবনি।

ঙসিগী মালেম অসিদা সাইন্স ফিক্সন অসি খোঙজেল য়াংনা চাওখৎলক্লিবা খোরিরোলগী জোন্নর অমনি। সাইন্স ফিক্সনগী মরুওইবা হেনগৎলকপা অমসুং মালেমগী মীয়াম্না পাম্নবা হেল্লকপা অসিনা মরম ওইরগা ঙসিদি য়ুএসএদদি ‘সাইন্স ফিক্সন’ খক্তগী ওইবা নুমিৎ অমা ফাওবা থম্লদুনা সেলেব্রেট তৌবা হৌরক্লে। চহী খূদিংগী জানুৱারিগী তাং ২ অসি য়ুএসএদা ‘নেস্নেল সাইন্স ফিক্সন দে’ হায়না পালন থৌরম তৌরি। হায়রিবা নুমিৎ অসিদা করিগীদমক পালন থৌরম অসি পাঙথোক্লিবনো হায়বা তারবদি, হায়রিবা নুমিৎ (জানুৱারি ২) অসি শক্নাইরবা সাইন্স ফিক্সনগী অইবা ইসাক অসিমোভ (Isaac Asimov) কী ওফিসেল ওইবা মপোক নুমিৎনি। নুমিৎ অসিদা হায়রিবা পালন থৌরম অসি পাঙথোক্ননবগী ৱারেপ অসিদা য়ুএসএগী সাইন্স ফিক্সনগী ফেনশিংনা কূপ্না খন্নরবা মতুংদা লেপ্নখিবনি। ইং কুমজা ২০১২ দগী চহী খূদিংগী লেপ্পা লৈতনা পালন থৌরম তৌরকপনা চৎলিবা চহী অসিগীসু হায়রিবা নুমিৎ অসিদা পালন থৌরম য়ুএসএদা পাক-শন্না পালন থৌরম পাঙথোক্নখি।

[ঐগী পুন্সিগী ইমাঙমক্তদা থোকখিবা উখিবা ৱারী অমখক্না কাউবা ঙমদনা নীংশিংবগী কল্লবা ঈরৈ অমনা ঐগী থম্মোয় হকচাংসিদা উরু‑উরু লৈশিন্দুনা ঙসি ফাওবা লৈরি। কাউবা ঙমদ্রবা থম্মোয় শোক্লবা ৱারী অসি ঙসিদি থম্মোয়গী পৌরোন হাংদোক্তুনা লীথোকচরি। মনীং তম্না পাইজখ্রসনু চেক্লা অমগুম, ফাজিন‑পুনশিল্লিবা পোনসিদগী। ঙসিদি ঐগী থম্মোয় লকানুংসে ইহাঙ হাঙহৌরসনু, মীকপখোল তাদ্রসনু। পূম্নমক্কী থম্মোয়দা শিন্নজরি। ]

চাউবীগী মপুরোইবদু মপান লমদগী লাকপা ময়াং সিফাইশিংনা নোংমৈনা কাপতুনা হাৎখি। চহী তরামরি তরামঙাগী মমাঙগী ৱানি। নোংমা চাউবীগী খুঙ্গং অদুদা অাইননা য়াখিদ্রবা লালহৌবা খূৎপু অমগা মপাল্লোমদগী লাকপা ফিরাং শেৎপা সিফাইশিংনা অঙকপা ফংনা নোংমৈ কাপ্নখি। মদুদা ময়াং সিফাই কয়া শিখি; খূৎলায় পায়বা লালহৌবা খরসু শিখি; খরনা নান্থোক্তুনা চেনখি। নোংমৈ কাপ্নবা অদু লোইখ্রবা মতুং ময়াং সিফাইশিং অদুনা চাউবীনা লৈরিবা খুঙ্গং অদুগী য়ূমথোঙ খূদিং চঙ‑চঙদুনা লালহৌবা লৈরিবরা হায়দুনা থিখি অদুবু খূৎলায় পায়বা লালহৌবদি অমত্তা ফাবা ফংখিদে। য়ূম য়ূমগী নহা ওইরিবা নুপামখৈ ময়াং সিফাইশিংদুনা ফাজিল্লগা থমখি। মদুদা চাউবীগী মপুরোইবসু য়াওখি। মতমদু চাউবী মচা অনী ফংজরবা মতমনি, নুপা অমা নুপী অমা। নৌনা য়ূম পানখিবনা থোইদোক্না মায়থোঙ হোংদ্রি, তরু‑তরুরি। চাউবীগী মপুরোইবসু অদুমঙায়, পাখঙ মাল্লি। ফারম্বা মীপূম খূদিংমক ৱাহং‑পাউহংনরগা মথং মথং সিফাইশিংদুনা থাদোক্নখ্রে অদুবু চাউবীগী মপুরোইবদি থাদোকপদা য়াওরক্ত্রে। চাউবী মিপাইবা হেনগৎলকখি। মচা অনীদু অমনা মনমদা পো অমনা শেগাদা পম, মপুরোইবা হল্লকপা ঙাইজখি। অহীংদা নোংমৈ কাপ্নখিবনি য়াহৌরকপদা নোংমৈ কাপ্না লোইরকপদা মপুরোইবা ফাজিনবিখিবনি, নুমিৎ অমুক তাখ্রে, মমশিল্লক্লে। নুমিদাংগী পূং নিপাল মাপল হেনখ্রে। অদু ফাওবদা থাদোরকখিদে। চাউবী য়াচঙলকপা সন্ধ্যাগী লাই থাউমৈ ফাওবদি থাল্লম্মী অদুবু নুমিদাংগী চাক‑ঈশিং থোং থাক্কনি হায়বদুদি কাউখ্রে। মপুরোইববু তেক্ত‑কায়হনবিদবা হায়দনা য়াচঙলকপদা লাই থাউমৈ থান্দুনা খুরুমজরম্বদগী ফনা থেঙলে, নোংয়ায় চবুক হায়রক্লে। পীক্লিবা মচা অনীদি ইশি শিনা তূম্লি। চাউবীদি তূম্নীংবা ফাওখিদ্রে। অহীং চূপ্পা ফমদুনা উংদুনা লৈখ্রে। ঙল্লিঙৈদা লৈকাইগী মচে‑মনেম খরা লাক্তুনা হংবিরম্বদুসু লোইনা হন্নখ্রে। থেঙলবা অহীংদুদা উন‑ৱাইমুক চীক্লবা মীৎকূপতুদা করিবু থোক্লবা খন্দুনা উংদুনা ফম্লিঙৈ, থোঙ্গালদা মী খরা চঙলকখিবগী খোঞ্জেল‑ওই করি‑ওই খরা তাখি। থংনবদা লৈবা হূইশিং খোংবগী খোঞ্জেলসু তপ্না তপ্না তারকই। কনাবু ওইরিগদবা খন্না চাউবী মূৎশি মূৎশিবা থাউমৈ লেন্টর্ন অমা পায়দুনা থোঙ পৌরোল হাংদোক্তুনা য়েংজৈ। অমম্বা মরক্তুদা মী খরা চঙলক্লি। মূৎশিরবা থাউমৈগী মঙালদুদা মশক্তি অমত্তা লাকশিনবা ঙমখিদে। সুম‑সুম চঙশিল্লকপনা শুমাঙ চুরিতাফম অসুম য়ৌরকপদদি খঙলক্লে—মাগী মপুরোইবদু সিফাই খরনা মখূৎ পুনশিল্লগা, মচীন্দা ৱা ঙাঙবা য়াদনবা ফিবুল অমা নম্লগা পুরকপদু। চাউবী মপুরোইববু উবদা হরাওজবা পোকখি অদুবু মীৎকূপতুদা খঙহৌদনা মিপাইজবা শরুক লিশিং লিশিং হেনগৎলকখি। তুংদা লেপ্লম্বা সিফাই অমনা শুমাঙ ময়ায়দুদা চিংথোকখ্রগা চাউবীগী মপুরোইবগী মকোক্তা নোংমৈনা নম্লগা মরোল লোনখি। চাউবীদি লোল্লিবা মরোলদু করিনো খঙখিদে, অদুবু চাউবীগী মপুরোইবদি মরোলদু খঙবরা খঙদবরা খঙদে মঙক অদু মানা হংলিবদু খঙদে হায়বগী মওংদা হায়খি। সিফাই অচৌবরা খঙদে অমনা অমুক চঙলক্লগা চাউবীগী মপুরোইবদা মকোক্তা নোংমৈ নম্লগা মরোল লোনখি। মপুরোইবনা খঙদে হায়দুনা মঙক হাইখি। চাউবীনা পাখৎচদুনা মপুরোইবগী মনাক্তা চঙশিঞ্জরুবদা সিফাই অমনা ইন্থোরক্তুনা চঙহনখিদে। মতমদুদা চাউবীনা পাখৎচনা “করিগী মাবু ফাবিরিবনো? মাদি লালহৌবা নত্তে, মাবু থাদোকপিরম্মু” হায়দুনা কপতুনা হায়জখি। তাবিখিদে। তাঞ্জাদুদা সিফাই খরনা চাউবীখোয়গী ইমুং‑মনুং থুংনা চঙদুনা করি করিনো কোয়থি থিরি। ঙাইহাক থিরবা মতুং মথং মথং থোক্নরক্লগা লোন্না মরোল লোন্নখি। চাউবীনা ৱা ঙাঙগে তৌজবদা ঙাঙহনখিদে। “চুপ‑চুপ” অমনা কল্লপ্না লাউখি। মতম ইকান কান্নদনা অতোপ্পা সিফাই অমা চঙশিল্লক্লগা চাউবীগী মপুরোইবদা পুল্লিবা মখূৎতু থাদোকপিখি; মচীন ফিবুল নম্লিবদুসু লৌথোকপিখি। চাউবী হরাওজখি মপুরোইববু থাদোকপিগদৌরবনি খঞ্জদুনা ‍‌“জাও জাও” হায়দুনা হায়বদু তাবদা। অদুবু খঙহৌদে সিফাইদুনা মপুরোইবগী মনাক্তগী খরা হেক লাপথোকখিবা মীৎকূপ্তা কদোমদগী কাপ্লকখিবা নোংমৈনো খঙখিদে চাউবীগী মপুরোইবদু নোংমৈ মরূ মশীং খঙদনা পাল্লগা লোংনা হাইথখি। চাউবীনা পাখৎনা চেনশিঞ্জখি। মপুরোইবনা অরোইবা মীৎয়েং অমদি চাউবীদা য়েংলম্বরা! চাউবী খঙজখিদ্রে! ৱাহৈ অমা ফাওবা হায়রমদ্রে! ৱা ঙাঙনীং ঙাঙনীংনা ঙাঙবা ঙমদনা মমীৎ উইশিনখ্রে। চাউবীনা মশাদা জ্ঞান লাকপদা লৈকাইগী পোৎলোইফম অমদা লৈকাইগী মীওইশিংনা মপুরোইববু পোৎলোইরম্লি। পীক্লিবা মচা অনীদু মমাদা ঙাথু‑থেংথুদুনা লৈরম্লি। অতোম্বী নুপীমচাদুদি মবূক লাম্বনা ওইরমাল্লে শিথ‑শিথদুনা কপ্লি। চাউবীদি কপসু কপখিদে ৱাসু ঙাঙখিদে। তপ্না থোকখ্রগা লৈকাইগী পোৎলোইফমদা মপুরোইবা পোৎলোইরিবা অদুগী মৈরী ৱাংনা ৱাংনা কাখৎলক্লিবদু চপ লেপতুনা য়েংলম্লগা তপ্না ফমথখ্রগা শোন্থাংননা কপখি, “কৈনো ঐনা তৌদৌরিসিবো পীক্লিবা ইচা অনীসিগা? কদায়দনো নঙনা চৎলিদুবো?” চাউবীদো থোইনা মখা তাখিদ্রে। মমীৎতু চুমদ্রিং মপুরোইবা পোৎলোইবগী মৈরী ৱাংনা ৱাংনা কারক্লিবদুদা অঙাওবীগা পাংখক ওইনা য়েংলি। চাউবীবু খঙবা লৈকাইগী নুপী অহল অমনা চাউবীগী পীক্লিবা মচানুপীদু পমদুনা পুরক্লগা থেমজিল্লকই, “চাউবী, অঙাংসি মবূক অমুক্তা পীথকপিয়ুসে, মবূক লাম্বনা লোইরবনি…।” অদুবু চাউবীদি তারিবরা তাদ্রিবরা খঙদে, খুম্বা কৌবদি লৈখিদ্রে। তিল্লম্লিবা অহল‑লমন খরনা চাউবীবু খঙবা চাউবীগা খরা হেন্না নক্নবা লৈকাইগী য়ূম্লোন্নবদা হায়বিখি, “অঙাংসি খরা মুন্না শেন্নবিয়ুকো মওং অমা তৌদৌরিহে!” খরনা ঙাঙনৈ, “মানবু নহারোল য়াওরমগনি হায়বদি থাজদেদা।” “য়াওবদুনবু হাৎলিবনি য়াওদ্রগবু হাৎলমগদ্রা? মাগা ফামিন্নখিবমখৈদি লোইনা থাদোক্লম্লিসিদি।” খরনা ঙাঙনবা ৱাদু তাবদা লৈকাইগী অহল অমনা মখোয় শীক্না হায়রকই, “কনাগুম্বা ফত্তবশিংনা পংহায় হায়জিনবিবা ওইগনি। ইমুং‑মনুং পুদুনা লৈজরিবা মানবু অদুগুম্বা থবক্তু কদায়দা চত্তুনা য়াওরুগদৌরিবা?” অশিবা থৱায়খক্তনি মাঙজবা! ঙসিগী তাইবংপানসিদা চাউবীগুম্বী কনাসু লৈজদ্রবী অমগী ৱাকৎ তাবিগদবা কনাসু লৈখিদে। চাউবীনসু ৱাকৎখিদে। চাউবীগীদমক ৱাকৎপিগদবা লৈকাইগী মীওই অমা ফাওবসু থোরকখিদে লৈকাইদুদা। নোংম‑নোংমা হৌখিবনা চাউবীগী মপুরোইবা সিফাইশিংনা নোংমৈনা কাপতুনা হাৎখিবগী ৱারী কাউনখি। সরকারনা করি থবক লৌখৎপিখিবা! নোংমা, শিবা নুমিৎকী নোংঙানবদা পুলিস লাক্তুনা মপুরোইবা মোর্গতা পুরুবা পোষ্ট মোর্টেম তৌখিবা অদুগী মতাংদা চাউবী নোংমতা থিজিল্লুখিদে। অপীকপা মচা অনীদুদি লংশেকপা য়াদবনিনা হিংননবা লান্থেংনরকখি। মপুরোইবনা হন্দোকপিরম্লবা মচাশিং নাউকোঞ্জদুনা। অফং অফংবা এন্সাং‑নাপী, মনা‑মশিং য়োন্দুনা তীক্তুনা কৈথেলদা, লৈকাইদা। ৱারবসু ৱানা হান্নদি মপুরোইবগা নোংমতা ওইরবসু মোমোন নোক্না লেনবা ফংজরম্বা পুন্সিদু ঙসিদি ওইদ্রে। লেপ্লু‑লেপ্লুবদা পংলেপ্তা লেপ্পা, চৎখি‑চৎখিবদা পংচৎতা চৎপা, য়েংলুবা অমদা মরম ইরৈ লৈতনা মীৎ কূনা য়েংদুনা হেক লৈথোকপা, অপীকপা মচাশিং অদুনা “ইমা ইমা” কৌরক্লগা হেক‑হেক জ্ঞান তারকপগুম্বসি মাবু উবা, মাবু খঙবা মী মখৈনা চিংনবা ঙাঙনবা হৌরকই। “চাউবীসি মওং অমা তৌদৌরিবরা করিনো?” চাউবী মচা অনীবু থাক্নবা কৈথেল চৎতুনা নোংমগী মনা‑মশিং অমা নৎত্রগা অমা লৈ‑য়োন্দুনা শেন্দোং খরদা ওইরসু ফংজনবা হোৎনরগা মচাশিংবুদি থাক্লি। মচা‑মমাগীদমক চাউবীগীদমক ৱাবিবা লৈকাইগী মী লৈতবসু নত্তে, লৈ। অদুবু করিসু তৌবিবদি ঙম্নদে ৱাহৈদনি। “হোৎনৌ হোৎনৌ, নুংঙাইত্রে হায়দুনা নচাশিংদু লংশেকউবা য়াবা নত্তে। নচা চাউবা ঙাইবা তাবনি…।” নুংশিবিবা কয়াগী ৱাদু চাউবী তাবদি তায় অদুবু নোংমতা হোয় হায়দুনা খক খুমখিদে। মহৌশাদগী চাউবী অহোংবা য়াম্না লাকখ্রে। কৈথেলদসু অদুমঙায় য়োল্লিবা পোৎতু লম্বী অচৎ‑অওক্তা খরা লৈবিখোদনা হায়বা কৌবা লৈতে। য়োল্লিবনি হায়দুনা থারিবা পোৎ খরদু মাঙদা খিল্লগা মীনা কয়ানো হংলগা খুম্বা, হংদ্রগা তোকপা। মসিনি চাউবীগী পুন্সি মহিং—মপুরোইবা লৈখিদ্রবা মতুং। চাউবীগীনি হায়বা শাগৈ‑নাতৈ, পারী‑পুরী, কনা অমনা লৈ হায়, কনা অমনা লৈতে হায়। অশেংবা খঙদে। মানা লৈরম্বনা ককৱাদনি হায়নৈ। মপুরোইবগী হৌরকফমসু মথোং খঙদে। মফমদুদা লৈরিবা ইমুংদুদা কদায়দগীনো অঙাং ওইরিঙৈদগী লাক্লগা থবক‑ইনখাং শূদুনা লৈরকখিবদগী চাননা মফমদুদা লৈরকখিবনি হায়। অদুদগী অমুক লৈখিদবনি। খ্বাইনা হায়বসি খরমখৈ হেক্তা চুমগল্লি। “চাউবীসি ঙাওগদৌরিবরা করিনো, শোয়দনা ঙাওদুনা চৎখিনিকো” হায়বগা তৌবগা চাউবীদু মচা অনীদু পুদুনা চৎখিবদগী য়ূমদা হঞ্জিল্লক্তবা নুমিৎকাসু য়াওখি হায়। মহাক্না য়ূমদা হঞ্জিল্লকখিদবদা কনানসু মাবু হংবিখিবা, থিজিনবিখিবা কনাসু লৈখিদে।

অপীকপা মচা অনীদুগা চাউবীদো ঐনা লৈরিবা খুঙ্গং অখামদা নোংমা সন্ধ্যা য়াচঙলকপা মতম অদুৱাইদা থুংলরে। ঐগী য়ূমমক্তদদি নত্তে, ঐগা য়ূম্লোন্নবা ইমুং অমদনি। ইতৈমা অমগী য়ূমদনি। তশেংবমক্তি চাউবীগী ৱারীসি মতাং অসিদগী হৌগদবনি। অদুবু অইবনা অপাবশিংদা নুংঙাইননবা খঙননবা মাগী মমাঙদা থোকখ্রবা থৌদোকশিংদু হান্না তমথোকচবনি। মথক্কী হৌখ্রবা ৱারীশিং চাউবীদগী ঐনা তপ্না তপ্না খঙহৌবনি। ইতৈমগী য়ূমদুদা চঙলক্তুনা চাউবীনা হায়জখি, “ঙসি অহীং অসিমত্তা লেঞ্জখিগে য়ূম য়ৌবদা খুদোং অমা চারোইদৌরে।” ইমুং অদুনসু হরাও হরাওনদি হেক য়ারগা ৱাহংদি লেপ্পা লৈতে। মপূং ওইনা ইমুংদুগী য়ূম্বুরেম্বীনা হংখি, “ইনাওবু করি লমদগীনো?” “ককৱাদগী।” “হৌজিক্না কদায়দা চৎলুবা?” “সনা লোকচাউদা চৎলুবনি।” “সনা লোকচাউদদি কৈদৌবা?” “চুম্না ইমুং অমদা শেল খরা থৌরুবনি।” চাউবীগী পাউখুম তারগা য়ূম্বুরেম্বীদুনা মখা তানা করিগী শেলনো, কৈদৌবদা লৌখিবনো হায়দুনা কূপথনা হংগদবসু চাউবীনা করি করি খনখিগদবা লৈবসু য়াই খন্দুনরা খঙদে, মখা হংখিদ্রে। থৈদোক্তুনা হংখি, “য়ূমদা মতম চানা হন্দ্রিবদুদি য়ূমগী মীশিংনা পাখৎনরম্লোইদ্রা?” “পাখৎলোইদা!” চাউবীনা ইতপ তপ্না খুম্মী। “ইচারা অনীসিনা?” য়ূম্বুরেম্বীদুনা মচা অনীদুদা য়েংলগা হংখি। “মান্নি।” “ইনাওগী মিংদি করি কৌই?” “চাউবী কৌই।” য়ূম্বুরেম্বীদু মখা তানা অতোপ্পা ৱাহং লৈতবগুম ঙাইহাক তূমিন্না লৈখি। অদুবু ৱাহং হংদনা মদোম মবূক্তা খঞ্জরিজাৎলা—‘অসুক নহা ওইরিবা মৌনহা অসিনা য়ূমদগী চৎথোকখ্রগা মনুং‑মতম চানা য়ূমদুদা হঞ্জিল্লক্তবদা য়ূমগী মীশিংনা ঙাঙবিরোইদ্রা, মৱা‑মপুরোইবনা ফুবি চৈবিরোইদ্রা?’ ঐদি করিসু হংখিদে। মতমদুদা ঐনদি করিবু হংলুনি। ঐদি পাখঙনি। অসুম্না ঙাইহাক মীৎকূপ অমা লাঙনরিঙৈ চাউবীগী মচানুপা অহলদুনা মমাদা লুরুক লুরুক য়েংলগা হংলকই, “ইমা ঐখোয় ঙসিনা সিদা লৈগদৌরিবরো?” “হোয়,” চাউবীনা খুমখি। অঙাং অমদি য়াম্না পীক্লি। চাউবীগী মনমদগী থাদ্রি। মমাদা ৱা হংজরিবা মচানুপাদুনা চহী মরি মঙাগুম্বা চঙলম্লদরা? য়ূম্বুেরম্বীদু মচানুপাদুগী মমাদা হংখিবা ৱাহংদুদা হাইফেৎ চিংনবা ফাওবা মানখ্রে। চিংনরিঙৈ চৈরক্তুদা অমুক মচাদুনা মমাদা হংখি, “ইমা ঙরাং ঐখোয়না লৈরুবা লমদো করি লমনো?” “নঙনা খঙঙোইদা!” চাউবীনা খুমখি। “ইমা মদুগী লমদুদি অমুক হন্না চৎকুমসি মী য়াম্না ফত্তে। য়ুঙাওবগী য়ুঙাওবা ঙাক্তা, ঐদি য়াম্না কিজৈ।” মচাগী ৱাঙাঙসি তারগা য়ূম্বুরেম্বীদু নুপীদুদা চিংনবগী মীৎয়েং অমা চীংদুম্মুক ৱাংনা ৱাংখৎলকপগুম য়েংলগা হংলকই, “ইনাও, নচানা হায়রিসিবু ঙরাংনা কনাগীদা লৈরুবগে?” “শেল থৌরুবা ইমুংদুদনিদা।” “শেলনা কয়া য়াম্বা? কৈদৌবদা লৌখ্রিবা?” “এন্সাং‑নাপী শোৎখিবগীনিদা?” “অদুবু লুপা কয়ানো?” “শেলবুদি য়াম্বা নত্তেদা, লুপা কুন্থ্রাখক্তনি।” “লুপা কুন্থ্রাখক্কীদমক” হায়রগা য়ূম্বুরেম্বীদু থোইনা ৱা মখা তাদনা চাউবীদা চিংননা য়েংদুনা লৈখি। থোইনা ৱা মখা তাখিদে। ঐসু খনখি। লুপা কুন্থ্রাখক্কীদমক ককৱাদা লৈবা মানা সনা লোকচাউ তান্না শেল তিংনা গাড়ি ভারা পুথোক্তুনা শেল থৌবা চৎলুরিবা। মহাক্কী মচানুপাদু কা হেন্না জ্ঞান মপূং ফাদনা সি তৌসি, সিনা তৌরোইসি হায়বা ঙম্না জ্ঞান তারবা অঙাং অমা ওইদ্রিবা মতমনি। তুংগী অফ‑ফত্ত লেপচবা ঙমখিরোই। অমরোমদা চাউবীগী ওইরিবা ফিভম অসি য়েংলগদি য়ূম্বুরেম্বীদুনা লান্নসু হেক উবা ঙমদবগুমসু তৌরি। ঐসুনি। ফিজেৎ‑চাকচা য়াম্নমক নানজদ্রগসু ময়ায় ওইনা তরু‑তনান্না শেৎ‑চারি। পুল্লিবা তুংগী শম্বুল হেন্না নীংথিজরি। থাদরক্লগদি নীংদু য়ৈগদবা শম্লাংনি। মমায় কোয়দানৈ, কুলৈ কুচুদগী খরা পান্থোকই। চাননা ঙৌই হায়বমক্তি য়াদ্রি। ঙারোই শাবাননি। থোইনা নেমদে থোইনসু ৱাংদে। মশা তনান তনাল্লি, রাশি লৈ, ফজৈ। হেক য়েংবদা নুপী হায়বদুদি মৌনহা হায়বদুদি সিনিদনা হায়বদুমক থোকই। চিংনবা পূম্বা ফাজিল্লগা য়ূম্বুরেম্বীদুনা চাউবীবু নীংথিনা মচাদু মতম্বাক্তা থাংথহন্দুনা ইল্লিবা ইনফি মতেক অদুনা মশা হাইফেৎ খঞ্জিঞ্জদুনা পীক্লিবা মচা অদুনা নিঙাই তৌরকপগা তাঞ্জানরুদুনা মবূক পীথকখ্রে। মচানুপা অহলদুনা ফক্তুদা খুউ লৈতারদুনা মমানা মচনবু মবূক পীথকপদু য়েংলগা লক্নদুনা শান্নজখ্রি। য়ূম্বুরেম্বীদু চাউবীগা হাইফেৎ মায়োক্ননা ফমদুনা চাউবীগী অশেংবা মশক খঙনবা তপ্না মথং মথং হংবা হৌরকই। “ইমা বাজিদি লৈরিবরা?” “অমত্তা লৈত্রে।” য়ূম্বুরেম্বীদুনা হংবা ৱাহংগী পাউখুম চাউবীনা তুবৎ তুবৎ পীবা নত্তনা, হেন্না হায়বা ঙাঙবগী ৱা অমত্তা লৈতে। “নপুরোইবদি করি হোৎনরি?” “মাসু লৈখিদ্রে।” ইয়াং য়াংবা পাউখুমদুদা য়ূম্বুরেম্বীদুনা হাইফেৎ ঙক্না হংখি, “কৈদৌবদা লৈখিদবা?” “সিফাইনা নোংমৈনা কাপতুনা হাৎখিবনি।” “কৈদৌবগী হাৎখ্রিবা?” “খঙদে।” তুবৎ তুবৎ খুম্বা পাউখুমদুদা য়ূম্বুরেম্বীদুনা মখা তানা হংলকই, “অদুদি নঙদি হৌজিক কনা কনাগা লৈরিবা?” “ইমা ইচাদা লৈ।” “কদায়দা?” “ইপুরোইবা লৈরিঙৈদদি ককৱাদা লৈরম্মী অদুদগী থাংমৈবন্দদা মতম খরা অমুক লৈরগা, সনা কৈথেলদসু অমুক মতম খরা লৈরুরে। মদুসু মী য়াম্না ফত্তে অদুনা শগোলবন্দ তেরা অসিৱাইদা অমুক লৈসিরা খল্লি। অদুবু মদুসু সিফাইগা নহারোলগা তাঞ্জা ঙাইনরগা নোংমৈ কাপ্নগদবগী লৈ হায়দুনা মীনা নিনফুং নিনফুং ঙাঙনরি। অখঙবা কয়াদি য়ূম থাদোক্তুনা চৎনবা ফাওবা য়াওই হায়নৈ। অদুৱাইদসু লৈবা কিরি, খঙদেদা।” চাউবীগী ৱাঙাঙ অমদি মচানা মমাদা হংবা ৱাহংশিং খূদিংমক্তগী য়ূম্বুরেম্বীদুনা চাউবীসি খ্বাইগা মান্নদবা জ্ঞান অমা মঙোন্দা য়াওরে হায়বা খঙলে। অসুক নহা ওইরিবা মানা করিদগী অসিগুম্বা ফিভম অসি ওইরকখিবনো হায়বদুদি হায়বা ঙমদ্রে, খঙলুবসু ঙমদে। মহাক্কীদমক য়ূম্বুরেম্বীদু মথৱায় ৱাবা হৌরকই। অসুক নহা ওইরিবী মহাক্না করম্না পীকখ্রবা মচা অনীসিগা হিংগদবা। কল্লক চাউরবা ঙসিগী মিহৌবতনা থল্লবা সমাজসিদা মাবু কল্লক্লোইদবদি তাইবংসিদদি তাঙগনি। অদুবু মাবু থেমদুনা ফাজিন্দুনা থম্বিরগে হায়বা ৱাখল অমা য়ূম্বুরেম্বীদুদা ফাওরক্তুনা হায়রকই। “নঙবু ঐখোয় স্বায়সিদদি লৈনীংদ্রা?” “লৈববু য়াগদ্রনে?” চাউবীনা ইতপ তপ্না হংজৈ। “করিগী য়াদনেগে। ইচেগী ইংখোল লমহাঙ অমা লৈ, মদুদা নমা‑নচা লৈগদবনি।” “মী তানদবা ইংখোলদা?” “থংনবা ইংখোলদি মীগী মী ঙাক্তনি, পোৎ‑চৈ থাবগী ইংখোল শঙবগী য়ূম মচা অমসু শারগা লৈ। মদুদা ওইনা লৈরোদনা। চাকখূম লৈরঙ ফমুংসু হান্না লৈ।” য়ূম্বুরেম্বীদুনা অদুম্না হায়রবদা চাউবীনা খুম্লকই, “মীদি ফবা নৎত্রো কৈসু তৌরোইদৌবা?” “কনানা কৈদৌনি হায়গে কৈসু তৌরোইদা।” অসুম্না চাউবী মমা‑মচাদু য়ূম্বুরেম্বীদুনা মখোয়গী ইংখোল লমহাঙগী য়ূম মচাদুদা থম্বিরে। চাউবী মমা‑মচাদু য়ূমদুদা নীংথিনা লৈজরে। ইংখোল লমহাঙ হায়জবগী ৱানি, থংনবা ইংখোলশিং য়ূম লোইনা তানবা ঙাক্তনি। হায়রিবা ইংখোল অদুখক্তদা য়ূম অনী শুদে হায়বখক্তনি। চাউবী লৌবূক্তগী পেরুক‑কেঙোই হেক্লগা কৈথেলদা য়োন্দুনা, করিগুম্বদা লৈকাইদগী এন্সাং‑নাপী খোমদুনা তীক্লগা কৈথেলদা পুরগা য়োল্লগা মচাশিংদু থাকচৈ। নোংমনা কনা কনাগুম্বশিংনা লৌ খুলং থাবিরক্তুনা খুলংসু শূরুই। মদুগুম্বশিং অদুদগী ফংলকপা শেলফম্না চেঙ‑চাক ঙারী‑থুম পুজদুনা মচাশিংদুবু থাকপা ঙম্নবা হোৎনজৈ। খূদিংমক ওইজদুনসু মঙোন্দা খ্বাইগা ইমান মান্নদবা অমদি অদুম য়াওরে। য়ূম অমা পানবদা চঙবা চফূ‑উয়ান, পূখম‑তেঙ্কোৎ অয়াম্বদি য়ূম্বুরেম্বীদুনা ঙম্না পীবিখি। চাউবীনা কৈথেল চৎখিবা মতমদা মচাশিংদু য়ূমথংনবা লৈকাইগী মচে‑মনেম, লৈশাবী মচাশিংনা শেন্নবিহৌই। মমা হল্লক্লগা মমাদা শিন্নবিরুই। চাউবীগী মচা অতোম্বীদুসু কাফৈ‑কাফৈ চৎপা ঙম্লক্লে। য়ূম্বুরেম্বী নুপীদুনসু মরক মরক্তা লাক্তুনা চাউবী মমা‑মচাগী অৱাৎ‑অপা হেক হেক য়েংশিনবিরুই। নোংমা চাউবীনা কৈথেল চৎখ্রিঙৈ য়ূম্বুরেম্বীদুনা মচাশিংদু করি কমদৌরি হায়দুনা য়েংশিনবিরুবদা মচা অনীদু লাঙদুনা শান্নরম্মী। “নখোয় নচীন‑ননাও শান্নরিবরা?” “হোয় মাচৌবী,” খরা চাউবা মচানুপাদুনা খুম্মী। “নমা হল্লক্ত্রিবরা?” “হল্লক্ত্রি।” “চৎথোক্কনুকো, লমজাও সোরোক্তগা থোক্কনু। গাড়িনা শোক্কনি, নচলনুপীসি পূখ্রিদকা তা লাক্কনি, নীংথিনা শেন্নৌকো সোমো।” “হোয় মাচৌবী।” “সোমো নখোয়বু ঐখোয় স্বায়দা লৈবসিবু নুঙাইবরো?” “নুংঙাই,” চাউবীগী মচানুপা সোমোনা য়াঙনা খুম্লকই। “ঐখোয়গীসিদা লৈত্রিঙৈদদি নখোয় কদায় কদায়দা লৈরুরে?” য়ূম্বুরেম্বীদুনা মখোয়গী মরমদা খরা হেন্না খঙনীংদুনা থৌদুনা হংবা ৱাহংনি। “কদায় কদায়দনো পংলৈদা লৈদা। ঐখোয় ইমানা পংপুদা পুই, অমুক্তা মফম অমদা কুইনা শুক্লৈ লৈরক্তে।” অঙাংদুগী ৱা তারগা য়ূম্বুরেম্বীদুনা মবূক্তা মদোম খল্লকই—চাউবীনা অঙাংশিংসি পুদুনা কোয়চৎ চৎলুরবজাৎনিদনা। ঐনা মমা‑মচাবু নীংথিনা ফাজিন্দুনা থম্বিরিবসি ওন্থোক্না ফখ্রে। করিগুম্বা ঐনা ফাজিন্দুনা থম্বিরমদ্রবদি মথোঙ‑মরম খঙদনা পঙচৎ চৎখিদুনা অঙাংশিং লোইনা মাঙলমগনি। হয়েং মচানুপাসিনা চাউরক্লগা স্বায়দা ইংখোল মচা অমা লৈবিরগা লৈতানা লৈহনবিরগা লোইরে খঞ্জখি। নোংমদি চাউবীনা য়ূম্বুরেম্বীদুদা হায়, “ইচে ঐ হোটেল ওইনা ফম্মগেদো?” “শীৎলোইদা চাউবী” চাউবীগী মতৌদুদা কনানবু লৈদুনা চাবিগদগে খন্দুনা য়ূম্বুরেম্বীদুনা থৈদোক্তুনা খুমখি, “মীনা অনি মতেকখক তারগা!” “কৈদৌবগী শীৎলোইদৌরিবা স্বায়দদি হোটেলসু অমত্তসু ফমসু ফমদনা,” চাউবীনা খুম্মী। “অদুবুদি চুম্বা! অদুদা হোটেল ফম্বা তারবদি তঙাইফদনা হোটেল শঙ মচা অমসু শাদবা য়ারোইদো, অদুগী শরুক নঙগী এন্সাং‑নাপী থিরগা থোংবদু অদুম তৌবনা ফনিদা।” “অদুদা ইচে নহা ওইরিবা ঐনা হঙ্গৎ‑হন্দা নুংতিগী চৎপদো মীনা মীৎয়েং চাউই অদুগী ৱানি।” “নঙদা চাউরুনু কনাসু চাউরোই।” “ইচা অপীকপশিংসি নুমিৎ চূপ্পা হুনজেক হুনজেক্তুনা চৎপদুসু নুংঙাইতে।” য়াদদুনা চাউবীনা ঙমদুনা হোটেল ফম্লে। শঙগা শাদুনা ফম্বা হোটেল নত্তে। সোরোক্কী মতাইদা পাকখন অমা খল্লগা লূকমায় খিন্দুনা অচা‑অথক মখৈনা মানা লৈজরিবা য়ূমদুদগী থোং‑ঙৌরগা পুথোক্তুনা য়োনবা হোটেল খূৎফমনিনা কনা কনাগুম্বশিংনা চানীংনা লৈদুনা চাবসু অদুম ময়াওই। কনা অমনা মসিগী নুপী অসিনা থোং‑থাকপবু হায়দুনা লৈনদবসু কোঙ্গায়নি। চারুবা কনাগুম্বশিংনা “মতৌদি ইমান মান্দে থোং থাকপদি ফনবু হৈ” মহায়নৈ। অসুম্না চাউবী মমা‑মচা অমুক হিংই মতম খরা। নোংমা নুমিদাং অমনি। মতমদু পংথেঙসু থেঙদ্রি, পংঙনসু ঙন্দ্রে মরক হায়বদুনি। পূং মাপলমখায় তরা তারকপা অদুৱাইদনি চাউবীনা “লৈকাই লৈকাই হূরানবা চঙঙে হূরানবা চঙঙে” হায়দুনা কন্না লাউরকপদু। চাউবীগী খোঞ্জেলদু তাবদা অতাবা কৈরোই‑লৈকাইগী মী কয়া “কৈদৌরে কৈদৌরে” হায়দুনা চেনশিন্নরকপদা নুমিৎ চূপ্পগী য়ূদা ঙাওদুনতা লৈবা মোহোন য়ু ফুলদা ঙাওরগা লৈরম্মী। মশা ফাওবা চুম্না লেপচবা ঙমজদ্রে। মদুদা ময়াম্না হংই, “মোহোন, নঙদি মফমসিদা কৈদৌরম্মিবা?” মোহোননা করিমত্তা নীংঙাইদনা ৱা ঙাঙবা ঙম্বোই ঙমদবোই খুম্লকই, “কৈগীনো ময়াম লাকপিরিসিবো। ঐদি চুম্না চাউবীনা হোটেল ফম্বদুদা চাক্কা চারুনবা কাংহৌ বোরা খরা লৈগে হায়দুনা চঙলকপনি। ঐ কৈসু তৌদেনা।” ৱাদু তাবদা চাউবীনা ময়াম মাঙদা খুমজৈ, “চুম্মী, নুপা অসিনা কাংহৌ‑বোরা লৈগে হায় অদুবু ঐনা ঙসিগীদি লোইথোকখ্রে, হয়েং ওইনা লৈবিরুলাকও থাউসু লোইথোকখ্রে হায়জরুবদা নুপা অসিনা ঙসাই হৌনরম্বগী খাং মনীংদা পকপা খরদা ওইরবসু লৈরমগনি মদুদা হৌরকউ সিনি।” চাউবীগী ৱাদুদা মোহোননা “চুম্মী চুম্মী ঐ হায়” হায়দুনা ময়াম মাঙদা খুম্মী। চাউবীনা মখা তানা ময়ামদা হায়জৈ, “মতমদুদা ঐনা ৱারৌবিরনু হয়েং ওইনা মরাং কায়না লৈবিরো অঙাংশিংসিসু চাক‑ঈশিং অমত্তা চাদনা লোইনা তূমথনখ্রে। অঙাংশিং হৌদোক্লগা চাক ঈশিং পীজনবা তৌজগে হনবিখ্রো হায়দুনা থোঙ লোনশিঞ্জগে তৌবদা নুপা অসিনা থোঙ লোনবা য়াখিরোই ঐদি কাংহৌ বোরা লৈখিগদৌরিবনি হায়দুনা থোঙসি কাওখায়রকপনি।” চাউবীগী ৱাদু অচুম্বা ওইবনা খ্বাইনা য়ু ঙাওবা মোহোনগা মান্ননীংদ্রদুনা মোহোনবু থেম্লগা চৎখিনবা হোৎনরকই। “মোহোন, চৎলো চৎলো মাগীসি ঙসিগী হোটেল কাংহৌ বোরা লোইথোকখ্রেয়ে হয়েং ওইনা লৈরো।” মতমদুদা মোহোননা য়ু ঙাওবগী হৌনবী “ঐদি পোৎ লৈদ্রিমখৈ হল্লোই করি ঐবু হূরানবা তাহনবা” হায়দুনা মোহোনদু শিখাং খাঙদুনা লৈখি। কনানসু য়ুঙাওবা মোহোনগা মান্ননীংদে। তাঞ্জাদুদা অহল নুপী অমনা তপ্না মোহোনদা থেম্মী, “ইবুংঙো মোহোন, হল্লোসে চাউবীগীসি ঙসিদি হোটেল থোঙ লোল্লেয়ে, হয়েং ওইনা লৈরো।” ৱাদুদা মোহোন হেন্নদুম শাউগৎপগী মওংদা লাউনা হায়রকই, “য়ারোই, পীদবা শুকয়া য়ারোই হায়রিসিনি। করি ঐবু হূরানবসু তাহনবা।” খরা নহা অমা চঙশিল্লক্তুনা, “মীনা ঙসিগী কাংহৌ বোরাদু লোইথোকখ্রে হায়রদি লোইখ্রেদনা। হৌজিকপু হোটেল হাংবা মতমলা হা!” হায়দুনা ধপ তৌরক্লবদা মোহোননা, “ফৈ‑ফৈ, মোহোন ঐনা পোৎ লৈগে হায়বদা পীদ্রবা! ঐবু হূরানবা তাহল্লবা! লৈকাইসিদা কনা অমত্তা হয়েংদগী হোটেল ফম্বা য়ারোই, ঐনা য়ারোই হায়রিবসিনি” হায়রম্লগা মোহোন হাইরং হাইরং চৎখ্রে। চৎনা চৎনা লাউরমখি, “ঐনা হায়রিসিনি। ঐগী অয়াবা য়াওদ্রবা কনা অমত্তা হয়েংদগী লৈকাইসিদা হোটেল ফম্বা য়ারোই। য়ারোই হায়রিবসিনি।” মোহোননা চৎখ্রবদা ময়াম অমসু অমসু মুরুম‑মুরুম শোন্নদুনা ঙাঙনরকখি, “করিনো তাদা গোবনখোয়না তৌরিবসিবো। ইংখোল লমহাঙসিদা কদায়দগীনো মথোং খঙদবী মৌনহা অমা পুশিল্লগা থমজিল্লিসিবু। নিয়ম চুমদেদা ৱাথোক য়াম্নবা।” অহল খরনসু হায়নখি, “নিয়মবুদি চুমদ্রবনি।” নুমিৎতুগী থৌদোক্তু লোইশিনখ্রে। মতুংদদি নোংমতা চাউবীদু হূরানবা চঙঙে হায়দুনা লাউরকখিদ্রে। মরক মরক্তা মোহোননা য়ূ ঙাওরকপা খূদিংগী চোইরোল লোনবদা ময়াম্না তানৈ, “ঐনা য়াদ্রদবু কদায়দগী মসিগুম্বনা হোটেল ফম্বা ঙমগদগে। ঐনা য়ারবকান্দদা ফমগদবনি।” চাউবী ঙসিসু হোটেল ফম্লি। করিগীনো খঙদে চাউবীদু হোটেল ফম্বা হৌরকপদদি ৱাবু খরা দ্রো‑দ্রো ঙাঙজরম্বনি। অদুবু হৌজিক্তি কয়া ঙাঙখিদ্রে। মতমগী খোঙচৎ মতুংইন্না চাউবীগী পুন্সি খোঙচৎসু তপ্না তপ্না হোংলকই। চাক‑ঈশিং থোং থাকপসি মতম অমদদি ফনা তরু‑তনান্না থোং থাক্লম্বনি অদুবু হৌজিক্তি চাক্কা এন্সাংগা চফূ অমত্তদা পূন্না থোংজিনবকাসু য়াওরকই। হংলুরগসু “কৈদৌরুগনোদা শীংনগা শীং লৈতবগা, অতোপ্পসু য়াওবা নত্তবা ইমা‑ইচা ঐখোয়খক্তা চাগদবসিবু” হায়দুনা ইতিং তিংনা খুমদোরকই। চাউবীগী লীচৎ হান্নদগী হোংলকপা মতৌসি হায়দনা কান্নদ্রে, য়াম্না হোংখ্রে। হোটেল ফম্বা তোকখ্রে। কৈথেল খরা খরা চৎলম্বদুসু হোটেল ফম্লুবদগী চৎখিদ্রবনি। শূ‑নোমদুনা মচা থাক্কনি হায়বগী ৱাখল ফাওবা মশাদা ফাওরক্তবগুম তৌরকখি। ফনা তরু‑তনাল্লম্বা শকফমনি অদুবু ঙসিদি মশা ফাওবা শেংনা ইরুজ‑মায়থজগনি হায়বা ফাওবা কাউথোকপগুম তৌরক্লে। ফূগায়না শাৎলম্বা লৈরাংনা লৈশাৎ লোইরদুনা লৈমন চনশিল্লকপগুম চাউবীগী পুন্সিবু লৈমন চনশিল্লক্লবরা? নীংথিনা লৈশাৎ তম্লিঙৈ কনাগুম্বশিংনা হেক্তুনা খরায়থক্তা হাপতুনা মপুগী খূয়াখাদা কৎপদা য়াওবা ফংজখিদ্রবা লৈরাংগা পাংখক্নরবরা? নৎত্রগা কল্লক চাউবশিংনা নীংথিনা নাপ্পদদি চিনবিদ্রদনা ফজবা লৈরাংগী লৈনাশিং মতৎ মতৎ থদৎতুনা শান্নবিরবা লৈরাং লৈখোক লোইদুনা কেল্লবা লৈরাংগা পাংখক্নরবরা? ৱাহং চাম্মা চাম্মা ইদোম হংলকই। খঙদে হোংবদি য়াম্না হোংখ্রে চাউবীগী পুন্সি খোঙচৎ। চাউবীবু খঙবা অমদি নুংশিবিবা কনা কনাগুম্বশিংনা হায়বি, “চাউবীসি শোয়দনা সোরোক থোক্লক্কদবা মাল্লি। ফরেনে, মাবুদি সোরোক থোকচখ্রসনু পীক্লিবা অঙাং অনীসিদি কনবিবা চুম্মী।” ঙাঙনরিবা খন্নরিবা খ্বাইগী মরক্তা পূকচেল চাউবা চাউবী কয়ানা অঙাং অনীদুবু মচা শক্না য়োকচনীংবা য়াওদবসু নত্তে। নোংমদি খুঙ্গং অসিদা লৈবা মচানুপা য়াওজদবা নিঙোল ঙাক্তা পোকপা নুপা অমখক্না চাউবীগী মচানুপাদু মচা শক্না য়োকচরগে হায়দুনা ময়ামদা হায়জৈ। করিগীদমক চাউবীদদি হায়দ্রদুনা নুপাদুনা লৈকাই মীয়ামদা হায়জরুরিবা হায়বদুদি পাবিরিবা খ্বাইনা লেপ্পিবা তারে। হায়জৈ হায়দুনসু মীগী মমাগী মথানুংদা কোল্লিবা মচাবু করম্না চিংথোক্তুনা সে লৌজরোসে হায়দুনা পীবা ঙমগনি। মদু কনাগীসু মতিক ওইগদবা নত্তে। খরা লৈরগদি মী খরনা চাউবীগী পীক্লিবা মচানুপা অহলদুদা অসুম্না হেক হায়জিনবিরে, “সোমো নখোয়বু নমা অসিনা মফম খূদিং কোয়পু পুদুনা চৎলিবসে নখোয়বু লৈগে হায়বা কনাগুম্বা অমদা য়োন্থোক্কদৌবগী পুরিবনি, নখোয়বু চুরান্থাবদা য়োন্থোক্লগা থোং শাবদা হাপ্নখিগদৌরিবনি অদুনা নমা উদ্রিঙৈদা মসিগী মচানুপা পোকচদবা ইমুংসিদা ঐ নখোয়দা লৈজরগে হায়রু।” মদুদা অঙাংদুনা মমা চাউবীগী মতৌদুগা জ্ঞান মপূং ফাদ্রিবা অঙাংগা ওইবগা থাজরদুনা ইমুং অদুদা, “ঐ ঙসিদগী নখোয়দা লৈজরগে, ঐবু ইমা চাউবীনা চুরান্থাবদা য়োন্থোক্লগা থোং শাবদা হাপ্তোকহনবিদৌরে” হায়দুনা চঙশিন্দুনা লৈখ্রে। ইমুংদুগী মীপূম খূদিংমক্না অঙাংদুবু মখোয়গী মচাদা মচাগুম কোনশিনবিখ্রে। চাউবীনা মচাবু হংজরকপদা খঙদে উদে লাক্তে হায়দুনা অদুম লোৎখ্রে। অঙাং অদুনসু মমা চাউবীনা উদনবা লোৎ লোৎনা চেল্লে মমা হেক লাকপগা। অসুম্না চাউবী মচা অমা কায়নরে। খোমজিংলিবা মচা অতোম্বী অদুখক চাউবীনা নাউকোনজরি। নুমিৎতু চাউবী পেরুক কেঙোই খরা য়োল্লুগনি হায়দুনা মচা অতোম্বীদু পুরগা চৎখিবদগী হল্লকখিদে। মাবু কনানা থিবিরুনি। থিবিনবা কনাসু লৈতে। থা অনীমুক লৈরগা চাউবীদু মচাদু পুরগা অমুক লাকখি। মদুদা য়ূম্বুরেম্বীদুনা হংই, “চাউবী নঙদি নহানমখৈ কদায়দা চৎলুরে?” “পংচৎ চৎলুরে ইচে।” থোইনা মখা তাখিদে। চাউবী হান্নদগী হেন্না ফিভম শোক্লে। মশম‑মনা ফাওবা হাৎতোক‑খোৎতোক্কনি হায়বগী ৱাখল ফাওবা লৈতবগুম্লে। মদুদা য়ূম্বুরেম্বীদুনা খল্লি—‘চাউবীসে চাননা ঙাওরেদনা।’ খরা লৈরগদি চাউবীদু “চাউবী চাউবী” হায়নরম্বদগী “চাউবী অঙাওবী” হায়দুনা খ্বাইনা হায়নরকখি। থাঙ্গৈমকশেংনসু চাউবীসে ঙাওবা হায়বদু ওইরে। চাউবী অঙাওবী লাকএ তাবদা চাউবীগী মচানুপাদু মমা উদনবা হেক্তা লোৎখি। কনানসু মঙোন্দা নঙ নমা লাকএ লোৎখরো হায়রুবসু লৈতে। অঙাং ওইবগী হৌনবা মমানা মখোয় য়োন্থোক্নবা কোয়পু পুরিবনি হায়বদুদা তৌরিবরা? মমা লাকই তাবদা হেক্তা চেনখি। মমা উদনবা হেক্তা লোৎখি। কনাগুম্বা খরনা চাউবীগী মতৌ য়েংনীংদুনা লক্নবোই হংবি, “চাউবী নঙগী নচানুপাদুদি?” “মীনা মুনবিখ্রে মখোয়সি মিনুংশি য়াম্না লৈতে।” চাউবীনা ইতিং তিংনা খুমখি। ৱাহৈদুদদি মথম্মোয় শোকপা ৱাহৈবুদি মাল্লি অদুবু কা হেন্না চাউবীগী মায়থোঙদা অৱাবগী মমি তাবদি উদবগুম তৌখি। ঐগী মীৎয়েংনা লাল্লিদরা? অঙাওবী ওইরবী নুপী অমনা মচা অমা কায়নখিবগী মায়থোঙ ঐনা মহৌশা অমুক্তা উরক্তবনরা অদুদি খঙদ্রে। নোংমদি চাউবীনা চৎলমদাইদা লৈকাইগী লৈশাবী মচা খরনা চাউবীগী মচা অতোম্বীদু লৌবিহৌগে হায়দুনা লৌহৌখি। চাউবী কৈথেল চৎলুনি হায়দুনা চৎখিবনি। হল্লক্লগা মচাবু হংজৈ। হংলু হংলুবদা মানা লৌহৌবনি, মানা পুখিবনি, মখোয়গা শান্নমিন্নহৌবনিনে মোয়না ঙামোক লৈবিরুনি হায়দুনা পুখিবনিনে হায়দুনা অশেংবা অমত্তা তাক্লক্ত্রে। চাউবীনা হংলু হংলুবা খূদিংদা মখোয়দা হংঙু মঙোন্দা হংঙু, অৱাংথংবগী য়ূমদা হংঙুচো, মখারোমগী নুপীমচা অমনা পুখিবগুম তৌবনিনে হায়দুনা পূম্নমক্না থৈদোক্তুনা চাউবীদো মচা থিবা খঙদ্রে। চাউবীনা হংলু হংলুবা খূদিং য়াম্না হেক্তা পাখৎনা মচাবু থিবা হায়বদুদি ঐগী মীৎয়েংনা লানবনরা থোইনা হেন্না ৱাবা হায়বদু উদে। অদুবু তপ্না শোন্থাংননা শোনবা ৱাহৈদুদি পুন্সিগী ঙসি ফাওবা কাউদ্রি—“ইচাদো মবূক লাম্লম্মনি, খোম অমুক্তা ইনবিগে তৌবনিনে।” মচা থিবা ফংদ্রবা চাউবীদো, মচা মাঙখ্রে হায়দুনা কপতুনা লাউ‑খোংদুনা মমীৎতা মপি শীন্থদুনা মচাবু থিবদি উখিদে। মচাবু হংবদা মহংই। মচাশিংবু মচা ওইনা মমীৎতা উবা ফংলক্ত্রবদা কপ্পা থোক্তনা মৈচাক খাঙলিবা চাউবীগী মথম্মোয়নুংগী অৱাবা তাইবং কনানসু খঙবি উবিদগুম তৌখি। ঐসু খঙখিদে ইমীৎতা ইচা উদ্রিবনা, ইচা কায়নবগী মৈচাকসু ফংদ্রিবনিনা। অদুবু চাউবীদি চৎখ্রি মচাশিংবু হং‑হংদুনা। “ঐগী ইচাশিংদুবু উবরো? ইচা খোমদোনবীদো মবূক লাম্লম্মনি, খোমদোনবীদো খোম্লাং অমুক্তা ইনবিগে তৌবনিনে।” ঙসিদি চাউবী মমা অমা ওইনা খোমজিংলিবী মচাবু মথাদা কোন্দুনা খোম্লাং ইনবিবা ফংখিদ্রে। চাউবীবু খঙবশিংনা “চাউবী নঙগী নচাশিংদি?” হায়না হংলকপদা “মীনা লোইনা মুনবিখ্রে, মখোয় য়াম্না ফত্তে” হায়দুনা ইতিং তিংনা খুম্লম্লগা চাউবী মচাশিং থিবা চৎখ্রি। পাইখ্রে, চেক্লা অঙাওবীদো, ঐগী খুঙ্গংদগীসু। খরদং শাফগদরা হায়দুনা লমদনজখিবী, হেন্নদুম মৈচাক ওইখ্রে। কদায়দনো, কদোমদনো!

অয়ূক্কী খ্বাইদগী অহানবা গাড়িদা চৎপনি। অদুবু লম্বীদা লান্মীগী ফ্রিস্কিং কয়া অমা থেংনবনা সুগ্নুদা থুংবদদি পূং তরামখায় খরবু হেন্না তারে। ইথন্তনি, মহৌশাদগী ঐগা হেক‑হেক লোয়নবা ইনাও অমা অনীদু মফমসিদদি চৎলুসি য়াদে। শজিক তম্পাক্তনি হায়বদুদা মখোয়দি কম্লাকসু নীকখিবরা করিনো। ঐনা গাড়িদগী কূমথবগা ইকান কান্নদনা গুরখা মৌনহা অমনা ঐগী নাক্তা চঙশিল্লক্লগা হংলকই, ‌“‘অঙাং মরু কোকপগী ভিদিও নমগদবদু তাদা নহাক্লা?” ঐনা নুপীদুদা মীৎকূপ অমা অনীদি চিংননা অসুম য়েংলগা লৈ। অদুবু মাগী মফমদা থাজবা হায়বদু অসুম অসুম হেনগৎলক্লে। মরমদি ঐঙোন্দা কেমেরাগী ওর্দর তৌরক্লিবা ইনাও অদুনা ঐনা লাকপদা খরা শাফননবা অঙাং মরু কোকপগী অনম্বা শাশিন্নবা চেপাউ অমা লোয়নরক্কে হায়রবসু লোয়নরকউ হায়বদগী মদুমকসু থৌরাং তৌদুনা পুরকপনি। তশেংবমক লম্বীদা ফ্রিস্কিংগী লৈরম্বা লান্মীশিং অদুদা ঐগী প্রেস কার্দ অদু উৎপা মতমদদি মখোয়না ঐঙোন্দা চিংননা অমুক্কা হেন্না কূপথনা হংলকখি। অদুবু মদুগী মথংদা থেংনরকপা অতোপ্পা মফমশিংদদি ঐনা অঙাংগী শাশিন্নবা চেপাউ অদু উৎলুবদা ইপন পন্থদনা অদুম থাদোরকই। ৱারী খরা শানরবা তুংদনি। মৌনহা অদুনা লমজিংদুনা সেরৌ ফাওবা চেনবা জীপ অমদা লাকমিন্নরে।

বাংলাদেশতগী লাঞ্জেল্লক্লগা লৈবা মীতৈগী ইমুং অমদনি। মফমদুদা লৈরম্বা নহা অনীগা লোয়ননা অয়ূক্তুগী চাক্লেনদু য়ূমদুদা চায়। এন্সাংদুসু কা হেন্না হাউবরা খল্লি, ওকশা থোংবনি। অদুবু চাবদু লোইরমদাইদুদা ৱায়রলেস রেদিও সেট পায়বা নহা অমনা ঐখোয়গী নাক্তা তহা‑তহা লাক্লগা হায়রৈ, “‘ইয়াম্বা ৱারৌবিবা য়াদে। চাক চাবদু খরা থুনা লোইশিনবা য়াবরা অমুক্তা য়েংবিয়ু। শজিক্তা চঙগদবা গাড়িদু ইয়াম্বখক ৱাৎপদগী তুরেল মপান্দা হৌজিকসি অসুম ঙাইরগা লৈরবনি।” ফিভমসিদা করম্নবু তপথরুগনি। খূৎ‑শা ফাওবা শেংনা হেক হামদনা কেমেরা য়াওবা ঐগী খাউদু পায়রগা মখোয় নহা অনীদুগা অদুম লাকমিন্নরে। সেরৌ খুলগী মহৈকোল লৈরিবা লম্পাক্তু লাল্লগা খোঙনা লাকপদুদা ঐঙোন্দা য়াম্না ঙকপা অমা থেংনৈ। শুকথা থাজরুদে অদুম্না লৈরমগনি হায়বা। লম্পাক্তুগী মতাই খরদা অদুগা মদুখক্তসু নত্তনা য়ূম খরগী থোঙ্গাল খরদদি ঊনা‑ৱানা মচুগী য়ুনিফোর্ম শেৎপা খূৎলায় পায়বা লালহৌবশিংনি হায়বা মীওই খরদুনা মনীং তৌনা নীংঙাইদনা লৈরি। পূক্নিংদদি খল্লি—শজিক তম্পাক ফাওবদি লালহৌবশিংনা লিবরেটেদ জোননি হায়না লাউথোকখিবদু, মখা তানা সেরৌসি ফাওবা কোনশিনখ্রবা জাৎলা? মঙ‑হাগী মতৌগুম মণিপুর তুরেল (ইম্ফাল তুরেল) গী তোর্ব্বান ময়াদুদা থুংলরে। মফমদু চকপি তুরেলনা ইতিনফম ওইবা শরুক্নি। য়েংখিবদা হায়নীংঙাই লৈতনা ফজৈ। ঈপাক পাক্লবা, পীক্তক তৌবা নূং মচা কয়ানা পূমকূপ কূপশিনখ্রবা তোর্ব্বানদুদা উফূল মরিক অমত্তং থিবা তারবদি চহী মিলিয়ন অমদগী হেন্না ফাওবা মতম চঙগদবা মাল্লি। পাউ পীরবা নহাদুনা হায়খিবগুম, শক্তিমান গাড়িদুনা ঐতবু ঙাইরগা লৈবা ওইরম্লে। দ্রাইভরগী হেক ওয়থংবদা ঐবু ফমহল্লি। অতৈ মফমশিংদি কনাগী তুংগী বোদিদুদগী হেন্দোক্তুনা মমাঙ কাংখোঙগী মথক্তুদা ফাওবা অমত্তা হাঙদবমখৈ, য়ুনিফোর্ম শেৎপা খূৎলায় পায়বা লালহৌবশিং অদুনা চরোং য়ানবমখৈ তোংই। অয়ূক্কী পূং তরামাথোই মখায় তারকপদদি ঐখোয়না সেরৌ লমদমবু তুংওইনরম্লে।

চৎলিবা লম্বীদুসু ওন্থোকপগী মতৌ অমা হায়বদুনি। লৈকংদা থৌবা নত্তে। অপাক‑অপাকপা নূং ঙাক্তা ঙায়বা ঈশিং ঈচেল নাইনা চেল্লিবা লোক্নুংদা ঙাক্তনি। মদুদা ইশং থাংবা নূংশিংদা গাড়িগী কাংখোঙ মপা তারুবগীরা খঙদে, গাড়িদুগী মতুংথংবা শরুক্তু তোয়ন‑তোয়না অমুক য়েত্তা শাংনা শাংনা হেক হেক শীত্থবসু য়াওই। মদুগুম্বা মতৌদুদা ঐনা করিগীদমক কংফালদা থৌদনা অসিগুম্বা খোংনুংসিদা থৌরিবনো হায়না দ্রাইভরদুদা হংলুই। মীওই‑মীতৌ চাউ‑শাংবতা নত্তনা মশকসু ফজবা সুগ্নুদগীনি হায়বা দ্রাইভর অদুনা হায়রকপদদি মসিনা লৈকংদা চৎপদগীদি শরুক অহুম হেন্না তেনশিনবগীনি। অদুগা অমুকসু মেন রোদতা চৎলগদি চকপিকারোংনচিংবা মফম কয়াদা ভারত লান্মীশিং লৈবনিনা মদুগী নাতৈ চাদবসু লৈ। মিনিট নিম্ফুমুক লাক্লবা তুংদনি। গাড়িদু লোক্নুংদা ঙাক্তা অসুম লাক্লম্বদগী চীংগী অঙম্বা শরুক অমদা থৌগৎননবা থৌরাং তৌরকই। নীংথিনা চৎনবা য়াবা লম্বী অমা নত্তে। কাংখোঙগী লীক্লম অনীদুগী মরক্তা পীক্তক তৌবা উ মচা কয়া হৌবা থেক্ন‑খোয়না কাখৎখিবা শক্তিমানগী লম্বী হায়বদুনি। মীৎকূপসিদা ওইররিবা মতৌদি, অঙম্বা শরুক অদু কাখৎলমদাইদা দ্রাইভরদুনা গিয়ারদু চেকশিন্না পাল্লবা তুং ঐঙোন্দা হায়রকই, “ইয়াম্বা, গিয়ার লিভরসি লেঙদনবা চেকশিন্না অমুক্তা ইয়াম্বনা পায়রগা শেন্নবিয়ু। ঐ খূৎ অনীমকসি থাদোকপা য়ারোইদৌরে।” করিদি তৌরুনি? অঙম্বা অদু কাখৎলকপদা গিয়ার লিভরদু খূৎসিনা চেৎনা পায়না পায়না লাই মশীং খঙদবমখৈ খুরুমজবা নত্তনা। চীংয়াংগী শরুক য়ৌদুনা লোক অমা লান্থোক্কদৌরিবনি হায়দুনা চীংখোঙ তম্না অমুক থৌথরকই। মতমসিমকসু ঐগী ইথৌদি গিয়ার লিভরদু শেন্নবনি। পংলাপ লাপ্তনা লোক্তুগী মপান য়ৌরে। অদুক হাক্না চাউদবা ফিট কুনমুক্কী ময়া পাক্কদবা খরদি লুবা লোক অমনি। অদুম ওইনমক অচৌবা নূংজাও কয়াগী মরক্তা অকনবা ঈচেল চেল্লি। গাড়িদুনা লোক্তুবু লান্থোকপগী মতৌদুদি তশেংনা ঐ তু চুংবগা ঈরোয়ননা পূক্নিংসি য়াম্না পীকশিনখি। ময়ায় ওইরপ চাউরবা উপুম অনী গাড়িগী কাংখোঙ মপা চানা অমমম থারগা তপ্ন‑তপ্না য়েং‑য়েংদুনা লান্থোকপনি। মদু লালহৌবশিংদুনা শাবা থোংনি হায়। অঙকপা মখলগী থোং অমা হায়বদুনি। মখোয়গী ম্যান্মারগী ঙমখৈদা লৈরিবা লানশঙশিংদা পুশিনগদবা চেঙ‑চাক অদুগা তঙাইফদবা খূদিং থোংসি লাল্লগা পুশিনখিবা ঙাক ওইরমখি। অসুম্না মফম অমখক্তা ওইরফাওবদা পূক্নিংসি লূম্না লাকপা লম্বী হায়বদু ওইদ্রগসু নুংথিলগী পূং অনী তারমদাইদদি ঐখোয় শজিক তম্পাক্তা থুংলে। মখোয়গীদমক্তদি হোং কোংনি হায়নবগা ঈরোয়ননা অহিংগী পূং তরানিথোই নৎত্রগা অমা ফাওবা তূম্ন‑হীপ্নদনা দুকান ফাওবা থোঙ লাওনা লাওনা হাংলগা লৈনরিবা পীক্লবা টাওন শজিক তম্পাক। মফমদুদা মিনিট তরামুক পল্লগা লৈ। করি করিনো পোৎচৈ খরা অমনা লৌথহৌরগা খরা অমনা অমুক নৌনা হাপকৎলকই। মখা তানা ঐখোয় অমুক মখোয়গী লানশঙ লৈ হায়বা ইন্দো‑ম্যান্মারগী ঙমখৈদু য়ৌনবা শক্তিমান গাড়িদুদা অসুম লাকই। পূংমুক লাক্লবা মতুংদদি লোক অমগী ময়াদা ঐখোয় খূদিং গাড়িদগী কূমথরে। মায়কৈ অমদা গাড়িদুনা চৎখি। ঐখোয়দি মখোয়গী লানশঙদু য়ৌনবা মিনিট তরামুক্কী মতম চঙনা খোঙনা অমুকসু চৎলি।

ঐঙোন্দা ভিদিও নম্নবা পাউ ফাওরকখিবা ঐগী লৈকাইগী ইনাওশিং থোকপা চলাম্বগা ঐখোয় অনী মখোয়গী লানশঙ য়ৌরবা মতুংদতা মাগা থেংনৈ। মহাক মখোয়গী লূপতুগী সজর্ন মেজর অমা ওইনা লৈরমখি। লানশঙদুদা হেক থুংবগা মানা মখোয়গী মথক থোংবা অমদা ঐ থুংলরে হায়বগী পাউ ৱায়রলেস রেদিওদা পীখি। কোফি য়াওবা হাউরবা শঙ্গোমগী চা অমদি বিস্কিট চাদুনা ঙাইহাক ৱারী শানরবা মতুং, মানা ঐগী নুমিদাংগী লৈফমদু শীন্দোরকই। মানা হায়বগী মতুং ইন্না ঐনা খঙলকখিবদি, অহিংদু ঐ মখোয়গী চেঙ‑চাক থম্ফম ওইনা লৈবা গোদাওন অমদা ঈংন‑চীক্না মখোয় মীওই মরি মঙাখক্তংগা লোয়ননা লৈরগনি। মসি ওইদুনসু নুমিদাংগী চাক্লেন অদুদি মহাক্কা পূন্না চামিন্ননবা মফমদুদা লৈবা মীওইশিংদা মানা পাউ পীদুনা খঙহনখি।

মখোয়গী অহানবা লানশঙদুদগী গোদাওন লৈরিবা মফমদুগী অরাপ্পদু খোঙনা চৎপদা মিনিট তরেৎ নিপালমুক্কীনি। মফমদু ফাওবা ঐবু থিলহল্লকপা মখোয়গী খূৎলায় পায়বা লান্মী অনীদুদি মফমদুদা লৈরম্বা মীওইশিংদুদা ঐবু শিন্নরম্লগা অদুম হনখ্রে। লৈরম্লিবদু মখোয় খূৎলায় পায়বা মীওই মঙাখক্তনি। গোদাওনদু শেন্নবনি হায়। মখোয়গা ঙাইহাক ৱারী শারবা মতুং মখোয়দি নুমিদাংগী সর্জন মেজর চলাম্বা য়াওনা চামিন্নগদবা চাক্লেন অদুগীদমক য়েংগোনদগী য়েনবা লাবা অনী য়াওনা য়েন মরি ফারগা শেম্নবা থৌরাং তৌবা হৌখ্রে। ঐদি কাতু‑কারন কোয়না চৎলগা মখোয়গী মফমশিংদু অসুম য়েংলগা লৈ। লৈরম্লিবা গোদাওনদু অদুম চাউই। ফিট চাম্মরোম শাংলগা য়াংখৈমুক পাকপা য়াই। মথক‑মখা শারগা তিন্না কূপ্পি। থারপ তৌবা উপাক ঙাক্তনা ফক্লাং খায়। চাউরবা শঙদুগী মনুংদুদা লৈরম্লিবশিং অদুসু অঙকপগী মশক্নি। য়ামদ্রবদা চেঙ বোরা লিশিং অমগা চামরি চামঙারোমদি শোয়দনা শুরমগনি। মদুখক্তনসু লোইদে। হৱাই চেঙৱাই অদুগা অচাথাউগী তিন কয়া অমনসু মরোল মরোলনি পৈখৎলগা লৈখ্রিবদু। ৱারীগী মতাং অমদা, ঐনা হান্ননা লৈরম্লবা মীওই অমদা হংলুবদগী খঙলকপদি, মখোয়গী ম্যান্মারগা লোন্নবা ঙমখৈগী শরুকশিংদা লৈরিবা লানশঙ কয়াদুদা পীখিগদবা চেঙ‑চাক খূদিং মফমসিদগী পুখিগদবা ওইরমখি। মফম অদুসু হায়নীংঙাই লৈতনা ফজবা মফম অমনি। চীংখোঙ অমগী লৈতেম মান্নরবা থেল অমনি। অদুগা খা‑ৱাং ওইনা শাবা চাউরবা শঙদুগী নোংপোকথংনা লৈরিবা শুমাঙদু লৈতেম মান্নবগা ঈরোয়ননা শীৎ নাল্লি। মৌ অনৌবী লুহোংবা কুইদ্রিবী অমনা লৈবা য়ূমগী শুমাঙসি মঙায়। অদুক য়াম্না চগুংননা মরাং কায়না, শঙ অমদি শুমাঙদুগী অকোয়বদা হৌখ্রিবা চাউর‑চাউরবা উনিংথৌ, খাংগ্রা, লৈহাউ, টিক অদুগা অগরনচিংবা পাম্বী কয়া অদুগী মনা অমত্তা শুমাঙদুদা তাহন্দনা তরু‑তনান্না লৈ। পূম্নমকসিগী মথক্তা মফমসিবু অমুক্কা হেন্না নীংথিজহনবদি পীক্তক তৌনা ফিট তরানিথোই‑হুমদোইমুক্তং পাক্না অদুগা খুবোম্মুক লুনা নূংগায়লক্তা চেনবা ঈচেল মচা অমনা শুমাঙসিগী ওয়থংবা শরুক লমজঙ ময়াদুদা মোং‑হাদনা ম্যান্মারগী শরুক্তা চেন্থখ্রিবা অদুমক্ননি হায়বদা করিসু লাল্লোই।

খূৎলায় পায়বা সর্জন মেজর চলাম্বগী খোঙবু মখোয় মীওই তরামাথোইদুগা লোয়ননা নুমিদাংগী চাক্লেন্দু পূন্না ঐখোয় তরাতরেৎ মখোয়গী গোদাওনদুদা পূন্না চামিন্নৈ। চাক তোক্লবা মতুংদসু ঙাইহাক ৱারী শানৈ। নুমিদাংগী পূং নিপালমুক তারকপগী অদুৱাইদদি মহাক মাগী খোঙবুশিংদুগা লোয়ননা ঐবু নুংঙাইনা পোত্থানবা হায়রম্লগা মখোয়গী লানশঙদা হনখ্রে। অদুবু মানা অদুম্না হায়রম্লগসু অহিংদু ঐহাক পাক তূমথবা য়াদে। মানা হায়খিবা ৱাহৈ খরদু নাকোং ময়াসিদা অসুম ঙংলগা লৈ—‘ইয়াম্বা, হয়েংগী পাসিং আওটকী থৌরমসি য়ৈথোকপা য়াবগী ফিভমদা লৈরি। অদুবু হায়বা ঙমদে। ঙসি অহিং ফাওবগী মনুংদা ঐখোয়গী অহলশিংনা চপ‑চাবা অমদি শোয়দনা খঙহল্লক্লগনি। করিগুম্বা মণিপুরগী মপান্দগী মশীং য়াম্না চঙশিল্লক্লিবা ভারত লান্মীশিং অদুনা ইলেক্সনগী ওইনা লাকপা তশেংনা ওইদুনা চকপিকারোংদগী হেঞ্জিল্লক্তবা ওইরবদি ফৈ। মদু নত্তদুনা ভোৎকী মিংদা খুদোংচাবা লৌরগা শজিক তম্পাক অমদি মসিগী অকোয়বগী শরুকশিংদা ওপরেসন চত্থনবা থৌরাং তৌবা ওইরম্লগদি, লান খরদি অদুম শোয়ররোই।’ মতমসিদদি ঐনসু খল্লকই—মখোয়গী লূপসিগী ওইনা লৈবা কেমেরা অনীমক য়াদদুনা শেমখ্রি হায়বদগী ঐবু হয়েংগী পাসিং আওটকী থৌরমদু নম্ননবা লন্নাই ওইনা নেক্লকপদগী মফমসি য়ৌনবা মিহুল তিং‑তিং চোংনা লাকখিবনি। করিগুম্বা থৌরমদুনা য়ৈথোকখিবা তারগদি ঐনা করম তৌবা? মতাং ইচা চাদনা ফাগি তারগদবা ৱারী কয়া অমসু মীৎকূপসিদা হেক নীংশিংলকই। ঐনা থা খরগী মমাঙদা পাখিবা অমেরিকান জর্নেলিষ্ট ইদগর (পি) স্নোনা ইবা মাগী মমিং লৈরবা লাইরিক রেদ ষ্টার ওভর চাইনা দা ইরিবা অদুগুম ঐসু মাগী মতৌ তম্বনা ফগদৌরিবরা? তশেংনমকসু মাদি চাইনাগী নীংতম লান মমাঙদগী চাইনীজ কম্ম্যুনিষ্ট কয়াগা চহী কয়া লোয়নদুনা লৈরকপতা নত্তনা মখোয়গী লুচিংবা চিয়ারমেন মাউ‑মক্কীসু চান্নরবা মরুপ ওইখিবনি। হুম! নত্তে নত্তে, ঐ মাগী মতৌ তম্বা য়াবা নত্তে। ঐদি অমুক পন্থদনা য়ূমদা হনখিবা তাবনি। অসুম্না খন্না খন্না ঐ হাইফেৎ তূমথবা হৌরুরমাল্লে। অদুবু অফিং‑অফাই ওইনা ঐ মীৎকপ খঙথোক থোকই। করিনো তাখ্রিবা খোঞ্জেলদুদি? ‍‌‘ৱে ৱে’ লাউনা হৌনা হৌনা খোংলগা য়েন্নখা ময়া ওইনা কুদ্রুক‑কুদ্রুক লাউনা করিগুম্বা খরনা চেনখিবগুম্বগী মখোলনি। ঐ হীপ্লম্বদগী ফূক হৌগৎলগা ফম্মী। ঐগী ইতৌদু ঐগী নাক্তা হীপ্লিবা নহাদু খঙলমাল্লে। হীপ্ন‑হীপ্না করিসু থৌৱা শাদনা হায়রকই, “ইয়াম্বা, শজিনি করিসু খনবিরুনু। মখোয়দি পূল্লপ পূল্লপ অসুম্না হেক হেক চৎপনি। মখোয়দা নত্তে মফমসিদদি শা অতৈসু অদুম মরাং কায়না লৈ।” অসুম্না হায়রম্লগা মহাক তূমথনবা অমুক তৌখি। অদুবু ঐদি করি খনখিবনো খঙহৌদে, অশাংবা স্বর অমা হোন্দোকখি।

মথংগী অয়ূক্তু ঐ য়াহৌবা পংকুই কুইদ্রি। চীন‑খা শেংলগা ঈশিংখোংদুগী মপান্দা কাতু‑কারন অসুম চৎলগা লৈরিঙৈদনি। খূৎলায় পায়বা মখোয়গী নহা অনী লানশঙদগী লাকই। সর্জন মেজর চলাম্বনা ঐবু লৌরুনবা হায়বদগী লাক্লিবনি হায়। পন্থদনসু অদুম মখোয়গা লাকমিন্নরে। লানশঙদু য়ৌরবা মতুংদদি ঐঙোন্দসু য়াম্না নুংঙাইবা অমা ফাওরকপগুম তৌই। অতৈগী নত্তে। লানশঙদুগী কমান্দর মেজর লোয়ননা ঐবু মাগী লৈফমদা কৌশিন্দুনা সর্জন মেজর চলাম্বগা লোয়ননা অয়ূক্কী ব্রেকফাষ্ট চামিন্নদুনা ৱারী ৱাতাই শাবগী তাঞ্জা অমা পীরকপদুগীনি। মহাক মপুক‑মপাউ ফবা মীওই অমসু মাল্লি। মোমোন নোক্লগতসু লৈবা ওইনা উই। ‍‌“ঐখোয়গী সর্জন মেজরগী ইয়াম্বশিংনি হায়বনিনা ঐনসু ইয়াম্বা অদুম কৌজরগে, ৱারৌবিরোই। অসুম তৌবনি, ঙসি পাঙথোক্কনি হায়না তৌরম্বা পাসিং আওটকী থৌরমদুদি ঐখোয়গী সার জি এসনা নুমিৎ খরনি চোন্থরগা তৌনবা হায়রক্লে। হৌজিকসি ঐখোয়গী লান্মীশিংগী পোজিসনদসু হোংদোক হোংজিন তৌবগী ফিভম খরা লৈরক্কদবা মাল্লি। মসিগী মরমদি হন্দক পাঙথোক্কনি হায়না তৌরিবা ইন্দিয়াগী তরামরিশুবা আওটর মণিপুর পার্লিয়ামেন্টরি ইলেক্সনগীদমক্নি হায়না মণিপুরদা চঙশিল্লক্লিবা ভারত লান্মীশিংগী মশীং অসি কা হেন্না য়াম্মী। ঐখোয়গী পাউমীশিংনা পীরকপা পাউশিংদা, চঙশিল্লক্লিবা অয়াম্বা লান্মীশিংদু মপূং ওইনা বর্মা‑সুগ্নু মায়কৈ অসোমদা ওইনা লেপ্তনা চঙশিল্লক্লি। মখোয়না অপীকপা খূৎলায়শিংখক নত্তনা অচৌবা নোংমৈ হায়বদি ফিল্ড গন অনীসু লোয়নরকই। ময়াম্না তোপ হায়না খঙনবা বোম কাপ্নবা নোংমৈদুনি। ঙরাং ফাওবদা সর্বিলেন্স হোলিকোপ্টর ফাওবা শীজিন্নদুনা চঙশিল্লক্লিবা মশীং য়াম্লবা লান্মীশিংদুগী শিখ লাইট ইনফেন্ট্রিগী কাঙবুদুনা সুগ্নুদা লৈহৌরগা অতোপ্পা কয়া অদুনা অমুক মখা তানা লেপ্তনা চঙশিল্লকপনা চকপিকারোং য়ৌরকখ্রে। মফমদুদা থুংলরবা রাজপুত রাইফলসশিংদুনা খুল কয়া ফাওবদা চাইথোক্লগা লৈখ্রে। হৌজিকসু মখা তানা মদ্রাজ রেজিমেন্টকী মশীং য়াম্লবা লান্মী কাঙবুশিংনা অমুক শজিক তম্না অসুম চঙশিল্লক্লি হায়বা পাউ ফংই। লাক্লিবা ভারত লান্মীশিং অদুনা ঐখোয়গী মৈরা পায়বী ইমা‑ইবেনশিংদা হায়রিবদি মখোয় ইলেক্সনগীদমক লাকপনি। মদু লোইরগা অদুম হনখিগদবনি। অদুনা মখোয়গী মচা‑মশু ওইরিবা লালহৌবশিংনা মখোয়দা খূৎ থাহল্লক্কনু। করিগুম্বা থারক্লগদি অফবা ওইরোই, অসুম্না হায়বগী পাউ ফংই। অদুবু ৱাফমসিদা ঐখোয়না কয়া য়াম্না থাজগদৌরি? মখোয়না পুরক্লিবা ৱেদরগী মতুংইন্না কিলোমিটর কুন্থ্রাদগী কুন্থ্রাহুমদোই ফাওবা শান্না কাপ্পা য়াই হায়রিবা অচৌবা মখলগী ফীল্ড গনশিং অদু মখোয়না ইলেক্সনগীদমক লাকপা ওইরগদি করম করম্বা পোল্লিং ষ্টেসনশিংদা খিন্দুনা থমগে হায়রিবনো?”

লৈতাফম খঙদবা ৱাখল কয়া খন্না খন্না নুমিৎসিগী নুমিদাংৱাইরম য়ৌশিল্লকই। গোদাওনদুবু ঙাক‑শেল্লিবা মখোয় মঙাদুগা ৱারী শানবগা লোয়ননা ৱায়রলেস রেদিওদা মখোয়না পাউ থাদোক থাজিন তৌদুনা মখোয়‑মশেল ঙাঙন‑শক্নরিবা কয়াদু অসুম তাবনা মতমবুদি হৌখিবা খঙহৌদে। য়াচঙলক্ত্রিঙৈ পূং মঙা তারমদাইদা নুমিদাংগী চাক চাবা তোকই। মম্লি‑মম্লি তৌরকপগী অদুৱাইদনি। ঐখোয়না লৈরিবদুগী অৱাংলোমথংবা মায়কৈ ওইনা নোংমৈ মখোল য়াম্না তারকই। মরক মরক্তা হৌরবা বোমগী মখোলসু অমুক মুক য়াওরি। মফমদু খরদি লাপ্পা মাল্লি। “মফম অমদা খূৎ থোক্নরে” মখোয়না হায়নরকপা ৱাহৈনি। এ কে রাইফল য়ানবা নহা অমদি মাগী মথৌরা খঙদে, মম্লি‑মম্লি তৌরকপদুদা অৱাংবা চাউরবা উপাম্বী অমদা শেমদুনা থম্লবা ফিট নিফুমুক্তগী হেন্না ৱাংলবা উগী কৈরাক অমদা করিসু কিদনা থুনা হেক্তা কাখৎখি। কৈরাক্তুগী মতোন্দনা, চাউরবা উপাম্বীদুগী মশা‑মরেং ফন্দোকপা শরুক অদুদা ইপাক পাকপা ফম্বাক অমা থৌওইনা শেম্লগা লৈরি। ফম্বাক্তুদা লেপ্লগা নহাদুনা নোংমৈ অমদি বোমগী মখোল তারক্লিবা মায়কৈদুদা অসুম য়েংলগা লৈ। ‍‌“শজিক্কী খাথংবদা লৈবা বোলপি হায়বা অনৌবা খুলদুগী ময়াদনি” নহাদুনা মথক্তগী লাউরপ তৌনা হায়রকই। করি থোক্লগবা অদুগা ঐনা মতৌ করম্না য়ূমদা হনখিগনি খনবদা অহিংদুসু পাক হেক তূমথবা য়াদে। নোংমদোনথক্তা মংলগা লৈহৌবা নোংগী লৈচিল‑নোংফাইশিং অদুসু নোংলীক ওইনা হোবে হোবে হেক্তা তাবা হৌরকই। পাক হেক হাংদে। অহিং চূপ্পদুমা চুই। মদুনা মরম ওইদুনা গোদাওনদুগী অকোয়বদা লোইবা খম্বা নাইদনা হৌখ্রিবা চাউর‑চাউরবা উপাম্বী কয়াদুগী অকংবা উশা কয়া নোং চোৎপগী লূমথরক্তুনা প্রেক‑প্রেক তেক্লগা মখাদা তারকই। মদুনা ঐবুসু অমুক‑মুক খংপ্রেক খংপ্রেক হেক খংহল্লি।

হুম্নি শুবগী অয়ূক্তুনি। চলাম্বনা ঐবু লানশঙদা লাক্নবা মী থারক্তুনা কৌরবদগী লাকমিন্নৈ। অয়ূক্কী ব্রেকফাষ্ট ওইনা তনগং অমসুং শঙ্গোম য়াওবা কোফি থক্না‑থক্না করিগুম্বা ৱাফম খরসু খন্নৈ। মরুওইনা ঐনা য়ূমদা হনখিবদা ওইগদবা অফ‑ফত্তগী মরমদনি। পাসিং আওটকী থৌরমদুদি য়ৈথোকখ্রবনা ঐনা য়ূমদা হনবা তারবসু হৌখিবা নুমিৎকী নুমিদাংৱাইরমদুদা থোকখ্রিবা খূৎ থোক্নবগী থৌদোক্তুনা ঐনা হনখিনবা থৌরাং তৌবদা অপনবা অমুক ওইহল্লে। মরমদি, অতোপ্পা লালহৌলূপ অমনা তৌখিবা এম্বুশ অদুদা কেপ্টেন অমা য়াওনা ভারত লান্মীগী মীওই মরি হাৎখ্রে। খরা অমনা শোকহনখ্রে। থৌদোক্তুমক্না মীৎকূপতুদগী শাহিং চাবা হিংচাবা অমমম হায়বদু ওনখ্রবা ভারত লান্মীশিংনা বোলপি অমসুং শজিক্কী খুল কয়াবু কোয়শিন্দুনা থম্লগা অকনবা ওপরেসন চত্থবা হৌখ্রে। অসিগুম্বা ফিভমসিদা লালহৌবশিং লৈবা মখোয়গী লানশঙগী মায়কৈদগী ভিদিও কেমারা পায়বা, প্রেসকী মীওই অমনা থোরকপদা মখোয়গা থেংনবা হায়বসি তরাই‑তরাইনদি খক থাগদবা লৈতে। অদুগা অমুকসু ঐদি টীম ওইনা পাউমী অতৈগা পূল্লগা লাকমিন্নবসু নত্তে, ইথন্তনি। অমরোমদা অমুকসু, ভারত লান্মীশিংগী খূত্তা তাখ্রগা মখোয়গী ওৎ‑নৈবনা মরম ওইদুনা লালহৌবশিংগী অরোন‑অথুপ কয়াবু হায়দোকখিনবগী মরম ওইবনা মেজর লোয়ানসু লানশঙদগী কনা অমত্তবু মাগী অয়াবা য়াওদনা চত্থোক‑চৎশিন তৌদনবা অচেৎপা ৱাফম ফাওবা থমখ্রে। ওইরক্লিবা মতৌ খরসিদা লৈতাফম অমা ইখঙ খঙদনা, অয়ূক্কী চাক্লেনদু লানশঙদা চাননবা হায়বদগী গোদাওনদা হন্দ্রে। ঐখোয়না চাননবা চাক এন্সাং থৌরাং তৌবা হৌখ্রে। মীওই কুন কুন মুক্না শাবা সেক্সন অমমমগী তোঙান তোঙান্না থোংনবনি। চলাম্বনা শিন্নবগী মতুং ইন্না ঐ সজর্ন রুসিগী কাঙবুগা পূল্লি। এন্সাংদি কৌতা ঙা ওইনা থোংবা তারে।

অয়ূক্কী পূং তরা তারক্লে। করিগীনো খঙদনা লানশঙদুদা লৈরিবা মখোয় খূদিংদু চরাঙ খোয়রাঙননা হোবে‑হোবে তৌনা মফম অমদগী অমদা চেনচৎ চৎপগী মতৌ অমা তৌনরকই। মখোয়গী মতৌশিংদুদা ঐনা করি তৌবা য়াওরবনো খন্না ঙকচাননা য়েংলগা লৈরিঙৈদনি। সজর্ন রুসি তহা তহানা ঐগী নাক্তা চঙলকই, “ইয়াম্বা, ঐখোয় হৌজিক মফমসি থাদোক্লগা অতোপ্পা অমদা চৎপা তারে। ইয়াম্বগী খোঙউপতু নুংঙাইগদবা মান্দে। মোজাগা লোয়ননা হন্টিং বুট অহনবা অমা ঐ পীরক্কে। ইয়াম্বগী নম্বর কয়া তোংবি?” মফম মরাং অমা ইখঙ খঙদনা ঐনসু হায়, “ইন্দিয়াগী নম্বর সেবেন তোংই।” করি তৌরবনো, কদায়দা চৎকদৌরিবনো হংগে তৌবনি, নংহৌদে চৎখিবনা হাল্লি। থোংলিবা চাক্তুসু চফূ শৌরগা য়াইগদবগী তৌবদা ঙায়রিবনি। চাক থোংলিবা নহাদুনা চফূদুগী চেঙ চঙলিবা চাক্তু ক্রোক ক্রোক ওৎখায়রগা নাকন্দা চেল্লিবা ঈশিংখোংদুদা পূল্লপ হৈথখি। কোলদু কাবক কাবক থুনা অমুক চামথোকই। তাঞ্জাদুদা এ কে রাইফল য়ানবা নহা অমনা খোঙমোজা য়াওনা হন্টিং বুট জূরা অমগা মিলিটরিগী হ্যাভরসেক পীক্তক তৌবা অমগা ঐঙোন্দা পীরৈ। “ইয়াম্বা ঐখোয়গী সজর্ননা খোঙউপসি হৌজিকমক অদুম তোংশিনবিরো হায়রকই” অসি হায়রম্লগা মাসু থুনা অমুক চৎখি। ঐসু পন্থদনা খোঙউপতু মরী লোল্লগা তোংশিল্লি। লানশঙদুদা লৈরিবা মখোয় লান্মী কয়া অমদি মখোয়না পায়রিবা নোংমৈশিংদুগী মথক নম্বো‑থাবো কয়া অমসু পোনরি। কয়া অমদি খাথংবা মায়কৈদুদা চৎনবসু য়াওখ্রে। ঐনা খোঙউপ তোংশিনবা লোইরদুনা ঐগী কেমেরাদু মখোয়না পীরকপা খাউদুদা হাপচিল্লি। হোবে হোবো তৌনা চরাঙ‑খোইরাংনরিবা কয়াদুগী মরক ঐনা চলাম্বদুবু কদোমদা লৈখ্রবনো খন্না কোয়য়েং য়েংই। থোইনা খল্লুদবনা থাজরুদে—লানশঙসিগী কমান্দর মেজর লোয়াদু মোমোন মোমোন নোক্লগা ঐগী নাক্তা চঙশিল্লকই। “ইয়াম্বা করিসু নুংঙাইতবা তৌবিগনু। ঐখোয় মফমসি থাদোক্লগা অতোপ্পা মফম অমদা চৎপা তারে। নীংতম লান্মী অমগী মফমদদি মা‑মানা থেংনরিবা মফম অদুগী ফিভমগী মখা পোন্না মদুগী খোঙফমসু য়েংবা তাই। হৌজিকসি ইন্দিয়ান অার্মিশিং শজিক অমদি নিয়ু শোমতল মায়কৈ অনীদগী ঐখোয়না লৈরিবা ঙমখৈগী শরুকসিদা চঙশিনবা হৌরক্লে। ঐখোয়গী সারশিংনা কূপ্না খন্নরবা মতুংদা ঐখোয় মতম খরদি মফমসি থাদোক্ননবা পাউতাক পীরকপনি। ফরে, ৱাফমসিনা তোঙানবা অমনি। চীংনুং‑মান্নুং উরক‑ৱারক্তা চৎপদা পূক্নিং লুম্নবা, অতৈদগী খরসু য়াংতক তৌবা এম সিক্সটিন রাইফল অমা ইয়াম্বনা পায়বিগে হায়বরা?” ঐ শ্বায় লাউনা মীৎ‑না খংশিং শিংবগুম তৌই। “এ! কদায়দগীনোদা, ঐ পায়জরোই সার। মদু ঐ হৈনরোই।” মেজরনা পূল্লপ শূপচিল্লগা ৱারোইশিন্দুনা হায়রকই, “ফরে ফরে। অদু ওইরগনা ইয়াম্বগী খূৎচাবী ওইবা শিনফমসু ওইরিবা ভিদিও কেমেরাদুনা ময়ামগী খোঙচৎসি মেমোরি ওইনা থম্নবা রেকোর্দ খরা খরা অদুম তৌশিনবিরম্বসু য়াই।” ঐনা চলাম্বগী মরমদা লাঙতক্ননা হংলুই। অদুবু মহাক্তি মখোয়গী জেনরেল সেক্রেটরিনা শিন্নবা থবক অমগীদমক লানশঙদু থাদোক্লগা তোঙানবা মফম অমদা চৎখিরম্লে। মসি ওইদুনসু মহাক্না ঐবু নীংথিনা য়েংশিনবিনবা মেজরদা হায়জরম্বগা ইরোয়ননা ঐ নুমিৎ খরনিদি চোন্থনা লৈরগা লাক্লনি হায়বগী পাউ মানা য়ূমদা য়ৌননবা হায়খ্রগনি হায়বা মাগী ৱাহৈ খরদু তাবদা ঐ অপেনবা অমদি পোকই।

লানশঙদুদগী খা পাংনা খোঙনা মিনিট অনী অহুমগী অরাপ্পখক চৎলগা ম্যান্মার অমদি মণিপুরগী লোন্নবা ঙমখৈদা চেল্লিবা ময়ায় ওইরপ পাকপা লোক্তু লৈরে। নম্বুল তুরেলমুক্কী চাং ফানীংচিৎ য়ৌনা পাকই। য়াংনু লোক কৌই হায়। কনাগুম্বা অমনদি য়াংদু হায়বনি অসুম্নসু হায়। করম্বনা চুম্বনো খঙদে। অয়ূক্কী পূং তরামখায় খরা হেল্লকপদনি। নোংচুপ পাংনা থেক্না খোইনা চেন্থখ্রিবা লোক্নুংদুদা ঐখোয় খূদিং খোঙশানবা হৌরক্লে। ঐদি কেমেরাদু থৌরাং তৌদুনা মতেক মতেক খরা অদুম লৌশিনবা হোৎনৈ। পরেং পরেং ওইনা চৎলিবা য়াওল লান্মীশিংদু ওন্থোক্না য়াম্না উখ্রে। চনিরোম্নি হায়। লানশঙদুদা লৈবা মখোয় য়াংখৈমুক্তা জেনরেল সেক্রেটরিগা লোয়নহৌরে অসুম হায়। লাক্লিবশিংদুগী মরক্তা নুপী লান্মী কুন্থ্রামুক য়াওই। মখোঙনা চৎপা ঙমদ্রবা অনাবা অনীসু শগাই শারগা পুরক্লি। মখোয়গী লৈখিদ্রবা কমান্দর অমগী লোয়নবীগী মপানি হায়বা ইয়াম্বশিং অদুনে অদুগা ঐ য়াওনা অনাবা অনীদু নত্তনা মখোয় খূদিংদি লান্মীগী ফিজোল শেৎনা ওটোমেটিক রাইফল পায়বা মীওই ঙাক্তনি। চৎলিবা লোক্নুংদুগী ইশং কানা লৈরিবা চাউর‑চাউরবা নূংজাওশিংদুগী মচেকশিংদা নেৎল‑নেৎলগা চৎপদু হায়নীংঙাই লৈতনা নাতৈ চাদে। মদুনা করিগুম্বদদি শীৎ হেক নান্থুদুনা চাউরবা নূংজাওশিংদুগী মচেক্তা য়ৈশিন্দুনা শোকপা ফাওবা য়াওনৈ নৎত্রগা খ্বাঙ ময়া নক্না লুনা চেল্লিবা ঈচেলদুদা তাশিনবসু কোঙ্গায়নি। লোক্তুদা হেক চৎপা হৌরকপদা মশা খরা চাউরপ তৌবী নুপী লান্মী অমদি ইশংদা নেৎলুবদগী নান্থুদুনা মখোঙ লৈথেকপদগী চৈশু শুর‑শুরগা য়াম্না ৱানা চৎপা ফাওবা য়াওখি। লোক্তুগী নাক‑য়েৎ অনীমক্তা কূংনা হৌরিবা চাউর‑চাউরবা উজাওশিং অদুগী মশা‑মরেংশিংনা থানা খঞ্জিনখিবনা নুমিৎকী মঙালদুসু লোক্নুংদুদা নীংথিনা য়ৌবা ঙমদে। মদুনা মরম ওইদুনা লোক্নুংদু নুমিৎয়ুংবা মতম অদুদসু মম্লি‑মম্লি তৌনা লৈ। তোন‑থা মান্ননা ৱাংবা চাউ‑চাউরবা উজাউ কয়া অমনা মরূ ফূক্না তুরগা লোক্নুংদুদা পৎ‑পুমদুনা লৈবসু কোঙ্গায়নি। মিনিট তরামরি মঙামুক্কী চাংখক চৎলকপদা ঙায়রি। নোংচুপথংবা লোক্তুগী পরিং ওইনা খরা লাপ্তক্না নোংমৈ মখোল অহুম্লক লন্তক্না তারকই। মখোয় মশেল ৱায়রলেস রেদিওদা পাউ ফাওনৈ। ঐগা সেক্সন পূন্না খোঙবু ওইনা চৎমিন্নরিবা সজর্ন রুসিগী রেদিওদা হায়রকপদু ঐসু তায়, ‍‌“তারবরা তেঙ্গো ৱান, চারলি তু? তেঙ্গো ৱান চারলি তু?” সজর্ন রুসিনসু পন্থদনা অমুক খুম্মী, “তাজরে তেঙ্গো ৱান চারলি ৱান, ওভর।” অতোপ্পা মীওইদুনসু অমুক মখা তানা হায়রকই, “ঐখোয়গী বি বি সিগী ইয়াম্বা অমা য়াওবদু মফমসিদা খরা থুনা অমুক্তা য়ৌহনবিরকউ। ফনা ফজবা অরাংবা অমা চিংথোক্লে।” রুসিনা খঙহল্লকই, মখোয়না হায়রক্লিবদু ঐবুনি।

মখোয়না লৈরিবা মফমদু য়ৌনবা হোবে হোবে তৌনা ঐনা চৎলগসু মিনিট তরুক তরেৎকী মতমদি অদুম চঙখি। অদুবু ঐনা খনখিবা অদুমক্তি ওন্নরম্লে। মখোয়না নোংমৈনা কাপ্লগা হাৎলে হায়রিবদু অরাংবা হায়না পনখিবদুদা ঐনা কৈ ওইরবোই খল্লুবনি। অদুবু চাউরবা লিন অমা ওইরম্মী। খরনা লাইরেন্নি হায়। কনা অমনা লিল্লবোপনিসু হেক হায়। মাঙজিল থানা চৎখিবা সর্জন মেজর খাবগী কাঙবুদুনা ‍‌‘চেৎ চেৎ’ লাউনা খোংবা তারকপদগী কোয়থি থিবদা, ঈশিংগা তাইনবা অচৌবা নূংজাও অনীগী কারক্তা লৈরমদুনা কাপ্পনি হায়না তম্মী। ফজনা চাউরে। ফিট অহুম চপ চানা কোল্লি। অদুবু চাউরিবদুগা হায়রগদি পংশাংদি শাংবা ওইদে। ফিট নিপান মখায়খক শাংই। মীওই অনীখক্না থাঙ্গৎপা লূম্বদগী অহুম চঙনা পুই। শাংনা পুবগী কান্নবা লৈতবনা, লৈতেম মান্নবা মফম অমা য়েংলগা লিনদুবু মকক তরেৎ থোক্না ককথৎলি। মদু থোংলগা চাগদৌরিবনি হায়। লিনদুগী মবুক মনুংদা পুংকক চাউরবা শজি অমসু য়োৎখিবগী য়াওরম্মী। ককথৎলবা মককশিংদু মখোয়গী সেক্সন কয়াদা অমুক য়েন্থোক্নখি। মদুগী তুংদদি থোইনা পন্থবা তৌদনা মখা তানা ঐখোয় লোক্নুংদুদা অমুকসু অসুম লাক্লে। অদুবু ঐগী থাংলিবা খোঙথাংশিংদু করিগুম্বদদি ইশং থাংবগী মরাং‑তুরাংনা লৈবা নূংগী শরুক খরবু হেক উরকপদা অমুক‑মুক চপ‑চপ লেপ্পি।

নুমিৎ তাগদবা পূং অমা খরা হেন্না ৱাৎলি। ঐখোয় খূদিং লোক্তুগী য়েৎথংবদা লৈবা চীংমায়দুদা কাখৎলগা নুমিদাংগী চাক্তু থোংননবা থৌরাং তৌনৈ। খরনা চীংমায়দগী অকংবা শীং থিরক্কনি। খরনা লোক্তগী ঈশিং শোক্লুগনি। খরা অমনা মখোয় অয়াম্বনা পুরক্লিবা চেঙ‑চাক হৱাই‑চেঙৱাই হাপ্লগা লেংবান্দা য়ানবা য়াননবা উতোং শানা থৌওইনা তূরবা ফিগী অশাংবা খাউশিংদুদগী চেঙ‑চাক খাইদোক্লগা থোংনবা হোৎনৈ। খরা অমনা অমুক লোক্নুংদগী হাৎখিবা লাইরেনগী মককশিংদু ঙা শেম্বগুম শেমগৎলকই। ঐ অমদি ঐনা নৌনা খোঙবু শেমদুনা পূল্লবা ইয়াম্বা মীচম অমা য়াওরিবদুগদি মদু হৈনদবনা ঙা কৌতাগা চাননবা থৌরাং তৌই। ময়ামদুনা তৌরিবা পূম্নমক্তু ঐনদি রেকোর্দ অসুম তৌশিল্লি। থোংলিবা চাক্তু লোইরবদা মখোয়না পুনরকপা অপাকপা চেরংশিংদুদা থিরগা মীওই মঙা‑তরুক মঙা‑তরুক পূন্না পূন্না চায়। চাবা হৌরকপগী অদুদদি নৌহৌনা নীংশিংলকই— ঐখোয় অয়ূক্কী চাক্তু হৈদোক্লম্লগা চারক্তনা লাকখিবনি। খৌরাংলবা মতমদা থকপা ঈশিং, লাম্লবা মতমদা চাবা চাক‑এন্সাং, অঙকপনি। তিলহৌ চনম থাক্তুনা থাউ অমুক হন্না ঙৌরগা থোংবু নত্তবা, শূপ্নগী মৈদখক শাহল্লগা চাবা ঙা কৌতাগী মহাওদু ঙসি ফাওবসিদা অদুক হাউবা অমুক্তা থেংনখিদ্রি। চাবদু লোইরগা কোল‑লীক চামথোক্লবা মতুং মখা তানা ঐখোয় অমুকসু অসুম লাকই। মতুং অদুদদি মমশিল্লক্লবনা ঐখোয় লোক্নুংদা চৎত্রে। নোং পুবা লৈচিলনা খঞ্জিল্লিবা থাবলগী মঙালদুদা চীংগী চীংমায়দা, মাঙজিল থাবশিংনা উশা‑ৱাশা নাপী‑মোংশোংশিংদু থাঙনা হাইদৎলগা চৎখিবগী লীক্লমদু মুন্না য়েংলগা অসুম চৎলি। করিগুম্বদনা ঐখোয় ইশানসু হাইদৎচরগা হেক চৎচৈ। অসুম্না ময়ায় ওইরপ্না ৱাংলবা চীংয়াঙ অমা অনী ফাওবা লান্থোক্লগা লাক্লবা মতুং ৱা হৌরম্বা মফম অমদা ঐখোয় অহিংদু পোত্থানবা থৌরাং তৌই। মতমদু নুমিদাংগী পূং তরামখায়মুক তারে। মাগী মাগী সেক্সনদা য়াওরিবা মখোয় খূদিংদু কনাসু পোত্থারগা লৈতে। খরনা ৱা য়াল্লগা দম্বুর খন্দুনা শঙ শানবা থৌরাং তৌই। খরনা পায়া শিরক্কনি। খরা অমনা অমুক তূম্বদা মোন ওইনবগী নাপী ফাল্লগা পয়ানা কিদুনা শেম্লক্কনি। অঙকপগী মতৌনি। মীওই তরা তরামুক চনগদবা শঙ অমমমদু শাবদা পূংখায় অমরোমদগী হেন্না চঙদে।

নুংথিলগী মতমদা তুং‑মাঙ কোয়চেন চেন্দুনা ভিদিও নম্নবা হোৎনবগী ৱাবনে, অদুগা নুমিদাংদুদনা চীংগী অনেম‑অৱাং কয়াদা কাখৎ‑কূমথ তৌদুনা লাকপগী চোকথবগা, ঐদি কোক্কা মোনগা তাইনবদা অদুম তূমথখ্রমাল্লে। ঐনা নুংঙাইনা তূম্লিঙৈদুদা কনানো অমনা ঐগী ইশা নোম্লগা তহা‑তহাবা মতৌদা হৌদোরকই, “ইয়াম্বা ইয়াম্বা, নমীৎ শিংঙু। করিগুম্বা অমা তৌদৌরে।” ঐ মফম মরাং অমা ইখঙ খঙদনা ফূক হৌগৎলি। ঐনা তূম্লিবদুগী খরা চৎথোক্লগা, দম্বুরদুগীদি মনুংদা সর্জন রুসি মানা ৱায়রলেস রেদিওদু পূক্নিং চঙনা তাবগুম তৌরি। লাক্লিবা খোঙবু ঐখোয় ময়ামদুবু লমজিংলক্লিবা মেজর লোয়াগা মাঙজিল থানা চৎলিবা সর্জন মেজর খাবগা রেদিওদা ৱারী শানরিবা অদুনি মখোয়না পূক্নিং চঙনা তানরম্লিবদু। মেজরনা তপ্লপ্না হায়বদু ঐসু তায়, ‍‌“য়াম্না চেকশিন্না লৈয়ু। ইন্দিয়ান অার্মি ওইগেরা, কুকি মিলিটেন্টশিং ওইগেরা নৎত্রগা স্মগ্লরশিং ওইগেরা ওইনীংবা অমা হেক্তা ওইরমসনু; কনা অমত্তা নান্থোকহনখিগনু লোইনা কাপথৎলু। শুপ্নগী নখোয়গী নাক য়ৌরক্কদবা খোঙকাপ তরামরি তরামঙাখক্তা ঙায়রবকালদা কাপকদবনি খঙলবরা?” ঙাঙনরিবদু তাবদা ঐ মীৎ‑না খংশিং শিংই। ঐগী তূম্ফম ময়ামক্তদা থম্লিবা ঐগী কেমেরা য়াওবা খাউদু ইনাক্তা হেন্না নকশিন্না থম্মী। ঐ হৌগৎলে হায়বদু খঙলদুনা সর্জন রুসিনা ঐঙোন্দা হায়রকই, “ইয়াম্বা মীৎ শিংবিরবা নৎত্রা? খূদক্তা হেক্তা চৎখিবা য়াবগী ফিভমদা থৌরাং তৌরগা অদুম লৈবিয়ু। করিগুম্বা নোংমৈ কাপ্পগী মখোল হেক তারক্লগদি ঐখোয় মফমসি থাদোক্লগা থুনা চৎখিগদবনি। অদুবু হীপ্লগদি অদুম লৈবিয়ু?” মিহুল তিং‑তিং চোংনা ঐগা লোয়নরিবা ইয়াম্বা অদুগা ঐখোয় অনী উপ্না হীপ্লগা তূমিন্না ৱারী শারগা লৈ। ইয়াম্বা অদুনা তম্বদগী খঙবদি, ঐখোয় লাক্লিবা খোঙবু অদুগী মাঙজিল থাখিবা সর্জন মেজর খাবগী কাঙবুদুনা লৈরিবা মফমদু তম্না টোর্চলাইট কাপ‑কাপতুনা মীওই তরামুক অহিংদুদা উরক‑ৱারকশিংদু ফাওনা চঙশিল্লক্লে হায়না পাউ পীরকপগী ওইরমখি। মদুগা ঈরোয়ননা ঐখোয়না থংনবা মীৎকূপতুদা হেক্তা, নাকোং শীংজা য়ৈবমখৈ হৌনা অহিংদুদা নোংমৈ মখোল কয়া মশীং খঙদনা তারক্লগনি হায়বসিনি ঙাইনরিবদু। অদুবু মীৎকূপ কয়া অসুম মথং মথং হৌখি। নোংমৈ মখোলদি সুক্তা তারক্তে। ঐ হাকাম চল্লকপগা ঈরোয়ননা মীৎসি খক‑খক চিংলকই। তাঞ্জাদুদা সর্জন রুসিনা ঐখোয় ময়ামদা হায়রকপদু তায়, “টোর্চলাইট কাপ্লগা লাকপা মখোয় খরদু মায়কৈ অমদা অসুম চৎখ্রে হায়।”

মথংগী অয়ূক্তুনি। ঐখোয়না অহিং লমদন্দুনা লৈরিবা মফমদুমক্তদা অয়ূক্কী চাক্লেনদু খরা ঙন্তক্না পূং নিপালমুক তারকপদুদা চায়। মদুগী তুং থোইনা পন্থবা তৌদনা অমুক খোঙশাল্লক্লে। মমাঙগী নুমিত্তা লোক্নুংগী চাউর‑চাউরবা নূংজাও কয়াদা কাখৎ‑কূমথ তৌদুনা ভিদিও নম্বগী হঙ্গৎ‑হন্দা কোয়চেন চেনবগা লোয়ননা মফম খরদদি অঙম্বা চীংগী শরুকশিং লান্থোক্নবা কাখিবা কয়াদুনা খুবোম অমদি ফৈগলগী তোংশাশিং কায়দুনা হায়নীংঙাই লৈতনা অনাবা ফাওই। অদুবু করমদি তৌনি, লৈহৌবদি য়াদবনিনা অদুম চৎলে। হন্দকসু চীংগী লোক্নুংদুদা চৎত্রে। চীংয়াংদগী খরা হাইথরগা হান্নগী মতৌগুম উশা‑ৱাশা নাপী‑শীংবী কয়া অমা হাইদৎ হাইদত্তুনা অসুম লাকই। নুমিৎয়ূংবা পূং তরানিথোই তারকপগী অদুদনি। সর্জন রুসিগা লোয়নরিবা ঐখোয়গী খোঙবুসু মণিপুর তুরেলগী তোর্ব্বান্দুদা থুংলৈ। মফমসি য়ৌবদা ঐগী পূক্নিংদা করিগীনো খঙদনা হায়নীংঙাই লৈতনা নুংঙাইবা অমা ফাওই। অদুগা অমুকসু ঙকপগীসু পন্দোল লোমখ্রে। মণিপুর তম্পাক্কী লমদা ইম্ফাল তুরেল হায়রগা খঙনরিবা মণিপুর রিভরগী তম্পাক্তা উরিবা মশক্তুগা মফমসিদা উরিবা অসিগদি পূমতোং তোঙাল্লি। মফমসিদা ওইরিবা মতৌদি, তুরেলগী তোর্ব্বান অনীমক চপ য়ুংনা বিলাতিমাতিনা থৌৱা ইশা শাদনা পঙহৈ হৈজিল্লগা শেমখিবা ফক্লাং অমগুম নৎত্রগনা লোইবা খম্বা নাইদ্রবা রিটেন্নিং ৱাল অমগুম্না পূম্পাক পাক্না লৈঙোয় মরিক অমা ফাওবা উদবমখৈ লৈরি। লোয়ননা তুরেলসিগী ময়ায় অমদি মফম খূদিং শীন‑থুংনা মশোঙ নাইনা অচৌবা নূংজাও কয়া থিনগৎলগা লৈ। তুরেলগী ঈহৌরকফমশিংদা নোং কন্না চুখিবা মাল্লি। লৈঙাং চেন্না ঈচেল কন্না চেল্লম্লিবা তোর্ব্বানদু পাদ্রবা ফাওবদা নীক‑নীক লাউনা ঈশিংগী ঈমায়দুদগী ময়াং নাইনা শাংতক তৌবা নূংগী শরুক কয়া লীৎখৎলগা লৈরিবশিংদু উবদা গুম্ভির মমায় অমা তাউরগা লৈরিবা ওইনা খন্দবা কনাসু লৈরোই। মফমদুদগী মিটর য়াংখৈ‑হুম্ফুখক তুরেলগী তোর্ব্বান্দুদা ম্যান্মারগী মায়কৈরোমদা চৎলগা ‍‌‘চীংনুংহুৎ’ হায়না খঙনবা মফমদু অদুম লৈরে। তুরেলসিগী ঈচেলনা ম্যান্মাররোমথংবা কূত্থবা শরুক্তুদা চেন্থখিবগী হৌরবা ঈশিংগী ঈরাওখোল মফমসিদগীসু অদুম তায়। মসিগা ঈরোয়ননা ঈশিং কাপথখিবগী ঈরিকশিং অদুনা লৈচিল মফোল ওইনা মফমদুদা হৌরিবা উপাল‑ৱাপাল কয়াদুসু লৈচিলনা পূমঙৌ ঙৌনা কূপশিনখিদুনা য়েংবদা অমত্তা উহন্দ্রে। ঐখোয়না থুংলিবা তোর্ব্বানসিদগী ঐখোয় অৱাংলোমদা মতেক খরা অমুক লাকই। চুরাচান্দপুর অমদি চান্দেল দিষ্ট্রিক্ট অনীগী লোন্নবদনি, তুরেলসিনা মফমসিদা চেল্লিবসি। মিনিট মরি‑মঙা লাক্লবা মতুং চান্দেল দিষ্ট্রিক্টকী শরুক ওইবা তোর্ব্বানদুদা বোর্দর পিল্লর অমা থেংনৈ। অসুম্না থাই—INDIA, Pillar no. 2, B.P.‑A9 (2), 1969‑70. লাকমিন্নরিবা মখোয় নহা খরনা ঐঙোন্দা তম্মী, ‍‌“ইয়াম্বা, সিগী বোর্দর পিল্লরসি নহালৱাইদি চীংনুংহুৎকী ঈশিং কাপথখিফম ময়াদুদা য়ুংলম্বনি। চহী মরি‑মঙামুক শুরক্লে বর্মাগী লান্মীশিংনা ঐখোয়রোমদা কিলোমিটর তংখায়মুক খরা হেন্না চঙশিল্লগা য়ুংশিল্লম্লিবসি।” তম্লিবা পাউদু তাবদা ঐ খংশাউ শাউনীংলকই। তম্লিবা মখোয়দবু ওনশিল্লগা চৈনীংই, ‍‌“নখোয়না অমুক মখোয়রোমদা হেঞ্জিন্না চঙশিল্লগা য়ুংলুবদি কৈদৌই?” অদুুবু খা চীক্লগা অদুম খাঙলে।

সর্জন মেজর খাবগী কাঙবুনা ঙা ফাবগী কুকি নহা অনীনা হোল্লকপা হি অদুবু ফাজিল্লগা ঐখোয়গী লাক্লিবা কাঙবুশিংদু মথং মথং অসোমথংবা তোর্ব্বান্দুদা লান্থোক্লি। হিদু কয়া চাউদে। মী অনীদগী হেন্না তোংবা চন্দবা হিনি। থাঙ্গদগী হিদা খূৎলোয়রবা নহা অনীনা অমনা ৱারক্লবদা অমনা মহুৎ শিন্ন‑শিন্ননা লান্থোকই। থেংনরিবা কয়াদু ঐনদি মতেক মতেক ভিদিও অসুম লৌশিল্লি। য়াম্লবা মীওইশিংদু অমমমতা ওইনা অসুম লান্থোকপনিনা লোইবা খম্বা নাইদে। খরগা হেন্না তপথনবগী মরম অমদি তুরেলগী ঈচেলদু ঈরৈ নাইনা কন্না চেনবনা হিদু তুরেলদুগী ঈয়ায়মক্তদা অনীরক্কুম্বা হিরু‑হিনাউদু উরু‑রু লৈরুরবা মতুং ঈচেলনা চেন্থহল্লগা তোর্ব্বান্দা তপ্না তপ্না হোঞ্জিনবনি। অসুম্না লেপ্তনা হি মচাদুনা মীওই অমমমদা লান্থোরকপদু ফনা কুইরে। লান্থোক্কদবা মীওই পংয়াম য়াম্লক্ত্রে। পূং অহুম ময়া নক্নসু চঙখ্রে। মতুংদুদি লৈথোকপা য়াদ্রবা ঐগী পূংফমদু অমুক লাক্লে। মীৎকূপসিদা ঐনা খল্লি। ঙসি হায়বা নুমিৎসি ঐগী পুন্সিগী অরোইবা নুমিৎ হায়বদু ওইরমাল্লে। ঐনা হিসি তোংদুনা তুরেলসি লান্থোক্নবা তৌবদা তুরেলগী ঈয়ায়দা ঈরৈনা হিসিবু উরু‑রু লৈহল্লকপা মতমদুদা করিগুম্বা লাকশিনবা থোক্লগদি কনানা ঐবু কনবিগনি? ঐদি তশেংনা ঈরোয়বসি মপূং ফানা হৈতবনি। ওহ! ঐনা মিজোরম অমদি ম্যান্মারগা লোন্নবা ঙমখৈদু য়ৌনবা লাক্লিবা খোঙচৎসিদি ঐগীদি মণিপুর তুরেলগী চীংনুংহুৎ ময়াসিদা পুন্সিগী অরোইবা পন্থুং হায়বদু ওইবা তারবা…। খঙহৌদনা ঐগী মীত্তা ঈরা চেল্লকই। অদুবু তপথবদি য়াবা নত্তে। ঐ খা চীক্লগা, শিদবা মপুবু পূক্নিংদা খুরুমজরগা হিদুদা লাইবক কৎলগা কাখৎলক্লে।

এবষ্ট্রেক্ট হাওবম তোম্বগী নুরা শান্থলেম্বী দ্রামাদা সাহিত্য সমালোচনাগী লৈচল থিজবনি। মপূং ওইনা ভারতকী কাব্যশাস্ত্রগী মীৎয়েংদগী দ্রামা অসিগী তোপ-তোপ্পা মগুণ পুথোক্নবা হোৎনজরি। ফোল্ক দ্রামা অমা ওইবগী থোইদোকপা মগুণ শাগোন্নরিবা ৱারীগী পরিংদা নীংথিজরবা লোল অমসুং ৱাহৈগী লৈতেং কয়া য়াওরি। অলঙ্কারগী মরুওইবা মচল কয়ানা দ্রামা অসিগী মগুণ হেনগৎহল্লি। মরুওইনা শব্দালঙ্কারগী মনুং চন্না অনুপ্রাস, বীপাসা, পুনরুক্তিপ্রকাশ অমসুং অর্থালঙ্কারগী উপমা, রূপক, অতিশয়োক্তি, পর্য়ায়োক্তি, লোকোক্তিনচিংবা অলঙ্কার কয়াগী লৈতেংদা তান্থা নাইনা অপাবা অমদি অতাবগী থম্মোয়বু শুমহৎলিবা মচাকশিং উৎচরি। ভর্স প্লেগী মওং লৌদুনা ইরক্লিবা শ্রীহাওবম তোম্বগী নুরা শান্থলেম্বী দা ৱাহৈ অমসুং লোলগী লৈতেংশিং পুথোক্তুনা উৎচবা অসিনা আর্টিকল অসিগী পান্দমনি।

কি ৱার্দ্‌স ফোল্ক দ্রামা, অলঙ্কার, শব্দালঙ্কার, অর্থলঙ্কার, ভর্স প্লে।

ৱাহৌদোক শ্রীহাওবম তোম্বা সিংহ (১৯০৮-১৯৭৬) মণিপুরী ফোল্ক দ্রামাগী অচৌবা লীক্লম য়াৎলম্বা অইবনি। কুনশুবা চহীচাগী অঙনবা মতমদা মমারোলগী সাহিত্যবু নুংশিবগী ঈহৌ কয়া লৈরকপা মতম অদুদা চোংথোরকখিবা লময়ানবা অইবশিংগী মতুংদা লাকখিবা মশাগী শক্তম, কলচর, ট্রেদিসনদা ঙাওজবা, কনবা পামজবা, তাবুনুংদা লৈখ্রবা ৱারী কয়াবু চিংথোক্তুনা উৎপা, লীবা পামজখিবা ফোল্ক দ্রামাগী শক্নাইরবা অইবা অমনি। মহাক্না লীলা তরাহুমদোইমুক ইরম্মী। লাইরিক ওইনা ফোঙখ্রবশিংদি—নুরা শান্থলেম্বী (১৯৬২), তাম্না (১৯৬৪), পিদোন্নু (১৯৬৪), থায়নগী লৈরাং (১৯৬৫), শাইয়োন শাফবা (১৯৬৫), শজিক থবা (১৯৬৭), থাজ থবা (১৯৬৭) অমদি মৈতৈ চনু (২০০৯) অসিনি। মহাক্কী ফোঙদ্রিবা দ্রামাশিংনা—‘পান্থোইবী’, ‘খম্ব‑থোইবী’, ‘মৈহাপ লুপ’, ‘লিন্থোইঙম্বী’ অসিনচিংবনি। মণিপুরী সাহিত্যদা মহাক্না তৌরম্বা অচৌবা খূদোলদি শৈরেংগী ফোর্মদা ইবা (ভর্স প্লে) লীলাগী মশক অসিনি। কবি ওইবগী চপ চাবা গুণ লৈখিবা অইবা অসিনা মৈতৈলোনগী ফজবা অমদি চীং‑লেম্বা ৱাহৈ শীজিন্নদুনা ফোল্ক দ্রামাগী ময়াই অমা পীননবা হোৎনখি। ওজা ওইবগী শিনফমদা পুন্সিগী অয়াম্বা শরুক কত্থোকখ্রবা ঈংন-তপ্না পুন্সি হিংবা পামজবা, ফিজেৎ-চাকচা অমদি ৱাঙাঙ‑শাঙাঙদা ইচম-চমজবা অইবা অসিনা মণিপুরী দ্রামাগী খোঙচত্তা পীরম্বা খূদোল অসি অমুক নৌহৌননা নীংশিংবা য়াম্না মথৌ তারি। মণিপুরী ফোল্ক দ্রামাগী তোপ-তোপ্পা মশক অমা লৈজরি। মণিপুরী অশৈবশিংগী ৱাখল্লোন কয়া, পুন্সিগী মীৎয়েং অমসুং জগৎ অসিগী ফোঙবা ঙমদ্রবা পাউখোং কয়া, ফোল্কতা য়ূম্ফম ওইবা ৱারী শিংবুন কয়াদা মহাক্না ফোঙদোক্নবা হোৎনরম্মী। মরম অসিনা শ্রীহাওবম তোম্বগী নুরা-শান্থলেম্বী দা মীৎয়েং থমদুনা সাহিত্যগী ফজবা লৈচলশিং পুথোক্তুনা উৎনবা হোৎনজরি।

নুরা শান্থলেম্বী গী শম্লপ্পা ৱারী নুরা শান্থলেম্বী মণিপুর দ্রামাগী লৈকোন্নুংদা নুংশিবগী মৈচাক কয়ানা মৈৱায়বা, নীংখিবদা খোঙফম চেৎপা, শারী নামুংদা হোংখিদবনা অৱাবনা পোলোই ওই, মীৎলুগী লাইজ ঈফূৎ তৌরিবা শ্রীহাওবম তোম্বগী তোমথিন ঙাল্লিবা খূদোলনি। দ্রামা অসি মায়কৈ মায়কৈ লেপনদুনা অমনা অমগী মায়োক্তা লৈদুনা শমজিন্নবা য়াদ্রবা অকায়বা লীক্লিগুম খাইবুং খাইবুং তানখি। মশাগী ৱাশক ঙাক্নবা হোৎনবদা পূক্নিং চেৎনা লেঙদনা লৈরুবদগী তুংগী পুন্সিদা অৱাবনা লাঙ্গোই চল্লকপা, মাঙনবগী মরম ওইরকখি। নুরা পাখং নুংশিনবগী খোঙহৌ তপ্না চেল্লকপা ঈচেল মতমগী তান্থা তুংইন্না অকনবা শাফুগা লোয়ননা চেন্থরকপা মীৎকূপ্তা থীংনবা হোৎনরুবা অৱাংবা পল্লোন কয়া নমখায়রক্তুনা নুংশিবগীদমক থৱায়না পোন্থা ওই, নুংশি ৱাশক ঙাক্নখি। থোঙনাও-শান্থ অনীগী নুংশিনবা অশেংবা অমকপা য়াওদ্রবা নুংশিবগী মশক্নি। থৱায়গা থৱায়গা য়ানদুনা নুংশি পন্থুং য়ৌনা চৎনবা অপনবা অয়েৎপা পূম্নমক মায়োক্নবগী অমুক শেত্তোক্নবা য়াদ্রবা ৱাশক্না লীপূন ওইনখি। তম্বা ঙমদবা মীওইবগী পুন্সি খোঙচৎনি। শাগৎচরুবা অাশা নুরা‑পাখঙ অনীগী নোংদম্বনা তম্লমদ্রে। খাইবুং খাইবুং তাবা মায়কৈ অনীদা খোঙজোম্বা অমসুং থোঙনাওঙম্বা লেপ্নখি। খোঙজোম্বাগী থক্তা অমা শাৎত্রবী খাদা অমা পোমদ্রবী শান্থলেম্বীবু শরী নমুংদুনা ওকচিল্লাকপগী মচানীপা শমুলেম্বদা থাজখি। মসিনা মরম ওইরগা মাগী ৱাশক ঙাক্নবা হোৎনবদা তমথীরবা শক্লোন লৌরকখি। থেঙখাং কয়ারক্তা থোঙনাও অমদি খোঙজোম্বা মূক্নরকখি। অমনা অমবু হনবা লৈখিদে। অনীমক থৌনা ফবা শিবা কিদনা নুপা থোক্না চাংয়েংনরকখি। খোঙজোম্বনা মহাক্কী শকখিবা ৱাশক ঙাক্নবা হোৎনরকপা লোয়ননা খোঙনাওসু মাগী নুংশি মৈরীনা নোংম‑নোংমগী মৈরায়রকপা হেল্লকপনা থৱায়গী পাম্মুবা লৈরক্তা নুংশিবী ইনেমচাগীদমক খোঙফম চেৎনা লেপতুনা নুংশি ৱাশক ঙাক্নবা হোৎনরকপদগী দ্রামা অসিগী ট্রেজিক এন্দিং ওইররক্নবগী চাউরবা মরম ওইরি। হনবা নাইদ্রবা মখোয় অনীগী খোঙফমদা থোঙনাওঙম্বগী পুন্সি খোঙজোম্বগী মখূৎতা লোয়খি। কায়নবগী মৈরীনা মশা পূম্বা মৈরায়রবী শান্থলেম্বী খাঙবা ঙম্বগী ৱাংমা লাল্লকপনা পাম্মুবা মাগীদমক মশা মথন্তা শিজদুনা মৈদিগোল থোঙনাওঙম্বগী মতুং ইনখি। অসুম্না অশেংবা নুংশিবগী ঈচেল্লক্তা ৱাশক্কী কল্লবা ঈরৈনুংদা কায়নবগী, থম্মোয় কায়বগী খোঞ্জেলনা শুমদুনা পোল্লো়ইনখিবা শ্রীহাওবম তোম্বগী লোইনাইদ্রবা রস কয়াগী ঈরোক্নফম ওইরবা দ্রামা নুরা শান্থলেম্বীনি।

অলঙ্কার কাব্যগী মগুণ হেনগৎহন্নবা লৈতেং ওইনা শীজিন্নরিবা ৱাহৈ অমদি মদুগা ইরোয়নরিবা অর্থ অদুবু কাব্যগী অলঙ্কার কৌই। অলঙ্কারগী মীৎয়েং পাকচাওই। অলঙ্কার সম্প্রদাই অসিগী অহৌবা নৈন মীওই ভামহনা হায়, ‍‌‘‍‌চনুগী মায়থোঙনা ফজরবসু লৈতেংদ্রবদি ঙান্দে’—‘নকান্তমপি নিভুষং বিভাষিত্ বনিতা মুখম্।’ পোৎশক অমগী মগুণ হেনগৎহনগে হায়রবদি লৈতেং কয়া তৌবা চঙই। নীংথিনা লৈতেংলবা মতমদা পোৎশক অদু অনৌবা মতীক‑মঙাল অমগা লোয়ননা শাফোংলকই। অসুম্না কাব্যগী ফজবা নীংথিজবা হেন্না হেনগৎনবা খোইথুম্লবা ৱাহৈগী (লোল) গী লৈতেং কয়া শীজিন্নদুনা পুথোরকপা মশকপু অলঙ্কারনি হায়বদা অচুম্বা ওইগনি খঞ্জৈ। অলঙ্কারনা কাব্যগী নীংথিজহল্লিবগী মরম অমসু চাউনা ওইরি লোয়ননা মপান্থোংগী ওইবা ফজবখক নত্তে নুংগী ওইবা ফজবগী মতীক অদুসু কোনশিল্লি। লৈতেং হায়বসি শিংথাবগী তোঙান‑তোঙানবা পথাপশিংনি, হায়দোকপগী তোঙান তোঙানবা মওংশিংনি। মরম অসিনা রুয়য়ক্না হায়বম্মী, ‘অলঙ্কারনা কাব্যাদা মরূনি’—‘তদেবমলংকারা এব কাব্যে প্রধানমিতি প্রাচ্যানাং মতম্।’ (রুয়য়ক, অঙ্কার সর্বস্ব)। ভরত মুনিনা ‘নাট্যশাস্ত্র’ দা অলঙ্কার’ মরিতমক পল্লম্মী: অনুপ্রাস, উপমা, রূপক অমদি দীপক। মতমগী মতুংইন্না তোঙান‑তোঙানবা সম্প্রদায় অসিগী নৈন‑মীওইশিংনা মথং মথং পুথোরক্তুনা চাউরাক্না অলঙ্কার চনীমুক শুরে। অলঙ্কার মখল অনী থোক্না খায়দোকপা য়াই। শব্দালঙ্কার অমসুং অর্থালঙ্কার। ৱাহৈদা লৈবা অলঙ্কারবু শব্ঙ্কালঙ্কার অমসুং অর্থদা লৈবা অলঙ্কারবুনা অর্থলঙ্কার হায়না খঙনৈ। ৱাহৈ অমসুং অর্থ অনীমক্তা লৈবা অলঙ্কারবুনা উভয়ালঙ্কার হায়না কৌই। মসিবু অলঙ্কারগী তোঙানবা মখল অমা ওইনা খায়দোক্তুনা থম্নদে। নুরা শান্থলেম্বী দা য়াওরিবা শব্দালঙ্কারগী মখলশিং লৌখত্তুনা নৈনজরি— অনুপ্রাস অলঙ্কার: ব্যঞ্জন ময়েকশিংবু রসকী মতুংইন্না নীংথিজনা, অমগা অমগা নক্ননা হন্ন-হন্না শীজিন্নববু অনুপ্রাস অলঙ্কার কৌই। দ্রামা অসিদগী খূদম খরা থমজরি। দ্রামা অসিগী অনীশুবা তাঙ্কক অহুমশুবা উৎপা মতাংদা শোইবোলনা শমুলেম্বদা করেম্নদুনা হায়রকপদা য়াওরিবা অলঙ্কারগী মশক লৌখৎচরি: শৌ-শৌ-লাউবা শোইবোন্না শৌগৎ-শৌগৎ শেম্লকপা শমু শান্থ শীঞ্জীনবা, শীল্লে শীল্লে শোইজিন মুক শীল্লে! কো ইবুংঙো কো। (লা: ৭৫) মসিদা ‘শ’ ব্যঞ্জন ময়েক ৱাহৈগী অহৌবা খোন্থোক্তা তরাহুমদোইরক (১৩) অমসুং ‘ক’ অনীরক হন্না শীজিন্নদুনা তাবদা নীংথিজবা মওংদা নক্ননা থম্বনা বৃত্ত্যনুপ্রাস অলঙ্কার ওইরি। অহানবা তাঙ্কক অনীশুবা উৎপদা শমুলেম্বনা হায়রকপা ৱাঙাঙ উৎচরি: নঙসু নীপ মচানি ঐসু নীপা মচানি নঙনা করি হেনগনি, ঐনা করি ৱাৎকনি। (লা: ৯) শমুলেম্বগী ৱাঙাঙদা পরেংশিংগী অরোইবা খোন্থোক্তা ‘ন’ ব্যঞ্জন ময়েক্না মান্ননা লাকপনা অন্ত্যানুপ্রাস অলঙ্কার ওইরে। বীপাসা: থম্মোয়গী অৱা-নুংঙাই ইকায়-ইকি, হঙ্গোইবা-তূক্কৎচবা, অঙকপা-অপেনবা অসিনচিংবা ফিভম ফোঙদোকপা ৱাহৈশিং থম্মোয় শীনবা থুংহন্নীংবদগী ৱাহৈ হঞ্জিন-হঞ্জিন হায়ববু বীপাসা অলঙ্কার কৌই। দ্রামা অসিদা য়াওরিবা বীপাসা অলঙ্কারগী খূদম অমা লৌখৎচরি: মাঙলে মাঙলে ইতারোই মাবু থেমজিনবিখোকো খোয়ুম নোংদম য়েংখিসি। (লা: ৬৯) শান্থলেম্বীনা থোঙনাওঙম্বগীদমক ৱাজবা মতৌ ফোঙদোরকপা মতাংনি। মসিদা ‘মাঙলে’ হায়বা ৱাহৈ অসি অনীরক হন্না শীজিন্নদুনা অৱাবা ফোঙদোক্লি। মরম অসিনা বীপাসা অলঙ্কার লৈরে। পুনরুক্তিপ্রকাশ: করিগুম্বা ৱাহৈনা ফজহন্নবগীদমক হঞ্জিন-হঞ্জিন চপ মান্নবা অর্থদা লাকপবু পুনরুক্তিপ্রকাশ অলঙ্কার কৌই। দ্রামা অসিদা য়াওরিবা পুনরুক্তিপ্রকাশকী খূদম খরা থমজরি: ১. উন-উন উথীনবা তান-তান তাথীনবা (লা: ১২) ২. মকোক উরু উরু ঙাওবমখৈ তবি তবি হেক মচেল্লি! (লা: ৩৪) মথক্কী খূদমশিং অসিদা ‘উন’, ‘তান’, ‘উরু’, ‘তবি’ ৱাহৈশিং অসি অর্থ চপ মান্ননা হঞ্জিল্লকপনি। মরম অসিনা পুনরুক্তিপ্রকাশ অলঙ্কার ওইরি।

দ্রামা অসিদা য়াওরিবা অর্থালঙ্কারগী মখলশিং উপমা: পোৎশক অনীগী অমগা অমগা মান্নবা মওং‑মতৌ চাংদম্নদুনা উৎপবু উপমা অলঙ্কার কৌই। উপমা তৌগদৌরিবা পোৎশক অনি অদুগী তঙাইফদনা কায়াৎ মরি চংই। মখোয় অদুদি—১) উপমেয়: চাংদম্নগদৌরিবা পোৎশক নৎত্রগা মীশক অদুবু উপমেয় হায়না খঙনৈ। ২) উপমান: চাংদম্ননবগীদমক প্রমাণ ওইনা শীজিন্নরিবা পোৎশক অদুবু উপমান হায়গনি। ৩) সাধারণ ধর্ম্ম: উপমেয়গা উপমানগা অনীগী মান্নবা গুণ নৎত্রগা শাজৎ অদুবু সাধারন ধর্ম্ম কৌই। ৪) বাচক শব্দ: উপমেয় অমসুং উপমান অনীগী সাধারন ধর্ম্ম চাংদম্ননবা ফোঙদোক্লিবা ৱাহৈ অদুবুনি। খূদম—‘কুম’, ‘গুম’ নচিংবা। উপমা অলঙ্কারগী খূদম অমত্তং লৌখৎতুনা নৈনজরি: নুরা নঙগী কাদদি লোইবি চীংগুম লেঙদ্রবা পামেল উগুম খাঙহৈবা পাখঙ ঐগী পুকচেলনি। পূক্নীং অনী লোঙজদ্রে, ৱাখল অনী ফাংজদ্রে। (লা: ২৭) থোঙনাওঙম্বনা মাগী চেৎলবা নুংশিবগী ফিরেপ্পু শান্থলেম্বীদা খঙহল্লকপা মতাংনি। মসিদা থোঙনাওগী ‘পুকচেল’ না উপমেয়, ‘লোইবি চীং’, অমসুং ‘পামেল উ’ না উপমানশিংনি, ‘লেঙদ্রবা’ অমদি ‘খাঙহৈবা’ না সাধারন ধর্ম্মনি অমসুং ‘গুম’ না বাচক শব্দনি। উপমাগী কায়াৎ মরিমক মপূং ফানা য়াওবা মরম্না পূর্নোপমা ওইরে। রূপক: উপমেয়বু উপমানগী মওং লৌহন্দুনা অনীমকপু চপ মান্ননা অমত্তা ওইনা উৎপদা লৈবা অলঙ্কারবু রূপক অলঙ্কার কৌই। খূদম: শান্থ-থাগী থাজদি থম্মোয় ফাওনা ঙান্দুনা কোকহনবিরে পূক্নীংগী অমম্বদি পুম্নমক! (লা: ১৩৬) মফম অসিদা ‘শান্থলেম্বী’ (উপমেয়) বু ‘থা’ (উপমান) গী মওং লৌহন্দুনা অনী অসি খেন্নবা লৈতেনা মান্নহল্লে। মরম অসিনা মসিদা রূপক অলঙ্কার লৈরে। অতিশয়োক্তি অলঙ্কার: করিগুম্বা পোৎশক অমগী মগুণ হেনগৎহন্নবগীদমক কা হেন্না হায়জিনবদা ওইবা অলঙ্কার অদুবু অতিশয়োক্তি অলঙ্কার কৌই। দ্রামা অসিদা য়াওরিবা খুদম অমা য়েংলবদা: থোঙনাও শয়াঙ-ঙম্বগী কোলোয় ইমিং তাবদা নোংদোল শুন্দা পাইরিবা চেক্লা শাখপ কায়দুনা মালেম থক্তা কেল্লিবা— থোঙনাও-ঙম্বা ঐনবু তন্বা নঙবু লোইশিনবা ৱাংলেন মীৎকুপ ফাগদ্রা? (লা: ১৪) মথক্কী দ্রামা মতেক অসি থোঙনাওঙম্বনা খোঙজোম্ববু শীংনদুনা হায়রকপা মতাংনি। মসিদা থোঙনাওঙম্বগী মগুণবু কা হেন্না হায়জিন্দুনা মহাক্কী মমিং তাবদা নোংদোলদা পাইরিবা চেক্লা ফাওবা কেল্লকই হায়না ফোঙদোক্তুনা ফজবা হেগৎহল্লি। মরম অসিনা মফম অসিদা অতিশয়োক্তি অলঙ্কার লৈরে। পর্য়ায়োক্তি: করিগুম্বা ৱাফম অমা চুমদ্রিং হায়বগী মহুত্তা কোইনা অতোপ্পা মওংদা হায়ববু পর্য়ায়োক্তি অলঙ্কার কৌই। খোঙজোম্বনা মমোমগীদমক মমাক ওইহনগে শীল্লিবা শমুলেম্বাবু শান্থলেম্বীনা পামদবা, য়ানীংদবগী মতাং অমা লৌখৎচরি: নোংমতসু নত্তনা পোকঙমদ্রবা মপোকসি; পিগী ঈরা কংদনা শায়বা শৌগী শৌরক্তা পুন্সি লোম্মু তাকপিবা পন্থৌ ৱাখল তোবিয়ু পায়মা পুকচেল কনবিনু। (লা: ৪৫) শান্থলেম্বীনা শমুলেম্বগী মনাক্তা লৈনীংতবগী অপাম্বা খোঙজোম্বদা চুমদ্রিং হায়বগী মহুত্তা কোইথোক্না অতোপ্পা মওংদা ফোঙদোক্লি। মরম অদুনা মসিদা পর্য়ায়োক্তি অলঙ্কার লৈরে। লোকোক্তি: করিগুম্বা বর্ণন অমা তৌবদা পান্থৈ পাউরৌ শীজিন্নদুনা ফজবা হেনগৎহনববু লোকোক্তি অলঙ্কার কৌই। খূদম অমা য়েংলবদা: নমোম অমত্তং পোক্লগা মীকোক অনীদা থাজবা মীগী শাজৎলা অসীবো? মীনা শিবনা মচীন্দা শানা শিবনা খোঙ্গুলদা পন্থৌ মসিদি খঙদব্রা? (লা: ৮৭) শমুলেম্বনা খোঙজোম্বদা ৱারৌনা হায়রকপা ৱাঙাংনি। মসিদা শমুলেম্বনা শান্থলেম্বীবু নুপা অনীদা খোঙজোম্বনা থাজরিবা করিগীনো হায়না মতাং চানা পান্থৈ-পাউরৌ শীজিন্নদুনা ফোংদোরকপদা লোকোক্তি অলঙ্কার ওইরি।

ৱারোইশিন নুরা শান্থলেম্বী দ্রামা মণিপুরী সাহিত্যগী লৈকোলদা অচৌবা মফম অমা কন্দুনা লৈরিবা দ্রামানি। শৈরেংগী মওংদা ইবা লীলাগী খূৎই অসিদা তোপ-তোপ্পা সাহিত্যগী মহাও অমা পীরকই। দ্রামা অসিদা শীজিন্নরিবা অনৌবা অমসুং অরিবা লোলগী লৈতেংশিংনা দ্রামা অসিগী মৈথৌ হেন্না পীরি। ভারত্য কাব্যশাস্ত্রগী মীৎলমদগী য়েংবদা মরুওইবা রস অমসুং অলঙ্কার মচল কয়ানা কুয়োমগুম্না য়োমশিল্লি। তান্থা নাইনা চেন্থরিবা লীলাগী দায়লোগকী খোলহায় খোন্থোক, সুর ছন্দ, জগোয়‑ঈশৈনচিংবনা অপাবা অমসুং অয়েংবশিংগী থম্মোয়বু শুমদুনা পুরি। লোয়ননা অসিগুম্বা য়ুনিক ওইবা মহাও অসিনা ভাবক্তা য়াম্না থ্রিলিং ওইবা হেনগৎহল্লি। কবিগী গুন চেল্লবা শ্রীহাওবম তোম্বগী নুরা শান্থলেম্বী তোমথিল ওইনা মণিপুরী দ্রামাশিংগী মরক্তা লৈহৌরগনি।

বিব্লিওগ্রাফি ১. শ্রীহাওবম তোম্বা সিংহ, নুরা শান্থলেম্বী (অহুমশুবা ফোঙবা), নহারোল সাহিত্য প্রেমী সমিতি, ইম্ফাল, ২০০৬ ২. শ্রীহাওবম তোম্বা সিংহ, মৈতৈ-চনু, হাওবম ইবোতোম্বী সিংহ, ইম্ফাল, ২০০৯ ৩. অরিবম ব্রজবিহারী শর্ম্মা (সম্পা:), অলঙ্কার কৌমুদী, অরিবম নবকান্ত শর্ম্ম, ইম্ফাল, ১৯৯৮ ৪. সুরচান্দ শর্ম্ম (সম্পা:), নাট্য-শাস্ত্র, ইম্ফাল: মণিপুর ষ্টেট কলা একাদেমি, ১৯৮৫ ৫. এলাংবম দীনমনি, ভারতকী কাব্যশাস্ত্র, অনীশুবা খূৎনম, নম্বোল: বোবী পব্লিকেসন্স, ২০০৯ ৬. ডা: ওয়নাম ইবোচাউবা সিংহ, মণিপুরী কাব্য‑কাঙলোন, মরিশুবা খূৎনম, ইম্ফাল, ২০১২ ৭. শর্ম্ম, শ্রীদ্বিজমনি দেব, অলঙ্কার শাস্ত্র, ইম্ফাল: আর বি প্রিন্টিং হাওস, অনীশুবা খূৎনম, ১৯৯৬

ইং ১৯৮১ দগী ওল ইন্দিয়া রেদিও ইম্ফালগী শৈরেংবা ওইনা শকখঙলক্লবা ঈশৈ ময়েক ইবা ডা যোদ্ধচন্দ্র সনসমনি। শৈরেংবগা লোয়ননা ফিক্সন ইবদসু থৱায় য়াওজরকই হায়বসি অইবগী ইং ১৯৮০ দা অহানবা লাইরিক ওইনা পুথোরকখিবা ৱারীমচাগী লাইরিক থাবলগী কুন্দো পরেং অমদি অনীশুবদা ইং ১৯৮১ দা ৱারী মপুমগী লাইরিক অকনবা শাফূগী ইরৈ ফোঙখিবা অসিনা ময়েক শেংনা তাকচরি। লাইবক থীবদি লাইরিক অসিমক মতমদুদা মীয়াম্না, অপাবশিংনা ফজনা পানখিবা লাইরিক ওইখিদে। শৈরেংবা অমা ওইনা সাহিত্যগী লমদা শকখঙবা অদুগা মশাগী শিনফমদা অনা লায়েংবা দোক্টর অমা ওইনা শকখঙবদগী হেন্না অইবা অসিবু খঙনখিদে। চহী কুনতরুক্লোমগী মতুংদা মণিপুরী সাহিত্যদা মপূং ফানা মায় লৈশিল্লত্তুনা মখা তাবা লাইরিকশিং খূদোল তৌবা হৌরকই। ইং ২০০৭ তা ঐগী ঈদা কৌবা শৈরেং লাইরিক অমা অদুগা শকখ্রবা ঈশৈশিং য়াওনা খোমজিনবা ঈশৈ শৈরেংগী লাইরিক ঙসিদি অশেংবা হায়দোক্লগে ইং ২০০৯ দা ফোঙলকই। মণিপুরী সাহিত্যদা অরংবা মশেক্কা লোয়ননা ডা যোদ্ধবু শকখঙলকখিবদি ইং ২০০৯ দা ফোঙলকখিবা মপূং ফারবা ৱারী মপুমগী লাইরিক মথৌ কনবা দি এন এ হায়রিবসিদগীনি। ফিক্সন ইবদা থোইদোকপা মতিং অমা লৈজৈ হায়বসি ইং ১৯৮০ দগী উৎপা হৌরকখিবনি। অদুবু মফম মতমনা য়াদদুনা য়াম্লবা চহী কুনমাপল্লোম অসি পূক্নিংদা ফাজিন্দুনা থম্লুরবা মতুংদা খঙহৌদনা ‘মথৌ কল্লবা দি এন এ’না অকনবা শাফূ অমগা লোয়ননা মথৌ তৌবা হৌরকখি। মদুদগী থিংঙমদ্রবা ঈচেল ওইনা ২০১০ দা নোং নঙ চুগে চুজরো (ৱারীমচা), ইং ২০১৩ দা লৈশাৎ তম্লে নঙগীদমক (ৱারী মপুম) অমদি ২০২০ দা থাজ চনু ( ৱারীমপুম) মথং মথং পুথোরকই। মতম অসিগী মনুংদা শৈরেং, ট্রান্সলেসনগী লাইরিক কয়া পুথোকখ্রে। হৌজিক ফাওবা ইমিন্নবা, হন্দোকপা য়াওনা পূন্না লাইরিক তরানিপাল ফোঙখ্রে।

ৱারী মপুম (নোভেল) ইবদা মায় পাক্লবা অইবা অমনি হায়বসি অচৌবা নোভেল মরি অসিনা তাকচরবনি। ঐনা ঐগী চে অসিদা মপূং ওইবা মীৎয়েং থমজরিবসি অইবগী অহৌবা লময়ানবা ৱারী মপুম অকনবা শাফূগী ইরৈ দনি। নোভেল অসি অহানবা ইং ১৯৮১ দা ফোঙলকপদা কনানসু খঙবিখিদ্রবা নোভেলনি হায়বা য়াই। নোভেল অসিবু মশক নৌনা খঙলক্তুনা মমল লেপ্নরকখিবদি ইং ২০০৯ দা অনীশুবা খূৎনম পুথোরকপদগীনি। অইবসিগী ইং ২০০৯ দা ফোঙখিবা অনীশুবা নোভেল মথৌ কনবা দি এন এ দা লেমজনীংঙাই ওইরবা সাহিত্য অকাদেমি এৱার্দ ইং ২০১২ ফংই। মসিনা মরম ওইরগা অইবগী সাহিত্য অমদি পুন্সিগী থৌদাংগী মরমদা নৈনবা হেন্না খূমাঙ চাওশিন্নরকখি। মথৌ কনবা দি এন এ না বি এম নোভেল এৱাৰ্দ ২০১১, য়েন্দ্রেম্বম সুরলতা পুরুস্কার ২০১২, দিনেশ্বরী সাহিত্য মনা ২০১৩, মণিপুর ষ্টেট কলা একাদেমি মনা (লিটরেচর) ২০১১ নচিংবা ফংখিবনি। অদুগা মাগী অহুমশুবা নোভেল লৈশাৎ তমলে নঙগীদমক অসিদসু দোক্টর লমাবম কমল সাহিত্য রত্ন নীংশিং মনা ২০১৮ ফংখি। খরা অসি পঞ্জবগী মরমদি অইবা অসি নোভেল ইবদা মায় পাক্লবা অইবা অমনি হায়জনীংবদগীনি।

অহানবগী নোভেল অকনবা শাফূগী ইরৈ  মখা তারকপা নোভেল অহুম অসিদগী ভোল্যুমদা পীকই। নোভেল অসিগী ৱারীসু মণিপুরগী ইং ১৯৭০‑৮০ অদুৱাইগী লৈঙাক, পুন্সি মহিং ৱাখল্লোন্দা য়ূম্ফম ওই। লমদমসিগী ৱাংমদা লান্থোক্তুনা ইন্দিয়াগী নৎত্রগা মালেমগী অহোংবা চৎনবী কয়া পুশিল্লক্তুনা শাগৎলকপা নত্তে। ৱারী মপুমদা মণিপুরদা লালহৌবা নৎত্রগা নীংতম্বা মণিপুর অমা শাগৎপা পাম্বা নৎত্রগা লৈঙাক পথাপকী থৌরম থৌদাংদা পেন্দ্রবা মণিপুরগী নহা কয়াগী ঈহৌ অমা শাগৎলকপগী ৱারীনা য়ূম্ফম ওইবা নোভেলনি। মপুমদা সামাজিক উপন্যাস হায়না মশক তাকচনীংই। ইন্দিয়াগী ওইনা পান্দমদা যথার্থবাদ (রিয়েলিজম) গী য়ূম্ফমদা শাগৎলকপা নোভেলনি। নোভেল অসিগী রারীগী থিম অসি মতমদুগী হায়বদি ইং ১৯৮১ গী মতমদা মণিপুরদা পূম্নৌ নৌবনি।

মণিপুরী নোভেলগী খোঙচৎতা ইং ১৯৮১ অসি নীংশিংবা য়াবা চহীনি। মরমদি ইং ১৯৭৯ দা মণিপুরদা চাউরাক্লা নোভেল তরা, ইং ১৯৮০ দসু তরা অদুগা ইং ১৯৮১ দদি কুনমাথোই অদুগা ইং ১৯৮২ দনা নোভেল তরানিথোই (চাউরাক্না) ফোঙই। চহী অহুম‑মরি অসিদা ইং ১৯৮১ অসিনা নোভেল খ্বাইদগী ফোঙবা চহী ওইরি৷ অদুগা অনৌবা থিমদা যোদ্ধচন্দ্রগী অকনবা শাফূগী ইরৈ অসি চঙশিল্লকই। দ্রামাদদি থিম অসি ইং ১৯৭২ দা জি সি তোংব্রানা অহানবা ওইনা মাগী চেঙনী খুজায় দা পুশিল্লক্তুনা উৎখ্রে। মণিপুরগী লৈঙাক কাঙলোন ৱায়েন থৌদাদা পেন্দবা লৈনরে, মসিনা মণিপুরী খুন্নাইগী ইনখৎলক্লিবা নহারোলশিংদা নীংবা কায়বা পেন্দবা পোক্লক্তুনা অনৌবা ঈহৌ অমা মসিগী মায়োক্তা শোয়দনা লাক্লগনি হায়বসি জি সি তোংব্রানা ইং ১৯৭০ অদুৱাইদগী উদুনা মাগী দ্রামা চেঙনী খুজায় অসি পুথোরকখিবনি খঞ্জৈ। মসিদা মণিপুরগী মতমদুগী সমাজগী ফিভমসু য়েংদবা য়াদে৷ ইং ১৮৯১ দা মণিপুর বৃটিশকী লৈঙাক মখাদা লৈরে। পীক্লিবা চুড়াচান্দবু নিংথৌ হাপ্লগা মণিপুগী ৱাংমদা মহৈ তম্বা থাদোকখ্রগা বৃটিশনা মণিপুর লৈঙাক্তুনা লৈখ্রে। ইং ১৯০৭ তা চুড়াচান্দ মহারাজ লাইরিক তম্বা লোইদুনা থোরক্লগা বৃটিশকী মখাদা লৈবা নিংথৌ অমা ওইনা লৈঙাকপা হৌরে। অপূনবা মণিপুরগী শক্তমদা তম্পাক্তনা নিংথৌনা চীংদনা বৃটিশনা মপূং ওইবা থৌদাং লৌদুনা লৈঙাক্তুনা চীং‑তম তোখাইনবগী মরূ হুনখ্রে। মপূংদা চীংদা খৃষ্টান লাইনীং বৃটিশনা শন্দোক্তুনা চীংমী অয়াম্বা মশাগী লাইনীং থাদোক্তুনা খৃষ্টান লাইনীং লৌখ্রে। তম্পাক্তনা মৈতৈ হিন্দু লাইনীং মপূংদা চঙনরে। ইং ১৯৪৭ তা মণিপুর অমুক নীং তম্লে। বৃটিশনা মণিপুর থাদোকখ্রবদা মণিপুর মশাগী লৈঙাক কাঙলোন শেমজদুনা মীখল পাঙথোক্তুনা প্রজানা য়াবা মীহুৎ খন্দুনা লৈঙাকপা হৌরকপদা ইং ১৯৪৯ দা মণিপুর ভারতকী লৈঙাক ফিবান্নুংদা পূনখ্রে, পার্ট ‘সি’ ষ্টেট অমা ওইনা লৈরে। মশাগী ষ্টেট বাওন্দরি লৈজবা, লৈঙাক্লোন, হৌরকৱারী, লোন, ময়েক লৈজবা, লমদম অমবু নমদুনা লৌশিনবিরবা মতুংদা অতোনবীগী মচাগুম থম্বিবগী পেন্নদবা কয়া পোক্নরকখি। ইং ১৯৬৪ অদুৱাইদদি ভারতকী লৈঙাক মখাদা লৈতবা নীংতম্বা মণিপুর অমা শেমগৎপা পাম্বা মণিপুরীশিং চীংমী তম্মীগী অপূনবা খূৎপু অমা থোরকপা হৌরকই। নীংতম ঈহৌগী মরূ হুল্লকই। মণিপুরদা খুন্দামিন্নরিবা ফূরুপ পূম্নমক ইকাইখুম্ননা হিংমিন্নবা, হীরম খূদিংদা ওটোনোমস লৈবা দেমোক্রেসি চৎপা অপূনবা লৈবাক অমা শেমগৎপা, মান্নবা খুন্নাই অমা পুরকপা, মণিপুরদা নত্তনা ইন্দিয়াগী লোইলম লৈঙাক মখাদা নমথদুনা থম্লিবা অৱাং নোংপোক লমদমগী ফূরুপ পূম্নমকসু মনীং‑মখা তম্না পূন্না হিংমিন্নগদবনি হায়বা ৱাফমশিংদা শাগৎলকই। অদুবু মতম শাংনা খূৎ থোক্নবা ঈ‑নাই তানবগী পুরারীদি লৈখিদে। অসিগুম্বা ঈহৌ অসিনা খূৎলায় পায়দুনা চহী তরারোমগী মতুংদা মকা ফোংবা হৌরকই লোয়ননা ঈহৌ শাগৎপা লূপশিংসু মশীং য়ামখৎলকই। ঙসি ফাওবা লেপ্তনা চৎথরক্লি। অসিগুম্বা লমদম অসিদা ওইরক্লিবা অওনবা অহোংবা কয়া অসি সাহিত্যদসু মমি তারকপা হৌনশানি। সাহিত্যদি সমাজগী মিংশেলনি হায়নরিবনি। চপ চাবা শক্তমমক নৎত্রবসু অইবগী ৱাখলনা লাকশিনবা মাঙদা থোকখ্রবা হৌজিক ওইরিবা অমদি তুংদা ওইরকপা য়াবা কয়া অইবগী মঙলান অমা শাগৎতুনা পুথোক্নরকপনি। য়ান্না ঙন্না তুংগী থোক্লকপা য়াবা ৱাখল্লোন অমদা ইং ১৯৭২ দা জি সি তোংব্রানা মাগী দ্রামা ওইনা পুথোরকখি। দ্রামা অসিদা ভারতকী লৈঙাক কাঙলোন নৈনবগা লোয়ননা পেন্দবা নীংবা থুংদবা মীওইশিং থোরকপগী ঈহৌ শাগৎলকপগী ৱাফম উৎলকই। চাকথুং‑ফিথুং মান্ননা ফংলক্তবদগী নীংবা কায়রবা কাঙবু অমদি পুন্সিগী হিংনবা লানফমদা সিফাই ওইরগা পূক থন্নবা হোৎনরিবা কাঙলূপ অনীমক অইবনা চেঙনী খুজাই পায়বা খুন্নাই অসিদা হিংমিন্নরিবা ঙাক্তনি হায়বদু উৎলকই। লোয়ননা লৈঙাক চূপ্লি পায়রিবশিংনা শোয়বদগী পূক থন্দবা চেঙনী খুজাই পায়রিবা মশেল ওনশিন্নদুনা হাৎনবা উৎলকই। অসিগুম্বা থিম অসিদা শাগৎপা অসি সাহিত্যগী অতৈ মচলশিংদা তাঙই। কুইনা কান্নরবা তুংদা যোদ্ধচন্দ্র সনসমনা নোভেলগী খূৎলান্থোক্তা ইং ১৯৮১ দা ফোঙলকই।

যোদ্ধচন্দ্রগী ৱারীগী থিমসু লৈঙাক চূপ্লি পায়রিবশিংদা পেন্দবা উৎপনি। শেলগী মতিক ময়াইনা অচুম্ববু নাথৈখিবা অসিনা পেন্দবা নহারোলশিং হেন্না থোরক্নবা মরম ওইহল্লি। পেন্দবগী মচাক্তি য়াম্মী, অপীক অপীকপা ঈচেল কয়া তিন্নরগা অচৌবা ঈপাক ওইরকপগুম লৈঙাক পায়রিবা মীয়ামগী মীহুৎশিংগী মরক্তা মশাগী ওইজবা থিবা মীশিং য়াওরকপা, মপূং ওইবা লৈবাক্কী থৌবুরেলশিংগী মরক্তা মীচঙ‑মীখায় নাইবা থৌওং চৎথরকপা য়াওরকপা, অচৌ‑পীশক, অনেম‑অৱাং খায়বগী ৱাখল্লোন, শক্তমদা শীংনরকপনচিংবা ৱাথোক কয়ানা পুশিল্লকপা নীংবা কায়রবশিংগী লালহৌ অমগী ৱারীনি। নোংজু লোইদুনা ঈচেল তপ্না তুরেলনা চেন্থরবসু কুমগী নোংজু লাক্তুনা ঈহৌরকপদা অকনবা শাফূগী ঈরৈনা ঈচেল ওইবগুম লোইবা খম্বা নাইররোইদবা লালহৌ অমগী খোঙচৎনি হায়বদু অইবনা উৎনবা হোৎনবা ৱারী মপুমনি। ৱারীগী হৌফম মণিপুর তম্পাকনি, লোইফমসু ওই। মতাং চানা মণিপুরগী মপানগী লম অমা অনী পুশিল্লকই। লমদমসিগী ওইবা ৱারীনি।

ৱারী মপূং ওইনা নহা ওইরিঙৈদা অচুম্বা অফবা চৎপা থৌনা ফনা মীয়ামগী লুচিংবা ওইরকপা কলকতাগী আশুতোশ কোলেজদা বি এ তম্লকপা স্কুল অমগী ওজা ওইরম্বা অঙাংহলনা হোৎনবগী মপালনা মণিপুরগী চীফ মিনিষ্টর ওইনা লৈঙাকপা ওইরকখি। মপূং ওইনা মাবু থাক অসি য়ৌহল্লকখিবদি মকুবোক্ননি হায়বা য়াই। অঙাংহলগী লোয়নবী লৈমতোম্বীগী মপাসি রাজনীতিদা থৱায় য়াওজবা নুপানি। মহাকথক্তা ঙমদ্রবসু তুংগী অফবা সি এম ওইরক্কদবা মীশক অমদি শেম্নীংখি৷ মদু পূম্বা মহাক্না নহা ওইরিবা অঙাংহলদা উবা ফংখি। মচানুপী থাজদুনা অঙাংহলবু রাজনীতিদা পুশিল্লকখি। খল্লম্বগা ওন্নরকখি। অঙাংহলনা লৈঙাক শাসন পায়রবা, লৈবাক্কী লুচিংবা ওইরবা মতুংদা নহা ওইরিঙৈদগী লোয়নরকপা অচুম্বা হায়বদু মশাদগী মাঙখি। য়ানা য়ানবা হোৎনবা লুচিংবগী ফম ফিরেপ চেৎনবা হোৎনবদা পূম্নমক নাথৈখিদুনা অচুম্বা অমদি মশাগী ফিরেপ মাঙখ্রবা নুপা ওইরকখি। মরু ওইনা মাগী নুপীগী মনাওনুপী অনী লৌবা মাগী নুপী মরীদা মনাওনুপা অনী (অমনা ময়াং অমনা চীংমী) লৈরি। মখোয় অনীগী খূজিল থৌরাংসু লেপ্পা লৈতে। অঙাংহলনা মখোয় অনীগী ৱা লৌই। মসিনা ফম হাপ্পা, প্রমোসন পীবা মতমদা মতিক চাদবা ময়াং অমদি চীংমীগী মখূত্তা হেক হেক তাবসি তোয়না থোরকই। মসিগী মথক্তা য়াম্না লুরবা লৈবাক্কী ওইবা মৈতৈলোনগী বিল অমা পাস তৌনবা পুখৎলকপদা অঙাংহলনা লৈবাক্কী অখঙ‑অহৈ তানবগী মহুত্তা মনাওনুপা অনীগী ৱা লৌখি। মতমদু মণিপুরী লোল ভারতকী লৈঙাক পথাপকী নুপালশুবা সেদ্যুলদা চন্দ্রিঙৈগীনি। করিগুম্বা বিল অদুনা মণিপুরী লোলনা নুপানশুবা শেদ্যুলদা চনখ্রবদি ময়াং অমদি চীংমীশিং শোত্থহৌবা তারে হায়বসিনি মনাও অনীগী ৱাখলদি। গভর্নরগা উনবা মতমদা অঙাংহলনা বিল অসিবু শৌগৎখিদে, জাৎ‑বিজাৎ য়াম্বা, লোল মচা য়াম্বা মণিপুরদা লেঙ্গুৱেজ বিল অসি অফবা ওইগনি থাজদে। ভাব তাদবা কম্যুনেল ফানাটিক খরতগী খোল্লাউনি মসিদা ঐগী শৌগৎপগী মোৎ লৈজদে হায়না হায়খি। অসিগুম্বা অশোয়বা কয়াসিনা অঙাংহল লৈবাক্কী য়েক্নবা ওইরকখি। মরু ওইনা মাবু অচুম্বা চৎপা, পূকচেল শেংবা, মিনুংশি খঙবনি খন্না মতুং ইঞ্জরকখিবা নহা ওইরিবা চন্দ্রকান্তদা শাথীনা নীংবা কায়হনখি। অঙাংহলনা মাবু শেম্বিরকপনি মপানা মাবু মমাগী পীবুকনুংদা য়াওরিঙৈদগী লংথোকপিরম্বনি। পোক্তবা মপানসু থৌশাবিদ্রবা মমানা ৱানা হোটেল মচা অমা ফমদুনা হোৎনজরকপনি। মতমদুদা অঙাংহল থৌবালদা ওজা ওইরি৷ মানা চন্দ্রকান্তবু মমাদা হায়দুনা মী ওইগদবা অঙাংনি খন্দুনা ময়ূমদা পুরক্তুনা লাইরিক‑লাইশু তমহল্লকখি। অফবা মহৈরোয় ওইখি। মকোক থোংবশিংগী মনুং চনখি। অঙাংহলনা ভোট কারকপদা সি এম ওইনবা হোৎনরকপদা মানা অচৌবা মতেং ওইখি। অঙাংহলনা সি এম ওইরবা মতুংদা চন্দ্রকান্তগী শাগৎচরম্বা ৱাখল অরেম্বা ওইখি। দিল্লীদা চৎতুনা এম এসসি তমজনীংখিবা, আই এ এস পরীক্ষা থানবা হোৎনজগে খনখিবা পূম্বা অরেম্বা তাখি। রাজনীতিদা খোঙদাখিবদগী অঙাংহলনা মাগী ৱা তাখিদে। অঙাংহলনা অফবা তৌরকপগী মহুৎতা নোংমা নোংমগী ফত্তবা তৌরকপা শেঞ্জা‑থুমজাদা লূপশিল্লকপা চন্দ্রকান্তনা য়াওজবা ইন্টরভিয়ু ফাওবা খল্লবা চন্দ্ৰকান্তবু খৎতোক্লম্লগা শেল চারগা মখাদা লৈবা মী হাপখিবনচিংবা কয়াদগী চন্দ্রকান্ত নীংবা কায়বগা লোয়ননা অঙাংহলগী য়ূমদগী থোরকখি। রিক্সো থৌদুনা চরা তানবা হিংননবগী লানফমদা লান্থেংনবা লান্মী ওইখি। নোংমা মাগী রিক্সোদা মতমদুদা নৌনা লিংখৎলকপা কংলৈপাক রিভোল্যুসনরি ওর্গেনাইজেসনগী লুচিংবা ওইবা মীওই অনী তোংলকখি। থাঙ্গাল বাজারদা চৎনবা হায়রকই। চন্দ্রকান্তা মশম শাংলবা মকোয় ফজনা চোম্লবা হান্নগী চন্দ্রকান্তদগী পূমওল ওল্লবা মীশক অমা ওইরবনি। হান্না তিন্নখিবা মীনা ফাওবা শক খঙবা ঙম্লরোই।

নুমিৎ অদুদা থাঙ্গাল বাজারদা থোকখিবা ফূন‑চৈনবগী থৌদোক অমদা চন্দ্রকান্তনা অশোনবশিংগী মতেং পাংখিবা অদুগা মণিপুরীশিংবু হন্থনা য়েংলিবা মপান্দগী কারবার তৌদুনা লৈরিবা মীতোপশিংদা চন্দ্রকান্তনা উৎখিবা থৌনা অদুদা পেল্লদুনা রিক্সোদা তোংলক্লিবা অনীদুনা চন্দ্রকান্তবু কংলৈপাক রিভোল্যুসনরি ওর্গেনাইজেসনদা অচঙবা মেম্বর অমা ওইনা লৌশিনখি। মরু ওইবা ইম্ফাল এরিয়াদা পাঙথোকপা ওপরেসন কয়াদা শরুক য়াখি। লৈবাক্কী মাঙনবা শীল্লিবা লুচিংবশিং, কংলৈপাক রিভোল্যুসনরি ওর্গেনাইজেসনগী মাঙনবা শীল্লকপা পূম্বা নোংমা নোংমগী খূৎ থাবা হৌরকই। সি এম অঙাংহল, কেদর সিং, আই জি পি, গোজেন্দ্র, ফাইনান্স মিনিষ্টর, এস আই ইন্টেল্লিজেন্স কুল্লবিধু, এস পি দুবেনচিংবা শক্নাইরবা মীওই কয়া পার্টিগী টার্গেট ওইখি। অতৈ মতুং ইনবা কয়াসু য়াওখি। মখোয়গা থেংনবদা পার্টিগী মীওই কয়াসু পুন্সি পিখমনখি। অশেক‑অপন কয়া নংখি।

কংলৈপাক রিভোল্যুসনরি ওর্গেনাইজেসনদা চাননা চন্দ্রকান্তগা লোয়নখিবদি খম্বা কৌবা লুচিংবা অমগনি। খম্বা লৈকাইনা কৌনবা অদুগা রিভোল্যুসনরি য়াওখ্রবা মতুংদা পোপুলর ওইনা খঙনখিবা মিংনি। অশেংবদি জয়কুমার কৌই। মাদি চন্দ্রকান্তগুম্বা মরায়বক থীরবা মী নত্তে। মপা স্কুলগী হেদ মাষ্টরনি ময়াম্বা মমিং চৎপা উকিলনি। মচেসু মমিং চৎখ্রবা এঞ্জিনিয়র অমদা ওঙই। মপা ময়াম্বনা মাবু দোক্টর নৎত্রগা এঞ্জিনিয়র তমহন্নীংই মানা আই এ এস থাবা পামজৈ, পীক্লিঙৈদগী লাইরিক ফরকপনি। ষ্টেট, নেসনেল স্কোলরশিপ ফংলক্তুনা লাইরিক তম্বদা ইমুং‑মনুংদা অৱাবা লৈহল্লকখিদবা মহৈরোয়নি। ইনখৎলকপা পুন্সিগী লমদাং অমদা হোটেল ফমদুনা মমাগী মতেং পাংলিবী দেবলা থেংনখিবনি। অনীমক্কী থম্মোয়দা নুংশিবগী মরূ হুনখিদুনা মখা তাবা থৌদোক কয়াদা ফোঙদোক্নদুনা নুংশি ঈচেলদা চেন্থমিন্নরকখিবনি। অদুবু খম্বা খঙহৌদনা লালহৌলূপ অমদা য়াওখিদুনা মীরোৎ ওইখি। অদুবু নুংশিবদি থম্মোয়দগী কাউথোকপা ঙমখিদে। অরোনবা থবক কয়াদা দেবলাবু মতেং পাংহনবা হৌরকখি। খম্ববু নুংশিজরুবা দেবলাসু অদুমক লম্বী অদোমদা মশা ইখঙ খঙদনা চঙশিনবগুম তৌখি।

ৱারীগী পন্থুং য়ৌনা পুরকপদা চীফ মিনিষ্টর অঙাংহলগী মচানুপা ইবোহল য়াওশিল্লকই। মপাগী লমন খুম্বা পাম্বনি। মপাগী চুম্বা লানবা খঙদে, শেঞ্জাবা, অরানবা তৌবা মানা উদে। মানা পাম্বদি মপা হাৎখিবা কংলৈপাক রিভোল্যুসনরি ওর্গেনাইজেসনগী মীওইশিং হাৎপনি, লোইশিনবনি। ৱাখল অসিনা মাঙওইনরিবা ইবোহলদা খঙহৌদনা লাইনা থারকপগুম শ্রীনগরগী দাল লেককী টুরিষ্টশিংগী মরক্তা মপাগী বোদিগার্দ গনমেন বিরেন থেংনথি। বিরেন অসি অঙাংহলগী হকথেংনবা বোদিগার্দনি। অয়ূক ৱাকিং চৎপদা বিরেন মথন্তনা গার্দ তৌই। সি এম অঙাংহলগী হৈনবী ওইনা অয়ূক ঙন্না হৌগৎপা, শাজেল ওইনা পূং ৫ দগী শগোল তোংদুনা আই জি পি কেদর সিংহগা কংলা পাৎকী অকোয়বদা চৎপনি। বিরেন অমদি আই জি পিগী গার্দ নেপালি গনমেন অমগসু শগোল অমমম তোংদুনা মতুং ইন্নৈ। সি এম অমদি আই জি পি কাপ্লমখিবা নুমিৎ অদুদগী বিরেন থিবা খঙদনা লৈরকখিবনি। সি এম অঙাংহল খূদক্তা মফমদুদা শিখি, আই জি পিগী গনমেন মফমদুদা শিখি। আই জি পিদি শিদে শোকপনি, ফিভম লুই হোস্পিটালদা পুখি।

হোস্পিটালদা অরোনবা মীহাৎ অমদা অাই জি পি কেদর হাৎলম্মী। লংলা‑লংজিন মাঙখি। বিরেননা অরোইবা অমত্তা ঙায়রবা লংলা‑লংজিলনি। বিরেন মণিপুর থাদোক্তুনা লাক্লগা সিমলাগী স্কুল অমদা ফিজিকেল এদুকেসনগী ওজা ওইনা থবক তৌদুনা লৈরকখিবনি।

শ্রীনগরদা অঙাংশিং পুদুনা কোয়বা লাকপনি। ইবোহলসু দিল্লীদা এম বি বি এস তমদুনা লৈরকখিবনি। তম্বা চহী তরুক শুরবা ফাওবা থার্দ সেমিষ্টরদগী হেনবা ঙমদ্রবনি। অকে‑অমৌ, ঈরাংলোমদা হেন্না থৱায় য়াওবা মতৌনি। মপাবু কাপতুনা হাৎখিবগী পাউদা খরদি নুংঙাইখিদে। মণিপুরদা অমদি দিল্লীগী খঙন‑চান্নবশিংদা মপা হাৎপগী খোঙ্গুল লীনবা হোৎনখিবনি। মায় পাক্তবদগী মাগী হান্নগী হৈনবীদা তপ্না তপ্না হঞ্জিল্লক্তুনা ঙসিদি শ্রীনগরদা মমান্নবা মমান্নবী ময়ামগা কোয়বা লাকপনি।

লাইগী নোংদম্না ইবোহল মফমসিদা বিরেন থেংনরে। বিরেনগী মচীন্দগী মপা হাৎপসি কংলৈপাক রিভোল্যুসনরি ওর্গেনাইজেসন কৌবা লূপ অমননি, মদুদা চন্দ্রকান্তসু য়াওই হায়বগী থোকখিবা থৌদোক্কী ৱারী পূম্বা লীখি। ইবোহলগী ৱাখলদি মপাগী লমন খুম্বনি, বিরেনগী ৱাখলনা মাগী মাঙখ্রবা মিংচৎ, থবক, মরৈবাক ফংবগা লোয়ননা প্রমোসন কাবনি। মরন্নাই ওইবা ৱাখল অমদগী বিরেন ইবোহলনা হায়বা য়াদুনা মণিপুর থোরক্লে। হূরান‑চীন্থী তৌবা, গঞ্জা লল্লোনবা, নম্ফূদা কিহন্দুনা শেল খায়বা, মিনুংশি য়াওদবা পৈশাগীদমক মী হাৎপা কিদবা গেং খূৎপু অমগী মকোক মৈনোচান্দগা মরুপ ওইখি। মৈনোচান্দ খম্বা অমদি চন্দ্রকান্তকী য়েক্নবনি। ইবোহলনা পায়খৎলক্লিবা থবক অসিদা লৈঙাক্কী মায়কৈদগীসু অরোনবা অমদি অফোংবা মতেং কয়া ফংেল। লালহৌবশিংগী থবক কনখৎলকপা অসিনা লৈঙাক্কী মায়কৈদগী লালহৌবশিং নমথনবা অকনবা খোঙথাং লৌখৎলক্লে। ইবোহল অমদি বিরেনগী থৌওংসু খম্বা, চন্দ্রকান্তনা শেংনা খঙই। য়েক্নবা মাঙহনবা মখোয়গী অহানবা পান্দমগী মনুংদা অমনি। কংলৈপাক রিবোল্যুসনরি ওর্গেনাইজেসননা লাল্লোং অমা শীন্দুনা মৈনোচান্দগী কেম্পতা লান্দারে মসিদা ইবোহল, বিরেন, মৈনোচান্দ লোয়ননা গেং খূৎপু অদুগী অয়াম্বা মীশিং হাৎখরে। মতেং পাংবা লাকপা আর্মি জীপ অনীসু মীশি অদুদা লোয়নখ্রে। চন্দ্রকান্ত লানফমদুদা শোক্লে। হনখিবগী লম্বীদা আর্মিগী খূত্তা কংলৈপাক রিবোল্যুসনরি ওর্গেনাইজেসনগী অচঙবা থৌমী অনী লৈখিদরে। চন্দ্রকান্ত অমদি খম্বসু মোটোর বাইক তোংদুনা কেম্প য়ৌনবা খুদোংথীবা কয়া মায়োক্নদুনা লাক্লগা ইরিল তুরেলগী মথক্তা শারিবা থোংদু য়ৌরক্লে। নোংসু অকনবা শাফূগা লোয়ননা চুরি। ইরিল তুরেলসু ঈহৌরি। শোক্লবা চন্দ্রকান্তনা খম্ববু অরোইবা বিদাই পীরম্লগা ইরিল তুরেলগী ঈরৈ কল্লবা ঈমায় চোল্লবা ঈচেলদা তিনখ্রে।

ৱারীগী লোইরকপদা খম্বগী হায়ফম খঙদবা অৱাবা ঈপাক অমদা পুশিল্লকই। থানবা লৈত্রবা চন্দ্রকান্ত শিখ্রে লৌনরে। অশিবা হকচাংদি ফংদ্রি। মথক থোংবগী য়াথং মতুং ইন্না মখোয়গী তম্পাক্কী কেম্প পূম্বা থাদোক্লগা চীং ৱাংমা লান্না চৎপা তারি, লালহৌ মায় পাক্নবা শেম শাবা তারি। থৱায়গুম লোয়নজরিবী দেবলা এসেমব্লিদা য়ু দি সিগী থবক ফংখ্রে। দিপুটি সি এম সনাথোইগী বঙ্গলোদা লৈখ্রে। হেন্না নুংঙাইতবা পাউনা দেবলাগী গর্ভদা সনাথোইগী মরূ হুনখ্রে হায়বসিদনি। খম্বা তশেংনা থাজৈ—দেবলাগী পীবুক্নুংগী নাৱাদুগী মপাদি মহাক্নি। মানা দেবলাবু থৌশাখিদ্রে। হন্না হন্না মাবু উননবা কেম্পতা লাক্লম্বনি। দেবলা পুলিসনা ফাবা লাকখি। সি এম সনাথোইনা মাবু কনখি। দেবলাগী মাম্মাগী য়াম্না নক্নবা মীনি সনাথোই। অদুগা মাগী নুপী লৈখিদ্রে, মাদি দেবলাবু তশেংনা পামজবনি। দেবলানা সনাথোইগী মরুম থূপ্না পূম্নমক খঙনরগা খম্ববু ঙাইজবনি। খম্বনদি খঙলুবা নত্তে, হীরম খূদিংদা নাইতোম তারক্লবা খম্বা অপোকপা মমা‑মপাবু নুংশিরকই। নীংহন্নরকই, অদুবু তুরেলগী হন্থরবা ঈমায়সে নোংজুথা লাক্লগা ঈশিংগী ঈমায় অমুক হেনগৎলক্কনি। অমুক লাকখিগনি অকনবা শাফূগী ঈরৈ। মসিনা অনৌবা থৌনা হাপ্লকই। মথং খোঙচৎকীদমক মমা‑মপাবু কন্না উননীংলকই। মসিনা মপূং ওইবা ৱারীনি।

নোভেল অমগী মথৌ অমনি ৱারী হায়বসি। যোদ্ধচন্দ্র সনসমগী ৱারীগী প্লোট শাগৎলকপগী মওং অসি মাগী মখা তারকপা অতৈ নোভেলশিংদগী তোঙাল্লি। নোভেল অসিদা পন্দুপ তরানিপাল থোক্না লৈরি। পন্দুপশিংগী মিংথোল ফজনা পী। অহানবা পন্দুপতগী মরিশুবা পন্দুপ ফাওবসি পরিং চৎলি। শৈহৌগী মওংদা থম্মী। শৈহৌদা নোভেল অসিগী মরু ওইবা শক্তম লাংদুনা ৱারীগী য়াঙলেন ওইগদৌরিবা কেরেক্টরশিং থোইনা ফন চোংথোক্না উত্তে৷ ৱারী হৌগৎলকপদা সি এম অঙাংহলদগী হৌই। মথংদা মাগী নুপী লৈমতোম্বীগী তারকই। অহুমশুবদা অঙাংহল শগোল তোংদুনা আই জি পি কেদরসিংগা কংলাপাৎ পরেং ম্যুনিসিপালিটি ওফিস মপাদা অয়ূক্কী শাজেল থোরকপদা নোংমৈনা কাপতুনা হাৎলম্বনি। পন্দুপ অহুম্মক নোংমতগী ৱারীনি। অহুমশুবা পন্দুপকী লোইরকপদা মথং নুমিৎকী শরুক হাপচিল্লি অমদি মরিশুবা পন্দুপ ফাওবা চৎথৈ। ৱাহৌ ওইনা মরু ওইবা অচঙবা কেরেক্টর ওইরক্কনি খল্লম্বা অঙাংহল সি এম, মাগী লোয়নবী লৈমতোম্বী অমদি মণিপুরগী লালহৌবগী অকনবা ঈরাং লাকশিনগনি লাকখিবা মধ্য প্রদেশগী চম্বল ভেল্লিদা গুন্দাশিংগী লীদর ঠাকুরশিং ফাবদা রেকোর্দ ফজখিবা মশা‑মউ ফরবা শান্নরোয় ওইনসু ওলেম্পিক য়াওরকখ্রবা আই জি পি কেদর সিং অহুম অসি পন্দুপ মরি অসিদা অদুম্মক লোইশিনখ্রে। মঙাশুবা পন্দুপ্তগী সি এম অমদি আই জি পি কাপতুনা হাৎলম্বা শক্লোৎপা লালহৌবশিং মপূং ওইনা—খম্বা (জয়কুমার) অমদি চন্দ্রকান্তগী ৱারী চত্থরকই। ৱারী মপূংসু মখোয় অনীগীনি, ৱারীগী অয়াম্বা শরুক্তা ফ্লাশবেক টেক্নিক শীজিন্নদুনা মমাঙগী ৱারীশিং শমজিন্দুনা কেরেক্টরশিংগী মশক তাক্নবা লাক্লৈ। মতাং চানা চানা হৌখ্রবা ৱারীশিং নীংশিংদুনা চত্থরিবা ৱারী পরিং মপূং ফাহল্লি।

কেরেক্টর অসিসু নোভেলগী অচৌবা মখোঙ অমনি। কেরেক্টরশিংগী শক্তম য়েকপদা যোদ্ধচন্দ্রগী থোইদোকপা মতিক লৈজৈ। পীক্লবসু চাউরবসু কেরেক্টর খূদিংমক অমমমতা ওইনা মশক শেংনা তাকই। মশক‑মশা শেংদবা কেরেক্টর য়াওহন্দে। সি এম অঙাংহল অমদি মাগী লোয়নবী লৈমতোম্বী অহৌবদা মশক তাক্তুনা নোভেল অসি হৌরকই। মখোয়গী ৱারীদা য়ূম্ফম ওইবা নোভেল অমা ওইনা চৎথরক্কদরা খলহল্লি। ৱারী হৌবা নুমিৎতা অঙাংহল শিখ্রে। লৈমতোম্বী মপুরোইবা কায়নবগী মৈচাক ফংহৌরে অমুক হন্না মখা তারকপদা মাগী ৱারী য়াওদ্রে। অহৌবগী পন্দুপ অনীদি মখোয় অনীগী পুন্সি ৱারীদা কন্দুনা থম্মী। কেরেক্টর অনী অসিনা নোভেলগী মপূং ওইবা শক্তম লাংবা অমা ওইরিবা চন্দ্রকান্তগী পুন্সি ৱারী শাগৎপদা অচৌবা মতেং অমা ওইহল্লগা অদুমক মাঙখ্রে। পুন্সিদা নীংবা কায়বনা শরুক ওইজরক্লবা অপোকপা মপা মশক খঙদনা চাউরকখ্রবা চন্দ্রকান্তগী শক্তমনি। মবূক‑মপাউ ফবা অঙাংহলনা শেম্লবদি মী ওইগনি খঙবদগী মচা শক্না য়োক্লকখি। বি এসসি লোইবা ফাওবা তমহল্লকপনি। মায় পাকপগী অচৌবা মঙলান অমা শাগৎচরুরগা নীংবা কায়রকখি। অঙাংহলনা রাজনীতিদা খোঙদাবা হৌরকপদা অঙাংহলদা লোয়নজরকপা অচুম্বা হায়বদু মাঙখিবদগী চন্দ্রকান্ত লালহৌবা য়াওখি। মহাকমকপু চাউনবা য়োক্লকপা সি এম কাপতুনা হাৎপদা য়াওখি। মসি সি এমগী সেক্যুরিটি গনমেন বিরেননা খঙহৌই। মহাক্কা বিরেনগা কুইনা লৈমিন্নরকপনি। বিরেনবু মানা কল্লম্মী। বিরেনসু মরাল লৈরবা মীগুম সি এম কাপখিবা নুমিৎতগী মাঙখি। মসিনা বিরেনবু মীপূম খূদিংনা সি এম হাৎপদা য়াওই হায়না খলহনখি। মসিনা সি এমগী মচা ইবোহলনা বিরেনবু শ্রীনগরদা উনবদা হংই, “ঐখোয় পাবুং হাৎখিবা অদু নঙসু য়াওরুবা নৎত্রা?” উপায় লৈত্রবা বিরেননা খুমই, “উম।” অদুবু মরাল লৈতে তাক্নবা ৱারী লীথৈ মথং মথং মরিক চূম্না অদুগা হায়রকই, “চন্দ্ৰকান্ত য়াওবনি৷” ইবোহল ইঙক ঙকখিবনি। চন্দ্রকান্ত মখোয়দা চাউরকপনি। মশামক্না পুরক্তুনা মখোয়দা লৈদুনা মহৈ তমখিবনি। ইবোহলসু লাইরিক ফনা ফরকপনি অদুবু চন্দ্রকান্তদগী মানা হেনবা অমুক্তা ঙম্লক্তবনি। মাদি মপানা দোক্তর তম্বা থারকখি। চন্দ্রকান্ত মপাগী ভোট য়াওদুনা য়ূমগী মী অমনা তৌফম থোকপদগী হেন্না থৌদাং লৌদুনা লৈখিবনি। মামক্না মপা হাৎপদা য়াওই হায়বসি ইবোহালদা মঙ ওইখি। অদুবু বিরেননা মখা তারকই, “উম মাসু য়াওই। অদুবু নখোয় পাবুংদা কাপ্পা মীদি চন্দ্রকান্ত মান্দে। মঙোন্দগী খজিক্তং ৱাংতক তৌবা অমা য়াওই মানা ওইরমগনি।” মসিদগী ইবোহল চন্দ্রকান্তদা লমন খুম্নীংবগী ৱাফম য়ৌরকই। মসিনা পন্থুং য়ৌনা চঙশিল্লকপদা ইবোহল, বিরেন, চন্দ্রকান্তনচিংবা পূম্বগী অরোইবা পোলোইদা পুরকই। মশেল অমগা অমগা হাৎনরগা লোইশিল্লি।

হাৎনবা, কাপ্নবা মরক্তা নুংশি ঈচেলগা ইরোয়ননা মপূং ফানা চেন্থরকপা খম্বা অমদি দেবলাগী কেরেক্টরনি। খম্বদি ইনাক‑কৈরাক খুনবা ৱাত্ত‑পাদবা ইমুংদা পোকপনি। লাইরিক‑লাইশুগী জ্ঞান ফজনা লৈবা মীওইনি। নোংমা মমাগী মতেং পাংদুনা হোটেল ফম্লিবী চহী তরানিথোইরোমতং ঙায়রিবী দেবলাবু উখি। দেবলানসু খম্ববু নুমিৎতুদগী খোয়দাখি। লৈকাইগী ময়াম্বা উদোয়না পুদুনা মাগী হোটেলদা চঙলকপনি। খম্বা অমদি উদোয় অনীনা শানখিবা ৱারীদগী দেবলা মতিক চাবা মী ওইগে খনখি, হোৎনখি, মহৈসু ফংখি, মপালদা লাইরিক মখা তমথখি। নোংমা শিল্লোংদা দেবলা খম্বা উনখি। মদুদগী শাংলবা নুংশি লম্বী অমদা চৎথরক্লগা খঙহৌদনা পাউ ফাওনবা ঙমখিদরে। চিঠি অমতা ইরকখিদরে, উনবসু ফংখিদরে। কুইরবগী তুংদা খম্বা লালহৌলুপ অমদা য়াওদুনা ট্রেনিং লোইরবা মতুংদা সি এম কাপ্পদা য়াওররে। মদুদা হিংহৌবা আই জি পি কেদরসিংবু হাৎপদা মতেং পাংনবা খম্বনা দেবলাগী মতেং লৌরকখি। দেবলানা নর্স অদুগা খম্বা, চন্দ্রকান্ত অনীনা দোক্টর শাদুনা হোস্পিটালদা লাক্নরিবা কেদরসিংবু হূ কাপশিন্দুনা হাৎখি। উনরুদ্রবা মতুং অমুক উনরবা অসিদদি অচম্বা পুন্সিগী নুংশি খোঙচৎ ওইখিদ্রে। নোংলৈ মরক্তা ককঙাওনরবা ঊনাগুম মায়কৈ পল্লেপফম খঙদবা ঈচেলদা চেন্থরক্লে। অকোনবদা খম্বা লৈবাক্কীদমক ইম্ফাল থাদোক্তুনা ঈহৌ মপাঙ্গল কনখৎনবা অরাপ্পদা মণিপুর বর্মা লোন্নবা ঙমখৈদা চৎপা তারে। নাউপুহৌরবী দেবলা দিপ্যুটি সি এম সনাথোইগীদা শৈদাংদুনা পুলিসতগী মশা কঞ্জনবা লৈখ্রে। মণিপুরগী এসেমব্লিদা য়ু দি সিগী থবক অমসু তৌখ্রে। কায়নবনা পন্থুং ওইদুনা ৱারীসু লোইশিল্লি।

চন্দ্রকান্ত অমদি খম্বা (জয়কুমার) অনীগী কেরেক্টর অসি অইবনা চপ মান্ননা পুখত্তুনা য়েকই। অনীমক্কী মরৈবাক নীংবা, হৈ‑শিংবা, কৎথোকপা চাং মান্ননা পুখৎলকই। নাকল অমরোমদা খেন্নবা হায়ববু অমনা লায়রবা, পিতৎ‑পাতৎপা, নীংবা থুংদ্রবা চন্দ্রকান্তনি অদুগা খম্বদি মাগা য়েংনবদা য়াম্না ফরি। মপা‑মমা লৈরি। মপা হেদ মাষ্টরনি, ময়াম্বা মমিং চৎপা এদভোকেটনি। লাইরিক তম্লকপদা স্কোলারশিপ ফংদুনা য়ূমদগী পৈশা অমতা চঙখিদ্রবনি। অদুগা করি নীংবা থুংদদুনা লালহৌবা য়াওরক্লিবা৷ অইবনা মসি নিপালশুবা পন্দুপ ‘অচুম অরানগী লংদাই লৈই’ হায়বসিদা নৈনদুনা উৎলি। মসিদা মণিপুরগী রাজনীতিগী ফিভম অমদি ইন্দিয়াগী কনষ্টিট্যুসনদা লন্নাই ৱাখল মীৎয়েং থমদুনা নৈনবগা লোইননা লালহৌবা য়াওবগী ফিরেপ লৌহল্লি।

“ঐ অমগীদি লায় করিসু নত্তে, অদুবু মৈতৈ মচা পূম্বদি ঐ মৈতৈনি হায়বদা চাউথোকচনিংঙাই লৈরক্লোইদৌরি। মণিপুরগী লৈঙাক লোয়শঙ পূম্নমক্তা মথক থোংবা অঙম্বা পূম্নমক মৈতৈ অমত্তা য়াওরক্তরে ময়াং অমসুং চীংমী ঙাক্তা ঙায়শীল্লক্লে। মৈতৈদি মায় হাইগৎলগা শোরোক্তা চৎপফাওবা ঈকাইনরক্কদৌরি। বিধান সভাদা লৈবা সদস্য হুম্ফুগী মনুংদা নীফু হেন্না মৈতৈনা ওইরিবনি। অদুবু মৈতৈশিংগী তুংগী ওইবা পোলিসি অমসুং প্লান অমত্তা খনবা লৈতে, পুথোকপা লৈতে। মখোয়দি মশা মশাগী ফুরীৎখাউতমক য়েংবা হূরানবা ঙাক্তনি। পঙবরা হায়বসু লমহুইগুম্না ফত্তবা, তুং কোইদবা লৌশিংদা মপা লৈতে।” (লা: ১০১, অনীশুবা খূৎনম)

ইন্দিয়াগী কনষ্টিট্যুসনবু খম্বনা পেন্দ্রি। মী পূম্বগী হক চপ মান্নগদবনি হায়রি অদুগা সেদ্যুল ট্রাইব, সেদ্যুল কাষ্ট হায়দুনা রিজার্বেসন কয়া থম্লি। মসি ইন্দিয়াগী য়ু পি, বিহারনচিংবা মফমদা চুম্লম্বা য়াই। মণিপুর অমদি অৱাং নোংপোক্কী ষ্টেট মচাশিং অসিদদি মসি চূনদে। মরমদি মফমশিংসিদদি কলচরেল্লি, সোসিও ইকনোমিকেল্লি, থোং মান্ননা অদুম লৈরকপনি। খেন্নবা ইরৈ‑লৈতে। মসিনি অইবগী ফিরেপ। খম্বগী তত্তনা ফোঙদোকপা ৱাফম অমনা “ঐখোয় মৈতৈনা য়ায়তোঙ খমদোংনা ময়াম মথক্তা নেৎতুনা পানগে হায়বগী ৱা নত্তে। হৌজিক্কী ইন্দিয়াগী কনষ্টিট্যুসন অসি সুম চৎনরবদি ঐখোয় মৈতৈ মচাশিংদি আ লৈখা তারগদবনি। নোংমা নৎত্রগা নোংমদি শঞ্জেন্নহানা হোইদুনা পুরিবা শনগী শঙ্গুদগী হেন্না তোন্থরগদবনি।” অসিগুম্বা ৱাখল কয়া অসিনা লমজিং ওইরগা খম্বা লৈবাক্কী করিগুম্বা খরা তৌরম্নবগীদমক তরেৎ তরা থোক্না খল্লগা লৈরিঙৈদা মণিপুরদা মাগুম্বা অশাওবা নহারোল য়াম্না লৈরে। ময়ামদু পূনশিল্লগা নহারোল লিংজেল ফূদোক্তুনা মৈতৈগী মণিপুরগী, মী খুদীংমক্কী মফম মতম চানা হিংবগী হক ফংনবা হোৎনগদৌবনি হায়বসি তারকই। অকোনবদা মখোয়গী মরক্তা পূন্নবা ফিরেপ লৌদুনা কংলৈপাক রিবোল্যুসনরি ওর্গেনাইজেসনদা য়াওখি। মানা ট্রেনিং হৌরবা মতুং থা অমমুক লৈরগা চন্দ্রকান্তসু ট্রেনিং মফমদা থুংলখি। ৱাখল মান্নরুবনা পূনখি, তিন্নখি। লম্বী অসিদা মখা তানা চঙশিনখি। মসিদা অইবনা মশাগী ওইবা ৱাখল অমা পীরকই, “…মাগী ৱারেপ অসি সমাজগী, ধর্ম্মগী অমসুং রাজনীতিগী মীৎয়েংদা অচুম্বরা অরানবরা হায়বা অদুদি য়াম্না লুই। কৰ্ম্মফলনা লেপফম থোকই।”

অইবনা অসিগুম্বা লালহৌবগী ৱাখল্লোন অমা লমদম অসিদা লাক্লিবা অসি চুম্বরা লানবরা হায়বদু লেপ্নবা কন্না হোৎনরি। চন্দ্রকান্ত, খম্বগুম্বা মীওইশিংনা লম্বী অসিদা খোঙদারকপসি লৈঙাক্কী নৎত্রগা লৈঙাক পুরিবা খরগী অশোয়বদগীনি হায়বসি শেংলে। অদুবু মখোয়না মখা তাবদা পাঙথোরকপা থবক্না অফ‑ফত্ত লেপকনি হায়বসি অইবনা ময়েক শেংনা থম্লি। মশাগী ওইজবা থিবগীদমক অসিগুম্বা লূপশিংদা য়াওরকপা ওইরক্লবদি মীয়ামগী মতেং ফংবা ঙম্লোই, মীয়ামগী মতেং ফংদ্রবদি ওইথোক্লোইদবা খোঙথাং অমনি। মসিগীদমক অইবনা ৱারী পরিংদা চাংয়েং অমা হাপচিল্লকই। তরানিথোইশুবা পন্দুপ্তা ‘মীয়ামগী চাংয়েং’ হায়বসিদা অসিগুম্বা লূপ অসিবু মীয়াম্না য়ারিবরা য়াদবরা হায়বগী চাংয়েং তৌই। মীয়ামদগী পাউখুম অমখক ফংই—“হৌজিক নহারোলনা হৌরক্লিবসি মায় পাকপা পাক্তবা লৈবাক ঙাক্লিবা মীশিংদা পারা মচা অমদি তম্বিগদৌরি। ” (লা: ১৩১)

পেন্দবা লৈনবগী ৱাফম অসি খরমখৈদি ময়েক শেংলে উৎলি৷ অদুবু অচুম্ববু ওইরো অরানববু ওইরো অশি‑অনা নংলবা ইমুংনদি অপেনবা নুংঙাইবা হায়বদু লৈবা হৌনদে। মরমসিনা মপা হাৎখিবগী লমন শিংনবা ৱাখল ইবোহলদা খল্লকই। মপানা করি তৌখ্রবগে হায়বসিদা চঙশিনবা ঙমদে। নাকল অমরোমদা মথৌ তৌজরিবা মতিক চারবা পুলিস, ইন্টেলিজেন্স, সেক্যুরিটি ফোর্সতা লৈবা মীওই কয়া লমখাংদা পুন্সি পিখম্নরি। মসিদা অফ‑ফত্ত, অচুম‑অরান থোইনা খন্নরুবা লৈতে। শামু দশা ফত্তবা অমা তুরকপদা হঙোই দশা ফবা ময়াম অমা নন্দুনা শি হায়বদুনি। কাপ্নবদা শিরিবা সিফাই পুলিস ময়াম অসি ফত্তবা তৌবা ঙাক্তরা হায়বগী ৱাহংদি অদুমক থোরকই। কুলবিধু এস আই ইন্টেলিজেন্স মশাগী মথৌ চপ চানা তৌবা নুপানি। মশাগী মথৌ নীংথিনা তৌই। থিজিনবদা মরিক চুম্মী। মীনিনা ফম কানীংই, মিংচৎ পাম্মী। থোইদোক্না শেঞ্জা‑থুমজা তৌরুবগী ৱাফম নত্তে। সি এম অমা হাৎলম্বা অমদি আই জি পি অমা হাৎখিবা অসি লাল্লি চুম্মী হায়বগী ৱাফম নত্তনা থিগৎফম থোকপা মথৌনি। অদুবু অপাননা থিগৎলুবনা মতাং চাদনা পুন্সি পিখম্নখি। লাঞ্জং অসিদি লোইবা খম্বা নাইদ্রবা হাৎন‑শুনবগী ঈচেল অমনি৷ অদুবু অইবনা হৈ‑শিংনা গেং খূৎপু পুশিল্লকই। মসিনা লালহৌবশিংবু মিংচৎ থীহন্নবা হোৎনবগী অচৌবা মতেং ওইরকই। মপা হাৎপগী লমন খুম্নবা হোৎনবদা ইবোহলনা লৈঙাক্কী অমদি গেং খূৎপু অসিগী মতেং লৌরুবনা অকোনবদা ৱারীগী মায়ওন অসি নীংতম ঈহৌগী খোঙজং চঙশিনবগী মহুৎতা খূরক্কী ঈনা লাই শাবা কাঙবু থেংনবদা মায় ওনশিনবগুম উরকই। ঐখোয় মশেল হাৎনবরোমদা চঙশিল্লকই। অকোনবদা মমল য়াম্লবা পুন্সি কয়া মাঙখি। অপীকপা মীওই খূজোক অমনা চাউরবা লৈঙাক অমা থেংনবা অরায়বা নত্তে, অদুবু য়াঙ্গংলবা তুরেলনা নোংজুথা লাক্লবদা অকনবা শাফূগী ঈরৈ হৌরকপগুম পেন্দবগী ঈহৌ অসিদি লোইবা নাইররোইদবা অমনি হায়বদু অইবনা উৎলকই।

নোভেল অসিগী নুংঙাইবা, পাবদা লেপ্নীংদবা মশক অমনা অইবগী লোল অসিনি। শক্তম লাংলিবা মীওইশিং অসিগী শিনফম মতুং ইন্না চানবা চৎনবা লোল কয়া শীজিন্নৈ। দোক্টরগী, পুলিসকী ৱাঙাঙ চৎনলোনচৎ লোল অশেম্বা য়াওদনা শীজিন্নৈ। কাপ্নবা, মীহাৎ‑মীপুনগী শৈথারকপদা অপনবা য়াওদনা জর‑জর ইথরকই। খূদম ওইনা “খঙহৌদনা স্তেনগনগী মতোল অমা লীৎথোরকখি। সেকেন্দ অমগী মচেৎ অমদা অঙাংবা মৈরী ফেদ্রেৎ ফেদ্রেৎ কাপথোরকখি। গুলী তরামুক পাইথোরকখি। আই জি পিগী গনমেনদা লোইনা কাপশীনখি। …চিফ মিনিষ্টর অঙাংহলগী মকোক্তা লুশমদা, মনঙ্গন্দা, য়েৎথংবদা নোংমৈ গুলী কুল্লোম কাপশীনখি। শগোল মথক্তগী লেকথদুনা তাখিবা অদু গনমেন অদুদগী অঙাংহলনা হানখি। (লা: ২৬‑২৭)

মতমদুগী পাখঙ লৈশাবীশিংগী চৎন‑লোনচৎ অইবনা ইকোম কোম্না ফোঙদোকই। “ঙাইহাক চীন্মাঙ‑মাঙলুবগী মতৌবু মান্দেনে। অহীং লেকমিন্নরুরগা লাকপা ওইরিনি। হৈখ্রেদকো কানগী লৈশাবী। মমা মপানদি দোক্টরগী লাইন্দা হৈনবা থারক্লিবনিদকো!” (লা: ৩৪ ) অসিগুম্বা অপনবা য়াওদনা হায়দোরকপা লোল কয়ানা নোভেল অসি শাগৎলকই। য়াম্না নেচর ওই। যোদ্ধগী মখা তারকপা অথেঙবা লাইরিকশিংদদি অমদি মাগী ৱারেংশিংদদি (সেমিনারদা পাখিবা, চেফোঙদা ফোঙখিবা) লোলয়ানগী মহুৎ মৈতৈলোনদা মশাগী লোনশেম কয়া পুথোক্তুনা ইরকই। লাইরিক অসিদদি মদুগী মমি থোইনা তাদ্রি।

অঙাংহলনা সি এম ওইরিঙৈদা লৈবাক্কী ঈহৌ, ছাত্রগী, ওজাগী, দোক্টরগী, এঞ্জিনিয়রগী, দ্রাইভরগী, থানা, পুলিস ওফিসার ফাওবা য়াওনা, ষ্ট্রাইক তৌশিল্লকপদা অঙাংহলগী ৱাখল মথন্তা খঞ্জৈ—‘মহাকসু ছাত্রগী লুচিংবা ওইরকই ষ্ট্রাইক তৌরকই। ওজা ওইরফাওবা ষ্ট্রাইক কয়া তৌরকই লুচিংলকই।’ হৌজিক্তি মহাক্না লৈঙাক মকোক ওইরে। ঈহৌ খূদিংমক মাগী মথক্তা তারকই। মসিদা মানা খনবা ৱাখল অদু অইবনা ইতিং তিংনা ফোঙদোকই।

“…মাগী মহাত্মা গান্ধি হায়বা খুদৈ শেৎপা ঙবোং ইনবা খুরাদুনা অহিংসা আন্দলোন হৌদোক্লম্বদগী হৌজিক্তি গান্ধি মচা ওন্থোক্না য়াম্না থোরক্লে। ফৎখিদ্রবা ভাইরস অমা পুথোক্লমদুনা শন্দোক্কনবা লায়না অমা শন্দোরক্লে। পোলিটিকেল ইপিদেমিক হায়বদু থোক্লবনিসে। তোপিক অসিদা ব্রোদকাস্ত অমতংবু তৌসিরা।”

মতেক অসি পারুবদা হৌজিক্কী কোভিত‑১৯ গী পেন্দেমিক অসি খংনীং নীংশিংই। অইবনা গান্ধীগী অহিংসাবু মতম অমদা ভারত নীংতম্বগী মন্ত্র ওইখ্রবসু অকোনবদা থুনা শন্দোক্কনবা ভাইরস অমা ওইনা লৌরকই। ৱাকৎ মীফম কয়াদা গান্ধীজীগী ফোটো মাঙদা থমদুনা ফম্বদু মীৎতা উরকই।

লাইরিক অসিগী অনীশুবা খূৎনমগী ৱারোলদা অইবনা ফোঙদোকপদা ইং ১৯৮১ দা ফোঙখ্রবসু লাইরিক অসি লালহৌবগী মশক য়েকপগী মওংদা চৎথখিবদুনা মরম ওইরগা কনাগুম্বনা ফৈজৈনবা ৱাখল পরিংদা চৎখিদুনা শেরান্নবা পাউ শন্দোরকপা য়াই। সরকারনা অথিংবা থমজিল্লকপা য়াই; মদুগী মথক্তা লাইরিক অদু সরকারগী মায়োক্তনি অমসুং নহারোলবু ঈনশিন্নবগী মচাক য়াওইকা হায়বা অসিগুম্বা লৈখোম কয়া তৈশিল্লকপা য়াই হায়বা ৱাফম কয়া মথক থোংবশিংনা মতম চানা পাউ পীবিরকখি। অইবসু মতম অদুদা সরকারগী থবক তৌবনিনা মীয়াম খঙনা ফোঙদোকপগী থৌরমসু পাঙথোকখিদে। মশাদসু অকিবা ফাওখি হায়না ফোঙদোক্লি।

অইবগা উনজবদা অনীশুবা খূৎনম পুথোরকপদদি অকিবা অসি লৈত্রবরা হংজবদা, লৈত্রে হৌজিক্তি করিসু খন্দ্রে। মতমদুদি সরকারগী থবক তৌবা ফম্নাইবা ময়াম অমনা নঙগী “মহাত্মা গান্ধি হায়বা খুদৈ শেৎপা ঙবোং ইনবা খুরাদুনা…” হায়বসিদা অদুমক ফাবা য়ারবনি হায়বনচিংবা হায়রকখি। অসিগুম্বা কয়া অসিদা সরকারগী থবক তৌরুবনিনা নীংহন্নবা ফাওখি। হৌজিক্তি খন্দ্রে ফারসু ফাজরসনু খল্লে” খুম্লকই। অইবনসু ইরি—“সাহিত্য হায়ববু করিনো? থৱায় অমগী নুংদা য়ৈরকখিবা পাউজেল অমবু হিংমিন্নরিবা থৱায় অতৈগসু ’সুম শরুক য়ামিন্ননীংবা ফাওরকপদগী পাউজেল অদুবু খ্বাই অতৈদসু পাউদম্লকপখক্তনি॥ (অনীশুবা খূৎনমগী ৱারোল) অইবনা পীরিবা সাহিত্যগী ৱাহন্থোক অসিমক ফজরবা ৱাহন্থোক্নি। নোভেল অসি নৌহৌননা য়েংবদা চপ চাবা মহাও ফংলি। নোংহৌ লাকপদা তুরেলনা অকনবা শাফূগী ঈরৈ ওইরকপগুম অপাবশিংদা অকনবা শাফূগী ঈরৈ অমা অদুমক পীরি।

কৈথেল্লাকপম লন্দন ৱারীমচাগী খূৎইদা মশাগী ওইবা মফোঙদোক অমদি পাউদম তোপ‑তোপ্না লৈজবা অইবা অমনি। ৱারীমচা ইবদা প্লোট শেমগৎপগী লমদা মায়পুনবগী মহুত্তা থৌদোক অমদি নাক‑য়েৎপু কূপ্না য়েক্তুনা নুংগী ওইবা শক্তম, থৌওং অমদি ইহুলশিংবু ময়েক শেংনা উৎনবা হোৎনরিবা অইবা অমনি। ৱারীগী পরীংনা হীরম অমবু উৎনবা হোৎনবগী মহুত্তা থৌদোক অমদি থৌওংশিংনা অচৌবা ৱাখল্লোন, অরুবা ৱাহন্থোক অমদি মীওইবগী নুংগী ওইবা শক্তমবু উৎনবা হোৎনবদা হেন্না মায়পুনরি। মসিনা খুন্নাইরোল অমদি মসিগা শাগোন্নরিবা পুন্সিগী মরমদা কূপথনা অমদি লুথনা য়েংদুনা নুংগী অর্থ কয়া পুথোক্তুনা উৎনবা হোৎনৈ। অইবগী পাউদম্না অপাবশিংগা ৱাখল খন্না খন্না চৎথমিন্নহল্লি। করি হায়নীংলিবনো খঙনীংবগী ইহুল অমগা লোয়ননা অরুবা ৱাখলগী ঈচেলদা তপ্না তপ্না পুথরি। তহা‑তহা পাবদা ৱারীগী মহাও লৌশিনবা ঙমদে, লংজিন মাঙখিগদ্রা চিংনবা য়ৌনা পুথরক্লিবা ৱাখলগী পরিং খূৎপায় চেৎনা পায়বা তারকই। ৱাহৈশিংদি মচা তানা তানা হায়বা ঙম্বগী মগুণ চেল্লি। মসিমক নৎলমদ্রবদি অইবনা হায়নীংলিবা পাউজেল লৌশিনবদা অরুবা অমা ওইরমগনি। অয়াম্বা ৱারীমচাদা মওং অসি থেংনৈ।

কুনমাথোইশুবা চহীচাদা খোঙদারকখিবা অইবা অসিগী ৱারীশিংদা করি করম্বা হীরমবু পাউদম্লিবা? মসিমক ৱাহং অমা ওইফম থোকই। খুন্নাইরোলগা খোরিরোলগা ঈরোয়ননা চৎমিন্নবা হায়বসি হৌনশা ওইবনিনা চহীচা অসিগী নহা ওইরিবা অইবা অমগী মীৎয়েংদগী পুন্সিবু, খুন্নাইবু করম্না য়েংলিবা, করম্বা ৱাখল্লোন, করম্বা লমথুং অমগীদমক লাঙতক্নরিবা হায়বসিগী পাউখুম অইবগী খূৎইদগী শোয়দনা ফংফম থোকই। মীৎয়েংসিদা য়েংলুবনি লন্দনগী অমনবা হি (২০০৩)। উরক্লিবদি পুন্সিনি, খুন্নাইরোলনি হৌখ্রবগী অমসুং হৌজিক্কী। হৌখ্রবগী পুন্সি, হৌজিক্কী পুন্সি লোয়ননা হৌজিক্কী অমদি হৌখ্রবগী খুন্নাইরোল চাংদম্নদুনা চিংশিল্লকই মীৎমাঙদা। হৌখ্রবগী মমল অমবু শকখঙবা পাম্বগী ৱাকৎ অমা ঈরোয়নরি। অনৌবনা ননশিনখ্রবা খুন্নাইরোল অমদি পুন্সিরোলবু চেৎনা কোনশিনবা পাম্বগী, পাম্মূনা নুংশিনা য়োকখৎচবা পাম্বগী মীৎয়েং ঈরোয়নরি। পুন্সিগী অমদি মীওইবগী লেঙদ্রবা মমলশিংবু হিংহনবা পাম্বগী মমিসু তারি। মরুওইনা নুপীগী পুন্সিদা মীৎয়েং থম্বা ৱারীমচা খরসু য়াওরি। নুপীগী পুন্সিবু অচুম্বা মীৎয়েংদা য়েংনবা হোৎনবগী মশক উবা ফংই।

লাইরিকসিগী মিংথোল ওইরিবা ‘অমনবা হি’ অসিমক হৌখ্রবগী খুন্নাইরোল অমগী মমল থিরিবা ৱারীমচা অমনি। মতম অমা, লমদমসিগী মরুওইবা তুরেলশিংদা হি তোংদুনা লান্থোক‑লানশিন তৌনরম্মী। মতমদুদা মীওই কয়াগী পুন্সিসু হি হোন্দুনা অচৎ‑অওকশিংবু লান্থোক লানশিন তৌবগী শিনফমদা তাংজফম লৌরম্মী। মতমগী য়াওলদা লম্বী‑থোং শেমগৎলকপদগী হান্নগী পুন্সিরোলদু নাথৈদুনা পুখি। তাংজফম লৌরম্বা মীওইশিংগী পুন্সিদি হান্নদগী ইহোং‑হোংদনা মতমগা চানদনা লৈহৌরি। খূৎ হাঙলবা শিন্মী ওইনা পুন্সিগা মায়োক্নবা ঙমদনা হিংহৌরি। করম্না হিংগদগে হায়বগী ৱাহং অমদি মাঙদা তাদুনা লৈরি। মতমগী য়াওলদা পুন্সিদা নত্তে হোংলিবা, অকোয়বগী ফিভমসু য়ৌনা হোংলে। মীওইবগী অপাম্বা অনীংবা ফংনবা হোৎনবদা মহৌশাগী লৈরিবা পোৎলমশিংদা শাথীনা শোকহল্লি। মসিনা তুরেলশিংগী ঈচেল ফাওবা কায়হনখ্রে। মতম চাদনা ঈকং, মতম চাদনা ঈচাও তত্তনা থোকহল্লি। ঈকং অমসুং ঈচাওদা অৱাবা নংলবশিংগীদমক লৈঙাক্না অচৌ‑অচৌবা শেনফম কাইথোকই অদুবু হকথেংনরিবা খুঞ্জাশিংদদি খক য়ৌদে। হোংলক্লিবা ফিভম অমদি মতমনা পুরকপা অৱাবা চৈথেংশিং হকথেংননা ফংলিবদি অপীকপা পুন্সিশিংনি, শিন্মীশিংনি, লায়রবশিংনি। মতমগী অকনবা ঈরৈনা চেন্দুনা পুবিখ্রবা হিংনবগী পাম্বৈনা লায়রবশিংগী খূত্তগী নান্থোক্তুনা চৎখিবদা নীংবা কায়বগী উপায় লৈতবগী খোঞ্জেল থোকঙমদ্রবা ৱাকৎ অমা ৱারীসিদা পুখৎলকই। মহৌশা, খুন্নাই অমদি পুন্সি অহুমগী অচেৎপা মরীনা ওইহল্লিবা অনৌবা সমস্যা অমা অইবনা পুখৎনবা হোৎনবনি।

অইবা লন্দন, লমদমসিগী মশীং য়াম্লবা শিন্মীশিংনা থেংনরিবা অৱাবশিংবু কূপ্না য়েংদুনা ৱাখল খল্লিবা, হিংনবা লম্বেলগীদমক ৱাহং হংলিবা মীশক অমনি। পৃথিবীগী হোংলক্লিবা য়াওল খোঙচত্তা মনীং হন্দুনা লৈহৌরবা লমদমসিগী মীয়াম করম্না হিংগদগে হায়বগী চাউরবা ৱাহং অমা পুখৎলকই মহাক্কী ‘ঈশীলৌ’ হায়বা ৱারীমচাদা। ৱারীমচাসিমদি হৌখ্রবগী, হৌজিক্কী অমদি ওইরক্কদবগী মতমশিং অসিবু পূন্না শূপচিন্দুনা য়েংলগা খুন্নাইসিগী মীয়াম্না থীন্থদনা থেংনরগদবা অৱাবা ফিভম অমবু খূৎ থিন্দুনা তাকপগুম তৌরি। ভারতকী পরম্পরাদা হোংবা লৈতনা চত্থরিবা বর্ন সিষ্টেমগী মতৌগুম লৈঙাকলোনগী মপূং ফাদবনা লমদমসিদসু শিন্মীনা শিন্মী পোকপগী হোংবা লৈত্রবা ফিভমসিদগী করম্না হেন্না ফগৎপা শিনফম অমা ফংবা ওইথোক্কদগে হায়বগী ৱাহং অমা, ৱাকৎ খরা ৱারীমচাসিদা পুখৎলকই। লমদমসিগী চীংমীসু, তম্মীসু মপা‑মপুশিংনা তৌরম্বা শিনফম মতুংইন্না হিংনবা লম্বী ওইনরি। য়ু শুংবা, লৌউবা, শা‑শন লোইবা, কনাগুম্বনা সেকেন্দ হেন্দগী ফি‑রোল য়োনবা মখল মথেল তৌদুনা হিংনবা হোৎনরি। অদুবু মখোয়গী ফিভমদি ফগৎলকপা লৈতে, আশা উরক্তে। লৌমীনা লৌগী মপু ওইবা ঙম্লক্তে। মফমসিদা ইন্দষ্ট্রি অমত্তা লৈতে অদুবু মঙলান্দি মঙলি শিন্মীশিংনা। খুন্নাইসিগী মীয়ামগী চাওথরক্লিবা পুন্সি, মখোয়গী হিংবগী থাক, মহৈ‑মশিনগী ফিভম পূম্নমকসি য়েংলুরগদি অনৌবা ইন্দষ্ট্রিগী চেতনা অমা লাক্লবসু মদুনা লমদমসিগী মীয়ামদা করিসু কান্নবা ফংনীংঙাই লৈতে। মীতোপ্না লমগী মপু তপ্না তপ্না ওইশিনখিদুনা মীচম, মীয়াম, শিন্মীশিংগী পুন্সিদি খূৎ হাঙলগতা মতোক্লগদবা ফিভম অমদা তারবা য়ারি হায়না চেকশিনৱা অমা অইবনা মহাক্কী ৱারীমচাসিদা পীনবা হোৎনরি।

হৌখ্রবা মতম, হৌখ্রবা খুন্নাই, হৌখ্রবা পুন্সি তাঙ্কক পূম্নমকসিগী মমল অমমম লৈ হায়বসি অইবগী চেৎনা থাজবনি। চাওখৎপগী মঙাল ফংদ্রিঙৈ মতমগী খুন্নাই অমদা য়ূম্ফম ওইরগা ঙসিগী অহোংবা খুন্নাই অসি ওইরকখিবনি। অদুবু মাঙগী খুন্নাইরোল, মদুগী মমল ঙসিগী মীয়াম্না কাউখিবগুম তৌরে। মমলশিংদুবু শকখঙবা পাম্বা অইবনি। ‘ইমাগী তাবুনুংদগী’ ৱারীমচাসিদা অইবনা লমদমসিগী মমা ওইবীশিংগী মমল অমা পীনবা হোৎনরি। পীক্লবা লমদমসিদা ঙসিদি চাওখৎপগী মঙাল খজিক লাকপা হৌরে। হৌখ্রবগী খুন্নাইদগী ঙসিগী লমদমসিগী মীয়ামগী ৱাখল্লোন খঙলাপ লাপথোরকপগুম তৌরি। মতম অমা, শূপ্নতগী দিকেদ খরতগী মমাঙদা হিংলম্বী লমদমসিগী মমা ওইবীশিংগী পুন্সিনা মায়োক্নখিবা অৱাবা, মখোয়না তুংগী য়ূম্বী ওইরিবা ঙসিগী মীরোল ঐখোয়বু মতমগী মঙাল খরদং ওইরবসু ফংহন্নবা হোৎনবদা মশাগী ওইজবা, নুংঙাইবা কয়া থাদোকখি। শেৎপ‑চাবা, অকে‑অমৌ, নুংঙাই‑য়াইফ পূম্বা তুংওইনা মচাশিংগীদমক খাঙখি, পেন্থোকখি। অদুবু মাঙগী লম্বেল থোনবিরম্লিবা মখোয়গী তৌবিমলদি মচা ওইবশিংনা কাউখিবগুম তৌখ্রে, নাথৈখ্রে। মখোয়না পুথরম্বা খুন্নাইগী ঈচেল ঙসিগী মীরোলনদি চাওখৎতবা, অমনবা, মশেক‑মঙাল য়াওদ্রবা তাঙ্ককনি খন্না মীরায়নরকপগুম তৌরি। মসিবু অইবগী থম্মোয়না য়ানীংদবা ফোঙদোক্লি। ঙসি অনৌবা যুগকী ইপাল লাংলবা পুন্সিগী মীৎকূপশিংদা হৌখ্রবগী শক্তমশিংবু নৌহৌনা মমল পীবা পাম্লি।

অইবনা মহাক্কী ৱারীমচাশিংদা শক্তম খরা, থৌদোক খরা শেমগৎতুনা ৱারীগী খূৎশেম অমা শেমগৎলবসু অরুবা ৱাখলগী মরেপ অমা হাপতুুনা য়েক্নবা হোৎনবসি অয়াম্বা ৱারীমচাশিংদা পামজনা শীজিন্নরি। ৱারীমচা অসিদসু মচা অমনা মমাগী তৌবিমল খঙবা, মমাগী মফম অমা মহাক্কী পুন্সিগী ঈচেলদা থম্বা পাম্বা ওইনা ফোঙদোক্লবসু ৱারী অমদি থৌদোক্কী মরুমদা অইবনা হায়নীংলিবা ৱাফম অসিদি হেন্না পাক চাউই। মমাগী শক্তম শেমগৎপদা লমদমসিগী পোত্থাবা হৈজদবী মমা ওইবীশিং, পেন্থোকপতা মশরুক ওইবী নুপীশিং, লাইনীং‑লাইশোলগী চৎন‑লীক্লমবু ঙাক্লিবীশিংগী মশেক‑মঙালবু লৌখৎতুনা হাপ্লি। নোম্বতনা মশরুক ওইবী নুপী ওইবীশিংগী মমি তারি। লোয়ননা পৃথিবীগী শিন্মী হায়বা শক্তম অসিগা লমদমসিগী মমা ওইবীগী শক্তমগা পূনশিন্নখি, লোয়ননা শূ‑নোম্বা কনবগী মনাৎ অমা লৈজরম্বা অদুগুম্বা লীক্লম অদু ঙসিদি তাবুনুংদা তাদুনা লৈখ্রবা অমনবা ফি ওইখ্রে হায়বগী নীংঙমদবা খোঞ্জেল অমা ৱারীগী নুংদা ফুমদুনা হাপ্লি।

অইবনা হোংলক্লিবা খুন্নাইরোল অমসুং পুন্সিরোলগী মনুংদা চঙ চঙদুনা থিরি ৱাহং কয়াগী পাউখুম। মী অমগী খ্বাইদগী মরুওইবশিংগী মনুংদা য়ূমসু অমনি। হোংলক্লিবা পুন্সিরোলদা হিংনবগী লম্বেল থিবদা মফম কয়া য়ৌই, শিনফম কয়া তৌই। অরোইবদা ইয়ূম লমদম, ইয়ূম য়ূম্ফম হায়বসি কাউবা ঙমদে। অদুবু হোংলক্লিবা পুন্সিরোলসিনা কনাগুম্বনা কনাগুম্বগী মফমদগী মশাগী ময়ূম ওইজবগী হক মাঙহনখি। ‘ইয়ূম’ হায়বা ৱারীমচাদা অইবনা ‍‌‘অচৌবা’ অতোপ্পা মমিং ‍‌‘মোহম্মদ ইব্রাহিম’ গী পুন্সি ৱারী শেমগত্তুনা হোংলক্লিবা খুন্নাইগী মশক অমা পুন্সিরোল অমা উৎনবা হোৎনরি। হিংবগী লম্বী থিবদা খুদোংথীবা কয়া নংলুরবা, পৃথিবীগী মফম কয়া য়ৌরুরবা অচৌবনা ময়ূম লমদম য়ৌরকপা ঙমখিবগী অঙকপা ফংলবা ৱারী অমা শেমগৎতুনা পৃথিবীদা হিংলিবা মীয়ামগী মফমদা ফাওরিবা ইয়ূম লমদমগী মরুওইবদু উৎলি। অদুবু অচৌবনা ময়ূম য়ৌরকপা মতমদদি মহাক্কী য়ূম্ফম মনাওশিংনা লৌশিনখিরম্মী। মহাক্কীনি হায়বা মফম মচেৎ অমত্তসু লৈরমদ্রে। মরমদমদা মহাক ময়ূম লৈতবা মীশক ওইরে। টর্কীদা ইষ্টানবুল শহরগী লম্বীদা ঈশৈ শক্তুনা কোয়চৎ চৎপদা অচৎ‑অওকশিংনা নুংশিনা লুনা তৌবিখি, মিনুংশি উৎপিখি, শেল পীরমখি। মতম শাংনা মহাক হিংখি মফমদুদা অদুবু মরমদমদদি মহাক্কী মনাওশিংমক্না মহাক্কী মফম থম্বিখিদে। মতমগী য়াওলদা ঈগী মরী, থম্মোয়গী মরী হোংখি। হোংখিবদা ইয়ূম হায়বসিগী ৱাহন্থোকসু কায়খি। পোকফম, শাৎফম নৎত্রবসু মিনুংশি মচেৎ খরা ফংদুনা নীংতম্না হিংজবা য়াবা মফম অদুবু ইয়ূমনি হায়না লৌবদা করি লানবগে হায়বা অনৌবা ৱাহং অমা পুশিল্লকই ৱারীমচাসিনা। অনৌবা খুন্নাইরোল অসিনা দাইঅস্পোরা হায়বা মীওই কাঙলূপ অমা শেমগৎলকই। মখোয়গী মফমদা ইরমদম অমসুং ইয়ূম হায়বসিগী ৱাহন্থোক অমা থিবা তারবদি অনৌবা পাউখুম অমা শোয়দনা লাক্কনি খল্লি। পাউখুমদুমক অইবনা ৱারীসিদা পীনবা হোৎনরিবরা হায়বসি ৱাখল খলহল্লি অপাবদা।

‘ৱারেপ অমা’, ‘চাইথোক্লুরবা লৈনাশিং’ ৱারীমচা অনীসিমদি নুপীগী পুন্সিবু মমল হাপ্নবা হোৎনবা পান্দমদা খূৎ থারিবা খূৎইনি। হোংলক্লিবা খুন্নাইরোলদা হোংলক্লিবা নুপীগী শক্তম কয়া উবা ফংলকই। হেন্দোক্না মনীং তম্লবী নুপী কয়া খুন্নাইসিদা উরে, তারে, থেংনরে। ৱারী কয়া, থৌদোক কয়ানি নুপীগী অদুবু মসিনা নুপী খুন্নাইগী অশেংবা শক্তমদু নত্তে হায়বসি অইবনা উৎনবা হোৎনরি। ‘ৱারেপ অমা’ হায়বা ৱারীমচাসিদা অইবনা কবুই নিঙোল গোলমৈগী শক্তম শেমগৎলি। মপামদা হল্লক্তুনা লৈরিবী গোলমৈনা মচাশিংবু য়োক‑থাক্নবা, মহৈ‑মশিন তমহন্নবা য়ু য়োনবগী শিনফম তৌরি। হন্থবা শিনফম পায়রবসু গোলমৈগী লমচত্তি খক হন্থদে। মথৌ তৌবদা কনাগসু ওনশিন্নবা শংদে। মচাশিংগী খনবদা মহাক্কী ৱাখল মীৎকূপ অমত্তসু চোইথোকখিদে।

থোইবগী নুপী সনানা মচা লৈরবী ওইদুনসু মপুরোইববু, পূম্নমকপু থাদোক্তুনা লম্লানবা মীশক অমগী খোঙলোয় ওইদুনা চৎখি। মহাক্কী নুপী সনাগী থৌওংদা খোয়শাওনরবা থোইবনা য়ুগী ঈপাক্তা লূপতুনা লেল্লি। মচাশিংবু থৌশারুদে, নোংমতা মখোয়বু য়েংশিনখিদে। গোলমৈগী মনাক্তা অথেঙবা ফাওবা য়ু থকখি। অসিগুম্বা মহাক্কী থৌওংসিদা গোলমৈনা মশাগী পুন্সিবু বদনামগী মৈশাদগী নান্থোক্নবা অকনবা ৱাফম খরা থম্লকই:

“য়ূগী ময়াই খঙবগুম ঐগী পুন্সিগী মশকসু খঙনবা হোৎনবিয়ু। ঐ নুপীনি, নুপানা ইন্থোক্লবী, ইচা অনীসিগা অদুগা নঙনা নুপা…!”

গোলমৈগী ৱাহৈনা থোইববু মীকপ থোকহনখি। নুপানা ইন্থোক্লবসু মচাগীদমক হিংলিবী গোলমৈগী ৱাহৈনা থোইববুসু মচা নুংশিবা মশক খঙহনখি। নুপী ওইবীশিংদা য়াওরিবা মচা নুংশিবগী ইহুলবু ৱারীসিদা শাফূ লৈনা পুখৎনবা হোৎনৈ। নুপী অমনা লঙজবা মরালগীদমক মপা অমনদি মচাশিংবু থৌশাদবা ঙম্লবসু মপানা ইন্থোক্লবা মচাশিংবুদি মমা ওইবীশিংনা খক মীরায়বা ঙমদে। অহোয়নদুম মখোয়গী পুন্সি মচাশিংগীদমক হিংলি হায়বসি অইবনা ৱারীসিদা উৎনবা হোৎনরি। নুপাগী লীচৎ অমসুং নুপীগী থম্মোয় অনী চাংদম্নদুনা ৱারীসিগী নুংগী ৱাহন্থোক্না নুপা ওইবশিংগী পূক্নিংবু মীকপ থোকহন্নবা হোৎনরি। লৈকাং চারবা খুন্নাইগী মনুংদা মীওই কয়া, নুপী কয়াগী থম্মোয়দা লৈরম্বা মিনুংশি কীন্থখিবদি য়াই অদুবু মদুনা খুন্নাই অমগী অরেপ্পা মশক নত্তে হায়বসিদা থাজবা থম্লিবা অইবনি। হৌজিকসু লমদমসিগী নুপী ওইবীশিংদা মমা ওইবগী থম্মোয়দি মাঙদনা লৈরি হায়বদু অইবনা উৎনবা হোৎনরি।

‘চাইথোক্লুরবা লৈনাশিং’ হায়বা ৱারীমচাসিদা অইবনা লমদমসিগী নুপী ওইবীশিংগী চোইথোক্লুরবা পূক্নিং ৱাখলবু তাশিন খোমজিঞ্জদুনা লৈপোপ কায়দনা হিংহনবা পাম্বা মীৎয়েং ফোঙদোক্লি। ৱারীমচাসিদা অইবনা মপুরোইবগা খাইনদুনা লৈবী নন্দিনীগী শক্তম শেমগৎতুনা মীওইবগী অশোনবা মতৌনা পূক্নিংবু খুদুম চনশিল্লক্লিবা উৎলি। নহা ওইবগী ইহুল কয়ানা শাফূ কন্না চেনশিল্লক্লিবা থৱায়লেম্বনা নন্দিনীবু নুংশিখি, নক্নরুবদগী। পুন্সিগী খোঙচত্তা মমানা লংথোক্লম্বগী চৈনা খাঙদুনা হিংলিবা থৱায়লেম্বনা লম্মাঙনরবা পূক্নিংবু চূপ্লি লাকশিন্দুনা ফাজিনখি। নন্দিনীবুসু পূক্নিংগী মায়ওন হোংহনখি। থৱায়লেম্বগী ৱাহৈদা:

“করিগুম্বা মেদামনা অশেংবা নুপী অমা নৎত্রগা মমা অমা ওইবগী ফিদম ঙাকপী ওইরবদি ঐগী ইমাগুম্না পোকচবা মচাবু থাদোক্তুনা অতোপ্পা নুপা অমদা অমুক য়ূম পানগে খনবিগনুকো।”

ৱাহৈশিংসিনা নন্দিনীগী চাইথোক্লুরবা থম্মোয়গী লৈনাশিংদু খোমজিঞ্জনবগী তাঞ্জা ফংহনখি। নুপীগী পুন্সিবু অৱাংবা ফিদমগা লোয়ননা হিংহনবা পাম্বা মীৎয়েং ময়েক শেংনা ফোঙদোক্লি ৱারীসিদা।

মীওইবনা চাওখৎপগী অৱাংবা থাক্তা ফনা ৱাংনা কাখৎতুনসু পূক্নিংগী অপেনবা, হিংবগী নুংঙাইবা হায়বসিদদি থম্মোয়গী মরী, ঈগী মরী য়াওদনা ওইথোকপা য়াদে হায়বসি উৎনবা হোৎনরিবা ৱারীমচাশিংনি ‘মহৌশাগী মমি’ অমসুং ‘মথংগী নোংমাইজিংদা’। মচাশিংগী য়াইফবনা পুন্সিগী মঙলান ওইজরিবী মমা অমগী মশক্তা কবোক্লৈগী শক্তম শেমগৎলকই ‘মহৌশাগী মমি’ ৱারীমচাসিদা। হিংমিন্নরিঙৈ মতমদা মপুরোইবা বোরসিংনা কবোক্লৈগী থম্মোয়বু পুন্সিবু মশক খঙবিখিদে। নোংমতসু পূক্নিং তিন্ননা নুংশিনা লোয়নবিখিদে। ইমুংগী য়াইফনবতা হোৎনজখিবী কবোক্লৈ অরুবা অনাবনা মতম চাদনা লৈখিদ্রবদা বোরসিংনা পুন্সিদা অহাঙবা হায়বদুগী চৈনা ফংলকই। কবোক্লৈনা মহাক্কী পুন্সিদা কল্লম্লিবা মফম মহাক লৈত্রবা মতুংদতা খঙলকই। মমাগী হোৎনজমলনা মহৈ য়ানবা পুন্সি ওইরক্লবা মচানুপানা মতমগা চূননা শারিবা অনৌবা য়ূমদুদা মহাক্কী নুংঙাইবা, পূক্নিংগী পোত্থাবা ফংখিদে। কবোক্লৈগা লোয়ননা লেল্লকখিবা অমনবা য়ূম্ফম, অমনবা য়ূম মদুতনা মহাকপু পোত্থাহল্লি। পুন্সিগী নুংঙাইবা হায়বসিদা হৌখ্রবগী পুন্সিগা শাগোন্নবা, নীংশিংবনা মহাও হাপ্লি হায়বদু ৱারীসিদা উৎলি। ৱারীমচাসিদা পল্লিবা ‍‌‘মহৌশাগী মমি’, মমাঙগী হৌখ্রবা পুন্সি তাঙ্কক্কী খোঙ্গুল মমিনি। অৱাবা লেল্লক্লগা ফংবা নুংঙাইবগী মীৎকূপশিং হৌখ্রবগী নীংশিং মমি য়াওদনা মপূং ফাদে হায়বদু অইবনা হায়নবা হোৎনরি। মীওইবগী পূক্নিংনা তাল্লিবা নুংঙাইবা হায়বদুগী ৱাহন্থোক অমা থিনবা হোৎনবনি।

‘মথংগী নোংমাইজিংদা’ হায়বা ৱারীমচাসিদা ঈগী মরী হায়বসিগী অচেৎপা থাজবদু উৎনবা হোৎনরি। অনৌবা পুন্সিরোলনা মীগা মীগগী মরীদা লাক্লিবা অহোংবা অদুদা য়ূম্ফম ওইদুনা শাগৎলকপা ৱারীনি। অনৌবা খুন্নাইরোলনা পুরকপা অৱাংবা শিনফম, চাওখৎপা লমদম হায়বদুদা মায়ওন থমখিবদগী ওইরক্লিবা লাপথোক্নবা হায়বদুগী চৈনা অমা ঙসিগী মীরোলসিগী থম্মোয়দা ফাওরক্লি। মুম্বাই সিটিদা লৈবা অহল ওইরবা মিষ্টর কাপূর অমদি মহাক্কী লোয়নবী বাসু অনীগী পুন্সিদা য়ূম্ফম ওইদুনা শাগৎলিবা ৱারী অসিদা মতমগী চৈনা অসি উৎনবা হোৎনরি। চাওখৎলবা অমেরিকাদা অচৌবা থবক তৌদুনা লৈখিবা মচাগা লাপথোক্নবগী চৈনা অহল ওইরবা মপা‑মমা অনীনা খাঙলি। মখোয়গী মরল ৱাত্তনা লৈ অদুবু মচাগা লাপথোক্নবগী মৈচাক্তি মরলশিংদুনা মূত্থৎপা ঙমদে। শহরসিগী চিদাইদা লৈবা ময়ূম‑মকৈ লৈজদ্রবশিংগী মনাক্তা চত্তুনা মখোয়গী লৈজবা মরল তিংদুনা পোৎ‑চৈ কয়া লৈদুনা পুই মফমদুদা নোংমাইজীং খূদিংগী। মখোয়গী মতেং পাংবনা থম্মোয়গী মৈচাক কোক্নবা হোৎনজৈ। মখোয়গী দ্রাইভর ওইরিবা মণিপুরী মচা লেম্বা মহাক্না মখোয়গীদমক তৌবিরিবা মতেং অদুগীদমক মখোয়দগী অচৌবা আশা তৌই অদুবু ফংলক্ত্রবদা মফমদু থাদোক্তুনা তূমিন্না চৎখি। নোংমাইজিং খূদিংগী মখোয়গী অৱাৎ‑অপা পীখিবা আদিবাসীশিং নোংমাইজিং অমখক থেঙনা থুংলবদা চেকতুম‑নূংদুম পায়দুনা থোম্লকখি, তাল্লকখি। মখোয়না অহলশিংদুগী থম্মোয়গী ৱারোল খঙখিদে, খঙনবা হোৎনখিদে। লম্লানবশিংগীদমক ৱারুবগী মহৈ ফংখিদে। অহল ওইরক্লবা মপা‑মমা কয়াগী মথাদগী মচা ওইবশিংবু মতমগী নোংলৈনা হুমদুনা পুখিবগী চৈনা অদু ৱারীমচাসিদা উৎলি। মপা‑মমা ওইবশিংগী নুংগী মপাউ মীওইবা খুন্নাইদা পাউদম্লি।

নোক্নীংবগী ইহুল (সেন্স ওফ হ্যুমর) হাপতুনা ইবা ৱারী অনী অমসু অইবগী লাইরিক অসিদা য়াওরি। মসিদসু মায় পাক্না চঙশিল্লকপা থেংনৈ। ‘নীংশিং কুমওন’ অমদি ‘অশি লৈবাক্তা’ ৱারীমচা অনীসিদা ইহুল অসি হাপতুনা অনৌবা মহাও অমা পীরি। ৱারীমচা অনীসিদদি অরুবা ৱাখলগী ঈরৈগা শাগোন্নবা পাউদম, ৱাহৈ থাদোক্তুনা লমদমসিগী লৈঙাকপশিংগী অরানবা থৌওং, পৃথিবীগী তোঙান‑তোঙানবা মীওই ফূরুপশিংগী মশাজৎপু মীৎমাঙদা পুথোক্তুনা ইকোক কোক্না থম্নবা হোৎনৈ। পাউদমদা নোক্নীংবা, নুংঙাইহনবা ঙম্বা মহাউ হাপ্নবা হোৎনরিবসিদা নীংথিনা মায় পাকই।

‘নীংশিং কুমওন’ হায়বা ৱারীমচাসিদা নোঙ্গাখ্রবা লৈঙাক্কী অচৌবা ফম পায়রম্বা মপাবুংগী নীংশিং কুমওন থৌরম পাঙথোকপা নুমিত্তা নক্না তিন্নরম্বা মপাগী মরুপ অমনা ৱা ঙাঙখি। হকথেংননা উহৌবা খঙহৌবা ৱারোল খরা মপাবুংগী মরমদা হায়রকপদা মহাক্না মন্ত্রী ওইরিঙৈ মতমদা তৌখিবা অরানবা থৌওংশিংবু ইকোক কোক্না ফোঙদোরকই। অতাবশিংনা হান্না খঙলমদবা মপাবুংগী অশোয়বশিং খঙলকপদা নিন্দা তৌদুনা ময়ূমদা হন্নখি। ৱারীসিনা লমদমসিগী লৈঙাক পায়রিবশিংগী থৌওং, মীচম মীয়ামগী, লৈবাক্কী ওইবা শেলফম কয়া হাইহৎখিবগী মশক উৎলি। মাঙদা শং‑শংনা উদুনতা লৈরবা লৈঙাকপশিংগী লীচৎপু মায়খূম হাংদোকপগী থৌদোক অসিবু পাউদমদা নোকনীং‑ইহুল হাপতুনা ফোঙদোরকপা অসিনা অনৌবা মহাও অমা পীরি।

‘অশি লৈবাক্তা’ হায়বা ৱারীমচা অসিদদি পৃথিবীগী তোঙান‑তোঙানবা লৈবাকশিংদগী লাকপা মীওই কয়ানা অশি লৈবাক্তা থুংলবগী থৌদোক অমা পাউদম্লি। তোঙান তোঙানবা মীওইশিংনা মরমদমগী খুন্নাইরোল অমদি পুন্সিরোলগী মতৌগা শাগোন্নবা লীচৎ চৎলকপগী মতৌ অসিনা লমদম কয়াগী শকয়েং মিংশেলগী মতৌগুম মশা মশাগী মশক তাক্লকই। পৃথিবীগী মীওই ফূরুপ কয়াগী মরক্তা লৈরিবা খেন্নবা কয়া; অফবা কয়া, ফত্তবা কয়া চাংদম্নবগী চাংয়েং খোঙচৎ অমনি। ৱারীসিগী পাউদমদসু নোকনীং ইহুল মতা চানা হাপ্পা থেংনৈ, অনৌবা মহাও পী।

কৈথেল্লাকপম লন্দনগী ৱারীমচাশিং ৱারী লীদুনা নুংঙাইবা পীবগী পান্দমদতা খূৎ থাবা নত্তে। মতমসিগী খুন্নাইরোলদা হিংলিবা মীশিং, থোক্লিবা থৌদোকশিং, ওইরিবা ফিভম কয়াদা অচৌবা ৱাহং হংনবা হোৎনবা, অনৌবা লমথুং অমগীদমক ৱাখল খন্নবগী পোরম য়াৎলিবা ৱারীশিংনি। ৱাখল খলহনবা হায়বসি পাউদমগা ঈরোয়ননা চৎমিন্নরিবা থৌওংনি। হিংবগী ফিভমনা হেন্না হেন্না লুশিল্লক্লিবা ঙসিগী খুন্নাইদা অরুবা ফিভম, অরুবা ৱাহং কয়াবু পুখৎপনা মহাক্কী ৱারীশিংগী মরুওইবা পান্দমনি। নুংঙাইবা পীদুনা পূক্নিংবু ইয়াং য়াংহনবদু নত্তে। পুখৎলিবা সমস্যাশিং হৌজিকসু মাঙদা তাদুনা লৈরিবা অরুবা ৱাফমশিংনি। ৱাহংশিংগী ঈরৈদা পূক্নিংবু হুমদুনা পুথরিবা খূৎইনি। খূৎইসিদা লমদমসিগী হৌখ্রবা খুন্নাইরোল, হৌজিক্কী খুন্নাইরোল, পুন্সি অমদি মীওই লীচৎকী খোঙ্গুল মমি ময়েক শেংনা তারি।

শক্নাইরবী অইবী ফিক্সন রাইটর ক্ষেত্রিময়ূম সুবদনীনা ইং ২০২২ গী জুন থাদা ফোঙলকখিবা মহাক্কী অকোনবা ৱারীমচাগী লাইরিক অশেংবা ইরল হায়বসিদা হংলি, পুন্সি করিনো খঙদনা ঙসি ফাওবা লাক্লিবা শাংলবা মীওইবগী পুন্সি খোঙচৎসিদা নুপাগা‑নুপীগগী খেন্নরিবসি করিনো? অদুগা অমুক পাউখুমসু পীরকই, নুপী ওইবীদি চৎনবীনা নুং‑পান অনীবু য়োমশিন্দুনা ফিজেৎনরিবীনি, অদুগা চৎনবীসি নুপা ওইবনা মশাগীতা কান্নবা য়েংদুনা শেম্লিবা অদুবুনি। অদুগুম্বা ফিজেৎ অদু হেক লৌথোকখিবদা নুপী অদু সমাজনা অঙাওবীগী থাক্তা লংথখিগনি। অদুগুম্বা থাক্তগী কাখৎলক্তুনা মহৌশাগী পুন্সিদা লেন্নবা হোৎনরকপদা নুপী অমনা কয়াগী মতিক ৱাবগে, খুদোংথীবা কয়া মায়োক্নবগে হায়বদু অইবীনা মহাক্না শাগৎলিবা ৱারীমচাশিংদা থৌনা ফনা উৎলি। নুপী ওইবগী অৱাবদি নুপী ওইবীশিংনা ফাওবা খঙবিদে হায়বদু য়ৌই। অসিগুম্বা নুপীগী পূকচেলবু অনৌবা যুগকী ভারত সাহিত্যগী নোভেলিষ্ট শরৎচন্দ্র চট্টোপাধ্যায়না নুপীগী মমল লেপ্নবা হোৎনরিবা মহাক্কী ৱারেংগী লাইরিক নারীর মুল্য হায়বসিদা মরীক চূম্না উৎলি। য়েক্নবনা ফাদুনা পুরকখ্রবা নুপীবু ইকায়বা পীদুনা ওৎপ‑নৈবা চত্থরকপদা হায়ঙমদনা অৱাবা খাঙলিবী নুপীদুগী অৱাবদু মফমদুদা লৈরম্বা নুপীশিংনা অৱাবা নংলবী নুপীদুগী অৱাবা কোক্নবা মতেং পাংবিবগী মহুত্তা হরাওনা অপেনবা ফোঙদোক্তুনা নোক‑খেনা লঙনবদা মখোয়সু য়াওশিল্লি। মসিনি নোভেলিষ্ট শরৎচন্দ্রনা মহাক্কী ৱারেংসিদা উৎলিবা নুপীগী পূকচেল।

তৌবমকসু অসিগুম্বা নুপীগী পূকচেল অসি লৈরমদ্রগদি ফিক্সন রাইটর ক্ষেত্রিময়ূম সুবদনীনা মহাক্কী ৱারীশিংদা নিঙোলগা‑মৌগা, মনেমগা‑মমৌগা, মৌ মশেল মূক্নবগী, য়েৎনবদগী, য়ানদবগী ৱারী লৈরমদবসু য়াই। অসিগুম্বা মূক্নবা, য়েৎনবা, য়ানদবশিংগী মরক্তনি অইবীনা নুপী ওইবীগী ফজবা মশক উৎলক্লিবসি। মণিপুরগী লময়ানবা ফিক্সন রাইটরশিং, মিং ওইনা খরদং পল্লবদা—অঙাংহল, শীতলজিৎ, আর কে এলাংবম, থোইবী, বিনোদিনী অসিনচিংবা লমজিং মৈরা ওইরম্বশিংনা য়েক্লম্বা নুপী ওইবগী অরেপ্পা মশক্তগী কদায় ফাওবা খেন্ননা ক্ষেত্রি সুবদনীনা হৌজিক মতমগী অইবী অমা ওইনা মহাক মশাগী মীৎয়েংদগী তোপ তোপ্পা নুপী ওইবীগী মশক অমা পুথোরক্লিবগে হায়বদু মহাক্কী হন্দক ফোঙলকপা ৱারীমচাগী লাইরিক অসিদদি ময়েক শেংনা উরে হায়নীংই। নোভেল, দ্রামা, শৈরেংদা অপাবগী পূক্নিংবু ঈথক‑ইপোম হৌহন্নবা পীরকপা কল্লবা শাফূ অদুমক ৱারীমচাগী ওইবা হৌনবা টেক্নিক শীজিন্নদুনা অইবীনা মহাক্কী ৱারীমচাশিংদা চপচানা হৈ‑শিংনা উত্থোরকই। হৌজিক মতমগী সমাজদা থোক্লিবা থৌদোক‑ৱাথোকশিং, মীওইবগী নুতি নুমিৎ খূদিংগী লেন্নরিবা পুন্সি মরেলদা অইবীনা চঙশিন চঙশিন্দুনা তোঙান তোঙানবা পুন্সিগী মহাও পীবা মীওইবগী অৱা‑নুংঙাইগী ওইবা মখল‑মথেলগী পুন্সি ৱারী শাগৎলকই। ৱারীমচাগী ওইবা ৱারী লীবগী অইবীগী হৈ‑শিংবদি ফন‑ফজনা মহৈ য়াল্লে, অইবগী মপূং ফারবা এক্সপরিয়েন্স লোৎশিন্দুনা থম্বা য়ারক্তে। ৱারীগী প্লোট শেম্বদা, কেরেক্টর শাগৎপদা, মীত্তা শং‑শংনা উবা, থেংনরকপা, মীওইবগী কূপখ্র‑কূপখ্রবা লৈনবা মরী, অৱা মৈশা লাংবমক্তা হায়রবসু থনুং য়ৌবা মৈচাক অদু ফাওবা খম থেংনা থম্লকই। অইবীগীদি লৈথেৎ‑লৈকোই য়াওদবা, মমৈ‑মকোক লোত্তবা, কিশি কিদুনা থমদবা মতমসিগী ওইবা লোলনি। মহাক্কী লোলগী নীংথিজবদি কেরসু ফজৈ, কেদ্রসু ফজৈ।

হন্দক্কী অইবীগী খোমজিনবা ৱারীমচাগী লাইরিকসিগী ‘অশেংবা ইরল’ হায়রিবা ৱারীমচা অসিমক্তি অইবীগী মায় পাক্লবা ৱারীমচানি হায়রুবদা ক্রিটিক কনানসু য়েৎলক্লরোই খল্লি। ৱারীগী ফোর্ম, টেক্নিক, থিম, প্লোট অমসুং কেরেক্টর শাগৎপদা, লোল শেম্বদা, মতম অমসুং খোঙচৎকী অতপ্পা‑অয়াঙবা অনীবু চাং পুদুনা চৎপদা ৱারীমচা ইবী ক্ষেত্রিময়ূম সুবদনীনা পাক্লবনি হায়রুবদা হায়মনবা থোক্লরোই। লোয়ননা ৱারীমচা অসি খূদোল তৌরকপনা মণিপুরী সাহিত্যগী ৱারীমচাগী খোঙচত্তা অইবীনা কাউঙম্লরোইদবা অচৌবা ফিদা অমদি কল্লে হায়না অপাবশিংনা শোয়দনা শীংথানরক্কনি।

নুপা‑নুপী অনী পানমিন্নদুনা চৎলিবা তাইবংগী খোঙচৎসিদা নুপীবু মী ওইনা লোয়নরক্ত্রবদা, নুপীনসু নুপীগী মগুণ ঙাক্নরক্ত্রবা মতমদা, নুপী ওইবগী থৌনা‑লিংজেল, অচুম‑অরানগী বিচারদা অৱাংবা থাক্কী কক্নীংঙাই লৈতবা রাই পীবা ঙম্বগী শক্তি, সমাজবু অৱা‑নুংঙাইগী ঈথক‑ইপোম হৌহনবা ঙম্বা, অওনবা‑অহোংবা পুরকপা ঙম্বা নুপী ওইবীগী মায়থীবা পীঙমদ্রবা পূকচেল অমসুং মরীক চূম্বা নুপী ওইবগী পুন্সি মশক লেপ্পনা অইবীনা ৱারীমচাসিগী থিম শাগৎলকই।

ৱারীগী ৱেল‑মেদ প্লোট শাগৎলকপদা অইবীনা লুখ্রা ওইহৌরবী তোম্বীনৌগী পীক্লিবা মচানুপা অনীবু মমা ওইবীগী হৌনশা মথৱায়দগী হেন্না নুংশিজবা অদুদগী হৌরক্লগা অহল ওইরক্লবা মমাবু মচা‑মমৌনা মীতোপ মীরান্দৌনা লোয়নরকখিবদগী ইমুং‑মনুংগী ওইবা মমা‑মচা, মচীন‑মনাও, মনি‑মমৌ নুংশিনবগী মরী লীক্লি মচেৎ তানা কায়বদৌনা তাইশিন্নবা য়াদনা কায়থরকখিবা অদুবু মহৌশাগী লীক্লমদা অমুক হঞ্জিলহন্দুনা মতম চূপ্পগী ওইনা মীওইবগী মরক্তা শেৎন‑খাইনদনা থনম্নবা চেৎলবা নুংশিবগী মরী অদু শাগৎলকপা অহল ওইরবা তোম্বীনৌগী অরোইবা পুন্সিগী মীৎকূপ্তা উৎলম্বা থম্মোয়গী ঈহৌবু, হৌজিক্কী সমাজদা মতমসিগী মীশিং অসিনা খঙলসনু হায়বা থাক অদু ফাওবা য়ৌনা থম্লকখিবা ৱারীগী মশক অদুনি ‘অশেংবা ইরল’ হায়রিবা ৱারীমচাসিনা ফোঙদোক্লিবসি।

মতম অমগী থকশি‑খাশি নাইবা সমাজদা, য়ূমথংনবা মশেল নিবদা পীনরিঙৈ, কৈরোয়‑লৈকায় মশেল হংবদা শরুক য়ামিন্নরিঙৈ, লৈকায় লান্না নুংশি‑চান্ননা হিংমিন্নরিঙৈ মতমদা হৌজরকখিবী তোম্বীনৌ য়ূম পাল্লবা মতুং মপুরোইবা লৈখিদ্রবদা য়ূম‑ইংখোলদা হৌবা য়েন্সাং, মনা‑মশীং হেক্লগা কৈথেলদা য়োন্দুনা পীক্লিবা মচানুপা অনী চাউনবা য়োক্লকখি, মচা চাউরগা নুংঙাইনি হায়বগী আশাদা লৈজরম্বা লৌ মরাক্তু য়োন্থোক্তুনা মচা অনীবু মপান লমদা থাদুনা মহৈ তমহল্লকখি। মচা অনী চাউরে, মহৈ তম্বা লোইরে, মশা ঈৎপা ঙম্নরে। মচানুপা অহল সরকারগী থবক ফংলদুনা লুহোংলে, মচা লৈরে। অদুবু মচাগা মমৌগনদি তোম্বীনৌবু অৱাবা কয়া খাঙনা শাজখিবা ময়ূম, চেকশিন্না ঙাকচরকপা ইংখোলদগী তান্থোক্তুনা ওল্ড এজ হোম অমদা পুরক্লগা থম্লকখি। নোংমতা মচা‑মমৌগী মফমদা অকনবা ৱাহৈ অমতা ঙাঙলকখিদ্রবী, অখাবা মীৎয়েংনা য়েংলকখিদ্রবী মমাবু‑মনেমবু মীওইবনা হৌনদবা, তৌহৈদবা নুংশি হৈতনা ফনা থীনা ওৎ‑নৈরবদসু, তোম্বীনৌনদি মখোয়বু মতম্বাক্তা চোং‑ফন্দুনা শান্নজরিবা পীক্লিবা মচাদু ওইনা অদুম্মক ঙসিসু উরি। অদুবু মচাগী‑মমৌগী শাজৎনা‑মীৎয়েংনা অসি য়ৌরক্তুনা মহাকপু ওল্ড এজ হোমদা লৈরবা অসিদদি তৌম্বীনৌ খঙলক্লে—মহাক্কী মচা‑মমৌবু নুংশিজবদু লেঙদনা লৈরি হায়না ফনা হোৎনরুদনসু করিসু কান্নররোই, মহাক্তনা অরানবা তারগনি, মহাক্কী অশেংবা নুংশিবদু মতম চূপ্পগী ওইনা মাঙখ্রগনি। খল্লু খল্লুরগা মহাক্কী কনা লৈজদবগুম, নুপীনি হায়দুনা উশিৎত্রিবরা হায়না করিগুম্বা মীৎকূপ্তা মচা‑মমৌবু ৱারৌরকই। অদুবু অরূবা ঈশিংগুম চেন্থরিবা মহাক্কী মমা ওইবীগী নুংশিবগী ঈচেলবু করাম চাউবা, কল্লক‑মিহৌবনা লাকহৎলকপদগী মীওইবনা মিনুংশি য়াওদবা, হিংচা য়াইতম্বা ওল্লক্তুনা নৈখায়রকপদা মহাক্তি করিগী মখোয়গুম্না হিংচা য়াইতম্বা, মিনুংশি য়াওদবা, অদুক পাঙদবা মীশক ওইজরুনি হায়না তোম্বীনৌনা খল্লক্লে।

হৌজিক্তি তোম্বীনৌ মশাগী অশেংবা ফিরেপ লৌরকই। তাইবংপান অসি শরুক তংখায় অমদি নুপী ওইবীগীনি। কনানসু মদুবু ৱাৎহনবসু য়ারোই, হেনগৎহনবগীসু কান্নরোই। তাইবং অসি শেম্বদা, শাবদা, ফজহনবদা নুপী ওইবীনা লৌরিবা, লৌগদবা থৌদাং পূম্নমক নুপী ওইবী খূদিংমক্না কাউরোইদবনি, মদু মতম পূম্বদা ঙাক্না চৎকদবনি। মসি নুপা ওইবা খূদিংমক্নসু খঙবা তাবনি, মদুবু ইকায়খুম্নগদবনি। ইশম শম্না হায়রবদা নুপী ওইবীদি মপুরোইবগীনি, মচা‑মমৌগীনি, মশুগীনি। মখোয়দুনদি মহাকপু মখোয় মখোয়দুগী মফমদা করিগুম্বা মরম অমা নৎত্রগা অমনা করিসু ওইদনা লৌখিবদি য়াই। অদুবু মদুগীদমক্তা মহাক্না কনাদা ৱাকৎলুগনি, কনাদবু হায়জরুগনি! ৱাকৎ তারিবা মহাক্তু নুপা ওইগেরা, নুপী ওইগেরা, মখোয় পূম্নমক নুপীনা পোকপা নত্তবরা? কনাদা ৱাকৎলুগদৌ শরুক, হায়জরুগদৌ শরুক, নুপী ওইবী মহাক্কীদি মপুরোইববু নুংশিজবা, মচা‑মমৌবু অমদি মশুবু নুংশিজবা অদুবু চেৎনা‑লুনা থাগোন্নজরগা পুন্সি খোঙচৎকী অরোয়বা তানখিবা অদুনি। মদুতনা কায়রবা, তোইরবা ইমুং‑মনুং অমদি সমাজবু তাইশিন্নদুনা মহৌশাগী ফিভমদা হঞ্জিলহল্লগা ফজবা, নীংথিবা পূম্বনা তিল্লবা তাইবংপান অমা ওইহল্লম্বা অদুবুনি তোম্বীনৌগী থম্মোয়না লেপ্লকখিবা অশেংবা ফিরেপ।

ফিরেপ অসি লৌরকপদা তোম্বীনৌনা পুন্সিদা কনাগসু শীংনখিদে। কনাগুম্বনা করিগুম্বদা নুপা ওইবসু য়াই নুপী ওইবসু য়াই মহাকপু শীংনরকপদা হঙ্গৎনা য়েংদুনা মখোয়গা মায়োক্নরুবসু তৌদে। অদুগা মশা হীকথদুনা গতি লৈজদ্রবী হায়বদু ওইদুনা কনা লৈজদ্রবী তোল্ল‑তারবী অমগুম পুন্সিসি লোইবা নুমিত্তুদা লোইরে খল্লগা শিবা ঙাইবসু নত্তে। অদুগা অমরোমদা কত্থোকপদনা শরুক ওইদুনা মহাকপু নীংশিংদুনা লৈহৌরসনু হায়বা পুন্সিদা চাউথোকচবসু মহাক্কী মশাদা লৈজদে। মহাক্না লৈরিবা ওল্ড এজ হোমদা মহাকপু উনবা লাকখিবা মথৱায় শোক্লবা মচানুপা অতোম্বা থানিলদা তোম্বীনৌনা হায়খিবদু মতাং অসিদা য়েংবা য়াই:

“…পুন্সি খোঙচৎপু তম্বা ঙম্বরা? হৌজিক্তি অৱাবা অমতা লৈত্রে। কনাগী অমুক ৱারুখিনি। নুংঙাইবা হায়বসিদি অৱাবা অনীগী মরক্তা লৈবা মীৎকূপতুনি। লন‑থুম অপাইবা লৈচিলনি। চপ মান্নবা থোঙ্গাল অমদগী লাকপা ঐখোয় চাক্নিবদগী নিংথৌরেল ফাওবা চপ মান্নবা থোঙ্গাল অমদা হনখিগদৌরিবনি। নুংঙাইবদি নুংদা য়াওজবা ওইরম্লে। ঐখোয়নতা মপালদা থিরম্বনি। …থানিল নঙনা তাঞ্জরকপদুনা নঙনা হিংনবনি নঙনা পীখিবশিং অদুদি নঙগী পুন্সি নুংঙাইনবগীনি। পীখিবগীদমক লৌখিবগীদমক নুংঙাইতবা তৌগনু।”

অমুকসু মমাদা লাল্লে হায়জরখিবা, মমাবু য়ূমদা পুনবা ওল্ড এজ হোমদা লৌবা লাকখিবা মচানুপা অহলবু য়েংলগা হায়জরকখিবদু লৌখত্তুনা য়েংবা য়াই:

“সনাজাওবা, মীওইবগী নুংঙাইবদি লন‑থুমদা নত্তে। অশেংবা নুংঙাইবদি ঈশ্বরদা মায় ওনশিল্লগতা ওইরম্লে। ইচাগী দোষ পাপ পূম্নমক ইমানা লোইনা কোকথোক্লবনি। নঙনা মী ওইনা অমুক্তং হিংহৌবদো অদুনি ইমানা পাম্লিবা। ঙসিদি নুংঙাইরে নঙনা জ্ঞান তারকপসে শিরবসু খুয়া তুশিৎলে। …ইমাদি য়ূমদুদা অমুক হন্না চৎলরোই।”

অসুম হায়না মচাবু অমুক্তং কৌরম্লগা তোম্বীনৌ অরোয়বা মীৎকূপ তানখি। অদুবু কনাগীসু মীখা পোন্দনা, কনাদসু য়েৎলুদনা মীওইবা অমা ওইনা পোকপগী পুন্সিগী অরোয়বা মীৎকূপ্তা থৱায়গা হকচাংগা খাইনরবা মতুংদা থৱায় য়াওদ্রবা উতূপ তাবদৌ তারবা হকচাংগী অরোয়বা মথৌ‑মঙম পাঙথোকপগী থৌরম অদু ফাওবা মফম চানা মরম চানা অপোকপী মমানা শিন্নদুনা থনম্লে হায়বসি মচানুপা সনাজাওবনা খঙলকই। তোম্বীনৌনা হিংলিঙৈদা মশাগী থৱায় য়াওদ্রবা হকচাংবু হোস্পিটালদা কত্থোক্লম্বগী মশাগী সহী পীথোক্লম্বদুনা মচা ইবুংঙো সনাজাওবগী হক লৈখিদরে। মমাগী থৌরাংসিদা খাঙফম খঙদ্রবা মহাক্কী ৱাবগী ঙমখৈ লৈখিদে, ৱা ঙাঙবা থোকখিদরে। মখা তানা অইবীনা অসুম্না ফোঙদোকই:

“অদুগা পূম্নমক অসিদগী খ্বাইদগী খাঙঙমদ্রিবদি মনেমগী সেবা নোংমতা তৌখিদ্রবী মমৌনুপী সনাহনবীনি। নীংঙমদবগী মৈচাক্না মাগী থম্মোয়গী কাচিন পূম্নমক ওমদুনা লৈরম্বদু মৈ হৌনা চাকখৎলক্লে। করি অমুক হায়রুনি মহাক লোন্থোক্তবীগুম্লে।”

এম্বুলেন্স লাক্তুনা অশিবা হকচাং লৌবা লাকপদা ময়াম কপ্নরকই। হকচাংদু পুদুনা থৌখ্রিবা গাড়ীগী মনীংদুদা পিরাংনা চোল্লবা মীৎ ময়াম্না তান্ন‑তান্না উরিবমখৈ য়েংলি হায়রগা অইবীনা মহাক্কী ৱারীমচাসি লোইশিল্লি। অদুবু অইবীগী ৱারোইশিনগী ওইবা ৱারী লীবগী টেক্নিকনা পীরিবা সিঙ্গল ইফেক্টতি থৱায় য়াওদবা হকচাং পুখিবদা কপ্না কপ্না লৈহৌবা অদুদা নত্তে। চীন্না কাঙথোক্ত্রবসু, ইদুনা থমদ্রবসু কায়নবগী মৈচাক্না থম্মোয় পুঙমদনা লৈহৌবা খূদিংমক কনানা মমা‑মপানো, মচা‑মমৌনো, কনানা মরী‑মতানো, মচীন‑মনাওনো, মচীন‑মৌপ্ব ানো, কনা কনানা মরুপনো‑মপাঙনো হায়বগী খেন্নবা অমতা লৈরোই, পূম্নমক তাইবংসিদা পোক্লবদি মী ওইয়ু, মী ওইনা হিংঙু, মী ওইবগী থম্মোয় পাল্লু, মী ওইবগী নুংশিবা পূকচেল চেল্লু, কল্লকপা‑য়েংথীবা, অশাওবা মীওইবগী হৌনশানি, অদুবু কয়া কুইনবু কল্লক য়েংথীদুনা, শাউদুনা লৈগনি, পূম্নমক থম্মোয় অমদি নুংশিবা পূকচেলনা ঙমদুনা তাইবংগী লৈকোলসিদা ঋতুগী খোঙচৎ তুংইন্না লাক্কনি চৎখিনি, কনাসু অমর নত্তে, অসিগুম্বা লেপ্পা লৈতবা ঈচেল অসিবুনি, তাইবং খোঙচৎ হায়রিবসি। অসিগুম্বা তাইবং খোঙচৎপু ফজবা নীংথিবা পূম্বনা তিল্লবা শুহ্মৎপগী চেৎলবা লীপূন্না পুল্লসনু হায়বসিনা তোম্বীনৌগী অরোয়বা পুন্সি খোঙচৎকী থাজবা ওইখি।

থৱায় য়াওদ্রবা হকচাং পুখিবগী কপ্নবা মরক্তা সনাজাওবা কপকনি হায়বা কাউখরে। হৌফম‑লোইফম খঙদ্রবা অৱাবগী পোৎলূম্না মহাক্কী মশাদা খাঙফম খঙদনা নন্থরক্লে। অপোকপী মমা ইবেম্মনা হায়রম্বা ৱাহৈ খূদিংমক নীংশিংলুরগা মহাক তপ্না তপ্না জ্ঞান তারক্লে, হৌজিক্তি মহাক খঙলক্লে, অপোকপীগীদি তাইবংসিদা পোক্লম্বগী পীগে খনবা পূম্নমক অমতা খাক্তনা পীরম্লে। অদুবু অপোকপীগী মফমদা মহাক্নদি করি করিদি পীখরে, নৎত্রগা তাইবংসিদা পোক্লুবগী মহাক্না করিদি পীরমগদৌরি? লুখ্রা ওইহৌরবী অপোকপীনা মচা অনীবু চাউনবা য়োক্তুনা মী ওইহল্লকখিবা পূম্নমক্তু শীংথাবদা লোইররোইদবা মমা ওইবীগী পূকচেল, মমৌনা সেবা তৌরদে হায়বগী নোংমতসু নিংদোন পোমখিদবী, থরুম তৌখিদবী, অসিগুম্বা গুণ পূম্নমকসিনা ঙসিদি মহাকপু তাইবংসিদা পোক্লকপগী অর্থ খঙহনবিরম্লে। মসিনা মহাক্কী মফমদদি অপোকপী মমা ইবেম্মগী অশেংবা মরল ওইররে। অদুবু নীংঙমদবগী খাঙঙমদবা অৱাবা মরক্তা থিংঙমদনা ঈহৌরকপা অপোকপীবু নুংশিবগী মপাউদি কনাদবু তম্লগা অৱা‑মৈচাক খাঙলুনি? নীংঙমদবগী মৈচাক্না মশা পূম্বা মৈ হৌনা চাকখৎলক্লিবী মহাক্কী লোয়নবীগী মফমদা ফোঙদোক্লুরগা মহাক্কী অৱাববু কোক্কদ্রা? লোয়নবী মহাক্কী মতৌদুদা অদুগুম্লবী মহাক্তুনা মপুরোইবনি হায়দুনসু, মহাকমক্কী হেক অৱাবদা শরুকপু য়াবিরক্কদরা? হায়বা শাবনি নাউথী শাজফমদা ওইখিবী অপোকপীনা লৈখিদ্রবদা মহাক্কী লোয়নবী অসি নত্তনদি মহাক্কীনি হায়বা অতৈ কনা অমা লৈহৌরি তাইবংসিদা?

অদুবু মনেম্না লৈখিদ্রবা মতুংদা নীংঙমহৌদ্রবী মমৌনা করি ওইহৌবা অমদি করিবু খল্লিবা হায়বদু অইবী ক্ষেত্রি সুবদনীনা মহাক্কী ৱারীসিদা ফোঙদোক্লিবা ৱাহৈশিং অসি অমমমতং লৌখৎলগা নৈনরগদতা ময়েক শেংনা খঙগনি। মণিপুরী সাহিত্যগী মোদর্নিষ্ট লিটরেচরদা হৌজিকসিদা ক্ষেত্রি সুবদনী খূমাঙ চাওশিন্না খূৎ থারক্লিবী অমনি হায়বদা হায়মনবা থোক্ত্রবী অইবীনি। মহাক্কী হন্দক ফোঙলকপা ৱারীমচাগী লাইরিকসিদা মহাক্না শাগৎলিবা ৱারী খূদিংমক্তা ইন্দিভিজুয়েলিজম, এক্সপেরিমেন্টেসন, এবসর্দিটি অমদি সিম্বোলিজমগী অরেপ্পা মশক ময়েক শেংনা তারি। মীওইবগী হৌনশা ইমুং অমমমদা অমদি সমাজদা নাকল অনী অনী থোক্না চিংখাইনরকপা থৌদোকশিংদা মহাক্না মহাক্কী ৱারীগী সেট্টিং, প্লোট অমদি কেরেক্টরশিং শাগৎলকই। মহৌশাদগী মণিপুরীশিংগী ইমুং অমমমদা পীক্লবসু‑চাউরবসু থোক্লিবা মনি‑মমৌগী, মচীন‑মনাওগী মরক্তা চিংখাইনরকপগী লান অদু লৌখত্তুনা অইবী সুবদনীসু মহাক্কী সাহিত্যগী মচল শেম্লকই। মনেমগা‑মমৌগা, মৌগা‑মৌগগী মরক্তা নাকল‑নাকল লেপ্নদুনা উংখৎনরকপগী ৱারী কয়া শাগত্তুনা মণিপুরী সাহিত্যগী শক্নাইরবা অইবা‑অইবীশিংনা সমাজদা মীৎ‑নাকোং ওইহন্দুনা শাংলবা মতমসি লাকখ্রবনি। তৌবদবু কল্লক‑খম্বন্নবা, অনেম‑অৱাং, অচৌ‑পীশক খায়দুনা হন্থনা য়েংনরকপা, অমগা অমগা তূক্কৎচনরকপা পরম্পরাদগী চৎনদুনা লাকপা থোক্লিবা ইমুং‑মনুংগী চিংখাইনবগী ৱারীশিং অদুদগী ক্ষেত্রি সুবদনীগী খূৎইদি নান্থোরকখরে।

অইবীনা উরিবদি, মীওইবনা নোংমা নোংমগী মোদর্নাইজেসন অমদি অর্বানাইজেসনগী ভিক্টিম ওইরকপগী অৱাবা অদুবুনি। মীওইবনা মশা মশাখক্তবু নত্তনা, মপা‑মমানি, মপুরোইবনি‑মচানি, মচল‑মচেনি, মবুং‑মৌপ্ব া নি অমদি মরুপ‑মপাঙনি হায়বগী খেন্নবা লৈতনা অতৈ কনা অমবু উরক্ত্রবা মতমসিগী মীশিংগী মতৌবু তোম্বীনৌগী মমৌ ইবেম্মবু সিম্বল ওইনা অইবনা উৎলকই। অমেরিকাগী মোদর্ন পোইট কেন্নেথ রেক্সরোথনা অমেরিকাগী সমাজদা হিংলিবা মীশিংবু অমগা অমগা ঈ‑পাউ ফাওনদ্রবা, অৱা‑নুংঙাই শরুক য়ামিন্নবগী ৱা য়াওদ্রবা অতিয়াদা থোক্লিবা নাইতোম তানা তানা, হন্নফাওবা য়েংনদনা ঙাল্লিবা থৱান্মিচাকশিংগুম নৎত্রে হায়রগা মরোল থোক্ত্রবা, অৱা‑অনা হংনদ্রবা, য়েংবদা মীৎফম হোংবা য়াদ্রবা অয়েকপা লাইগুম্বনি হায়না মহাক্কী শৈরেংশিংদা য়েক্লকখিবা মতৌ অদুগুম অইবী ক্ষেত্রি সুবদনীসু মণিপুরী সমাজদা হিংলিবা মীশিংবুসু মহাক্কী ৱারীমচাসিদা য়েক্লকই। মোদর্নিষ্ট রাইটর অমা ওইনা মহাক্কী ৱারীসিদা মোদর্ন মণিপুরগী মীশিং অসি পঞ্চভূৎনা শাবনি হায়বা কাউখরে, লোইনা রোবোট ওল্লকপগী অমদি কলচর মাঙলকপগী অৱাবগী শক্তম অদু মমৌ ইবেম্মা অসিবু সিম্বল ওইনা পুথোক্তুনা অইবীনা খঙহল্লকই।

তৌইগুম্বসুং অইবী ক্ষেত্রি সুবদনী সমাজগী মায়োক্তা লৈবা রিভোল্যুসনরি অমদি নত্তে, অদুগা অচুম‑অরান য়েংদনা সমাজগী চৎনবীবু হেক্তা শৌগৎপা কোনফোর্মিষ্ট অমসু নত্তে। তৌবদবু মহাক্কী ৱারীসিদা অইবীনা মমৌ ইবেম্মগা মনেম ইবেম্মগা নাকন নাকন লেপ্নহন্দুনা চিংখাইনহল্লিবা অসিনা খঙহল্লিবদি সমাজ হায়বদি তাইবংপান অসি হিংহল্লগুমসি, পূম্মাঙ মাঙহল্লসি হায়বা নত্তে, অইবীগী অপাম্বদি মীওইবসি হিংগদবনি, মদুসু অমগা অমগা নুংশি‑চান্ননা, নুংঙাই‑য়াইফনা হিংমিন্নবা অদুবুনি। মমৌ ইবেম্মনা লেপ্লিবা ফিরেপ অসিদি তাইবং‑মালংপান অসি পূম্মাঙ মাঙনবগী মশক পুবা হূ চেনবা মীওইবগী সমস্যানি হায়বসি মনেম ইবেম্মনা খঙলে অমসুং মদুনা মরম ওইদুনা খুইথরবা উপাল অমদি লৈপালবু ঈশিং চাইর চাইরদুনা উপালনা পূমশং শংবা, লৈরাংনা পূময়োম য়োম্না শাৎপা মালেম লৈকোয়পূং ওইহন্নবা ফিরেপ অইবীনা মনেমবু লৌহল্লকই।

মরম অসিনা মনেমগী পুন্সি অমদি মমৌগী পুন্সি অনীসি পূন্না খঙগে হায়রবদি মীওইবা, পুন্সি অমদি তাইবংগী অশেংবা মশক খঙবগী তঙাইফদবা লৈরকই। অসুম্না মীওইবা অমসুং তাইবংগী মশক খঙনবগী অমতা ঙায়বা উপায় অমা হায়রগদি সাহিত্যদগী হেনবা অমা লৈতে, অদুগা সাহিত্যনা তোঙান তোঙানবা মশক‑মওং কয়া লৌরক্লবসু মশাগী ওইবা মতিক মগুণদি হোংবা লৈতে হায়বসি অইবী ক্ষেত্রি সুবদনীনা থাজৈ। মীৎয়েং অসিদগী মতম কৌবী লাইরেম্বীনা মায়থীবা পীঙমদ্রবা মীওইবা অমসুং তাইবংগী লেঙদ্রবা মরলদি সাহিত্যখক্তনি হায়বসি অইবীনা মহাক্কী খূৎইশিংদা উৎনবা হোৎনরকই। নুপী ওইবগী ফজবগা‑ফজদবগা অনী চিংখায়নরকপা অদু মমৈদদি ফজবগী ঈচেলদা অমতা ওইনা চেন্থমিন্নরকখিবগী অশেংবা শক্তম অইবীগী ৱারীমচা ‘‍‌অশেংবা ইরল’দা উৎলিবা মনেমগা মমৌগী অনীগী কনফ্লিক্টনা থম্মোয় ফূক্না নুংশিনা লীরি।

মচাগা মমৌগনা মমাগী মখোঙ শোক্না খুরুমদুনা ঙাকপিনবা হায়জবগা লোয়ননা মমাবু লৌবা লাক্লিবনি হায়রকপদা মমানদি মচা‑মমৌবু ঙাকপিখি; মচানা জ্ঞান তারক্তুনা মী ওইনা হিংহৌবদা অপোকপীদি শিরবসু খুয়া তুশিৎলে হায়রদুনা, ‌“ইমাদি য়ূমদুদা অমুক হন্না চৎলরোই” হায়রম্লগা তোম্বীনৌ পুন্সিগী অরোয়বা য়াহীপ তানখি। মনেম্না অসুম্না অরোয়বা য়াহীপ তানখিবসিদা খাঙঙমদ্রবা কায়নবগী মৈরীলক্তা ৱানা খাঙহৌরবী নীংঙমহৌদ্রবী মমৌ ইবেম্মা সনাহনবীগী মফমদদি ৱাহং চাম্মা চাম্মা হংলরে। অদুবু মতাংসিদা হায়হৌদবা ইয়ামক য়াদবা মতাং অমদি অইবী ক্ষেত্রি সুবদনীনা ৱারীমচাগী ওইবা মশক শুক্কায় হেক কায়হনবা তৌদনা মহাক্কী ৱারীমচাসিদা মনেম ইবেম্মা তোম্বীনৌ অমসুং মমৌ ইবেম্মা সনাহনবী অনীমক হৌজিক মতমগী মণিপুরী সমাজদা ৱাখল খলহন্নীংঙাই ওইবা অকনবা নুপী ওইবীগী শক্লোন পুবী কেরেক্টর অমমম শাগৎলগসু মনেম্না করি করি ৱাহংবু হংলিবা অদুগা মমৌনা করি করি পাউখুমবু পীরিবা হায়বদুদি অইবীনা মহাক্কী তোমথিন ওইবা ৱারী লীবগী টেক্নিক অমা ওইনা মহাক্কী হন্দক্কী ৱারীসিদা থম্লক্তে। মতাং অসিদি অইবীনা অপাবগী মফমদা শিন্নরগা মহাক্না মহাক্কী ৱারী লোইশিল্লি।

হৌজিক, অইবী ক্ষেত্রি সুবদনীনা ৱারীসিদা য়েক্লিবা কেরেক্টর তোম্বীনৌবু খঙনবা হোৎনরকপদা সাহিত্যগী টাইমলাইন অমা শেম্লগা নৈনবনা অচৌবা মতেং অমা ওইগনি। তরামাপলশুবা চহীচাগী অনীশুবা তংখায়দা সাহিত্যগী অনৌবা মায়ওন তাকখিবা নোরৱেজিয়ান কবি অমদি প্লেরাইট জোহান হেনরিক ইবসেননা মতমদুগী য়ুরোপকী সমাজদা মিদ্দল ক্লাসকী ওইবা খৃষ্টিয়ানশিংগী য়ূম্বান‑কৈবান্দা নুপীশিংনা য়ূম পাল্লবা মতুংদা নুপীবু ওৎপ‑নৈবগী চত্থরিবা চৎনবী অদুবু য়ানীংদবা উত্তুনা মহাক্কী লৈবাক হূপ্না য়েংনখিবা দ্রামা এ দোল’স হাওস ইরকই। দ্রামাসিদা মপুরোইবা Torvald Helmer গীদমক্তা অৱা‑অনা কয়া খাঙলিবী প্রোটাগোনিষ্ট Nora Helmer বু মপুরোইবনা য়ূম্বানবগী হৌনবা ইমুংগী ৱারেপ অমতং লৌরকপদা শরুক য়াহল্লক্তবা, অদুদসু নত্তনা নুপী হায়বসিদি নুপাগী অঙাং পোক্নবখক্কীদা লৈবনি, নুপানা চত্থরকপা থবক খূদিংগী দোষ‑গুণ পুথোক্লুবা তৌদনা নুপাবু পংনুংদা নুংশিদুনা লৈগদবনি, নুপানা জগোয় শাউ হায়বদা শাগদবনি, মতম মতমগী ওইবা নুপাগী অনীংবা‑অপাম্বগী মতুং ইন্না খোঙ থাংগদবনি, লোয়ননা মপুরোইবনা শেলতনা পুন্সিগী অরোয়বনি খল্লকখিবদুনা মহাক্না মথৌমক্নি খন্দুনা তৌজরকপা খূদিংবু লান্না উরকপা, পূকচেল লেপ্তবীনি হায়রকপা, লমচৎ চুমদবীনি লৌরকপা, মসি পূম্নমকসি খল্লকপদা নোরাগী মশাদা কনানসু ইনশিল্লুবা তৌদনা ফাওরকখিবদি নুপা ওইবশিংনা খল্লিবসি নুপীদি সমাজদা মথন্তা হিংবা ঙম্বা নত্তে, আইনসু নুপানা শেম্বনি, বিচারসু নুপানা চত্থবনি রাইসু নুপানা পীবনি অদুগা নুপী ওইবীগী শাজৎ‑লীচৎকী লানবা‑চুম্বসু নুপানা লেপকদবনি হায়বসিনি। মতাং অশ্বায় য়ৌরকপদদি নোরাগা মহাক্কা মপুরোইবগা লৈনরিবা লুহোংবগী মরী অসিদি য়ূম্বুবী অমা ওইবগী মহুত্তা মহাক্তি মপুরোইবগী মফমদা মীওইবগী ৱাখল চেন্দ্রবা শান্নপোৎকুম্বা লাইধিবী অমা ওইরক্লে, অদুগা মচা অহুম—Ivar, bobby অমসুং Emmy বুনা মহাক্কী মফমদা লাইধিবী অমমম্নি হায়না মহাক্কী মশাদা ফাওরক্লে। মমৈদদি মহাক্কী পুন্সিনা থেংনরক্লিবা চৈনা কয়াসিগী মরক্তা নোরানা মহাক মশামক্কী অমদি তাইবংপান অসিগী অশেংবা মশক খঙলগে হায়বগীদমক্তা মপুরোইবা অমদি মচা অহুম থনমদুনা নুংঙাইনা লেঞ্জরম্বা ময়ূম থাদোক্লম্লগা থোক্লকখি।

অমরোমদা বেঙ্গলি সাহিত্য অমসুং বেঙ্গলগী ৱারীশিংদা হেন্না কত্থোক্লবী ভারতকী নুপী অইবী, একাদেমিক অমসুং ট্রান্সলেটর অরুনা চক্রবর্তিনা মহাক্কী মরিশুবা নোভেল সুরলক্ষ্মী ভিল্লা  দা প্রোটাগোনিষ্ট ওইরিবী সুরলক্ষ্মীনা নুংঙাইরবা ময়ূম থাদোক্তুনা চৎখিবা, অমুক হল্লকখিদ্রবা অদুগী ৱারী লীরি। কুনশুবা চহীচাগী ময়ায় চল্লকপা বৃটিশ ইন্দিয়াগী কোলোনিয়েলিজমগী মতমদগী হৌরগা নীংতম্লবা মতুং চহীচা অসিমক্কী লোইশিল্লকপা ফাওবদা বঙ্গালি সমাজদা লৈখিবা বঙ্গালি নুপীগী অশেংবা মশক অদু অইবীনা মহাক্কী নোভেলদা য়াম্না চঙখোন্না উৎলকই। অসিদসু নত্তনা বৃটিশ ইন্দিয়া অমসুং নীংতম্লবা মতুং ফাওবদা লৈবা অপ্পর মিদ্দল ক্লাস অমসুং লৱার ক্লাসকী ওইবা বঙ্গালি সমাজ (হিন্দু অমসুং মুস্লিম) গী শক্তম অদুবুসু অইবীনা মহাক্কী লাইরিকসিদা য়াম্না ইচঙ থৌনা উৎলি।

বৃটিশ ইন্দিয়াগী কোলোনিয়ল ব্যুরোক্রেসিদা মরুওইবা ফম পায়খিবা আই সি এস ওফিসার অমগী মচানুপী মঙাগী মনুংদা অহুমশুবী কুনল বসু সুরলক্ষ্মী চৌধুরীগী ৱারীনা নোভেল অসিগী মপূং ওইবা মশক্নি। থায়নদগী চৎনরকপা ইমুং‑মনুংগী ওইবা নিয়ম‑নীতি অমসুং চৎনবী অদু অফা‑অপুনগী মশক্নি খন্দুনা মদুদগী নান্থোক্নবা আই সি এস ওফিসার অসিনা খাথংবা দিল্লীগী মফম অমা হোংলক্লগা য়ূম‑কৈ শাদুনা লৈরখি অমসুং মচানুপী মঙাগী য়ূম ইংখোল অমমমসু মাগী মাগী মমিংদা পান্দুনা থম্বিখি। মমা ইবেম্মা লক্ষ্মীনা ইমুংদুগী অশূপ্পীনি। মচা ইবেম্মা অহলদুনা মশাগী চহী তরাতরুক্তা লুখ্রা ওইহৌবগী অৱাবা চৈনা অদুনা মরম ওইদুনা মমা ইবেম্মা অসিনা লুহোং খোংদোংববু থৌওইনা মরু ওইনা লৌবগী মহুত্তা মচানুপীশিং অসি অৱাংবা থাক্কী মহৈ‑মশিং তমহল্লগা মাগী মাগী মপা চানবা বর অমমম খঞ্জসনু হায়বা ৱারেপ লৌরকই। অদুবু খল্লিবদু খঞ্জৈ হায়বদা মঙায়রে, লাইবক্কী নোংদমখোলনি হায়গদ্রা, মদুগী ওন্ন‑তৈনবদা থোক্লরে। মশামক দোক্টর অমা ওইদুনা লাইরিক‑লাইশু মতিক চানা হৈরবী, শক্ত‑চুদা ৱাৎত্রবী, মশা ঈৎপা ঙম্লবী সুরলক্ষ্মী নুংশি মরী থমদুনা মহাক্কী ওইগদবা বর খনবদদি মশাগী ফিরেপ লৌবা ঙমজদবী, অচুম‑অরান মশক খঙদবী মীশক হায়বদু ওইরকই। মহাক মশাগী চহী কুন্থ্রামাথোই শুরকপদা মঙোন্দগী চহী তরাতরেৎ হনবা, নুংশিরুবগী মতিক চাদবা, নুপীদা লায়চূবা, লমচৎ কাম্বা নুপা অমবু মহাক্না নুংশিরুরে অমসুং নুপাদুদা মহাক মশাসি তপ্না তপ্না চিংশিনখি। নুপাদুগী অনীশুবী নুপী ওইনা মশানা য়ানা নুপাদুগা লুহোংখি। অদুগদি মমৈদা মচানুপা অমা পোক্লবা মতুংদা, মচানুপাদুবু মপাগী মতুংদা থনম্লগা, মপাবুংনা মাগীদমক তম্লিবা চাউখ্রবা য়ূম অদুবুসু নুপাদুদা পীথোক্লম্লগা ভারতকী কোনুং ওইরিবা দিল্লীদা গাইনিকোলোজিষ্ট অমা ওইবগী চাউথোকচনীংঙাই ওইবা মেদিকেলগী পুন্সি অদুবু তুংওইনরমদুনা নোর্থ বেঙ্গলগী লাপখ্রবা খুঙ্গং মালদাগী চাওখৎপগী মঙাল ফংদ্রিবা লাপখ্রবা মফম অমদা মহাক্না য়োকচবী হন্থবা থাক্কী মুস্লিম ইমুং অমগী চহী নৌরিবী নুপীমচা অদু পুরগা লাকখি। মফমদুদা মহাক্না নুপী ওইবী অমসুং অঙাংশিংগী লেম্না লায়েংবগী ক্লিনিক অমা হাংদুনা হিন্দু‑মুস্লিম খায়দনা মীয়ামগা লোয়ন‑তিন্নরকই। থাদোক্লম্লবা য়ূমদুদা মহাক অমুক হনখিদরে।

মহৌশাদগী য়ূমমুক নুংশিবা কদায়দা লৈরমগদগে হায়নবদু, মদু ফনা ওইদুনসু ইবসেনগী নোরা অমদি অরুনা চক্রবর্তিগী সুরলক্ষ্মীনা নুংশিরবা য়ূমদুদা অমুক হনখিদবা অদুগুম ক্ষেত্রি সুবদনীগী তোম্বীনৌসু মশাগী য়ূমদুদা হনখিদরে। মতাং অসিদা হায়হৌগদবদি নৈনরিবা অসিগী শরুক অমা ওইনা ক্ষেত্রি সুবদনীগা, ইবসেন অমসুং অরুনা চক্রবর্তি অনীগা চাংদম্নরুবগী ৱাফম নত্তে। অইবা অহুম্না শাগৎলিবা কেরেক্টর অহুম্না মাগী মাগী নুংশিরবা য়ূমদুদা করিগী অমুক হনখিদ্রিবনো অমদি মদুনা মানা মানা হিংলিবা সমাজদা কদায় ফাওবা চৈথেং পীবগে হায়বদু পুথোক্লুবা অদুগা মদুদগী তুংদা করি ওইরকখিবা হায়বদু উৎপা তারকপা অদুতগী ৱাফমনি।

ইশম শম্না হায়রবদা পেট্রিয়াকেল সমাজদা মহৌশানা নুপী ওইবীগীদি মপাম্না অশেংবা য়ূম নত্তে, পুন্সিগী ওইবা মীৎয়েংদা য়েংলকপদা মসিদি ঙাইহাক্কী লমদনবা, চঙজফম লৌবা শঙ অমা হায়বদুনি। নুপী ওইবগী অশেংবা য়ূমদি মপুরোইবগী য়ূম অদুনি। এ দোল’স হাওস তা ইবসেননা নোরাবু মপামদা লৈরিঙৈ অপোকপা মপাগী লাইধিবীনি হায়না উহল্লকপা, অদুগা লুহোংদুনা য়ূম পাল্লবা মতুংদা মপুরোইবগী য়ূমবু অশেংবা য়ূমনি হায়না নোরানা খল্লুবদু ওন্ন‑তৈনবা ওইরম্লে। চহী নুপাল চূপ্না মচা অহুম পোক্তুনা য়ূম্বানমিন্নরক্লবদসু মহাকপু মপুরোইবনা মহাক্কী লাইধিবীনি হায়না লৌহল্লকই। য়ূমদুদা মপুরোইবনা মহাক্কীনি হায়বা শরুক করিসু থুংহন্দে, য়ূমদু থাদোক্তুনা চৎনীংবা মতমদা চৎখিবা য়াগনি খলহল্লকই। মসি খঙলকপদগী নোরানা চৎনবীনি হায়বগী ৱানি লুহোংবা হায়বসি ফাগিগী মশক্নি হায়না উরক্লে, সমাজসিদা, নুপা ওইবগী মফমদা নুপী হায়সিদি শান্নপোৎকুম্বা লাইধিবীগী অশেংবা মশক ওইরম্লে হায়না খল্লকই। অসুম্না উরকপা অমসুং খঙলকপা মীকূপতুদগী নোরানা য়ূমগী থোঙ মখোল থোক্না হৌনা থিংজিল্লমদুনা তুংওইনরম্লগা য়ূমদুদগী থোক্লকখি। অদুগা মীওইবগী মপোক্তা নুপী ওইবীদি করিসু ওইরমদরে, অদুবু মসিবু চুম্লিবরা হায়বসি নোরানা খন্থবা হৌরকই। অসুম্না নোরানা কনাগীসু মতেং লৌদনা, কনাগীসু মীপান তাংদনা মশাবু মশানা খঙজনবা অমদি তাইবংগী অশেংবা মশক উজনবা লম্বেল থিরুরগে হায়বা ফিরেপ লৌরকই।

মতাং অসিদা ক্রিটিকশিংনা হেনরিক ইবসেনবু মহাক্কী লাইরিক অমসুং লীলা অসিবু, মরু ওইনা নোরাবু নাক‑য়েত্তা য়েংদুনা মাগী মাগী অনীংবা ফোঙদোক্নরকই। ইবসেননা মহাক্কী মতমগী য়ুরোপকী সমাজ অমসুং নুপী ওইবীবু করম্না তাক্লিবগে হায়বদু খঙহন্নবা মহাক্না মহাক্কী লাইরিক্কী মমিং অসিমক সিম্বোল ওইনা পুথোরকই। নুপীনা য়ূম পান্দ্রিঙৈ মপাগী য়ূম অদুগা লুহোংদুনা য়ূম পাল্লবদনা নুপাগী য়ূম, অনী অসিদি তশেংনা নোরানা পামজরিবা য়ূম অদু ওইরমদরে। মহাক্না পামজরিবা, খঞ্জরিবদি পুন্সিবু য়োকপিরিবা, ঙাকপি‑শেনবিরিবা, ইমুং মনুংগী লৈরিবা মী‑পোৎ পূম্নমক থম্মোয়গী লিপুন্না পুনবা থৱায় পানবগা পাংখক্নি খন্না লৈজরিবা পূম্নমক্কী তূংনফম ওইবা য়ূম (Home) অদুবুনি। ঙাইহাক্কী ওইনা লমদন্নবগী মশক পুবা, অহীংবা অমগুম্বনি হায়নসু খন্নীংঙাই ওইদবা অরাক অরাকপগী চঙজফম লৌনফম ওইবা শঙ, অদুগুম্বা য়ূম (House) অদু নত্তে। মী ওইনা পোক্লগা নুপী ওইবীশিংগীদি মখোয়গীনি হায়বা অশেংবা মরল হায়বদি অশেংবা য়ূম হায়বদু লিংনবগী মফম মচেৎ অমতা ওইরবসু তাইবংপানবসিদা শরুক থুংবিরমদরে হায়না নোরানা খল্লক্লে। নুপী হায়বসিদি শান্নপোৎকুম্বা লাইধিবী ওইনা মহাক্না উরক্লে। মহাক মশানা পোকচবা মচা ফাওবা মহাক্কী মফদদি লাইধিবিনি হায়না মহাক্না উরক্লে। মসি পূম্নমকসি খল্লকপা অদুগা মপুরোইবগী শাজৎপুসু উরকপা, মতাং অসি য়ৌরকপদদি মহাক্কী মফমদা য়ূম অদু অশেংবা য়ূম ওইরমদরে, শারং (cage) ওইরম্লে। মরম অসিমক্ননি, নোরানা মপুরোইবগী মায়োক্তা লেপতুনা শীংনরম্লগা য়ূমদুদগী থোরকখিবসি। ক্রিটিক খরা অমনা ইবসেননা মহাক্কী প্লে অসিদা ফেমিনিষ্ট প্লে অমা ইনীংলকখিবনা মখোল হৌনা ফেমিনিষ্ট দ্রম থিল্লকপনি হায়রকখিবদু মহাক্নদি য়াখিদে। অদুগা খরা অমনদি নোরা মথন্তা লেপচবা ঙম্বী নত্তে, নোংমা য়ূমদুদা অমুক হল্লকখিবগদবী নুপীনি হায়বসিনি। তশেংনা হায়রবদা লীলাসিনা লোইশিল্লকপদা ভাবকপু থম্মোয় কায়হল্লি, অমরোমদা অমুক লীলাসিবু থাগৎনরকই। মসি ঙসিসু অদুম্মক লেপ্তনা চত্থরি। লীলাগী অমসুং ৱারীগী ফজবদু মসিনি হায়নরি।

অমরোমদা ভারতকী নুপী অইবী অরুনা চক্রবর্তিনা কুনশুবা চহীচাগী বঙ্গালি সমাজদা নুপানা য়ূম্বুরেন ওইবগী চৎনবী অমসুং মদুনা নুপী ওইবীগী পুন্সিদা পীরিবা অৱা‑চৈথেং অদুগী মায়োক্তা লেপতুুনা চৎনবী অদুদগী নান্থোক্নবা সুরলক্ষ্মীনা য়ূমদুদগী থোরকখিবগী ৱারী লীরি। বঙ্গালি সমাজদা লৈরিবা হিন্দু‑মুস্লিম অনীমক অমগা অমগা জাৎ মান্নদ্রবসু অমদি অনেম‑অৱাং ফনা খায়দুনসু অমসুং ধর্ম্মগী খেন্নবা ফনা লৈদুনসু নুপীবু হন্থনা য়েংলিবা মীৎয়েংদি নাকন অনীমক চপ মান্নৈ। অনেম্বা থাক্কী বঙ্গালি মুস্লিম নুপাশিংদা লৈবা মীৎয়েং অমসুং শাজৎ অদুমক অৱাংবা থাক্কী বঙ্গালি হিন্দু নুপাশিংদসু চপ মান্ননা লৈ, অমগা অমগা করিসু খেন্নদে। অদুগুম্বা নুপানা য়ূম্বুরেন ওইবা য়ূমদুদা নুপী ওইবীবু ঙাকপি‑শেনবিনবা কনাসু করিসু লৈতে। নুপানা লমচৎ চুমদবা ফনা ওইদুনসু য়ূম্বুরেন ওইরুবনা নুপানা অতোঙবদতদা লেপ্পি অদুগা নুপীনা ফনা মতিক চাবী ওইরবদসু য়ূমদুদা মখোয়গী শরুক থুংদে। মমৈদা নুপী ওইনা পোক্লুবনা অসিগুম্বা চুমদবা, হৌনদবা পূম্নমকসিগী ৱাকৎফম লৈতনা যুগ কয়াসি লীশাং শীৎনা নুপী ওইবীনা নাইতোম তানা মদোম খাঙজবদনা শরুক ওইরগা লাক্লি। পূম্নমকসিনা চৎনবী ওইরগা করিগুম্বা নুপী ওইবীনা চৎনবী অদুবু ঙাক্না হেক চৎলুদবদা সমাজদা নুপী ওইবীগী চন্নফম লৈতে।

পূম্নমকসি অইবী অরুনা চক্রবর্তিনা মহাক্কী নোভেলগী মমিং লৌদুনা থোল্লিবা প্রোটাগোনিষ্ট সুরলক্ষ্মী পুথোক্তুনা নুপীনা য়ূম পাল্লক্লগা নুপাগা নুপীগা অনীগী মরক্তা লুহোংবা হায়বসিনা য়াত্তুনা থম্লিবা ঙমখৈ অদু খুদোম্বীনা থিন্দুনা তাক্লকই। নুপী ওইনা পোক্লগসু মশক‑মতৌ ফজবী, মহৈ‑মশিংদা ৱাৎত্রবী, মশা ঈৎপা ঙম্না শিনফম নাইরবী, অৱাংবা থাক্কী ইমুংদা পোক্লবী, নীংখিবদা হন্দবী, অফা‑অপুন য়াওদনা মনীং তৌনা হিংজনীংবী সুরলক্ষ্মীনা লুহোংলবা চহী তরুক্কী মতুংদা চহী মঙাখক্তা ঙায়রিবা অমতা পোকচবা মচানুপাদুবু মপাগা লোয়ননা থনম্লগা মহাক্না য়োকচবী পীক্লিবী মুস্লিম নুপীমচাদু পুরগা চাউরবা য়ূমদুদগী থোক্লকখি। পূম্নমকসি উরিবা তারিবা য়ূমদুনদি থৱায় পান্দবা কৌবনিনা কনাগী মফমদা ঙাঙথোক্লুবা ঙমদনা লৈহৌরে। মপাবুংনা মচা নিঙোলগীদমক্নি হায়দুনা শাজখিবা য়ূমদু চৎনবীবু নমখায়দুনা চেন্থথরকপা সুরলক্ষ্মীগী কল্লবা ঈরৈদা তুরোই‑ঙাম্লোই খাঙহৌরে।

অসুম্না ক্ষেত্রি সুবদনীগী ৱারী ‘অশেংবা ইরল’গী প্রোটাগোনিষ্ট তোম্বীনৌসু নোরা অমসুং অমসুং সুরলক্ষ্মীনা ফংলিবা চৈনা অদুমক চপ মান্ননা ফংই। মসিদা উরিবা খেন্নবা হায়ববু নুপা মরায় অমা হেন্না য়ূমদুগী য়ূম্বুরেনবী অমা ওইনা মচাশিং চাউনবা য়োক্তুনা শেম্লক্লগা মচাগা মমৌগনা খাঙবা ঙমদমখৈ নৈবগা লোয়ননা ওল্ড এজ হোম অমদা পুরক্তুনা থম্লখিবা অমদি নুংশিরবা য়ূমদুনা লানবুং ওল্লক্তুনা পুন্সিগী অরোয়বা শরুক্তা ওল্ড এজ হোম অসিদা লৈররবা মতমদুদা খল্লকখিবা মহাক্কী ৱাখল অদুনি। মণিপুরী সাহিত্যদা ৱারীমচাগী অমসুং লীলাগী শক্নাইরবা অইব‑অইবীশিংনা মখোয়গী ৱারীশিংদা মচা‑মমৌশিংনা অহল ওইরবা মমা‑মপাশিংবু হন্না য়েংদবগী অৱাবগী চৈনা উৎপা, হৌজিকসিদা থেংনরিবা মণিপুরী সমাজগী অশেংবা মশক মাগী মাগী মীৎয়েংদা উনরকই। শক্নাইরবা অইব‑অইবী খরগী মিং পল্লবদা মখাগী অসুম্না থমজরি—এলাংবম দীনমনি, নোংথোম্বম কুঞ্জমোহন, লমাবম বীরমনি, কৈশাম প্রিয়োকুমার, মাইবম নবকিশোর, নাউরেম কালিমোহন, মোইরাংথেম ইনাও, চনা লুখোই, রঞ্জিৎ নিংথৌজা, মনাওবী এম এম, বরকৈন্য, সত্যবতি নিংঙোম্বম, নী দেবী অসিনচিংবা কয়া লৈখরে। চাউথোকচনীংঙাই ওইরবা মখোয়সিগী মরক্তা ক্ষেত্রি সুবদনীসু মাঙজিল তানা ফিরাল পায়রিবী অইবীনি।

মহাক্কী হন্দক্কী ৱারীমচাসিদা অইবীনা তাইবংপানসিদা নুপী ওইবীগী অশেংবা মশক্তু উৎনবা হোৎনরকই। সমাজ অসিদা নুপী ওইবীনা কল্লিবা মফম অসি কদায়দা মান্নরিবনো, কদায়দা খেন্নরিবনো হায়বদু তাকপদা অইবীনা পুথোরক্লিবা থিম অসি কাউবা নাইররোইদবা নুংগী ওইবা লেঙদবা মশক্নি। মদুগা মপা চাননা শাগৎলিবা ৱারীগী সেট্টিং অদুনসু অমুক্কা হেন্না ৱারীগী থিম অদু উৎপদা অচৌবা মতেং ওইরকই। ওল্ড এজ হোমদা লৈররবা অসিদা তোম্বীনৌনা খল্লকখি, মথৱায় পান্দবনিনা নুংশিরবা য়ূম অদুদি কায়না মৈশা লাংলম্লরোই, ইহাঙ হাঙহৌরে হায়বগী অৱাবগী খোঞ্জেলসু থোক্লরোই। অফববু ওইরে, ফত্তববু ওইরে হাঙবা কৌবা লৈতবদি মীওইবগী থম্মোয়খক্তনি। অকোয়বদা লৈরিবা সমাজগী মশক অমদি মীওইবগী পুন্সি অনীসিদা মায়কৈ খঙদনা হায়ফম খঙদনা হুম্লকপা কল্লবা নোংলৈ নুংশিৎনা য়ৈবদা পোত্থাফম খঙদ্রবা হৌজিক্কী মীরোল অসিদি নুংঙাইবা থিবদা কল্লক মিহৌবা মরক্তা থম্মোয়গী মশক খঙলক্তরে, মখোয়গী মফমদা থম্মোয়গী মমল লৈরক্তরে। ইচা‑মীচাগী ৱা ঙাক্তা নৎখিদরে, মসিদি মীওইবা পূম্নমক্কী ওইবা ৱাফম্নি। সমাজগী অওনবা অমদি মীওইবা পুন্সিগী হোংলকপা খোঙচৎপু মায়রোঙ য়ানা থেংননবা তোম্বীনৌগী শক্তি লৈজদে। হৌজিক্তি মহাক খঙজরে অমসুং মশানসু য়াজরে নুপী ওইবী মহাক্কী থৌদাংদি মীওইবগী থম্মোয় মশক তাকপা অমসুং থম্মোয়গী মমল লেপ্পা অসিনি। অসুম্না নুংঙাইবা থিবা অমসুং কল্লক‑মিহৌবা মরক্তা অপোকপীনা অসুম অসুম অহলগী মতম ওইশিল্লক্তুনা হকচাংনা নোংমা নোংমগী শোন্থরকপগা মচাগা মমৌগনা অপোকপীবু নুংশিবগী চাংসু অসুম অসুম হন্থরকপা অদু তোম্বীনৌনা উরে। মদুদা মহাক্না ৱারৌবদি তোকখ্রদনা মতমসিগী মীশিং অসিগী লাইচৎ লায়নানা অনা লৈচেন্নবদা য়াওখ্রবা মচাগা মমৌগবু কলহৌনবা পুন্সিগী অরোয়বা মীৎকূপ অদু ঙাইরক্লে। মখোয়বু থম্মোয় পানবা মীশক অমমম ওইহৌনবা হায়বসিনা মহাক্কী লাইনীং ওইরক্লে। মসিদা তানবা হোৎনরকপদা তোম্বীনৌনা মাগী ইমুং মনুংখক্তগী ৱারীদা তাখিদনবা মহাক মশাসি মীয়ামগী অমদি মীওইবা সমাজগী ওইরে হায়বদু খঙহল্লগে হায়না মপূক্নিং চপ য়ুংনা লেপখি।

তোম্বীনৌ মহাক্কী নীংজবা থুংখি। অপোকপীবু য়ূমদা চৎলসি হায়না লৌবা লাকখিবী মচাগা মমৌগনা থম্মোয় পাল্লে হায়বসি খঙলকপদগী মচা‑মমৌ অনীবু আশির্ব্বাদ পীরম্লগা তোম্বীনৌ পুন্সিগী অরোয়বা য়াহীপ তানখি। থৱায় য়াওদ্রবা মহাক্কী হকচাং হোস্পিটালগী গাড়ীনা পুদুনা চৎখিবদা লৈহৌরিবা মী পূম্নমক্তা মানা মানা খঞ্জবা তোঙান তোঙানবা মীৎয়েংদা তোম্বীনৌনা পীরম্লিবা, মীপূম খূদিংমক নুংশি লীপুন্না পুনগদবনি হায়বা পুন্সি পাউমেল অদু মশা মশাদা চপ মান্ননা ফাওনরকই। মীওইবগী লেঙদবা অশেংবা য়ূমদি মীওইবগী থম্মোয়খক্তনি হায়বা তোম্বীনৌগী ৱাখল মীৎয়েং অদু মপূং ফানা মায় পাক্না উৎপা ঙমখরে। মহাক্কী অসিগুম্বা ৱাখল‑মীৎয়েং অমসুং পূক্নিংগী পাঙ্গল অসিমক তোম্বীনৌগী অশেংবা মরলনি হায়বদা চিংননীংঙাই লৈতে। অসিগুম্বা ৱাখল মীৎয়েং অমসুং ফিরেপ অসিমক তানবা ক্ষেত্রি সুবদনীনা শাগৎলিবা মহাক্কী ৱারীমচা ‘অশেংবা ইরল’ হায়বসি অইবীগীদমক্তদি মায় পাক্লবা ৱারীনি। তশেংনা হায়রবদা অইবীবু থাগৎফম থোকই, থাসু থাগৎনরক্কনি।

ৱারীমচা অসিগী মমিং লৌদুনা থোল্লিবা লাইরিকসিগী ৱারী খূদিংমক্না পীরিবা অকনবা শাফূ অমা হায়রগদি অইবীনা ৱারী অমমমদা য়েক্লিবা মীশকশিং অদুগা মখোয়না হিংলিবা সমাজ অদুগা মূক্নরকপা অমদি থেংগাইনরকপদা থোক্লকপা থম্মোয়গী অৱা‑চৈনাখোল অদুনি। অমরোমদা হায়রগা অইবী ক্ষেত্রি সুবদনীনা মহাক্কী ৱারীমচাশিং অসিনা খূৎলায় ওইরগা হৌজিক্কী মণিপুরী সমাজ অসিগী থনুং য়ৌনা চঙশিন্দুনা মসিগী শিংলী‑নাউরি খূদিংমক অমমমদং পায়রগা শীৎ‑নান্দুনা মসিবু মিহুল হুল্লিবরা নৎত্রগা হুনবু হুন্দ্রবরা হায়না লায়েংলকই। তশেংনা হায়রবদা অইবীগী হন্দক্কী ৱারীমচাগী খোমজিনবা লাইরিক অসিনা সমাজগী ওইবা ৱাফম অমসুং সমাজদা থোক্লিবা থৌদোক‑ৱাথোকশিং, অফ‑ফত্ত পুথোক্তুনা উৎলকই অমসুং নৈনরকই। মসিদা অইবীনা থম্লিবা মহাক্কী পান্দমদি মীওইবগী পুন্সিগী অশেংবা মশক অদুবু য়েকপা অমসুং উৎলকপনি। মীওইবগী ৱাখল খন্থদবা অপঙ‑চূদানবা মতৌ, পুন্সি অমগা অমগা উতাই (মপা) চানদবা থৌদোকশিং, অরানবা তৌহৈদবা শাজৎ‑লীচৎ পূম্নমক অসি য়ারিবমখৈ অইবীনা মহাক্কী ৱারীমচাশিং অসিদা উত্থোক্নবা হোৎনরকই। অদুবু অইবী ক্ষেত্রি সুবদনী সমাজগী মায়োক্তা অমসুং পুন্সিগী মথক্তা লানহৌবী অমদি নত্তে। মহাক্কী পুন্সিগী খঙলকঙৈদগী উজরকপা থেংনজরকপা সমাজগী ফজদবা মশক অমদি চুমদবা মতৌ অদুবু মশাগী ওইনা য়াজনীংলক্তবা অমসুং মদু পূম্নমক্তুনা করি ওইহল্লকপা, থোকহল্লকপা য়াবগে হায়বদু খঙলগা লাকচবসিনা অইবীদি মপূং ফানা জ্ঞান লৈরবী, মীওইবগী থৌজালগী গুণতনা য়োম্লবীনি হায়বদি হ্যুমেনিষ্টনি হায়বদু উৎলি।

লাইরিকসিগী অহানবা ৱারীমচা ‘ইপোম হৌদ্রবা ঈপাক’ হায়বসিদা ৱারী লীরিবা মেম্মীনা লৌনম তৌবা নুপা অমদা চেল্লুবদগী খঙনরক্তুনা খাইদোক্নরবসু সমাজনা দাগফম লৈরবীনি হায়দুনা মহাকপু ইন্থোরকপদা শীংনবা অমা য়াওনা অৱাংবা থাক্কী মহৈ তম্লকই। মমৈথংদা মহাক্কা মহৈ তম্মিন্নবা মীরমগী মরুপ অভিনাশনা মেম্মীগীদমক লেপ্লখি। অসুম্না শাবী‑শানৌ অনী পুন্সি লৈপুন শেমখি। ৱারীসিদা নুপীসে অমুকপু চেল্লুরবদি মৌ ওইরুরে হায়বগী মিংদা মীয়াম্না লৌবিবগী থম্মোয় শোকপা অৱাবদগী মেম্মীবু মিনুংশিগা লোয়ননা মতৌ করম্না কলহৌবগে হায়বদু উৎলি। মিনুংশি য়াওদ্রবা সমাজগী মীৎয়েংদগী অইবীনা মেম্মীবুদি কনবা ঙমহৌরে। অদুবু ‘লংজিন খঙদ্রবা লংদুম’ হায়বা ৱারীমচাসিদদি লায়রবা ইমুংদা ৱানা হোৎনদুনা মী ওইজরক্লবী মচীন তুমখৎচরকপী চাউবনা সমাজগী কল্লক‑মিহৌবশিংগী চাকথাক ওইনা তাদুনা পুন্সি পিখম্নখিবদা কনানা মতৌ করম্না থোকহনখিবনো হায়বদু পুথোকপা ঙমখিদবা মিনুংশি য়াওদবা সমাজনা ঙমখিবগী অৱাবা ৱারী পীরি। অমরোমদা মীওইবগী মিনুংশিগা শানা উৎপা মিনুংশিগা করম্বনা হেল্লি হায়বদু চাংদম্নদুনা শাদসু মিনুংশিগী চাং য়াম্না হেন্না য়াওই হায়বা উৎপা লোয়ননা মীওইবনা মিনুংশি চাউই হায়বদু কদায়দনো হায়না অইবীনা হংলকই অমসুং অপাবশিংবু ৱাখল খলহল্লকই।

অসুম্না খোমজিনবা ৱারীমচা লাইরিকসিগী অতৈ ৱারীমচাশিংসু সমাজগী ওইবা ৱাফম অমসুং মীওইবগী অৱা‑নুংঙাইগী পুন্সিগী থৌদোক‑ৱাথোক্কী ৱারীশিংনা অয়াম্বা শরুক্নি। তৌবদবু অইবী ক্ষেত্রি সুবদনীগী মহাক মশাগী ৱারী লীবগী টেক্নিক অসি ৱারীশিং অসিদা নাকন অনী থোক্না খায়দোক্লগা নাকন অমদনা সমাজ হায়বসি থম্লগা অদুগা অতোপ্পা নাকন অমদনা ৱারীশিং অসিদা লৈরিবা মী মখৈবু থম্লগা নাকন অনী অমগা অমগা মায়োক্ননা মূক্নহল্লকপা অমসুং থেঙ্গাইনহল্লকপগী ৱারীশিংনি। তশেংনা হায়রবদা অইবীনা মহাক্কী ৱারীশিং অসিদা হীরো, হীরোইন অমসুং ভিল্লেন থমদে। ৱারী খূদিংমক্কী পোলোইদা করি ওইরকপা তাবা অমসুং করি ওইরক্কনি হায়বদু অইবীনা অপাবশিংবু খলহল্লি অমসুং খন্থহল্লি। ৱারীশিং অসিদা অফবগা ফত্তবগা মূক্নহনবা লৈতে, মীওইবগা লাইবক্কা থেঙ্গাইনহন্দে, নুংনা কয়াদনো পান্না কদায়নো হায়বগী চমম্নবসু লৈহন্দে। অদুম ওইনমক সমাজগী চৎনবী অমসুং চৎন‑কাঙলোনগা লান্থেংনরকপদা পূকচেল ফত্তবা মীফত্তনা অৱাবা তাহৌবগী লানফম অদুবুদি অইবীনা মহাক্কী ৱারীশিংদা শাগৎলকই। অদুগুম্বা সমাজগী অমসুং মীওইবগী মায়োক্তা লৈবা মীফত্তশিংবু লাকচ‑লাকথুদুনা মাঙ‑তাকহনবা ঙম্বা ভিল্লেন অদু সমাজনা ওইরকই।

শম্না হায়রবদা অইবী ক্ষেত্রি সুবদনীদি সোসিয়েল ক্রিটিকনি, মীওইবনা খাঙবদা ৱারবা অৱা‑অনা অমসুং মীওৎ‑মীনৈ য়েকপদা অইবীদি থোইদোক হেন্দোক্না হৈ‑শিংই। সমাজ অমসুং মীওইবা নাকন অনীমক্কী মাগী মাগী ওইবা মোরেল লেসনশিং, ভেল্যুজ অমসুং ইথিক্স থম্লকপা অসিনা মীওইবগী য়াইফনবা খনবা হ্যুমেনিষ্টশিংগী মরক্তা অইবী ক্ষেত্রি সুবদনীসু থাক ৱাংনা লৈরিবনি হায়বদু উৎলকই। পূম্নমক অসিগী মথক্তা সমাজদা লৈরিবা অমগা অমগা খেন্নবা, মান্নদবা, শক্তিবু খূত্তা পায়শিন্দুনা তৌনীংবদা তৌরকপা, ওইদবনা অওইবা শারকপা, অমনা অমবু উশিৎ‑থৌওইনদবা, খাঙঙমদবা চৈনা পূম্নমক অসিগা মায়োক্নদুনা ফত্তে খঙলবা মখোয় অসিদা লৌথোক্নবা হোৎনবদা নুপীতনা থৌবু ওইনা থৌদাং লৌরকপা অমসুং মদুদা ৱাজবতা থংলবা নুপী ওইবীশিংনা অতোপ্পা কনা অমতদা পোৎলূম অদু থোনগৎলুবা তৌদনা অমদি কনাদসু ৱাকৎলুবা তৌদনা মশরুক্নি খন্না অৱাবা থেংখাং পূম্নমক খাঙনা খাঙনা পুদুনা চৎলিবা নুপী ওইবগী লোত্তুনা লৈরিবা গুণ অদু য়েকপা অমদি উৎপদা ফিক্সন রাইটর ক্ষেত্রি সুবদনী থোইদোক হেন্দোক্না মায় পাক্লে।

মোইরাংথেম রাজেন (১৯৫৯) ৱারীমচাদা খূৎ থারিবা ককচিং মায়কৈদগী থোরকপা মশক নাইবা অইবনি। মণিপুরী খোরিরোলদা নৌনা মশক তাক্নীংঙাই ওইদ্রবা অইবা অসিগী খূৎইদগী ৱারীমচাগী লাইরিক অহুম— চীংহী মনম (১৯৯৭), চেপথরবা ঈশিংপুন (২০১১) অমসুং মৈৱায়রক্লবা নুমিদাংৱাই (২০২২) পুথোকখ্রে। মহাক্কী অনীশুবা ৱারীমচাগী লাইরিক চেপথরবা ঈশিংপুন দা অকোইজম চাউতোন রাজকুমারী মুক্তাসনা নীংশিং সাহিত্য মনা, ২০১২; য়েন্দ্রেম্বম সুরলতা পুরুস্কার এৱার্দ, ২০১৪ অমসুং লেমজনফম ওইরবা ভারতকী সাহিত্য অকাদেমী, ন্যু দিল্লীনা পীবা সাহিত্য অকাদেমী এৱার্দ, ২০১৬ পীদুনা ইকায়খুম্নখ্রে। মশাগী খূৎইদগী খূদোল তম্লকপা লাইরিক ফোঙবগী খোঙলৈ খজিক থীনখ্রবসু ইবগী লমদদি ঙন্না খোঙদারকখি, দিল্লী স্কুলদা ক্লাস এলেভেন ট্বেল্ভ তম্লিঙৈদগী হৌনা ইংলিশতা শৈরেং ইবা হৌরকখি। মদুগী মহৈ ওইনা ইং কুমজা ২০২২ দা মঙালদা লোৎলিবা শক্তম কৌবা শৈরেং লাইরিক অমসু পুথোকখ্রে।

অঙাং ওইরিঙৈদগী মবুদ্ধি‑মরৌশিং লৈনা হৌরকপা, লাইরিক‑লাইশুদা থৱায় য়াওরকপা অইবা অসি এম এ হিষ্টরিনি। গ্রেজুয়েসনদা ইকনোমিক্স ওনর্সনি। একাউন্টেন্সি, বিজিনেস, বেঙ্কিংনচিংবা ইকনোমিক্সকী ওন্থোক্না কন্থা‑কলেংনখ্রবা অঙ্কগী অমাঙ‑অতোংগী ক্রক লাকশিনবা হীরমশিংদগী ঙাইহাক পোত্থাজনবা বি এ অমিদ এম এগী সিলেবসতা য়াওবা ইংলিশকী নোভেলশিং তেংনা পাথোকখি। করি অমুক হায়রুনি মশানা পামজবা ৱাখলনা মাঙওইনদুনা মহাক্না খোয়দাজবা লুই লামারনা ইবা নোভেলশিং নোংমা ইম্ফালগী বূক ফিয়ারগী ষ্টোল অমদা য়াওরম্বমখৈ লোইনা খোমদুনা লৈরকখিবনি। লাইরিক পাবা নেশানি, কনানসু থিংলুবা ঙম্বা নত্তে। ইং কুমজা ১৯৮৮ দা লেকচরর ওইনা কোলেজদা থবক চঙদুনা মতম শাংনা ইং কুমজা ২০০৩ ফাওবা তাকপি‑তম্বিবগী শিনফমদা লৈরমখি। মসিগী মথংদা এম পি এস সিনা লৌবা পরীক্ষাদা মায় পাক্তুনা মণিপুর পুলিস সার্ভিসতা কমান্দিং ওফিসার অমা ওইনা লৈরম্লগা ইং কুমজা ২০২১ দা থবক্তগী পোত্থাখি। মহৈরোয় ওইরিঙৈদগী হৌনা সাহিত্য পামজরকপা অমদি ইবগী হৈনবী লৈরকপা মরম্না মহাক্কী খূৎইদগী ইং কুমজা ১৯৯৭ তা পুন্সিগী অহানবা ওইনা ৱারীমচা তরামরিগী খোমজিনবা লাইরিক চীংহী মনম খূদোল তৌরকখি। লাইরিক অসিগী ৱাহৌদোক লমদম অসিগী ৱারীমচাগী লমদা মশক নাইনা মফম কল্লিবা নোংথোম্বম কুঞ্জমোহননা ইখি। ৱাহৌদোক অসিদা লাইরিক অসিবু মরিক চূম্না মশক তাকপগা লোয়ননা অইববু অসুম্না শীংথাখি—“ৱারীমচা তরামরিগী মচলনা শেম্বা চীংহী মনমনি। মচল পূ্ম্নমক চপ মান্নবা মগুণ চেল্লি হায়বদি য়াদে। অদুবু মচল অয়াম্বদি মশক নাইনা চোংথোরকই। নৌনা লৈচল শেম্বা হৌগৎলক্লিবা অমগী মফমদা মসি অচৌবা মায় পাকপা অমনি।” (চীংহী মনম, লা: ১)

পুন্সিগী অহানবা পুথোকপা লাইরিক্তগী হৌনা মশা তাশিন্না, খোঙফম চেৎনা খূৎ থারকখিবা অইবনি। পামজবা হীরমদা খোঙদাবা হৌরকপদগী মদোম তূমিন দাইরিগী চেনাদা নৎত্রগা নোটবূকতা ইশিন্দুনা থম্বনা পেল্লক্তবদগী মথং‑মথং চূমথাঙ, নতিক নঙাল, অনৌবা মঙাল, ঋতু নচিংবা চেফোঙশিংদা নত্তনা নুমিৎ খূদিংগী ফোঙবা পোক্নফম পাউচেদা ৱারীমচা কয়া লান্থোরকখি। মহাক্কী ৱারীমচাগী লৈনম্না অপাবশিংগী থম্মোয় য়ৌরক্লবদা কনানো মোইরাংথেম রাজেন, কৈদৌঙৈনো মহাক্কী অনৌবা ৱারীমচাগী লাইরিক পুথোরক্কদবা হায়না ঙাইনবা হৌরকখি। চৈরক অসিদা অপাবশিংগী ইহুল খাঙনা অইবা রঘু লৈশাংথেমনা থোং শাদুনা মহাক্কী অনীশুবা ৱারীমচাগী নাচোম ৱারীমচা কুনগী খোমজিনবা লাইরিক চেপথরবা ঈশিংপুন ইং কুমজা ২০১১ দা পুথোরকখি। লাইরিক অসি ফোঙলকপদগীদি মোইরাংথেম রাজেন মণিপুরগী ৱারীমচা ইবশিংগী মরক্তা খূৎশা মশীং থেকপদা য়াওবা হৌরক্লে। চহী অনী অনী কান্নরগা লাইরিক অসিদা সাহিত্য অকাদেমী মনা য়াওনা এৱার্দ অহুম ফংবা ঙমখ্রে। অনীশুবা লাইরিক পুথোকখ্রবা মতুং চহী তরানিথোই লৈরগা ইং কুমজা ২০২২ দা মৈৱায়রক্লবা নুমিদাংৱাই কৌবা ৱারীমচা কুন্থ্রানিথোইগী খোমজিনবা অহুমশুবা ৱারীমচাগী লাইরিক অমসু খূদোল তৌরক্লে। হৌজিক্তি অইবা অসি মণিপুরী ৱারীমচাগী লমদা লায়থোকপা য়াদ্রবা অইবা অমা ওইরক্লে।

মোইরাংথেম রাজেনগী চীংহী মনম দগী মৈৱায়রক্লবা নুমিদাংৱাই ফাওবগী শাংলবা ৱারীমচা হুম্ফুতরুক্কী খোঙচত্তা অপাবশিংনা থেংনরিবসি করিনো, মহাক্কী ৱারীমচাশিংনা অপাবশিংগী থম্মোয় লাইয়ূমদা কয়া য়াম্না য়ৈবা ঙম্লবগে, কলাগী মীৎয়েংদা মহাক্কী ৱারীমচাশিং কয়া য়াম্না মায় পাক্লবগে হায়বসি য়েংবা য়ারক্লে। ৱারীমচাদা মহৌশানা ৱারী অমদি ময়াওরে। অদুবু ৱারী য়াওবা ৱারেং খূদিংমক ৱারীমচা হেক্তা ওইবদি নত্তে। য়াওরিবা ৱারী অদুবু অহীংবা ওইহনবা, নীংথিনা লান্থোকপা হায়বদি অমুক নৌহৌনা শেমগৎ‑শাগৎপা ক্রিয়েটিভিটিগী মপূংফাবা প্রোসেস অমা চঙলি। ৱারীবু ৱারী ওইনা থম্বা নত্তবা লান্থোকপা নৎত্রগা লীবগী মওং অদুদা ৱারীদুগী প্লোট, সেট্টিং, এটমোস্ফিয়র, দাইলোগ মশানা অদুমক শাগোন্নজরবনি। মদুগী মনুংদা আর্ট ওফ কেরেক্টরাইজেসন অমসুং ৱারীদুগী মেসেজ নৎত্রগা উৎকে হোৎনরিবা পান্দমশিং মশানা অদুমক য়াওজখ্রবনি। মায়কৈ অসোমদা ঐখোয়গী অইবা মোইরাংথেম রাজেন ৱারী ফজনা লীবা হৈবা, ৱারীমচা নীংথিনা শেমগৎপা হৈবা অইবনি। মহাক্কী ৱারী খূৎলিদা শরক শিহন্দনা মরী‑মরী চেন্থহল্লগা করিগুম্বদনা ক্লাইমেক্সতা অদুগা করিগুম্বদনা সরপ্রাইজ এন্দিং অমদা চৈখৈ চিংশিনবা তোয়না থেংনৈ। লীরিবা ৱারী অয়াম্বগী কেরেক্টরশিং মরক মরক্তা উপাল‑ৱাপাল, শা‑উচেক, লৈবাক‑লৈতুম্নচিংবনা ওইহনবা, করিগুম্বা মতাংদসু পার্সনিফিকেসন তৌরকপা খরা য়াওরবসু মপূংদি ঐখোয় মীওইবনা ওই। ভূত‑প্রেৎ শান্নবা, তম্নবা, অকিবা, মঙ‑হা, পূক্নিং‑ৱাখলগী ওইবা খোঙচৎ অমা মরক মরক্তা ৱারীমচা খরগী মচল ওইনসু পুথোরকই। মহাক্কী ৱারীমচা অয়াম্বদা খুঙ্গংগী পুন্সি মপূং ওইনা ককচিংনা ময়োন্দা লৈহল্লগা পুন্সিগী মশক অমা মরিক চূম্না উৎপগা লোয়ননা হৌজিক্কী মণিপুরী খুন্নাইগী মশকশিং চীং‑তমগী মরী, মোদর্নাইজেসন, কোলোনিএলিজমগী চৈনা‑চৈথেংশিং, করপ্সন, নিপোটিজম, ফেভরটিজম, রাজনীতি‑কুতনীতি, লৈঙাপশিংগী শাজৎ কয়াগী মরক্তা এক্তিভ সার্ভিসকী মরুমদা লৈরিবা অমোৎপশিং, ক্রাইম মীটিং, ইনভেষ্টিগেসন, কেস দাইরিগা মরী লৈনবা নুংঙাই‑নুংঙাইরবা ৱারী কয়া মরক মরক্তা ফাগিগী মহাও হাপচিন্দুনা অমদি মচু শঙজিন্দুনা লান্থোরকই। করিগুম্বদনা অঙাংশিংগীদমক থৌওইনা শেম‑শাদুনা তন্দবা, হোৎনবা কনবা, অখাঙ কনবা অমদি শীংনবনচিংবগী থৌনা হাপ্পা, পাউতাক য়াওবা ৱারীমচাশিংদসু খূৎ থারি। খুঙ্গংগী পুন্সি, লম্মীৎ‑তুম্মীৎ, ৱাহৈ, ৱাঙাঙ‑ৱাতানচিংবগা লোয়নবা মথোং হূকখিদ্রবা মীওই কয়াগী ঙক্না নুংঙাইরবা থৌদোক কয়াগী ৱারী লীরিবা অইবগী ৱারীমচাশিংনা অপাবশিংবু নুংঙাইহল্লি, পোত্থাহল্লি অদুগা ৱাখলসু খন্থহল্লি। মহাক্কী খূৎশেমগী তাইবংদা অপাবশিংবু চিংশিনবা ঙম্লিবা অসিমক তশেংনা মায় পাকপা অমনি।

মোইরাংথেম রাজেননা খোয়জঙনা খূৎ থারিবা হীরমশিংগী মনুংদা নুপা‑নুপীগী মরী, অপাম‑নুংশিগী মশক, কায়নবা‑থুংনবা, মরী শেমগৎপা, শাগৎচরুবা আশাগী ময়োল তেকখিবা, তাইওন্নখিবনচিংবা মখল‑মথেলগী থৌদোক ৱারীশিংনা মফম চাউনা কল্লি। ৱারীমচাশিং অসি লান্থোরকপা মতমদসু লোইজি‑লোইয়া, খুঙ্গংগী মতাই লমদগী হৌরগা শহরগী মেট্রোপালিটান সিটি ফাওবা কোনশিল্লি। লৌমী‑শিন্মী, নোংমগী খূৎশূমন্না হিংজরিবা মীওইশিংগী পুন্সিদগী হৌরগা য়াইতোং‑খমদোংবা, লৈঙাক্কী অচৌবা ফম পায়বা, লোয়শঙগী মকোক‑মরু, শেঞ্জাও পায়বা মীওইশিংগী ৱারী কয়া য়াওরি। ময়াই কাবা চীঞ্জাক, য়ুগী নিশা, জ্বারগী ময়াইনা পুবা মীওইদগী হৌরগা মীয়ামদা লৌশিংগী মঙাল য়েল্লিবা ওজা‑গুরু, লাইনীংবা সাধু বাবা ফাওবগী অরোন‑অথুপ, অপাম‑নুংশিগী মশক কয়া য়েক্লি। হৈ‑শিংলবা অইবগী খূৎশেম্না মীওইবগী নুপা‑নুপীগী মরী, অপাম‑নুংশিগী মশক হায়বসিদি থম্মোয়গী ওইবা মরীনি, হকচাংগী ফিভম শোইনাইরবা মীত্তাঙবা ওইরবসু নৎত্রে হায়রগা ট্রান্সজেন্দরবু ওইরবসু মসিদগী খক নান্থোকপা ঙমদে হায়বসি উৎনবা হোৎনরি। পঞ্জরিবা হীরম অসিগা হকথেংননা মরী লৈনবা ৱারীমচা তরানিপাল অপূনবা লাইরিক অহুম অসিদা য়াওরিবা—‍‌‘মঙ্কী বিজিনেস’, ‍‌‘পরীক্ষা হায়দোকপা’, ‍‌‘চীংহী মনম’, ‍‌‘কুরাংপান তৎলবা কুয়োম’ অমদি ‘নাকেন্থাগী য়েন্নীং’ (চীংহী মনম); ‍‌‘হোংবা নাইদবা মহৌশা’, ‍‌‘চেপথরবা ঈশিংপুন’, ‍‌‘ঐগী শগোলতোংবা রাজকুমার’, ‍‌‘থাবল্লৈ লৈনম’, ‍‌‘ঙাইবা তম্বা’, ‍‌‘তরু তরুবা অতিয়া’ অমদি ‘ইবোহলগী নুপী’ (চেপথরবা ঈশিংপুন); ‍‌‘অসুম্না ঙাইহাক্তং’, ‍‌‘অমম্বদা লোৎলিবা ফজবা’, ‍‌‘নাচোমলৈ’, ‍‌‘চীন্থীবী অমগী’, ‍‌‘শকখিদ্রবা ঈশৈ’ অমদি ‍‌‘কোয়না চিংলিবা লৈই’ (মৈৱায়রক্লবা নুমিদাংৱাই) ৱারীমচাশিং অসি পনবা য়াই।

অইবা মোইরাংথেম রাজেন ৱাদি কয়া ঙাঙগন্দ্রবসু ৱারী লীবদি য়াম্না হৈ। চীংদা পোষ্টিং তাবা ওজা রামেশ্বরগী লমচৎনা মপূং ওইবা হায়বদি কেরেক্টর সেন্ট্রিক ওইবা ৱারীমচানি ‍‌‘পরীক্ষা হায়দোকপা’। “চীংদা পোষ্টিং তাবা ইবুংঙো নখোয়দি চেকশিল্লুকো” হায়বা অহল অমগী পাউতাক্না ৱাহৌ ওইবা ৱারীমচা অসিগী প্রোটাগোনিষ্ট ওজা রামেশ্বরনি। জোইনিং রিপোর্ট পীবা চৎপদা বসতা থেংনখিবা অহল অমগী পাউতাক অদু লুহোংবা কুইদ্রিবা মচানুপা চহীমুক ফারবা অমা ফংজবতা ঙায়রিবা নহা ওইরিবা রামেশ্বরনা অহানবদদি কয়া থৌশারুদবনি। ঙসিদি মশামক্তা দশা তারবা মতম অসিদদি ওন্থোক্না মমল লৈরকখি। লাইনীংদা হকচিনবা মপান থোক্না মচানা অরানবা থবক তৌরকপদা তূমিন্না লৈথোক্লোইদবা মপা পংকোৎ, নহা ওইরিবী য়ূমগী লোয়নবী, পীক্লিবা মচানুপা মথং‑মথং মীৎমাঙদা উরকখি। মহাক্না লাইরিক তাকপিরিবী বোইনু কৌবী চীংগী লৈশাবী অমা মীরোল্লকপদগী খুল্লাকপা দোংলেননা অঙাংগী মপা কনানো থিদুনা ৱায়েল্লকপদা ওজা রামেশ্বরগী মমিং পন্নরকপনি। অনী অমনা খুলদুগী মচীন চৎপা পাখঙ ঙাক্তনি। মখোয় অনীগী মনুংদা গৌলিনদি বোইনুগা নুংশিনবা পাখঙনি। খুল্লাকপগী ৱায়েলদা কূপ্না মতম হোৎলগা অঙাং অদু মার্চ এপ্রিলদা পোক্লগনা রামেশ্বরগী, মেদা পোক্লগনা গৌলিনগী অদুগা জুনদা ওইরগনা অবুংগী ওইগদবনি। অঙাংগী মপানা মচা য়োকপা অমদি বোইনুবু লোয়নবী ওইনা লৌবগী ৱারেপ তাখি। থাশিং অসিদা করিগুম্বা বোইনুগী মমীৎ‑মমায় পাঙদ্রবদি মহাক্কী মমা‑মপানা মশুদু য়োক থাকপা অদুগা চেন্নরিবা নুপা অহুম অসিনা চৎনবীগী মতুংইন্না ৱাকোংহনবা হায়না য়ানখি। ৱারী লীবা হৈবা অইবনা ওজা রামেশ্বরবু য়াম্না চিংনহনবা, মিহুল চেঙ্গা চেঙ্গুম্নহল্লগা ৱানা ঙাইহল্লি অদুগা পোলোইদা অবুংনা বোইনুবু লৌবা অঙাংসু য়োকপদা তাখি। খুলগী মীয়াম হূপ্না শেল থানবদা রামেশ্বরগা নক্না লোয়নবা ওজা গাংতেদি ওজা রামেশ্বরদা য়াম্না থাজনা লুপা চহুম থাখিবদু মাঙবা তাখি। করম থোক্লগবা হায়না মিপাই‑থবাইবনা তৌফম খঙলুদ্রবা ওজা রামেশ্বর নে তানা স্বর হোন্দোরকপদা মরুপ গাংতেগী শেল মাঙখিবগী নুংঙাইতবা মতা চাবা ইহুল অমনা অপাবশিংদা ফাগিগী মহাও অমসু ফাওহনবা ঙম্বা ৱারীমচানি। মিংথোলসু ‍‌‘পরীক্ষা হায়দোকপা’ হায়না থোল্লিবসি য়াম্না চান্ননা থোকই। তশেংনমকসু ওজা রামেশ্বরগী পুন্সিগী লুরবা পরীক্ষা অমা হায়দোকপগা চপ মান্নখি। অদুবু হেন্না ফজহল্লিবদি অইবনা থৌদোক অসিবু ৱারীগী ৱারী ওইনা পাউদম্লকপগী মহুত্তা কেরেক্টরসেন্ট্রিক ওইনা থোক্লিবা থৌদোক অসিগী হায়ফম খঙদবা চৈনা অমা; অপোকপা মপা, য়ূম্বুরেম্বী অমদি মচাগী মফমদা মীনম্বগী নুংঙাইতবা অমা ওজা রামেশ্বরদা ফাওহল্লিবা অসিনি—“ওজা রামেশ্বর মশাদা মফি‑মরোল পক্তবগুম্বা, ইহাং হাংবগুম্বা অমা ফাওরকই। করিগীনো নৎত্রগা করিনো ৱাৎলিবসে হায়বা খন্থবা ইঙম ঙমদে।” (চীংহী মনম, লা: ১৯)

মহৌশানা অইবা অয়াম্বনা খূৎ থারিবা ৱারীমচাগী হীরমশিং অসি মখল‑মথেল কয়াগী ওইরবসু অইবা অমগা অমগা হঞ্জিন্নবা, মান্নবা হায়বসি তত্তনা থোকই। অদুম ওইনমক মান্নবা হীরম ওইরবসু অমগা অমগা মহাও খেন্নহল্লিবা অসিদি অইবশিং অদুগী ক্রাফ্ট্‌সমেনশিপ হায়বদি ৱারীমচাদু লান্থোকপগী মওং, শীজিন্নরিবা টেক্নিক, লোন্দা‑পুদা, প্লোটকী অহান‑অকোন, পীরিবা সস্পেন্সন অমদি এন্দিংগী মখা য়াম্নমক পোল্লি। ৱারীমচাদা অপাবশিংনা য়াম্না নুংঙাইজরিবসি অসুম পাথরক্লগা অরোয়বদা মমৈ‑মকোক থোক লৈথোকখিবা, ইথা থাজরুদবা অমা হেক ওইরম্বগুম্বা, মু্ন্না ৱাখল খল্লুরগা ইয়াং হেক য়াংথোকহন্না নৎত্রগা ইরায় লায়না য়াংতক্না অদুম চত্থরক্লগা কোচি অমা থোক হেক কোৎশিল্লকপা, সস্পেন্সন এন্দ সরপ্রাইজ, সর্কাষ্টিক এন্দিংগী মশক য়াওবা ৱারীমচাশিং অসিনি। অইবশিংনা থিরিবসু ৱারীমচাদুগী কদায়দনো অমা মফম চানা য়াম্না রাশি লৈবা শম্ব্রু অমা নম্নবা হোৎনবদুনি। মরম অদুনা থিম লৈরবসু থিমেটিক ট্রীটমেন্ট হায়বসি য়াম্নমক মরুওইবা অমনি। মতাং অসিৱাইদনি অইবা অদুগী সিন্সিয়রিটি, সিরিয়সনেস, শাগৎলিবা ৱারীমচা অদুগী বেকগ্রাওন্দ, এটমোস্ফিয়ার, খুন্নাইদুগী মশক, মনাৎ, চৎনবী‑থাজনবী খঙনা খূৎ থারক্তবা য়াদবগী মশক অমা লাক্লিবা। পূম্নমক অসিগী মথক্তা শীজিন্নরিবা লোন্দা‑পুদা, ৱাহৈগী পূক্কৈ, প্রমান‑পান্থৈ, মতা চাবা ইমেজরি, মেটাফর, সিমিলি, চৎনবী ৱাহৈ, ৱাঙাঙ‑ৱাতানচিংবগী মখা পোল্লক্লিবা। ঐখোয়গী অইবা মোইরাংথেম রাজেনগী অয়াম্বা ৱারীমচাশিংদা ক্রাফ্ট্‌সমেনশিপ মশা তাশিল্লি, থিমেটিক ট্রীটমেন্টতা চেকশিন্না মীৎয়েং থম্লকই। মহাক্কী অহানবা ৱারীমচাগী লাইরিক্কী মিংথোল ওইরিবা ‍‌‘চিংহী মনম’ দা লৌখৎলিবা হীরম য়ূম্বান কয়া ৱায়োং চাদবা য়ু য়োনবা, জ্বার পামজবা নুপা অমগী মশক‑মতৌ চঙখোনবী য়ূম্বুরেম্বী অমা মখোয়গী হোটেলদা তোয়না চঙলকপা এস ও অমদা কন্যা কৎখিবগী ৱারীনি। ক্লবকী নহারোলশিংনা য়ু য়োনবা, জ্বার শান্নবা থিংবা, নত্তবা লমচৎ চৎপা নুপা‑নুপীশিং ফাদুনা ৱারক‑ৱাতেম্বা, কন্যা কৎপনচিংবা মোব ভাইওলেন্সকী ফল অমনা ৱারীমচা অসিগী পোলোইনি। অদুমওইনমক অইবনা য়াম্না হৈ‑শিংনা ৱারীমচা অসিগী মনুং অমদি মপান অনীমক্তা ভাইওলেন্স অসিগী মমি তাহন্দনা মদুগী ভিক্টিম ওইরিবা সনাতোম্বী, এস ও কেশো, সনাতোম্বীগী মপুরোইবা তোমাল, সনাতোম্বীবু পামজবা ফোরেষ্ট রেঞ্জর বোরাজাওবনচিংবগী মরমচৎ, মখোয়গী অপাম‑পামদা, পূক্নিংগী ফিভম্নচিংবা থার্দ পর্সন ইন্টিমেসিগী নেরেটিং ষ্টাইলদা লান্থোরকই। লৈশারিঙৈদা সনাতোম্বীগা লোয়ন‑তিন্নরকপা; কোয়মিন্নরকপা এস ও কেশো অমদি ফোরেষ্ট রেঞ্জর বোরাজাওবা মতু মচা লৈরবসু য়ু য়োনবী সনাতোম্বীগী চেঙহী মনম নম্নীংলুই। মদুগী মহৈ ওইনা য়ুগী নিশা পাল্লবা এস ও কেশোদা সনাতোম্বী কন্যা কৎখি। বোরাজাওবদি চগৌ য়েংদুনা লৈহৌখি—“বোরাজাওবা তূমিন লৈখি। …মরুপ কেশোবু নুংশিবিবসু পোক্লকই। ইশ! ময়াম মমাংদা কয়াদা ইকাইরমগবা! অদুগা হায়ফম খঙদনা কেশোবু কল্লকপা অমসু মপূক্নিংদা ফাওরকই।” (চীংহী মনম, লা: ৫৩)

অইবশিংগী মায় পাকপদি মীওইবগী পূক্নিংগী ফিভমশিংবু লৌথুপ‑লৌকোয় য়াওদনা অপাবশিংদা লান্থোকপা ঙম্বদসু ফনা য়াম্না লৈ। অইবা মোইরাংথেম রাজেনগী অহানবা লাইরিক্কী মিংথোল ৱারীমচাগী ফোরেষ্ট রেঞ্জর বোরাজাওবগী পূক্নিংগী ফিভম অপাবশিংদা ঙান্থোকহল্লকপদা মহাক্কী মায়পাকপসু লোয়নরি। খুন্নাইদা থোক্লিবা থৌদোকশিং অমদি মীওইবগী লমচৎ য়েকপদা তশেং তশেংনা থোকপা, অহীংবা ওইহনবা হায়বদি রিয়েলিষ্টিক ওইহনবা হায়বসিমসু য়াম্না মরুওইবা অমনি। মসিদনি ফুঙ্গাৱারীগা ৱারীমচাগা অনীগী মরক্তা চাউনা খেন্নরিবসু। ৱারীমচাদদি মেসেজ য়াওরবসু নৎত্রগা করিগুম্বা সোসিয়েল এৱারনেস অমা পীনবা হোৎনরবসু নৎত্রগা করিগুম্বা অকক্নবা পান্দম অমা উৎকে নীংলবসু মদু পাউতাক পীনবা হোৎনবা ওইনা লান্থোকপা নত্তবা অপাবশিংবু থাজহনবা হায়বদি রিজন্না পুনবা; মরম চানা ওইথোকহনবা অমা চঙই। মরম অদুনা অপাবশিংবু লায়না থাজহনবা হায়বসি ৱারীমচাগী কলানা পুনবা তারকই। রিয়েলিষ্টিক ওইনবা হোৎনরিবনি হায়দুনসু সোসিয়েল রিয়েলিটি অমদি ৱারৈ‑ৱাতাশিং অদু ইকোক কোক্না য়েক্লকপা, থম্লকপনচিংবগী ফজদবসু লৈ। শম্না হায়রবদা অকামপেৎ ওইবা ৱাহৈ‑ৱাতাশিং প্রমান‑পান্থৈ ওইনা ফোঙদোকপগী ফজবসু লৈ। খূদম ওইনা অরিবা মণিপুরী সাহিত্যদা নুপা‑নুপীগী অরোনবা মরীবু ‍‌‘হৈরাং লোঞ্জা চামিন্নবা’, ‍‌‘লৈরাং লোঞ্জিন চিনমিন্নবা’ হায়না ফোঙদোক্লিবা; নাউপুববু ‍‌‘খোয়জি খাদা মিহুল লাংবা’,‍‌ ‍‌‘তাউজিং হৈরু পানবা’ হায়না ফোঙদোক্নরম্লিবা অসিগী ফজবসু লৈ। মরম অদুনা ঐখোয়গী অয়ূক নুমিদাংগী পুন্সিদা ঙাঙন‑শানরিবা ৱাহৈনি হায়দুনসু স্লেং ওইবা ৱাহৈ‑ৱাতাবু হেক্তা শীজিন্নবগী মহুত্তা মহুৎ শিনবা ৱাহৈ কয়া শীজিন্নবা য়াই। খুদম ওইনা ‍‌‘ওক্তবী’, ‍‌‘লমচৎ নাইদবী’, ‍‌‘কাও থাবী’, ‍‌‘পাংখোকলাদা য়াহিপ্পী’ হায়বনচিংবসি মান্নবা ৱাহন্থোক লৈবা ৱাহৈ ঙাক্তনি। লাকচনীংলবদি ৱারীমচাদা সোসিয়েল রিয়েলিটি উৎলবসু মসিদি কলানি। কলাদা মায়কৈ ফিজেৎনবীগী মফম লৈরবসু ফি থোংদবা হকচাংদগীদি চেকশিনবা মরুনি।

ইং কুমজা ১৯৯৭ কী জনুৱারিদা ইখিবা অইবগী ‍‌‘মঙ্কী বিজিনেস’ ৱারীমচাগী থৌদোক থোকফম ভারতকী কোনুং দিল্লীদনি। ফার্ষ্ট পর্সন ইন্টিমেসিদা ৱারী লীরিবা মীওই অসি মফম অসিদা লাইরিক তমদুনা লৈবা মৈতৈ মচানি। মী কূংলবা মেট্রোপোলিটান সিটি অসিনা ময়োলদা লৈহল্লগা শাগৎলিবা ৱারী অসি থোক্লিবা মতম্না ভারতকী অহানবা নুপী প্রাইম মিনিষ্টর ইন্দিরা গান্ধীবু লৌতুনবা মীহাত্তা নোংমৈনা কাপতুনা হাৎখিবগী চরাঙনরবা মতম অদুৱাইগীনি। উৎনবা হোৎনরিবনা সাধু সন্যাসীশিংগী অরোনবা শাজৎ, মনুং‑মপান নাইবা লমচৎ, মহৈ তম্মিন্নরিবা মহৈরোয় নুপা‑নুপীশিংগী অরোনবা মরী, মহৈ তম্বা লাক্লগা ময়ামগী অরাঙফম ওইরিঙৈদা লাইরিক পাবা নংহৌদ্রবা মহৈরোয়শিংনা লৈবাক্কী ঈরাংদা য়াওশিন্দুনা পরীক্ষা য়ৈথোক্নবা ঈরাং হৌবা, অমুকসু মীয়ামগী ঈহৌ, মোব ভাইওলেন্সকী মশক কয়াগী মরক্তা মঙ্কী বিজিনেসকী মশক, মথোং হূকখিদ্রবা য়োংনাউ পরশুরামনা য়োংজাউ পরশুরাম ওইরকপগী নুংঙাইরবা ৱারীনা মফেল ওইনা ফেঞ্জিল্লকপা ৱারীনি।

মোইরাংথেম রাজেনগী ৱারীমচাশিংগী মনুংদা য়াম্না মশীং লীক্না খূৎ থারিবা নুপা‑নুপীগী মরী অমদি অপাম‑নুংশিগী তোপ‑তোপ্পা হীরম অমখক্তি ‍‌‘কুরাংপান তৎলবা কুয়োম’ দা লৌখৎলিবা হীরম অসিনি। নুংশি‑নুংওন অমদি নুপা‑নুপীগী মরী য়েকপা অতৈ ৱারীমচাশিংদগী মসিনা তোপ্লিবসি ৱারীমচা অসিগী প্রোটাগোনিষ্ট ট্রান্সজেন্দর অমনা ওইরকপা অসিনি। থার্দ জেন্দর হায়না হৌজিক্তি মালেমনা মশক খঙনবা হৌরক্লবা জেন্দর অসিনা থেংনরিবা নুং‑পান, মশাগী ফিভম অমদি অকোয়বগী মীৎয়েং অনীগী চিংখায়নরকপা মশক অমা মায় পাক্না য়েক্লিবা ৱারীমচানি। মণিপুরী খুন্নাইদা মখোয়গী ফিজিকেল অমদি মেন্টেল অনীগী মৈশা লাংদবা শমজিন্নহনফম অমা থিরকপগী মশক ৱারীমচাগী উচলদা হাপতুুনা লান্থোরকপনি। এদভোকেট নোবিন নুপাগী শাহৌদা হৌজরক্লবসু পূক্নিং ৱাখল অনীমক্তি নুপীনি, ট্রান্সজেন্দরনি। মচানুপী ঙাক্তা মঙা পোক্লবা মতুংদা নবদ্বীপ অমদি সনাহনবী অনীগী তাঙনা ফংজবা ইতোন তোনবা মচা পিবানি নোবিন। কুচু কুমেন ঙৌরোক ঙৌরদুনা, নোয়‑নোয় লাউনা হৌরকখিবা নোবিনবু মমানা পীক্লিঙৈদগী হৌনা মশক‑মতৌ চঙখোনবী মমৌ অমা থিহন্নীংবগী পূক্নিং মতা মহাক্না পীশক পীক্লিঙৈদগী হৌনা লৈরক্লবনি। অদুবু নোবিনগী পূক্নিংগী মায়ওনদি মশাগী চহী তরামরি‑তরামঙা চঙলকপা অদুৱাইদগী হোমোসেক্সশিংদনা হেন্না অপাম‑নুংশিগী ৱাখল পোকখি। মমা মপাগী অপাম্বনা মাঙওইনদুনা রাধারানী কৌবী খুঙ্গং চনু অমগা লুহোংখি। লুহোংলবা মতুংদদি মহাক্কী পূক্নিংগা শম্নরিবা হকচাংগী ওইবা অশোনবা মরী লোৎশিন্দুনা থম্বা য়ারকখিদে। লুহোংবগী মঙানি চাক্কৌবগী নোংঙানবদা রাধারানী মপাম চৎখি, ইকুই কুইদনা নুপা অমদা লুহোংখিদুনা মচা অমা লৈরবীনি। মতম অসিতদা নোবিন ভাব তারকখি, মহাক্না রাধারানীগী মফমদা তৌহৈদবা থবক অমা তৌখ্রে হায়না। ঙসিদি মহাক্না মপুরোইবগা হরাও‑তয়াম্না চৎমিন্নবদু উরুবদা নোবিননা মহাক্কী মপাপ পূম্বা কোক্লগদবগুম খঞ্জখি। অদুবু মহাক্কী ৱাখল লৈতাবা ঙমখিদে। অরুবা লায়না অমনা নাদুনা রাধারানী কিদনী ট্রান্সপ্লান্ট তৌদবা য়াদবা ফিভম অমা ওইরকখি। মদুগীদমক দোনর থিবা ফংলক্ত্রবদা নোবিননা লমন শিংবা ওইনা মহাক্কী কিদনী নাম্মা পীনবগী অয়াবা ৱারোল অমা চিঠিদা ইদুনা রাধারানীবু লায়েংলিবা দোক্টর অদুদা খঙহনখি। য়াম্না নুংঙাইরিবদি দোনর ওইরিবা মহাক্কী আইদেন্টিটি পেসেন্ট পার্টিদা খঙহনবিদনবগী চেকশিন ৱারোল অমসু চিঠিদুদা য়াওরিবা অসিনি। ইনখৎলকপা মতমদা ট্রান্সজেন্দরশিংসু অতৈ জেন্দরশিংগুম্না অপাম‑নুংশি পোকপগী মশক, হেটেরোসেক্সুয়েল রিলেসনশিপতা খোয়জঙবা ঙমদবা হোমোসেক্সুয়েল রিলেসনদনা হেন্না পামজবা, মখোয় মশেলতগী ওইবা তাইবং অমদা পূঞ্জনীংবগী পূক্নিং মতাদা মমা‑মপানা অমদি অকোয়বা খুন্নাইনা য়েংনরিবা মীৎয়েংগী মশক, মদুদগী মচাবু লাপথোকহনবনা মমা‑মপাগী মথৌদাং ওইনা লৌরকপা অদুগা মশামক্নদি মমা‑মপাগী মায়োক্তা লৈবসু ঙমদবা, খুন্নাইগা শীংনবগী পাঙ্গলসু থোক্তবা, পূক্নিংগা হকচাংগা অনীগী শমজিন্নফম খঙদ্রবা পুন্সিবু অইবনা ‘কুরাংপান তৎলবা কুয়োম’ ওইনা পুথোরকপনি। অপাবশিংবু ৱাখল খন্থহনবা, সসপেন্সন পী‑পীদুনা ৱারীগী প্লোট শাগৎলক্লগা পোলোইদা ফল তাহনবা, কত্থোকপগী নুংঙাইবনা ৱারোইশিন ওইহনবা ৱারীমচানি।

রাজেনগী অনীশুবা ৱারীমচাগী লাইরিক চেপথরবা ঈশিংপুন (২০১১) দসু মখল মথেলগী ওইবা নুপা‑নুপীগী অপাম নুংশিগী ৱারীশিং লৌখৎলকই। অদুম ওইনমক মখোয় অয়াম্বা থাজবা মাঙবা অমদি নীংলুবগা তায়োন্নখিবা, অপাবশিংদা নুংশিনবগী তরু‑তরুবা মশক উত্থোক্নবা হোৎনবদা থোইনা খোয়জঙলুদবা ৱারীমচাশিংনা মপূং ওই। অদুম ওইনমক ইথা থাজরুদনা ‍‌‘হোংবা নাইদবা মহৌশা’ অমদি ‍‌‘তরু তরুবা অতিয়া’ হায়বা ৱারীমচা অনী অসিদদি মীওইবগী মিনুংশিনা পুনবা থম্মোয়গী মরী অমা মায় পাক্না লান্থোরকই। থার্দ পর্সন ইন্টিমেসিদা মৌপ্ব া অমনা লীরিবা মচেম অমগী অপাম নুংশিগী খোঙচত্তা য়ূম্ফম ওইবা ৱারীমচানি ‍‌‘হোংবা নাইদবা মহৌশা’। চাংদম ৱাহৈ ওইনা মিংথোল ওইরিবা অসিনা মবাই তোম্বগা মচে ইবেমস্নাগা অনীগী ওইবা নুংশিবগী মশক অদুনি। শেল‑থুম পায়বা, ইনাক‑কৈরাক খুনবা মীওইদা মশাগী মপুন্সি পীথোক্তুনা মপুরোইবা ওইনা লৈজবা পূম্বা কত্থোক্লুরগা নিশাদা লূপ্পা য়ুমায় তাবা ওইরমদুনা ইবেস্নাগী য়ূম্বান পুন্সি খাঙঙুথক্তা লৈমন চনখি, নৌনা লুখ্রা ওইহৌখি। মতম অমা মখোয়দা তোয়না লাক্লম্বা মহাকপু শঙজরম্বা তোম্ববু নুংশিরবসু লায়রবনি হায়না ইন্থোকখিবনি। ইচম চমজবা, হোৎনবা কনবা তোম্বগী থম্মোয়দি মহৌশাগুম মহাক্না ইবেস্নাবু নুংশিজখিবা, নীংজখিবদু ঙসিসু লেঙদনা লৈরম্লি। মদুমক্তনা লাঞ্জদবা তোম্বগী থম্মোয় মশক খঙলকপদা নুরা পাখঙ অনীগী অরেপ্পা য়ূম্বান পুন্সি শেমখিবগী ৱারীনি। ইবেস্না অমদি লন‑থুমদা মিকাজবী মহাক্কী অপোকপী মমাগুম্লবী কয়াদা নুংঙাইবা পুন্সি অমা হায়বসি লন‑থুমদা ঙাক্তা মখা পোনবা নত্তে; তন্দবা, হোৎনবা কনবা অমদি থম্মোয়গী লিচিং অমগী তঙাইয়ফদবসু লৈ উৎলিবা ৱারীমচানি।

‍‌‘তরু তরুবা অতিয়া’ দা পুথোরক্লিবনা চফূ কায়নবা শাগৈগী নুপী অমগা অহানবদা খঙনহৌদবদগী থম্মোয়গী মরী চেৎশিল্লুরগা মমা‑মপানা কন্না অথিংবা পীরকপদগী মপাঙ্গল থোক্লুবা য়াদবা, মশানা তম্লিবা মহৈগী কোর্সসু মপূং ফাদ্রিঙৈ ওইবগী থৌনা ফূদোকহৌদবদগী কায়নবদা তাখিবগী ৱারীনি। নুপীদুনসু মহাকপু অখাঙ কন্না ঙাইজনবগী খুদোংচাবা পূম্বা অপোকপা মমা‑মপানা পায়শিনখিদুনা অথাপ্পা খুঙ্গং অমদা থাজথোকখিবনি। থৌদোক অদুগী মতুং চহী তরেৎলোম লৈরগা নুপীদুগী খোঙ্গুল লীরকপদা মহাক্তি অপীকপা মচা অমা পীবুক্নুংদা নাউপুহৌরগা লুখ্রাবী ওইহৌবদগী ৱানা খাঙজরক্তুনা হিংনবগী লানফমদা কন্না লান্থেংনরিবী অমা ওইনা লৈরম্বা থেংনরকখিবনি। মিনোক চাউবা লৈকাইগী ৱারেম শূবা কয়ানা মহাকপু হঞ্জিন হঞ্জিন মীৱা ঙাঙনফম ওইরবসু নুপীদুবু মহাক্কী থম্মোয়দদি হৌজিকসু অমোৎপা মরিক অমত্তা পক্ত্রিবী কোনশেংনি খঞ্জরিবা নুংশিবগী মক্ত্রবা মরী অমা উৎপনি।

অনীশুবা লাইরিক্কী মিংথোল ওইরিবা ‍‌‘চেপথরবা ঈশিংপুন’ নুংশিবদা থাজবা মাঙলকপা নুপা‑নুপীগী মরী কোমথরকপদা য়ূম্ফম ওইবা ৱারীমচানি। নুপী খুন্নাইগী ফিদম্নফম, রোল মোদেল ওইগদবগী নুপী অমনা মহাক্কী অনৌবা নোভেলগী প্রোটাগোনিষ্ট ওইহনগে খনবগা লোয়ননা মখোয়গী ওফিসতা নৌনা চঙলকপী ৱা কয়া ঙাঙগন্দবী, চীং‑লেম্বী, মথৌ মশক খঙবী, মশক‑মতৌ চঙখোনবী মঙোন্দগীদি চহী খরা হল্লপ তৌবী কেরানী নুপী অমবু মিনুংশিগা লোয়ননা য়েংজরিবা লাইরিক ইবনি। অদুবু থাজরুবা পূম্বগী তায়োন্নবদা ফজরবা মায়থোঙগী মরুমদা লোৎলিবা নুপীগী লমচৎ, তৌঙম্বী শাজৎ কয়া মথং‑মথং মায়খুম হাংদোরকখি। মহাক্কা লুনা তিন্নজবা, অরৈ‑লৈত তাথোক‑তাশিন তৌনরিবা মরুপ অদুমক্না মহাক্কী নুপীবু চেন্দুনা পুখি। কেরানী ইতৈমা অদুবু মীনা চিবোন চিবোন ঙাঙনরকপদা মহাক্না মপাম্বোম তিংলুবনি। অদুবু মহাকসু অহল ওইরবা লৈবাক্কী ফম্নাইবা অমদা ময়ূম পাল্লুবদগী করিগুম্বা লেঙ্গা চান্নবা নুপা নহা থেংনরবদি লৈজবা পূম্বা পীথোক্লগে খল্লবী চেপথরবা ঈশিংপুনগা পাংখক ওইরবী নুপীনি হায়বসি খঙবা ঙম্লকখি। মহাক্কী ফিদমদা শাগৎনবা হোৎনরুবা শক‑চু, শাওং‑শাবান ফজবী, ঈং‑তপচবী—কেরেক্টরদা, পার্সনেলিটিদা অৱাংবা থাক্কী গুণ চেনবী নুপীগী শক্তম অহীংবা তাইবংগা তাইওন্নরম্বগী মশক্নি। তৌজরুবা আশানা অথনবা পুনগা পাংখক ওইরবী নুপীগী শক্তম্নি অদুগা অহীংবা তাইবংদা থেংনরিবনা চেপথরবা ঈশিংপুন ওইননি হায়না য়াম্না আইরনিকেল ওইনা থোল্লিবা কোচি থাংবা ৱারীমচাগী মিংথোলনি। ‍‌‘ইবোহলগী নুপী’ দা থেংনরিবনা চহী নৌরিবী মৌনহা অমবু অহল ওইরবা নুপা অমনা য়ূম কোইনবা লৌরুরগা মথোং হূক্তবা নিশাদা লায়চুরবা, মেত্রিক লানবা ঙমদ্রবা মচানুপাগা হেন্না নকশিন্নবা মরী লৈনখিবগী মশক উৎনবা হোৎনবনি।

‍‌‘চেপথরবা ঈশিংপুন’ গী ঈশিংগুম ঙামথরিবা মায়ওনদা চেন্থনবা থৌরাং তৌরিবা নুপীগী অপাম‑নুংশিগী মরক্তা ‍‌‘ঙাইবা তম্বা’ গী ইবেমহলদি ময়ামদগী খজিক্তং তোঙাল্লি। মনেম্না পামদবী মমৌ অমা ওইরুবগী খোঙথাং খূদিংগী ময়া কাখত্তুনা চৈগদবগী শেম শারিবী মনেমগী ওৎপ‑নৈবা মরক্তা মপুরোইবনা মীয়ারবিরবী খুঙ্গংগী মৌনহানি ইবেমহল। মচা অনী পীশক পীক্না হুন্দোকম্লগা তামৈদা ওজা ওইবা মপুরোইবনা চীংমী নিঙোল অমা লৌদুনা ময়ূমদা হল্লকখিদবা চহী মরি‑মঙা ফারক্লবনি। ফরবসু ফৎত্রবসু মিনোক চাউবা খুন্নাইদগী খজিক্তং ঙাক্লৌ ওইবিগদবী মনেমবোকসু লৈখিদ্রে। ইবেমহলনা পীক্লিবা মচা অনীগী নোংমগী চরা কাংদনবা অফং‑অফংবা থবক শূদুনা লৌবুক্তা খূৎলং য়াওদুনা, মিলদা চেঙ খপ্পা য়াওদুনা মপুরোইবা হল্লকপা ঙাইজখিবনি। মশা নহা ওইবগী কনাগুম্বনা মীৎয়েং কারন চল্লকপা, করিগুম্বদনা মহাক্কী য়াকা ঙাইরি হায়বা খঙলবসু নোংমতসু মৱা‑মপাউ হংবিরবদি লায়রদুনা পীক্লিবা মচা অনীগীদমক য়েংদুনা শেল খজিক্তং ফাওবা থারকখিদ্রবা মপুরোইবনি। মপুরোইবনা মীরায়বিরবসু মহাকপু হল্লকপা ঙাইজবনা পুন্সিগী পন্থুং ওইনা লৌজরিবী ইবেমহলগুম্লবী নুপী কয়াসু ঙসিগী খুন্নাইদা হিংলি উৎলিবা ৱারীমচানি।

মোইরাংথেম রাজেনগী অহুমশুবা ৱারীমচাগী লাইরিক্তসু নুংশিবগী তোপ‑তোপ্পা শক্লোনশিং পুথোরক্লি। মহাক্কী ‍‌‘অমম্বদা লোৎলিবা ফজবা’ মপোকঙৈদগী মমীৎ উরক্ত্রবা থোইবগী হৈথোই‑শিংথোইবা, মহাক্কী সেন্সিবিলিটি অমদি থম্মোয়গী অরুবা মরেপ নীংথিনা উৎলিবা ৱারীমচানি। পূন্না হিংমিন্নরিবা, নুমিৎ খূদিংগী তত্তনা লোয়ন‑থেংনরিবশিংগী ৱাহৈদগী, মশাগী সেন্স ওর্গানশিংগী মতেংদগী য়াম্না চেকশিন্না অকোয়ববু মশক খঙনবা হোৎনরিবা ফিজিকেল্লি চেলেঞ্জ পার্সনশিংগী মরক্তগী মীত্তাঙবা মীওই অমনা প্রোটাগোনিষ্ট ওইনা ৱারীমচা অসিদা পুখৎলকই। মঙাল মচেৎ অমত্তসু উবা ফংদ্রবা মখোয়গী তাইবং অদুবু চুম্নগী সাধারন মীওই অমনদি ওন্থোক্না ৱারমগদবা মাল্লবসু মখোয়গীসু মীচম মীয়ামগা মান্নবা অচুম্বা, ফজবা, নুংঙাইবা, মঙলান তাইবং অনীগী খেন্নবা লৈবা তাইবং অমা লৈজরি হায়বদু নীংথিনা উৎলি—“শুমাঙ মতোন্দগী কবোক্লৈগী লৈনম্না নাতোন্দা য়ৈররবা মতমদা ঐঙোন্দা ফাওরকই। ঐনা খঙবা ঙম্মী। মসি থাবল ফবা নুমিদাংনি। … নীংজোন ফাওবা জ্বায়‑জ্বায় তাবা মাগী অমুবা শম্লাংদগী শংব্রৈ মনা অমসুং চীংশূ মনাগী নুংশিরবা চেঙহী মনম্না ঐগী নাতোন্দা য়ৈরৈ। শোক্লুবদা থোৎ‑নৌরবী মহাক্কী খূৎশানা ঐগী খূত্তা তপ্না তপ্না নাল্লকপদো মঙলান্নি হায়বা খঙলুদে। তাইবং ওইরবোই নীংলুই। মীৎকূপতুদা ঐনা ফজববু মশক খঙই। ফজবা করিনো হায়বদো ফাওই।” (মৈৱায়রক্লবা নুমিদাংৱাই, লা: ৩৭)

‍‌‘চীন্থীবী অমগী’ হায়বা ৱারীমচা অসিদা য়েক্লিবনা শাবী‑শানৌশিংগী ওইবা অপাম‑নুংশিগী মশক্নি। অদুম ওইনমক পুন্সিগী অহানবা অপাম‑নুংশিগী ৱাখল ফাওরকপা টীনএজ মতমগী লাক্ন‑ফানবা ৱাবা পূক্নিংগী ফিভম, অফ‑ফত্ত, অচুম‑অরান লেপথোকপা ঙমদ্রিবা ইনখৎলকপা মতমগী নুংশি‑নুংওনগী মশক অদুমক্তি নত্তে। পূক্নিং ৱাখল লাকশিন্দুনা ফিরেপ লৌবা ঙম্লবা লন্নাই হোস্পিটাল অমদা মেনেজিং দিরেক্টর ওইরবা ওর্থোগী সর্জন অমগা য়ুনিভর্সিটিদা ইংলিশ লিটরেচরগী ওজা ওইরিবী ককচিং নিঙোল অমগা অপাম‑নুংশিগী খোঙচৎ শেমগৎলকপগী ৱারীনি। তাকপি‑তম্বিবগী শিনফমবু খোয়দাজবা, মপূং ওইনা ইংলিশ লিটরেচরগী ওজাশিংবু থাক ৱাংনা ইকায়খুম্নজবা অইবনা মতাং চাবদা মহাক্কী পোক্নফম লমদম ওইরিবা লৌউ‑শিংউবা, মনা‑মশিং, মহৈ‑মরোং থাবা অমদি ঙা য়োকপদা মপূং ওইবা শিনফম ওইরিবা ককচিংগী পুন্সি, খুঞ্জাশিংগী পুন্সি মরেলগী মশক অমসু ৱারীমচা অসিদা থম্নবা হোৎনরি।

ককচিং খুঙ্গং অমদি মসিগী অকোয়বদা য়ূম্ফম ওইবা ৱারীমচা অমনা ‍‌‘কোয়না চিংলিবা লৈই’ হায়বসিনি। শেংমাই তুরেলদগী লৈঙোয় পেকপী, মপুরোইবনা ময়ূম থাদোক্তুনা থংনবা খুলশিংদা উ শূবা, য়ূম‑কৈ শাবা চৎপা মতৈ‑মনাও অনীগী কোয়না চিংলিবা অপাম‑নুংশিগী খোঙচৎনি। মপুরোইবা হল্লক্ত্রিঙৈদা লৈঙোয় পুবা টাটা দ্রাইভরদা ইবেনীগী অনীশুবা য়ূম্বান মরী থমখি। টাটা দ্রাইভর অদুগীসু হান্না মতু‑মচা লৈরবনি। মহাক্না ময়ূমদা হল্লকপদা লোয়নবী লৈরমদ্রবা মনিয়াইমসু ইবেনীবু অমুক ঙাইরুবা তৌদনা খুলগী চিদাই ওইরপ্না লৈরিবা মায়পাকপীগী য়ু য়োনফমদা চঙদুনা মপুন্সিগী অহানবা ওইনা য়ু থকপদা নত্তনা মহাক্কা য়ূম্বান মরীসু থম্নখি। অদুবু মখোয় মখোয়গী অনৌবা শেম্নরিবা য়ূম্বান মরী অদু মতম কুইবা য়াখিদে। মাগী মাগী হান্না হান্নগীদুদা লোইনা হঞ্জিন্নখি। ইকুই কুইদনা নোংমা নুংথিল অমা শেংমাই তুরেলগী লৈঙোয় পেকফম হিদেন্দা মনিয়াইমগা ইবেনীগা থেংনখি। নুমিৎ অদুদগী মখোয় অনীগী হান্নগী য়ূম্বান মরী অমুক হঞ্জিন্নখি, ময়ূমদা পূন্না অমুক হল্লকমিন্নখি। মসিগুম্বা কোইনা চৎলুবা পুন্সিগী খোঙচৎ অসি থোইনা হেন্না পুন্সিবু লুশিন্না খঞ্জিল্লুদবা মীওইশিংগী পুন্সিদা অদুমক থোক্তবা নত্তে হায়বদু অইবগী ৱারীমচা অসিনা ময়েক শেংহল্লি। নুংঙাইরিবদি অইবা মোইরাংথেম রাজেনগী ৱারীমচাশিংগা হান্ননা শকখঙনখ্রবা অপাবশিংদা মহাক্কী অহানবা ৱারীমচাগী লাইরিক্কী মিংথোল ওইরিবা ৱারীমচাদা নমখিবা চেঙহী মনমগী খোয়থুম্লবা মনম অমা ৱারীমচা অসিদসু ফাওহল্লিবা অসিনি। অদুবু হন্দক্কী চেঙহী মনম অসিদি হান্নগী শংব্রৈ মনাগা করপুরগা য়ানশিন্নদুনা শেম্বা মনমদু নত্তে খোংজাই নাপীগী চেঙহী মনম্নি। সনাতোম্বীসু মায়পাকপীসু য়ু য়োনবী ঙাক্তা ওইজরবসু সনাতোম্বীদি শূপ্নগী মপুরোইবগী নত্তনা অতোপ্পা কনাগী খূৎ চন্দ্রিবীনি। অদুগা মায়পাকপীনা শম্বল খাবিনবা লৈত্রবা খুন্দোনগী খুনাং চারবী য়ুয়োনবীনি।

মোইরাংথেম রাজেনগী খূত্থাদা ফাগিগী লৈখোন চেনবা থৌদোক অমদি মফোঙদোক শীজিন্নদুনা মীওইবগী তম্বা ঙমদবা লাইবক, অকন‑অরিং শীংনবা গুন্দা‑ফাদাগী মচৎ অমদি নীংশিংবা থোক্ত্রবা মতমদগী হৌনা লৈ হায়না থাজনরিবা তম্নবা, ভূত‑প্রেৎকী ৱারী, পূক্নিং ৱাখলগা মরী লৈনবা অকিবা অমদি চিংনবা কয়া পুন্সিগী রিয়েলিটিগা ইতোৎ তোৎশিন্নদুনা খুঙ্গংগী পুন্সিনা ময়োনদা লৈহল্লগা শাগৎলকই। মখল অসিগী ৱারীমচাশিংগী মনুংদা—চীংহী মনম গী ‍‌‘খুরা তোমৈগী চাংয়েং’, ‍‌‘হূরানবগী নোংমা’, ‍‌‘উরেম্বী মচা’ অমদি ‘প্রায়শ্চিত’; চেপথরবা ঈশিংপুন গী ‍‌‘মোহনগী অৱাবা’, ‍‌‘খোঙউপ জুরা অনী’, ‍‌‘সুপর কম্প্যুটর’, ‍‌‘ইরোই শেনবা (তোমাল)’, ‍‌‘তিংখং’ অমদি ‍‌‘মং হোংবা‘; মৈৱায়রক্লবা নুমিদাংৱাই গী ‍‌‘লম্বী মতেক অমগী খোঙলোয়’, ‍‌‘হূ পাম্বী’, ‍‌‘সোরারেনগী কৈরাক’, ‍‌‘য়ূম্লিংদবা অহীংগী খোঙলোয়’, ‍‌‘য়েঞ্জাংমক্নে মীৎতামক্নে’ অমদি ‍‌‘শক্তম অমসুং শক্তম’ অসিনচিংবা ৱারীমচা তরাতরুক অসি কোনশিন্দুনা নৈনবা য়াই।

‍‌‘খুরা তোমৈগী চাংয়েং’ দা অইবনা লীরিবা ৱারী অসি মতম কুইরবগী মমাঙদগী পূক্নিং ৱাখলদা চিংনদুনা লৈনরকপা ভূত শান্নবগী ৱারীনি। লৈকাইগী অহল‑লমন্না লীবিবা অঙাংশিংনসু য়াম্না তাজনীংবা, তারুরগা কিনবসু পোক্নবা নুংঙাইরবা ৱারী অমা অইবনা নৌনা মচু লোক্তুনা পুথোরকপনি। খূবাক ময়ি য়েংলুবা খূদিংগী শোয়দনা শেল পায়য়ু হায়বা লৈ হায়না ফাওরকপগী আশা অমদা হিংজরিবা য়েন কাওনবা, খুনু তুনবনা মথৌদাং ওইবা খুরা তোমৈনি। মশাগী চহী য়াংখৈ তানখৎলক্লিবা তোমৈ লৈকাই খ্বাই ময়ামগী খুরানি। য়েন কাওনবনা শিনফম ওইরগা শেল পায়রক্কনি খল্লিবা তোমৈ অরেঙ‑অরেঙ পূত্থরক্লবদা কাইনথংদা উপায় লৈত্রদুনা মাইবা শাবা মপল তোলমুদগী ভূত শান্নবগী মহৈ লৌরুবনি। মহৈ অসিনা ফিরাল মমায় চুম্লক্তুনা মহাক্কী পুন্সিগী চৈ কারকখিবনি। মতম খরা লৈরগা মশা ঙম্লক্তবদগী হঞ্জবা কৌবা ভূত অদুগী ঈরাৎ‑থৌরম মতম চানা পাঙথোকপা ঙমদবদগী ভূতনা মথৱায় লৌরগে তেমশিংলক্লবদা লৌশিং চাউবী মহাক্কী লোয়নবী জামিনীনা মপুরোইবগী থৱায় কনখিবগী ৱারীনি। য়াম্না নুংঙাইরিবদি অইবনা শাগৎলিবা অপাবশিংনসু ওন্থোক্না খৌরাংনা তানীংলিবা ভূত শান্নবা, থেংনবা, ভূতনা নম্বগী ৱারী থৌদোকশিং অসি মঙগা ইশম শমজিন্নহন্দুনা অপাবশিংবু নমদুনা থাজহনবা নত্তবা ৱারীগী খূৎলান্থোক অমদা চত্থিরবা অসিনি। মহৌশা ফুঙ্গাৱারী ওইনা ঐখোয়গী তাখিবা ভূত শান্নবগী ৱারীদু মোইরাংথেম রাজেননা মায় পাক্লবা ৱারীমচা ওইনা পুথোরকপনি।

‍‌‘হুরানবগী নোংমা’ হায়বা ৱারীমচা অসিসু অশি‑অনাগী, য়ূম শঙ্গাবগী, চুড়াকরণগী, লুহোং‑খোংদোংবগী পোৎয়েংগী হোৎনবদা অহাওবা এন্সাং চারা অমফাওবা চাবা ঙমদ্রবা য়ূম্বুরেম্বা অমগী ফিভম য়েক্লিবা ৱারীমচানি। সোসিয়েল এৱারনেস পীরকপনা ৱারীগী অহৌবা ওইরগা মমায় থোক লৈথোকখিদুনা ফাগিগী ইহুল অমা পীরকপদা অপাবশিংবু নোক্নীংবা ফাওহল্লিবা ৱারীমচানি। সিচুয়েসন শেম্বা হৈবা অইবনা মীগী শোরাৎ মফমদগী শউন সেন্দল অহনবা অমা তোংদুনা মোন্দা নুংঙাইনা সেন্দলদু কাঙ্খদা থমজিল্লম্লগা শোরাৎকী দক্ষিনানা কৈথেলদগী য়োংচাক লৈরুরগা হাইদোরকপদা ‍‌‘থৎলো থৎলো, হূরানবা থৎলো’ হায়না সাইকল হূরানবা অমা ফানবা লাউনরকপদা মঙোন্দা ওইরবোই নীংদুনা চেনখৎখিবা মিহুল হন্থরক্ত্রিবা গুলাপনি। ময়ূম য়ৌরকপদা ঙসাইগী মহাক্না পুরকপা সেন্দলদুনা মচানুপা কুমারনা লৈজরুবতা ঙায়রিবদু ওইরম্বগী নুংঙাইরবা ৱারীনি। তোয়না হূরানগনবা মীসু নোংমদি মপুনা ফায় অদুগা নোংমখক হূরাল্লুবা মী ওইরবসু নুমিত্তুদা অদুম ফাখিবা য়াই, হূবু হূরাল্লুরবদি নোংমদি শোয়দ্রে মপুনা ফাবা মদুনি গুলাপকী পুন্সিদা থেংনরিবা ‍‌‘হুরানবগী নোংমা’।

ৱারীবু নুংঙাই নুংঙাইরবা ৱারীমচা ওইনা লান্থোকপা হৈবা মোইরাংথেম রাজেননি। মহাক্কী ‍‌‘উরেম্বী মচা’ দা লীরিবা ৱারীসু কিগন্দবা নুপা অমনা অকিবগা নোংমা থেংনখিবগী নুংঙাইরবা ৱারীনি। ৱারীগী ক্লাইমেক্স তান্না পুখৎলকপদা সিচুয়েসন শেম্বা হৈখ্রবা অইবনা প্রোটাগোনিষ্ট ওইরিবা এগ্রি কেশোগী কেরেক্টরদা অহোবা খজিক্তংদি থম্লম্মী—“এগ্রি কেশোনা মচাসি ‍‌‘নাইট ব্লাইন্নেস’ লৈরমাল্লে হায়দুনা ‘ভিটামিন এ’ দগী হৌরগা জেদ ফাওবা পীজদবা য়াওদ্রে। …মপাসু মমাসু দোক্টর অমত্তা তানরুদে। মশা মশাগী লায়েংনা খ্বায়দৈ ফরবনি খঞ্জবা মীওই ঙাক্তনি।” (চীংহী মনম, লা: ৫৪‑৫৫)। নোংমা লমতাগী মঙানি পানবা, থাংজ নুমিৎসু ওইবা; অতিয়াদা নোংসু লৈবা নুমিৎ অমদা তুরেল ৱাংমরোমদা ওঙখিবা মচেগী ময়ূমদা চৎলুরগা নুমিদাংগী পূং ১২:১৫ রোম চৎপা অদুৱাইদা মচে‑মবাইনা হনখ্রনু হায়না খাম্বা য়াদনা লাকপদা মশা খঙজদনা মহাক্কী ৱাখলদা হোদুনা লৈরিবা অহোবা মখূল অদুদা অকিবনা নোংলৈ ওইনা লীৎশিল্লকখিবনি। অইবনা হায়নীংলিবদি ঐখোয়গী কন্সস মাইন্দনা কন্ট্রোল তৌবা ঙম্বা শরুক নত্তবা, মীওইবগী সবকন্সস মাইন্দগী লেবেলদা ঐখোয়না তত্তনা তাখিবা অকিবা, চিংনবনা মরী লৈনবা থৌদোক ৱারী কয়া তূংদুনা লৈরিবদু মফম মতম চানা করিগুম্বদসু মথি ফোংলকই হায়বদুনি। তশেংনমক হেক অহীংবগুম য়েক্লিবা, পানা পানা তুজুংবা পোকহনবা প্রেৎ আত্মাগা মরী লৈনবা তম্নবদা য়ূম্ফম ওইদুনা শাগৎপা ৱারীমচাদি ‍‌‘য়ূম্লিংদবা অহীংগী খোঙলোয়’ হায়বসিনি। ৱারীমচা অসিদদি এগ্রি কেশোগুম্না মশা খঙজদনা মতম কুইনদগী মহাক্কী কন্সস মাইন্দনা সপ্রেস তৌদুনা থম্লকখিবা সব‑কন্সসস মাইন্দগী মফম অমদা লোক্তুনা নৎত্রগা তূংশিন্দুনা লৈরিবা অকিবা হায়বদুনা মতা চাবা ঈশিং‑নুংশিৎ ফংবদা মথি ফোঙলকপা অদুগুম্বা নত্তে। মীশি চাদনা শিখিবা স্কুলগী চৌকিদার ওইরম্বা অহল অমগা স্কুল অদুদা মহৈ তম্লম্বী পীক্লিবী নুপীমচা অমগী থৱায় মিরেলনা, মখোয়গী মরমদা করিসু খঙজদবা মীওইশিংগী মফমদা মখোয়গী শিঙম‑নাঙমদনা শিখিবগী থৌদোকশিংদু খঙহন্নবা হোৎনরকপনি। মখোয়না হিংলিঙৈগী শক্তম অদুদা লাক্তুনা মখোয়গী থম্মোয়দা লৈরিবা পেন্দবা, নুংঙাইতবশিং অদুগী মরমদা পাউদম্লবনি; মখোয়গী মীশি অদুগা মান্নবা শামিন ফাওহনবনি। নুংঙাইরিবদি ৱারীমচা অনী অসি নক্না থম্মিন্নবদা অমনা অহীংবা তাইবং মীওইবগী সবকন্সস মাইন্দদা থোকপনি অদুগা অমনা শিঙম‑নাঙমদনা শিখ্রবা মীওইদুগী পূক্নিং ৱাখল অমদি মশাদা ফাওখিবা পেন্দবা অমদি চৈনাশিং অদু অকোয়বদা নৈশিন্দুনা লৈহৌবনি। ৱারীমচা অনীমক্না অপাবশিংবু অকিবগী তাইবং অমদা পুদুনদি চৎলবসু হায়ফম খঙদবা মনুংঙাই অমমমদি ফাওহল্লিবসি অইবগী মায় পাকপনি।

ফাগিনা পাম্বৈ ওইরগা ফোঙদোকপা য়াম্না সেরিয়স ওইবা ৱারীমচানি ‍‌‘মোহোনগী অৱাবা’। মঙ‑হাগী মতৌগুম ফেন্টাসি অমনা ৱাহৌ ওইবা ৱারীমচানি। মীহাৎ চাদনা হাত্তোকপিরবা থৱায় অমনা লাইরৈবাক্তা ঈংনা পোত্থাজরুরগে লাকপদা স্বর্গগী থোঙাকপদুনা মথবাক্তা কাওদুনা তান্থোরকখিবা মঙ অমদগী মিকপ থোরক্লবা মোহোনগী মনুং‑মপান নাইবা লমচৎনা ৱারীগী ময়াঙ পুরিবা ৱারীমচানি। লৈজরম্বা ইংখোল, মচানুপীগী সনা ফাওবা কায়দুনা থবক ৱানোম্লুরগা থবকসু ওইরক্তবা শেলসু হন্দোকপিরকখিদবনি। শেল থৌবা চৎলুবদা ধমকা তৌরুবগী মরু‑ময়াঙ তেকপমখৈ ফুধরক্তুনা শিনিংচিৎতা মথৱায় হিংলকখিবনি। থৌদোক অদুদগী অউবা পূম্বনা মোহনবু ৱাখল চোইরবনি লৌনখি। মদুগী খুদোংচাবা লৌদুনা মহাক্কী থবক হাপ্পিগনি হায়দুনা শেল লৌখ্রগা হন্দোকপিরকপদি লায়রদুনা মপুন্সি পিখম্ননবা তেমশিংনখিবা, মদুগী খূজিল‑থৌরাং তৌখিবা খুরাইবুংঙোগী পুন্সি লোইশিনখি। থৌদোক অদুদা মহাক্কা মরী লৈনবগী লংলা‑লংজিন পূম্নমক মাঙহনখিনবা অঙাওবগী তাইবং অমদা অমম্বগা মরুপ ওইবা পুন্সি অমদা লেনখিবা মোহননি। ফাগিগী মখলশিংগী মনুংদা খ্বাইদগী ময়াক লৈনা মচেক্না য়ুবা (অাইরনি) অমা অইবনা য়াম্না খূৎলোয়না ইচম‑চম্না শীজিন্নরকপা মতাংনি—“সংসারসিদা মমল য়াওদবা পোৎশক অমত্তা লৈতে। অচৌ‑পীশক খায়রবসু লোয়শঙ খূদিংমক্তা, চৌক্রি খূদিংমক্কী, টেবল অমমমগী তোঙান তোঙানবা অরেপ্পা মমল অমমম লৈ হায়বসি খঙলকখি। অদুনা পুন্সিদা মায় পাক্কে হায়রবদি পোৎ‑চৈগী মমল য়াম্না কূপ্না খঙবা তাবনি। …পোৎ‑চৈগী মমল খঙহৌদনা খংতাঙ তাঙখৎখ্রে হায়বসি মোহোনদি খঙখিদে। ইন্টরভিয়ুদা মায় পাক্লবা কেন্দিদেটশিংগী মমিং হায়দোরকপদা মাগীদি য়াওরকখিদ্রে।” (চেপথরবা ঈশিংপুন, লা: ২৮)। অহীং অমা মহাকপু খুরাইবুংঙোগী খূৎনেক নহা অনীনা ফূবা য়াবা ফূরগা শিরবনি খন্না বোরাখাউ মনুংদা হাপচিল্লগা লৌবূক্তা হুন্দোক্লম্বগী থৌদোক্তগী ‍‌‘অহীং হায়বসি তমথীবনি’, ‍‌‘অমম্বদা অমোৎপা লোনচৎ পূম্নমক লৈ’ হায়দুনা অহীংবু, অমম্ববু য়াম্না কিজখিবা মোহোননা—“অহীং হায়বসে কয়াদা নীংথিজখ্রবনো? অয়ূক্কী কোরৌ মঙালদা লোৎলম্বা তশেং‑তশেংবা শক্তমশিংদু অমম্বদা লোইনমক উই। অমম্বদা অচীকপা লৈ। ফজবা লৈ। নীংতম্বা লৈ।” (ইবিদ, লা: ৩১) হায়না অমম্বগা চেৎনা থাগোন্নদুনা অমম্বগা মরুপ ওইরকখিবা মোহোনগী পুন্সি অসিমক ঙসিগী শেঞ্জা‑থুমজানা চং ফংলবা মণিপুরী খুন্নাইদা অইবগী ময়া থৌরবা আইরনিনি।

ওইররোইদবা কয়াবু ওইথোকহনবা, পাঙবা ঙম্লরোইদবা থবক কয়াবু পাঙথোকপা হায়বসি মিত্রং ঙাক্তগী ৱাফম নত্তে। মসিদা শিবা কিদনা থৱায় খূবাক্তা হাপতুনা চেকশিন্না হোৎনবা অমসু চঙলিবনি। অদুবু কনাগুম্বনদি মদুবু যাদু‑মন্ত্র, লাইৱা‑তীনৱা ওইনা লৌনবসু য়াওই। পূম্নমক্কী মরুদি থাজবা হায়বসিদা লৈ হায়বা উৎলিবা ফাগিগী ইহুলসু চেনবা ৱারীমচানি ‍‌‘ইরোই শেনবা (তোমাল)’। ফাগিগী ইহুল হাইরপ চেনবা অদুগা তম্বা ঙমদবা মীওইবগী পুন্সিগী মশক য়েক্লিবা ৱারীমচা অমনা ‍‌‘মং হোঙবা’ হায়বসিনি। য়ূমগী লৈত‑লায়রদগীদি লৈকাইগী থবক্না হেন্না লুনা লৌজবা ময়ামগীদমক য়াইফনবা হোৎনবদা মাঙজিল থংদুনা হেক্তা চোংথোকপা থবক্তগী পোত্থারবা ওজা মঙ্গোলনি। খুল লৈকাইগী য়াইফ‑থৌরাং ওইনা ক্রেমেটোরিয়ম অমা ময়াম্না শেল খায়নদুনা শাবদা থৱায় য়াম্না য়াওজবা ওজা অসিগী ইকন কল্লিবা মচানুপা য়াইমা অহীং মঙলাক্নদুনা লৈখিদবদগী মপানা কন্না চেঞ্জ‑চোংজদুনা হোঙজখিবা মংদুদা মচানুপানা খ্বাইদগী ইহান হান্না পোৎলোইখিবা তম্বা ঙমদবা মীওইবগী লাইবক্কী নোংদম উৎলিবা ৱারীমচানি।

ঐখোয়গী অকোয়বদা থোক্লিবা লৈকাইগী, ইমুং‑মনুংগী অপীক‑অপীকপা থৌদোকশিংদগী চোইখত্তুনা থম্লকপা ৱারীমচাশিংগী মনুংদা ‍‌‘তিংখং’ থোইদোক্না নুংঙাইহনবা ঙম্বা ৱারীমচানি। মমা‑মপানা হায়বা ইন্দবা, য়ুগী নিশাদা লূপ্লবা মচা অমগী অহল ওইরবা মপানি অঙাংহল। মপানা ৱারকপা ঙমদ্রবা য়ু থকচিল্লগা করেম‑কথাইনদুনা তোয়ন‑তোয়না মপাগী মখোয়দৌ শীকপা হিংনা হিংনা শিবগা পাংখক ওইরবা মচাগী লমচত্তা পেন্দ্রদুনা নোংমদি অঙাংহলনা মচাগী চাকলূক্তা হূ হাপচিনখি। অদুবু মপা ওইবগী চেৎনা পুল্লিবা মরী অদুনা মচাগী মখূত্তগী চাকলূক মুন্দুনা মথৱায় কনখিবগী নোক্না নুংঙাইহনবা ৱারীমচানি। ৱারীমচা অসিনা নাকোয়ননা নিশানা মণিপুরী খুন্নাইদা পীরিবা চৈথেংশিং মপূং ওইনা ফেমিলি ভাইওলেন্সকী মশক অমা মরিক চূম্না উৎলি। ‍‌‘সোরারেনগী কৈরাক’ হায়বা ৱারীমচা অসিদা য়েক্লিবসু হৌজিক্কী মণিপুরী খুন্নাইদা ফোঙ‑ফোঙ শানা মায়োক্নরিবা পুঞ্জি স্কিমনা ওইহল্লিবা পুন্সিগী তংদু লৈতাদ্রবা মশক অদুনি। স্কিম অসিগী ভিক্টিম ওইনা নিমাইগী কেরেক্টর শেমগৎলকপনি। গুদৱিল প্রাইভেট ইনভেষ্টমেন্ট স্কিম কৌবা ময়াং নুপা অমনা লিংখৎপা ইনভেষ্টমেন্ট স্কিম অমদা কেশিয়ার ওইরুবা নিমাই ইনভেষ্টরশিংনা ঈরাং হৌরকপদগী ময়ূম‑মকৈ ঙম্না তুমখিবনি, লৈঙাক্নসু চৈরাক পীদুনা কৈশুমশঙদসু ফাদোক তারুরবনি। চৈরক অসিদা ভোটকী মতাং অমা পুশিল্লক্তুনা ৱারীগী মতাংগা মপা চান্নহন্দুনা মদুগী ভিক্টিম ওইদুনা মহাক্কী অঙাও লায়না হেন্না ফিভম লুশিনহনখিবনি। মমৈথংদা অৱাংবা দলান্দগী মখৌরিদা থৌরী থুজিন্দুনা চোংথরকপদগী মথৱায় মাঙখিবা নিমাইনি। অইবনা ৱারীগী অহৌবদা সস্পেন্স ওইনা অৱাংবা দলান অমদি থৌরীদগী চেকশিন্নবা নিমাইদা খঙহল্লগা ৱারীগী অরোয়বা শরুক্তসু মহাক শিবগী থৌদোক অসি শুক্না মম্লবা অহীং মহাক্তনা খঙই হায়দুনা লোইশিল্লি।

আইরনি, সেটায়র অমদি ৱিটনচিংবা মখলগী খরা হেন্না সেরিয়স ওইবা ফাগিগী মখল নত্তবা ইচম চম্না হ্যুমর ওইনা য়েকপা ফাগিগী মশক য়াওবা ৱারীমচা অমখক্তি ‍‌‘য়েঞ্জাংমক্নে মীৎতামক্নে’ হায়বসিনি। মমিংমকসু থোনবা কৌবা খুঙ্গংগী নুপা অমনা মপূং ওইবা শক্তম ওইবা ৱারীমচানি। চীঞ্জাক্তা অথিংবা লৈতবা মঙাও থীবা নহা অসিনা পরীক্ষা চৎলমদাইদা হৌদোং থোংবা হেক চাবা, লিল্লবোপ থোংবা, ঊচি থোংবা হাউনা চাবদা নত্তনা মমান্নবা লোয়ন‑তিন্নবশিংদসু অমা অমনি হায়জিন্দুনা হেক্তা পীজবা মীতানি। করি অমুক হায়রুগনি অশিবা মীগী শদোং ফাওবা শেমদুনা থোংলগা হাউনা চাথোকপা ঙম্বা ওন্থোক্না মথোং হূকখিদ্রবা নুপানি। ৱারীমচা অসিনা অপাবশিংবু থোইদোকপা ৱাহৈগী অমদি বুদ্ধিগী কোচি থাংদনা ইচম চম্না য়াংনা নুংঙাইহনবা ঙম্মী। মসি মরী মরী নাইনা খোঙজেল য়াঙনা পুথরিবা অইবগী নেরেটিভ টেক্নিক অসিননি হায়নীংই। থোনবগুম্না মথোং চাদবা নুপা অমনি ‍‌‘হূ পাম্বী’ গী থম্বৌ। মহাকসু থোনবগুম লিন চায়, খারৌ মরুম ফাওবা চায়। মমান্নবশিংদসু অদুম পীজৈ। অদুবু মহাক্কী তোপ‑তোপ্পা মগুণ অমদি মহূ পানবা লিন অমদি হূইগুম্না মহাকসু মহূ পুবা মী ওইরম্বা অসিনি। ঐখোয়না থায়নঙৈদগী থাজনরকপা অমদি মীওইবসু হূ চেল্লি, মরম অদুনা মীওইবগী য়ানা য়াখুন তানা চীক্লবদি হূ কায়, করিগুম্বদা শিবা ফাওবা য়াওই হায়বসিনি। অদুবু থম্বৌগীদি মীদা চীকপদা কাবা মহূ নত্তে মহূ পুবা হূইদা চীকপদা হূইদুবু শিহনবা ঙম্বা মহূনি। অপাবশিংনা মসিবু ওইথোক্কদ্রনে হায়বগী সস্পেন্স অমা পীবগা লোয়ননা নুংঙাইহনবা ঙম্বা ৱারীমচানি।

মোইরাংথেম রাজেননা লৌখৎলিবা ৱারীমচাগী অতোপ্পা মরুওইবা হীরম অমনা চরাঙনরবা মণিপুরী খুন্নাইগী মশক অসিনি। লালহৌবগী ঈরাং, লালহৌবা নমথনবা লৈরিবা সিফাইশিং, মখোয়গা মূক্নবদা মীচমগী থৱায়না পোন্থা ওইবা, অকি‑অখং মায়োক্নবা, লৈঙাকপশিংগী শাজৎ, ফিজং মরুমদা শান্নরিবা কূহ্মৈশিং অমুকসু ময়াই কাবা নিশাগী ঈপাক্তা লূপ্লবা তুংগী জাতিগী য়ূম্বী ওইরক্কদবা নহাশিংগী লাইবক, কোলোনিয়েলিজমগী চৈথেং অমদি মালেমগী লাইচৎ কোভিদ‑১৯ গী অকিবা কয়াগী মশকশিংবু মহাক্কী ৱারীমচাগী হীরম ওইনা লৌখৎলকই। মখল অসিগী মনুংচন্না—‍‌‘মচাক থিবদা’, ‍‌‘ঐ য়ূম হোংলনি’, ‍‌‘চাকলেন অমা’, ‍‌(চীংহী মনম); ‍‌‘কীন্থরবা মঙ’, ‍‌‘নেশানা পুবা’, ‍‌‘তর্নিং পোইন্ত’, ‍‌‘শিবা কিবশিংগী লাইবক’ (চেপথরবা ঈশিংপুন ); ‍‌‘সোরোক্কী নূং’, ‍‌‘কেস দায়রী’, ‍‌‘মৈৱায়রক্লবা নুমিদাংৱাই’, ‍‌‘ক্রাইম মীটিং’, ‍‌‘সনাখোংনাং পাম্বী’, ‍‌‘ময়াই কারবা মৈরী’, ‍‌‘লম্বী অমসুং উতাংবী’, ‍‌‘মচু ওল্লবা লৌবুক’ (মৈৱায়রক্লবা নুমিদাংৱাই ) অসিনচিংবা ৱারীমচা তরামঙা অসি কোনশিন্দুনা নৈনবা য়াই।

‍‌‘মচাক থিবদা’ হায়বা ৱারীমচা অসিগী প্রোটাগোনিষ্ট ওজা রাধেশ্যামনি। নুপা ওইরবসু চোইদি‑চোইখৎ খরা তৌগনবা, নুপী মরক নুপা মরক নাইদনা অমনা ঙাঙবদসু অমনা ঙাঙবদসু হেক্তা য়াওশিনগনবা পাখঙ শরীনি। লীনবা হোৎনরিবা ৱারীনা লমদম অসিগী খূৎলায় পায়বা, লৈবাক্কী য়াইফনবনি হায়না ময়ূম থাদোক্তুনা চৎখ্রবা নহাশিংনা চত্থরিবা লৈবাক্কী য়াইফনবা লৌখৎলিবা থবক, লৈকাইগী লমহেন‑তুহেনবশিংবু চৈরাক পীদুনা ৱারকপগী মওং, মখোয়গুম্বা মীওইশিং অসি হান্ননা করম্না হৌরকখিবগে হায়বগী লংলা লংজিন পীরিবা ৱারীমচানি। নুংঙাইরিবদি ৱারীমচা অসি লান্থোকপগী মওং অসিনি। নেরেসনদা য়াম্না ইন্টিমেসি লৈনা প্রোটাগোনিষ্টকী মরমদা থম্লিবা ৱারী অসিদা ফাগিগী লৈখোন অমদি অদুমক লোয়নরি। হেন্না নুংঙাইহল্লিবদি ৱারীমচা অসিদা মপূংওইবা থৌদাং লৌরিবা মীওইশিং—প্রোটাগোনিষ্ট রাধেশ্যামবু ওইরবসু, নেরেটর সুনিলবু ওইরবসু নৎত্রগা ওজা রাধেশ্যামবু ৱারক্লিবা, নমদুনা ৱারীমচা অমা ইনবগী চৈরাক পীরিবা খূৎলায় পায়বা নহারোলশিংবু ওইরবসু মশাগী মতিক‑মগুণদা, হৌরকফমদা নৎত্রগা মচত্তা অহোবা অৱাৎপা অমমমদি লৈবা মীওই অমমম ওইহনবা অসিনি।

খূৎলায় পায়বা লালহৌবা অমদি সিফাই অনীগী মূক্নবদা মীচমগী পুন্সিনা চৈনাখোল ফংবা, মীশি‑মীনা নংবগী ৱারীদা য়ূম্ফম ওইবা ৱারীমচানি ‍‌‘চাকলেন অমা’। লালহৌবগী ঈরাং লৈবা লৈবাক অসিদা মরাল করিসু লৈজদবা মীচমশিংবু নাকল অনীমক্কী তাইনফম ওইবা, মফম মরাং খঙনহন্দবা, মিপাই‑থবাইবা পুন্সিরোল অমদা হিংহল্লিবা চরাঙনরবা পুন্সিগী মশক অমা ৱারীমচা অসিদা য়েক্লি। ৱারীমচা অসিদসু ফাগিগী ইহুল অমদি অদুমক লোয়নরি। ঈরাং তোয়না থোকপা, বন্দ, ষ্ট্রাইক, এজিটেসন, ৱাকৎ মীফম য়াম্না কূংবা লমদম অসিদা অইবনা য়াম্না হৈ‑শিংনা বন্দবু পার্সোনিফাই তৌরকপা ৱারীমচানি ‍‌‘ঐ য়ূম হোংলনি’। ফার্ষ্ট পার্সন নেরেসনদা লীরিবা ৱারী অসিদা বন্দনা মশা মতোমতা খঞ্জবা ৱাখলনি—“বা: ঐসে মপা‑মপুনা অদুঙৈদগী লোইরক্লবা মীনাইদু মঙাইখ্রেনে! বন্দ নুমিত্তুদা হোস্পিটাল য়ৌবা ঙমহৌদনা শিখিবা চাবোকপীদুগী ইমুংনদি ঐবু “নঙমক্তা শিখ্রোবা” হায়দুনা য়াম্না ৱারৌনা থম্মোই শোক্না কপখিবদু ঐ করম্নদি কাউগনি?” (চীংহী মনম, লা: ৭৯)

লালহৌবগী ঈরাং মায়োক্নরিবা লমদম অসিদা মখোয়না মীচমশিংগী পুন্সিদা মায়োক্নহল্লিবা প্রোব্লেম খরা সেটারিকেল ওইবা মফোঙদোক্তা লান্থোকপা ৱারীমচাশিংগী মনুংদা ‍‌‘শিবা কিদবশিংগী লাইবক’ অমসুং ‍‌‘তর্নিং পোইন্ত’ হায়বা ৱারীমচা অনী অসিসু পনবা য়াই। খূৎলায় পায়বা লালহৌবশিংনা মখোয়গী খুদোংচাবা য়েংদুনা মীগী ইমুংদা হেক্তা অহীং য়ারেকপা, খূৎলায় হেক্তা থমজিনবা, মতু শোনবা লোয়শঙ কারিবা মীওইশিংদগী শেল খোমগৎপা, মখোয়না অহীং য়ারেক্লিবা ইমুংগী মচা নিঙোল হেক্তা চেন্দুনা পুখিবগী মশক উৎলিবা ৱারীমচানি ‍‌‘শিবা কিদবশিংগী লাইবক’। শোয়বদগী কাপথোরকপা মরূনা চঙজফম লৌরিবা ইমুংগী মীওইগী মখোঙদা পান্দুনা মপুন্সিগী শোইনাইহল্লবা মীওই অমগী মরায়বক্কী ৱারী লীরিবা ৱারীমচানি ‍‌‘তর্নিং পোইন্ত’। অসুক য়াম্না সেরিয়স ওইরবা প্রোব্লেমশিংবু অইবনা ফাগিগী পাম্বৈনা অপাবশিংদা পাউদম্লকপদা অপাবশিংবু নোক্ন‑নোক্না ৱাখল খন্থহল্লি।

নিশানা লাঙ্গোই চনশিল্লক্লিবা ঙসিগী মণিপুর খুন্নাই মীয়ামগী পুন্সিনি। নিশাগা মরুপ্পু ওইরুরবদি নুপা হায়বা লৈতে, নুপী হায়বা লৈতে, নহা‑অহল খায়দে ঙম্নমক মহাক্কী ঈরোন্নুংদা ঈরাক্নহনখিবা ঙাক্তনি। মসিগুম্লবা তমথীরবা ময়াই অসিনা মীওইববু শা ওলহল্লি, লৈজরম্বা মরল‑মথুম, মপাঙ্গল মথৌনা অমদি মশাগী ইকায়খুম্নবা ঙম্নমক মাঙ তাকহল্লি। মদুনা মখোয় মশাবু মাঙঞ্জবতা নত্তনা মখোয়গী মমা‑মপা, ইমুং‑মনুংবু কয়াগী মতিক ৱাখল লৈতাহন্দ্রিবা, চোপ্পা‑ইকায়বা নংহল্লিবা হায়বদু উৎলিবা ৱারীমচাশিংনি—‍‌‘কীন্থরবা মঙ’, ‍‌‘নেশানা পুবা’, ‍‌‘ময়াই কারবা মৈরী’। অচৌবা আশাগা লোয়ননা মচাগীদমক লৈজবা মরল‑মথুম পাম্মূবা লৈতনা অপাম্বতা থুংহল্লুবা, মীরমদা থাদুনা মহৈ তমহল্লুরগা মচানা হীরোইন কাপতুনা ওভরদোজ তারবদা ওইরিবা মপা অমগী চোপ্পা, ইকায়বা অমদি কায়রবা থম্মোয়গী মশক য়েক্লিবা ৱারীমচানি ‍‌‘কীন্থরবা মঙ’। মরক মরক্তা নোংফাদোক মতম লেনবা, পোত্থাবা ওইনা লুদো মরু ওৎপা, দুরী পোইন্টতা অঙ্ক হোৎতুনা শান্নরম্বদগী নোংমদি পুন্সি পূংমূৎ মূৎপা য়াবা, লৌ‑ইংখোল, য়ূম‑কৈ ফাওবা মাঙ‑তাকপা য়ানা শেল থানবা জ্বারগী কাঙবু অমগা শম্নরুবদগী মহাক্না ঙমদবা য়াদে হায়বগী নিশা অমনা চিংদুনা পুখিবদগী মহাক্কী তূমদুনা লৈরিবী লোয়নবীগী মনাদগী সনা ফাওবা থৎপা ঙম্লবা মীশক ওইরকপগী ৱারীদা য়ূম্ফম ওইবা ৱারীমচানি ‍‌‘নেশানা পুবা’। ‍‌‘ময়াই কারবা মৈরী’ হায়বসিদনা মহাভারতকী ৱারী পরিংদা কৌরবকী সভাদা দ্রৌপদীগী মফি মুনখিবগী ৱারী মতাং অমনা ময়োলদা লৈহল্লগা নুপী, জ্বার অমদি টেক্নিসিয়ান হায়বসি মাঙ‑তাক্নবগী লম্বী অহুম্নি হায়বা জোর্জ পোপিদুগী ষ্টেটমেন্ট অদু উৎলিবা ৱারীমচানি।

অইবগী অহুমশুবা ৱারীমচাগী লাইরিক মৈৱায়রক্লবা নুমিদাংৱাই (২০২২) হায়বসিদা য়াওরিবা ‍‌‘কেস দায়রী’ হায়বা ৱারীমচা অসিসু য়াম্না সেরিয়স ওইবা ৱারীমচা অমনি। হেক পাবদা করিনোনে মহাক্কী ৱারীমচা অসিবু, ফাগিগী ইহুল অমা ইচঙ চঙইদা হায়না ফাওহনবা অদুগা খজিক্তং ৱাখল তারকপদদি ওন্থোক্না মথৌ মশক খঙজবা, অচুম্বা পামজবা পুলিস ওফিসার অমনা ইবা কেস দায়রি ওইরম্বগী পাউখোঙ ফোঙলকপদা অচুম্বা ৱায়েল পামজরিবা অপাবশিংগী থম্মোয় মকা লামহনবা ৱারীমচানি। মতম শাংনা লৈবাক্কী অরোনবা ঙাকপা অমদি শান্তি‑রক্ষাগী ফিভম ঙাক‑শেল্লিবা মণিপুর রাইফল্‌সকী কম্মান্দিং ওফিসার ওইনা থৌ পুরম্বা অইবনা লান্থোরক্লিবা ৱারীমচা অসি মহাক্কী সার্ভিসকী এক্সপরিয়েন্সতা য়ূম্ফম ওইবনি হায়দবা ঙমদে। অদুম ওইনমক ঐখোয়গী মণিপুরী খুন্নাইদা মহাক্কী ৱারীমচাগী শক্তম ওইরিবা এস আই নিলচন্দ্রগুম্বা পুলিস ওফিসার খরদি মথৌ য়াম্না তারি। লমদম অসিগী পি ঐচ ক্যুশিংদা নিলচন্দ্রগুম্না কেস দায়রী ইবা হৈবা ওফিসারশিংনা মথৌ তৌরবদি লৈঙাকপা অঙম্বা কনাগুম্বা ফম্নাইবনা এক্যুজশিংবু থাদোকহনখ্রবসু অহীং অমতংদি ৱারীমচাসিদা য়াওরিবা অসিগুম্বা অমনবা বিল্ডিংদা লৈহল্লবদি কয়া নুংঙাইগবা!

পুলিসকী সার্ভিসকা মরী লৈননা পুথোকপা নুংঙাইরবা ৱারীমচাশিংগী মনুংদা ‍‌‘ক্রাইম মীটিং’ হায়বসিসু পনবা য়াই। লোয়শঙ অসিগী মকোক‑মরু ওইরিবা ওফিসারশিংনা মখা থাবা ওফিসারশিংদগী কমদৌনা শেল লৌবা অদুগা মখা থাবা ওফিসারশিংনা অমুক মখোয়না ঙম্বা মফমদগী করম্না শেল খোমগৎপা হায়বদুগী তশেং‑তশেংবা রিপোর্ট অমা য়াওরবা ৱারীমচানি। ‍‌‘সনাখোংনাং পাম্বী’, ‍‌‘লম্বী অমসুং উতাংবী’ হায়রিবা ৱারীমচা অনী অসিদনা য়ূমদাংবনা কৈনাবা, মপু নত্তনা মপু শাবা, খাঙবা কল্লগা ফমেন ফম্বা, ফম্বা চল্লগা হীপ্পা চল্লি হায়বা ইপা‑ইপুশিংনা থম্বিরম্বা পাউরৌশিং অদুগী মঙাল নাইহল্লিবা ৱারীমচাশিংনি। লমদম অসিদা মায়োক্নরিবা সোসিয়েল রিয়েলিটি খরবু অনরিয়েল ওইনা উহনবা নাকল অমরোমদা ‍‌‘রিয়েল ইন অনরিয়েল’ গী মশক্নি। ‍‌‘সোরোক্কী নূং’ অমদি ‍‌‘মচু ওল্লবা লৌবুক’ হায়বা ৱারীমচা অসিদা পীনবা হোৎনরিবসু মপু নত্তনা মপু ওইরকপদুনি পোষ্টমোদর্ন ফেনোমেননগী হায়ব্রিদাইজেসন হায়বদুনি। কোলোনিয়েল ৱার্ল্ড অমগী শক্তি পায়বশিংনা নেটিভশিংবু করম্না য়োৎশিনখিবা হায়বগী ৱারী লীখুন য়াওরবা ৱারীমচাশিংনি।

অইবগী অহুমশুবা ৱারীমচাগী লাইরিক্কী মিংথোল ওইরিবা ‍‌‘মৈৱায়রক্লবা নুমিদাংৱাই’ হায়বা ৱারীমচা অসিদি মালেম পূম্বদা শন্দোকখিবা লায়না‑লাইচৎ কোভিদ‑১৯ গা মরী লৈননা ইবা ৱারীমচানি। মালেম পূম্বা হা‑কার লাউনহনখিবা অঙকপা ফংনা মীশি‑মীনা নংহনখিবা লাইচৎ অদুনা থৱায় লৌখ্রবা অনাবশিং পোৎলোইনবগী থবক তৌবা মীওই অমগী ইমুংনা ময়োলদা লৈহল্লগা লাইচৎ অসিগী তমথীবা মশক অমা উৎনবা হোৎনবনি।

মশীং পংয়াম য়াম্না খূৎ থারকপা নৎত্রবসু ‍‌‘ৱাকচিংগী অয়ূক অমা’ হায়বা ৱারীমচা অসিদা জীবশিংগী মশা মশাগী ওইবা মচৎ অমমম উৎনবা হোৎনরি। লিন খারৌ অমনা খম্ব্রাংচাক অমা পূম্না য়োত্তুনা মচীঞ্জাক ওইথোকখিবগী ৱারী অসিনা “ঐখোয় খূদিংমক ইশা‑ইশাগী তোঙানবা লম্বী অমমমদা হিংনৈ” হায়বা সারা জেনেট মাসকী ৱাফম অদু নীংশিংহল্লি। ‍‌‘চরূ ইকু’ হায়বা ৱারীমচা অসিদনা মীওইবগা নক্না লোয়নরিবা য়ূমশাশিংগী মরক্তগী মীওইবগী লমচৎ, অরোল‑অথূপ খঙবা অশিংবা হূই অমগী ৱারীদা য়ূম্ফম ওইবনি। ‍‌‘নাইতোম পাইরিবা অতিয়াগী নিংথৌরেল’ হায়বা ৱারীমচা অসিদনা ককয়েন হায়বা নোংলৈ নুংশিৎকা শীংনবা ঙম্বা, অতিয়াদা ৱাংনা পাইবা ঙম্বা, নুমিৎকী মঙালদা হঙ্গৎনা য়েংবা ঙম্বা মথৌনা ফবা উচেক অসিগী ৱারী লীদুনা হৌরক্লিবা অঙাংশিংগীদমক হোৎনবা কনবা, তন্দবা, অখাঙ কনবা, শীংনবনচিংবগী থৌনা হাপ্লিবা ৱারীমচানি।

‍‌‘সন্ধ্যাগী থাউমৈ’ অমদি ‍‌‘নাউশুম হায়বিরিবা খূৎ’ হায়বা ৱারীমচা অনী অসিদি পুন্সিবু মশক খঙলকপগা মরী লৈনবা ৱারীমচাশিংনি। অহানবগী ৱারীমচা অসিদা ওন্থোক্না মঙাও থীখ্রবা, নহা ওইরিঙৈদা মীনা লাক্ন‑ফানবা ঙমদবা কাহ্নাই কৌবা মীওই অমনা অহল ওইরক্লবদা পুন্সিবু হেন্না‑হেন্না মশক খঙলকপগী মতৌ উৎলিবা ৱারীমচানি। ককচিংগী খোইতক তৌবা, মখোয় মশেল লোন্নবা তাবদনা অমুক্কা হেন্না লৌশিনফম খঙদবা ৱাঙাঙগী মচৎ অমসু মরক মরক্তা থেৎচিন্দুনা পুথোরক্লিবা ৱারীমচা অসিদা কাহ্নাই ওন্থোক্না মথোং হূক্তনা হৌরকই। লিল্লবোপ, খারৌনচিংবা লৌদুনা চারকপা অঙাংনি—“হাওদবদে! খারৌগা লিলবোপকা কদায়দৈ মান্ননিগেনে” (চীংহী মনম, লা: ৪০)। অঙাং ওইরিঙৈ মহাক লাক্নবদা মখোয়দৌ থীৎখিবা মপুবোক্নি। মহাক্না মপুবোক্কী চহী মতাং অমুক ওইরকপদা মপুবোকপু য়াম্না নীংশিংলকখি, পীক্লিবী মশুবু য়াম্না নুংশিরকখি। মহৌশা অঙাং ওইরিঙৈদা নোংমতা ফাওবা মনাদা হাপখিদবা, মমঙদা ফাওবা মঙখিদবা উপাল‑ৱাপাল থাজিনবা, উচেক‑ৱায়া, শা‑ঙাশিংবু লুনা‑চান্না তৌনীংলকপগী পূক্নিং মতা ফাওরকখি। অহল মতম ওইরক্লবা য়াচঙলকপগী পুন্সিগী ঙানগদবা মতম কুইশিল্লক্ত্রবা মতমদতা পুন্সিবু হেন্না হেন্না মশক খঙলকপগী মশক অদুনি ‍‌‘সন্ধ্যাগী থাওমৈ’ দা উৎলিবা। অদুগা ‍‌‘নাউশুম হাইবিরিবা খূৎ’ হায়বসিদনা অপোকপা মমা‑মপা মশক খঙখিদ্রবা, দোক্টর মতৈ‑মনাওনা মচা ওইনা য়োকচরকপা নৌনা মমিং লৈরক্লিবা আর্কিটেক এঞ্জিনিয়ার অমনা মহাক্কী পুন্সিবু মশক খঙলকপগা লোয়ননা মহাক্কুম্না মরায়বক্না তাথীবিরবা মমা‑মপা লৈজদ্রবা, লৈরবসু লৈতবগা পাংখক ওইরবা অঙাংশিংগীদমক য়াইফনবা হোৎনরকপদা য়ূম্ফম ওইবা ৱারীমচানি।

মোইরাংথেম রাজেন অতেনবা ৱারীমচা ইবদসু য়াম্না পকচবা, সিঙ্গল ইফেক্ট অমা শৎ হেক্তা পীবগা ৱারোইশিন তানবা খূত্থাদা মায় পাক্না খূৎ থাবা ঙম্বা অইবনি। চেনা অমদগী খজিক্তং হেনবা, অনীদগী খজিক্তং হেনবা ৱারীমচা তরাগী মথক্তা মহাক্কী লাইরিকশিংদা য়াওরি। মহাক্কী ‍‌অতেনবা ৱারীমচাগী খূত্থাদা চেপথরবা ঈশিংপুন গী ‍‌‘মীনম্বা’, ‍‌‘কৈরাক’, ‘সিরোসিস’; ‍‌মৈৱায়রক্লবা নুমিদাংৱাই গী ‍‌‘পাখৎচবা’, ‍‌‘মনম’, ‍‌‘মমল’, ‍‌‘ৱাকৎ’, ‍‌‘ক্বা মতপ অমা’, ‍‌‘অমনবা কম্প্যুটর’, ‍‌‘মেরাগী থাশি’ নচিংবা ৱারীমচাশিং য়াওরি। অতেনবা ৱারীমচাগী খোঙহৌ অসিমক্তি অইবা মশাগী ওইনা ইং কুমজা ১৯৯৬ তা ইখিবা ‍‌‘হুরানবগী নোংমা’ হায়বা ৱারীমচা অসি ইবদগী হৌনা লমথাখ্রবনি। অদুমওইনমক ৱারীমচা অহুম থংন‑থংননা থৌওইনা তেন্না ইবগী চাংয়েং অসিমক্তি মহাক্কী অনীশুবা ৱারীমচাগী লাইরিক্তা চঙশিল্লকখিবনি। শূপ্নগী সিঙ্গল ইফেক্ট অমখক পীনবা হোৎনবনা হেন্না মপূংওইবা অইবগী ৱারীমচাশিং অসিদা লৌখৎলিবা হীরমদি মখল মথেলগীনি। লৈকাইগী মচল মচেদা মিতা‑খমদাদুনা অপাম‑নুংশিগী ৱাখল পোক্লবসু মীনা করি হায়খিগদগে হায়না খনবদগী ফোঙদোকপা ঙমহৌদবা অদুগদি লৈকাইগী ময়াম্বা ৱাঙাঙ হৈবা অমগা পুন্সি লৈপুন শেমখিবগী ৱারী (‍‌‘মীনম্বা’); লুনা তিন্নবা মরুপকী নুপীদা মিতা‑খমদারুবগী মহৈ ওইনা লৌশিং চাউবী লায়রবা মরুপকী লোয়নবীনা য়ানখিবা ৱাফমদগী মশা ঙাকথোকচনবা অহানবা শোকপা পোৎশক অদু মহাক মশা ওইদনবা য়ূমথক্তা কাদুনা লৈবা, করাম চাউবা ইনাকখুনবা মরুপ্না মহাকপু অহানবা শোক্নবা য়ূমথক্তা কাখৎনবা হোনবদা কৈরাক্তা হান্না শোক্লুবগী অপাম্বা ফংবা ঙমখিদবগী নুংঙাইরবা ৱারী (‍‌‘কৈরাক’); থক্লিমখৈ চনবা, নাগন্দবা মরুপ অমনা মশা ইনা নারমদনা লিভর সিরোসিসতা লৈখিদবগী ঙক্না থাজদবা য়াখিদবগী ৱারী (‍‌‘সিরোসিস’) অসিনচিংবা চেপথরবা ঈশিংপুন দা য়াওরি।

অতেনবা অমদি তেন্তক তৌবা ৱারীমচাদা মশীং খরগা হেন্না য়াম্না খূৎ থারকপসি অইবগী ইকোন কোনবা অহুমশুবা ৱারীমচাগী লাইরিক অসিদনি। মশক‑মতৌ ফজবী মৱা মপুরোইবা লৈত্রবী জগোই ঈশৈ তৌবী নুপী অমনা লাইওং খঙদনা নাদুনা মনুং মতম চাদনা লৈখিদ্রবদা মহাক্কা অরোনবা হকচাংগী ওইবা মরী লৈনরুরবা মিনিষ্টর অমগা ওফিস অমগী মেনেজিং দিরেক্টর অমগা য়াম্না পাখৎচবা উৎলিবা ৱারীমচানি ‍‌‘পাখৎচবা’। ৱাদি ইহায় হায়দোকহন্দনা নুংদা ফুমদুনা লৈরিবা অৱাবা পাখৎচবগী মতৌ অমা মচেক্না য়ূশিন্দুনা য়েক্লকপদা য়াম্না মতা চানা থোকপা ৱারীমচানি। ‍‌‘মনম’ হায়বা ৱারীমচা অসিসু অপাবশিংবু অকা‑অকূম অনীমক্তা নুংঙাইহনবা ঙম্বা অতেনবা ৱারীমচানি। হূইগুম্না মনম য়াম্না খঙগনবা এস পি অমনা মহাক্কী ষ্টাফশিং অমদি লম্বীদা ফ্রিস্কিং তৌবদা মহাক্কী হেন্দোক থোইদোক্না মনম খঙবগী পাঙ্গল শীজিন্নরকপদা থেংনরিবা মশক অসিনা মপান্থোংগী ওইবা নুংঙাইহনবনি। অদুগা মহাক্কী মথকথোংবা হোম দিপার্টমেন্ট পায়রিবা চীফ মিনিষ্টরনা তৌরকপা ওর্দরদা মহাক মশামকপু মরাল লৈবা ওইনা খঞ্জখিবা, লম্বীগী হূইনা য়ু পুবা স্কূটর থৌবা অমদা তান্না তান্নদুনা খোংবদা মহাক্না ইঙক ঙক্না য়েংলিবা মতৌ অসিনা অপাবশিংদা অনীশুবা লৈরোনগী পূক্নিং‑ৱাখল হাংদোকহন্দুনা মকা লামহল্লি, নুংঙাইবা পোকহল্লি। অমুকসু মীয়ামগী মীহুৎ ওইনা লৈবাক ঙাকপগী থৌদাং লৌরিবা কেবিনেট মিনিষ্টর অমনা অফবা অমদি ফত্তবা, য়ানীংবা অমদি য়ানীংদবা তোঙান‑তোঙানবা মূক্নরিবা কাঙলূপ অনীগী প্রজা মীয়াম্বু য়াম্না হৈ‑শিংনা লোয়নবগী মশক য়েক্লিবা ৱারীমচা অমনা ‍‌‘মমল’ হায়বসিনি। য়ু থিংলিবা কাঙবুনা য়ু য়োনবা অমদি শুংবা য়ারোই হায়বগী ঈরাং হৌরিবা মহাক্কী মরৈবাক মীয়ামগী মমাঙদনা এস পি কৌদুনা য়ু ফাগৎহনবা, শুংবদা চঙবা মপোৎ‑মচৈশিং ফাগৎপা মাঙহনবনচিংবা চত্থবগী থৌওং অদুগা য়ু য়োল্লিবা অমদি শুংলিবশিংদা ঙসাই ফাগৎখিবা, মাঙহনখিবশিং অদুগী মমল হন্দুনা নাকল অনীমক্তগী ভোট ফংনবা হোৎনবগী ঙমজবা লাল্লোং চত্থবদা য়ূম্ফম ওইবা ৱারীমচানি।

পুলিসকী শিনফমগা মরী লৈননা শাগৎপা অতেনবা ৱারীমচা অমনা মতম অমদা ঙম্মী হায়দুনা মখা থাবা কন্সটেবলশিংবু ফূ‑চৈখিবা, শেল খোমগৎখিবা মতম অমগী এস পি তোম্পোক থবক্তগী পোত্থাদুনা ক্বা দুকান হাংখি। নোংমদি মতা চারুদুনা মখা থাবা মহাক্না ওৎখিবা কন্সটেবল অমদি এ এস আইগী খূৎপু অমনা শাথীনা উশিৎপিরমদবগী ৱারীনি ‍‌‘ক্বা মতম অমা’। ঐনা ঐনা তৌখিবা থবক্কী মহৈ ইশানা ফংই, সোরারেনদা তিন শীৎকৎলগা মায়দা তাই হায়নবা অদুগুম্না মহাক্না লঙজখিবা পাপকী মহৈ হৌজিক্তি তোম্পোক্না চপ চানা ফংলে। অদুগা নোংমা ফাওবা ময়ূমদা পোত্থাজনবা মতম ফংজখিদবা চহী চূপ্পা চীংদা পোষ্টিং তাদুনতা লৈখিবা মরৈকাইগী পুলিস ওফিসার অমদি থবক্তগী পোত্থারবসু থেংনবা সিফাই খূদিংমক্না মহাক উবদা সলাম কোৎপা লেপত্রি হায়বদু ৱারীমচা অসিদা উৎনবা হোৎনরি। মশামক এক্তিভ সার্ভিসতা মতম শাংনা লৈরম্বা অইবনি। মরম অদুনা চিল্লবা দ্যুটিগী মতমদা শিনফমগা মরী লৈননা মোংলকপা ৱাফম খরা শৎ খোৎচিলহৌবতনসু ৱারীমচা অমা হেক্তা থোকহনবা য়ারিবনি। অইবগী শিনফমগা মরী লৈনবা অতেনবা নোক্নীং ৱারীমচানি ‍‌‘ৱাকৎ’। ৱানোমশেল তিংদ্রবদি নোংমৈ পায়বা অপীকপা পোষ্ট পুলিস কন্সটেবল অমদি আই অার বিগী রাইফলমেন ফাওবা থবক চঙবা ঙম্নদ্রবা মতম্নি। মপা অমনা কন্না ৱানোম‑ৱাচৎতুনা উচিন‑নাচিন্না মচা অনীমক অহলনা রাইফলমেন ওইনা অদুগা অতোম্বনা কন্সটেবল ওইনা থবক চঙহল্লুবদা অচারম ফংজদবা মচানুপা অহলনা মচাবু মীচঙ‑মীখায় নাইনা থবক চঙহল্লি হায়দুনা ৱাকৎলকপগী নুংঙাইরবা ৱারী য়াওবা ৱারীমচানি। অতোপ্পা ৱারীমচা ‍‌‘অমনবা কম্প্যুটর’ হায়বসিসু অইবনা মতম শাংনা পুরম্বা থবক্কা মরী লৈননা শাগৎলকপা ৱারীমচানি। আই জি পিনা সিক্যুরিটি এরেঞ্জমেন্ট অমগী য়েংশিল্লকপদা লৈখিদ্রবা এসিষ্টেন্ট কমান্দেন্ট অমদি থবক্তগী পোত্থারবা হভিলদার অমা য়াওনা দ্যুটি এসাইন তৌরম্বগী ৱারীনি। হেক তাবদা নোক্নীংবা পোকপা ৱারীমচাশিং অসিনা হোম দিপার্টমেন্টকী থবক তৌবদা লূজদবা, চেকশিন্দবা মতৌ কয়াবু ইফোং ফোংনা করেম্নরি। খুন্নাইগী চৎনবীবু ফোংনা করেম্নরিবা অতোপ্পা অতেনবা ৱারীমচা অমনা ‍‌‘মেরাগী থাশি’ হায়বসিনি। দিৱালী, নিঙোল চাক্কৌবা অমদি গোবর্দ্ধন পূজানচিংবা মেরাগী থাশি, হিয়াঙ্গৈগী নোংমা অমদি নীনী পানবদা মথং‑মথং পাঙথোকপা কূহ্মৈশিং অসিগী মতমদা লমদম অসিগী মৈতৈ তাবা তম্পাক্কী মফম অয়াম্বদা লগাউ খাওনবগী মশক অমা কন্না চৎনরক্লি। নুপা‑নহা, নিশা চাবা, য়ুঙাওবদগী হেন্দোক্তুনা মৌনহা, মীয়ায়দগী হেন্দোক্তুনা হনুবী ফাওবা দাউ য়েংলিবনি হায়দুনা লগাউদা শেল থানবগী মশক অমা চহী খরা অসিদা য়াম্না কনখৎলক্লিবা অসিবু শাথীনা করেম্নবা ৱারীমচানি। লগাউ মরু ওৎলিবা মশুনুপা অমা লগাউ শান্নফমদা হান্না ফুমদুনা থম্লম্বা বোম অমা পোখায়রকপদা য়াওখিদুনা মশা পূম্বা থিবা খঙখিদ্রবদা লগাউদা শেল থাবা থোরকখিবী মবোক অমনা মশুবু থিরকপা হৌজিক মতমগী খুন্নাইগী চৎনবীবু খম থেংনা করেম্নরিবা ৱারীমচানি।

খুন্নাইবু অমদি মশামক্না খোয়দানা চঙলকখিবা এক্টিভ সার্ভিসকী প্রোফেসনগী অচেৎ‑অকোম কয়া করেম্নদুনা, ফাগিগী উচলদা লান্থোক্লিবা অইবনা লমদম অসিগী লৈঙাক থৌ পুরিবা লৈঙাকপশিংবু শাথীনা করেম্নরিবা মখলগী ৱারীমচাদসু খূৎ থারি। তুংদা করি থোক্লগদগে খনবদা ওন্থোক্না মকোক শারবা মচীন থীখ্রবা মচানুপাবু হয়েং চাউরগা ভোট লেপহনসি হায়না মতাওনা হৌদোরকপা ৱাফম অমনা ৱারোইশিন ওইবা ৱারী মচানি ‍‌‘চীন্থীবা অঙাং’। মতৌ অসুম্না মোইরাংথেম রাজেনগী অতেনববু ওইরবসু অশাংববু ওইরবসু ৱারীমচা অয়াম্বদা ফাগিগী ইহুলগা লোয়ননা মণিপুরী খুন্নাই অমদি মীয়ামগী পুন্সিগী মশক অমা উৎননবা হোৎনরকই। মহাক্কী ৱারীমচানা অপাবশিংবু নুংঙাইহল্লি, পোত্থাহল্লি অদুগা করিগুম্বদসু ৱাখল খন্থহল্লি। নুপা‑নুপীগী মরীদগী হৌরগা নুংশিনবা, মিনুংশি, কত্থোকপা, শেমগৎপা, পেন্দবা, ৱাকৎনচিংবা মখল‑মথেলগী হীরম কয়াদা খূৎ থারকই। মশাগী পোক্নফম লমদম ওইরিবা ককচিংদগী হৌরগা খুঙ্গং‑খুনয়া, লোইজি‑লোইয়া অমদি শহরগী মশক; মীচমদগী হৌরগা সাধু ফাওবা; লায়রবা লৌমী শিন্মীদগী হৌরগা য়াইতোং‑খমদোংবা, লৈঙাকপা, ওফিসার, ফাওবা অদুগা ৱাখল তাবা মীওইদগী হৌরগা, মীত্তাঙবা, ৱাখল চোইরবা নুপা‑নুপী অমদি থার্দ জেন্দর ফাওবা কোনশিন্দুনা মহাক্কী ৱারীমচাশিংগী মচল ওইহল্লি, শক্তম লাংহল্লি। সেরিয়স ওইবদগীনা য়াম্না য়াংবা ইচম চম্বা ৱারী ফাওবা কোনশিল্লিবা ৱারীমচাশিংনি। অপাবশিংনা তোয়না তারবা মহাভারতকী ৱারীবু অমুক হন্না লীদুনা জ্বারগী নিশা, মীওইবগী নাপল, করাম চাউবা, লমন খুম্বা, মবূক ফত্তবা ‍‌‘ময়াই কারবা মৈরী’ গী ৱারী অমুক হঞ্জিন্না য়েংশিন্দুনা করি করম্বা অহেনবা অনৌবা পাউজেল অমা পীনবা হোৎনরিবগে য়েংশিনবা য়ারি। অদুম ওইনমক ঐখোয়না তোয়না তানরবা ফুঙ্গাৱারী খরদি অইবনা নৌনা অমুক থৱায় পালহন্দুনা পুথোরকপদা তশেংনা অহীংবা মালহল্লকই। খুঙ্গংগী পুন্সি য়েকপদা ওন্থোক্না চোংলম চাখিদ্রবা মীওইশিংগী লমচৎ শেমগৎপদা অইবগী হৈ‑শিংবা খূৎফমশিং তোয়না উবা ফংই। মতা চাবা ফাগিগী ইহুল মতাং‑চানা হাপ্পা ঙম্বা অসিমসু অইবগী চাউনা মায়পাকপনি। হৌজিক্তি মশক নাইবা মণিপুরগী ৱারীমচা ইবশিংগী মরক্তা মোইরাংথেম রাজেনগী মমিং পন্নরক্লগনি।

এবষ্ট্রেক্ট হন্দক্কী বুধিচন্দ্র হৈস্নাম্বগী ইরানয়াইদা হায়না লান্থোক্লিবা ৱারীমচাগী লাইরিকসি তোপ‑তোপ্পা লৈশিংগী লৈ‑পরেং অমনি হায়বা য়াই। পুন্সিবু চাশিল্লক্লিবা, সমাজবু ৱাহন্থোক লৈহল্লক্ত্রিবা তোঙান‑তোঙানবা ফূরুপশিংগী পুন্সিগী ৱারীশিং লৈচল চানা লেংশিল্লক্লি। ৱারী অয়াম্বা নীংখায়খ্রবা য়ূম্ফমদা মশক থোকপা য়ূম্ফমশিং শাগৎনবা হোৎনবগী ৱারীশিংনি। মায় পাকখিবসু য়াওরি; পাকখিদবসু য়াওরি। অদুবু আইরনিকেল্লি পুন্সিগী অশেংবা মশক মচু ঊৎলম্বশিংনি হায়দবা ঙমদে। শম্না, খুন্নাইগী থোক্লিবা থৌদোক‑ৱাথোকশিংগী মরুমদা লোন্না‑থূপ্না থমজরিবা পূক্নিংগী চৈনা কয়াবু মকা ফোংদনা ফোঙদোক্তুনা সমাজগী অশেংবা মচুবু মতমগী কেনভাসতা লোক্লিবা ৱারীমচাশিংনি হায়দবা ঙমদে।

মরুওইবা ৱাহৈশিং লৈশিংগী লৈ‑পরেং, পুন্সিবু চাশিল্লক্লিবা, নীংখায়খ্রবা য়ূম্ফম, পূক্নিংগী চৈনা, মতমগী কেনভাস।

ৱাহৌদোক বুধিচন্দ্র হান্ননা ৱারীমচাগী লাইরিক অনী লান্থোকখ্রে—১। অপীকপা নুংশাস্বর (২০০৬), ২। ঙমখৈগী ৱাংমদা (২০১৩)। লান্থোকখ্রিবা ৱারীমচাশিং অসিদা অয়াম্বা মহৌশা অমদি দেষ্টিনি অনীগী ঙমখৈ মনুংদা মতম্না পুরকপা পামজদবা থৌদোক কয়া নৎত্রগা মীওইবগী পূক্নিং লমচৎনা ওইহল্লকপা য়েংনীংদবা থৌদোক কয়া অইবনা য়েকখি। হায়রিবশিং অসি য়েকপদা অইবগী সাইকোলোজিকেল ইন্সাইটনা মীওইবগী মপূংফাদবা কুরাংবান কয়া উহনখি। সেটারিকেল টোন, পোইটিক কমেন্ট শীজিন্নবা থেংনখি। হন্দক লান্থোক্লিবা ৱারীমচাশিং অসিদদি, সমাজ অসিনা হৌজিক হৌজিক থেংনরিবা লোকেল অমদি নেসনেলগী ইস্যু ওইবা প্রোব্লেম কয়া (লান, রিফ্যুজী, আইদেন্টিটি, ইনভাইরনমেন্ট, নুপী) অইবগী ওবাজার্ভেটিভ নেরেটিভতা লান্থোক্লকই। মসিদা কেরেক্টরশিংগী নুংগী কনফ্লিক্সসু ঊৎথোক্লি। নেরেটিভসি নীংশিংবা অমদি মঙ‑হাগী ওইবা তাইবংগী ফিবান্নুংদা পুশিল্লক্তুনা কেরেক্টরশিংগী মশক—লফূ লৈয়োন অমমমতা ওইনা খোক্তোক্লগা মনুংগী লৈয়োন উহনবগুম উহল্লকই; সমাজগী মশকসু তাক্লকই। মসিনা ৱারী পরিংসু ওইজরকই। মসিদা দাইলোগশিংনা ৱারীগী খোঙজেল য়াঙশিলহল্লকপদা মতেং পাংলকই। অপাবশিংদা অইবনা হায়নীংলিবদুসু উহল্লকই। হন্দক্কী ৱারীমচাগী লাইরিক অসিদা হান্না অইবনা পাম্না শীজিন্নবা ইপিসোদিক এলেগোরিদি শীজিন্নবা উদ্রে।

ৱারীমচাশিংগী মতাংদা ষ্টদি অমা ‘মীওইবা মরক্তা‘ হায়বা ৱারীমচাসি ধর্ম্ম মান্নদবা ফূরুপকী লান্দা ময়ূম‑মকৈ চাকহৌরবা, মশামকসু শোইনাইরবা (সলাম), মশামক্কী মমাঙদা হঞ্জিন‑হঞ্জিন ইজ্জৎ মাঙহনবিখ্রবী মাগী নুপী (জহেদা) অনীগী ৱারীনি। মখোয়গী অমত্তা ঙায়রবা মচা আলি শিখ্রবরা, হিংলিবরা তাংদাংবা খঙদ্রি। আরাকান লমদমদগী থৱায় হিংনবা চেল্লক্লগা মোরেগী মফম অমদা ভারাদা শক লোৎলগা লৈরিবনি। অইবনা মখোয় অনীগী পুন্সি ৱারীদা তোংলগা, ধর্মগী মিংদা ফূরুপ কাঙলূপকী লাননা মীওইবগী মিনুংশিগী মচৎ অমদি মীওইবগী মরী কায়থরকপদু ঊৎলি। ৱারীমচাগী মিংথোলসু মসিদা লাকই হায়না লৌই। ফূরুপ কাঙলূপকী ধর্ম অসিদদি থাজবা লৈত্রে। মসি সলামগী ৱাহৈদা য়েংসি, পাগোদাগী লাইশঙদগী য়ৈরকপা শেনবুং মখোল তাবদা হায়রকপনি: “…মখোয়গী মখূৎমক্না য়ৈরকপা শেনবূংগী মখোল অসে ঐ তাবা ঙমদ্রে। মান্নি খোঞ্জেল অসি লানগী লানবাউনি।” মীওইবগী পূকচেলসি অমুক য়েংসি: নহানমখৈ মাগী মশক উবদা পৈশা নিরক্লগনি হায়দুনা ফৎ‑ফৎ লৈথোক্নরম্বদু জহেদাবু খূৎ হত্তুনা কৌশিল্লকই। মীরক‑নারক য়েংলগা লোন্না হংনরকই, মমল কয়ানো? মোরেদগী নম্ফালোং, অদুগা নম্ফালোংদগী মোরে চঙথোক‑চঙশিন য়াখিদবদগী জহেদা হিংনবা পূকচাক তান্নবা হোৎনবদা, মপুরোইবগী হীদাক লৈনবা হোৎনবদা, মশাগী ইজ্জৎ য়োনবা তারকই। অইবনা অপাবশিংদা উহল্লক্লিবসি লানগী চৈথেং অসিখক্তা নত্তে, অশিবগী খুন্নাইনি উহল্লক্লিবসি। লানদা পূমশি শিখিবা অদুখক নত্তে, হিংনা হিংনা শিরিবা খুন্নাইদা হিংলিবা মীওইবগী লীচৎ অদুনি। মহাক্কী নুপীনা ইজ্জৎ য়োল্লগা হিংলিবা পুন্সি মহীংদা অইবগী ওবাজার্ভেটিভ নেরেটিভসি য়েংবিয়ু, কেরেক্টরগী নুংগী কনফ্লিক্সসু ঊৎথোক্লি: সলাম অশিবা অমগী মতৌগুম লেঙ‑হাইখিদ্রে। শিখিবনা হেন্না য়াইফরবা মীৎকূপসিদা সলাম অশিবা মাবু তরাম্না কোনশিন্নীংলকই। অদুগা জহেদানা করিগী হিংদুনা লৈবা পাম্লিবা। চুম্মী মহাক মচা হল্লকপা ঙাইরিবনি। মচাগী মশক উনীংবনা লাঙতক্নরিবী মমা অমনি মহাক। করম্না মহাক্তি অশিববু তরাম্না ওক্নীংলমগদগে? মচাগীদমক মমা অমনা চৎকদবা লম্বীদা পাপ‑পুন্য হায়বা অমা লৈফম থোকপ্রা?… …নোংমদি জহেদাগী মচীন্দগী অসুম্না হায়রকপা য়াই, ‘দহন দুনিয়া অসিদা গুনাহ লৈতবা মীওইবা কনাবু লৈবগে?‘ অদুদি অমুক হিংখিবা তারিব্রা গুনাহ লিশিং লিশিং লঙশিন্দুনা…? পাউখুম ফংদে। মখাগী ৱাফমসিসু পাউখুম ফংদে: “নঙনদি হায়খিবদাই মীওইবা মরক্তা মীওইবগী চঙজফম লৈতবা হৌনদে হায়না। কনাগী থোঙজিন্দনো ঐখোয়না হৌজিক লেপ্লুগদবা।” ভারাদগী মখোয় মুসলমাননি হায়বা খঙলক্তুনা তান্থোরকখ্রে। ৱারীসিদা খ্বাইদগী মরু ওইরিবদি, রাখাইন লমদমদসু ইজ্জৎ হঞ্জিন হঞ্জিন মাঙহনবিখ্রবা, মোরে লমদমদসু হিংনবগীদমক ইজ্জৎ য়োল্লগা হিংলক্লবা, মপুরোইবগী পূক্নিংগী চৈনা পীরবা, মফম অমদগী অমদা তান্থোরক্লবসু মী মরক্তা চঙজফম লৈত্রবা পুন্সিদা চঙজফম অমদি লৈরমখিগনি হায়না থাজরিবা জহেদাগী পূক্নিংগী মচৎ অসিনি। মসি মচা হিংলমখিগনি হায়বা পূক্নিংগী থাজবা অসিখক্তনা ওইহনবা মচৎ নৎত্রি। অমরোমদা অইবনা কামগী লম্বীদদি মুসলমাননি হায়দুনা জহেদাগী হকচাংবুদি ইন্থোকপা তৌদ্রিবা লীচৎপুসু এক্সপোজ তৌবা অসিনি। মসি পূম্নমক মী মরক্তা থোক্লিবনি। প্রকৃতি ফাওবা শোকহল্লকই। তেংবাংবিনবা লৈত্রবা পুন্সিদা কামগী লম্বীদদি মশক‑মচু থোক্না হিংবা ঙম্বা পুন্সি অমা ওইহল্লিবা মীওইবগী মচৎ অইবনা উহল্লকই। মীওইবগী মোরেল ভেল্যুদা প্রোটেষ্ট অমনি। ঐগী ইপা ইপু ইবুধৌ পুরেন হাক্তক্তগী হৌরগা লমদম অসিগী লৈশাদা তিনখ্রবনি। লমদম অসিগী পুৱারীদা ঐগী ইপা ইপুশিংগী ৱারী য়াওখ্রবনি। মীতোপসু নৎতবা ঐঙোন্দা করিগী শক্তাকচে পীয়ু হায়ফম থোকপগে? মসিনা মহাক্কী অকনবা মরৈ! সোসিয়েল কনসেপ্ট অমবু শীংনরিবা মশক মমিং নাইদবা কেরেক্টর অমগী দাইলেটিক অসিদা অইবনা ‘মায়থীবা‘ হায়বা ৱারীমচা অসিদা ঊৎনীংলিবদি ‘থাজবা‘ হায়বা ৱাফমসি লৈত্রবদি পরিচয়গী ভেল্যু অসি করিনো হায়বা ৱাফম অসিগা লোয়ননা, সমাজসিদা মালেমসিদা ধর্মগী মিংদা চৎনরিবশিং, ফূরুপকী মিংদা শাগৎনরিবশিং—মসিনা থোকহল্লিবা ধর্ম য়াওদবা মীওইবগী মচৎ, মসিনা থোকহল্লকপা খৎন‑চৈনবা, লোয়ননা তুংগী পোরম য়েংদবা ওইজ‑ওইথক তাল্লিবশিংগী কারবার অসিনচিংবনি। এক্সপোজ তৌরিবা ৱাফমসি খুমজিনখ্রগনা মপান্থোংদা উরিবনা রিফ্যুজীগী ৱাফম অমদি লালহৌবশিংগী ৱাফম অসিনি। ৱারীসিগী কেরেক্টর অসিনা শক্তাকচে পীবা ঙমদবদা ময়াম্না উনবা মীৎয়েংদু অমদি কেরেক্টরনা পূক্নিংদা ফাওবদু অইবনা ওবাজার্ভ তৌই: মতম অসিগী শক্লোৎপা খূৎলায় পায়বা মীশক অমগুম মাবু কিনা কিনা ফল্লপ য়েংনহৌবশিং অদুমক্তি মহাক নুংঙাইখিদে। ধর্মগী মিংদা চৎনরিবশিং এক্সপোজ তৌরকই: লাইবক্তা চন্দন পাক্না থিল্লদুনা অমুক্তা তাখিদ্রিবা লাইগী মমিং মানবা মিং অমসু থোনজিনবিরে। মহাক্কী থৱায়না লাইরম্লেন য়ৌবা ঙম্নবগীদমক ঈশৈ শকপা পালাশিং অদুনা শক্লিবা ঈশৈ ময়েকশিং অদু অর্থ লোইনা লৌশনফম খঙলমদে। মরক‑মরক্তা নুংশি‑নুংওনগী ৱাসু য়াওবগুম তৌই। মহাক শিরবসু নোংক্নীংখি। মিংনাইদবা কেরেক্টরদুনা পামজবা সমাজসিদা মালেমসিদদি উদ্রবা ফিভমদু লাইরম্লেনগী ফিভমদা লান্থোরকই: মফম অদুদা মিং, শাগৈ‑জাৎ হংনদে। ইংখোল‑শম্বল, লৌরী‑য়ূম্ফম, লন‑থুমগী মরমদা ৱা অমত্তা হায়নদে। ঙমখৈগী‑সিমনাগী মতাংদা খৎন‑চৈনবা, উংখৎনবগী থৌদোক অমত্তা থোক্তে। ফূরুপ কয়াগী মাগী মাগী হোমলেন্দ দাবী তৌনদুনা মেপ অমমম য়েক্নবগী কূম্মৈসু উদে। মফম অদুদা হেক য়ৌবদা মহাক্না খ্বাইদগী নুংঙাইজখিবদি মফম খূদিং চৎলুবদা কনামত্তনা মঙোন্দা শক্তাকচে পীয়ু হায়রকখিদবা অদুনি। খেন্নবা লৈত্রবা, চান্ন‑চিন্নজবা সংসার অমগী ইখৌলাংবদু ফোঙদোকই। সমাজগী ওইরিবা লাইরৈবাক্কা ওন্ন‑তৈনবা রিয়েলিটিসু ফোঙদোকই। লালহৌবগা মরী লৈননা সমাজসিদা তৌনরিবা চৎনরিবা মতৌ অসিবু অসুক্কী মতীক করেম্নরকই: হায়রক্লিবা মমিং পরেং অদুদা মহাক্কা মরী লৈনবা অদু করম্বনো হায়দুনা য়াম্না হকচিন্না লৌবগী মতৌ অমদা হংলকপা অদুদা নোক্নীংবনা হেনমনখিবদগী থীক‑থীক নোক্লদুনা মহাক্না খুম্লকই, “সারনা হায়বিরিবা মমিং ময়ামসে ফনদুম ফজরিনে। অঙাংশিংনা স্কুলদা রাইম থীববু মাল্লিনে।” শক্তাকচেগী ৱাফমদগী আইদেন্টিটিগী ৱাফমদা অমুক সোসিয়েল রিয়েলিটিশিং ঊৎলকই: মালেম অসিদা লৈরিবা মীওইবা খূদিংমক মাগী মাগী জাতি, ফূরুপ কাঙলূপ নাইনরিবনি। মালেমসিদা লৈমিন্নরিবা জাতি পূম্নমক্তগী মাগী মাগী জাতিনা অথোইবনি তাক্নবা হোৎনবদা অচৌবা লাঞ্জাও কয়া থোকখ্রবনি। ঙসি ঙসিমকসু মশা মশাগী শক্তম অমদি লাইনীংতবু ঙাক্নবা হোৎনবদা শোক্নরিবা লান অসি উরেদনা। অদুনা ইশাগী শক্তমবু কঞ্জবগা লোয়ননা ইশাবু শক্তাকচবা ঙম্নবা অপাম্বা লাইনীং অমদি চৎপনা ফদ্রো। মহাক্না শক্তাকচে পীদবনা মরম ওইদুনা মহাক রিফ্যুজীগী ফিভমদা লাক্লে। মসিদা খুদোংচাবা লৌদুনা ওইজ‑ওইথক তাল্লিবশিংগী মচৎ ঊৎথোরকই: “শক্তাকচে অমগীদমক করিগী অদুক ৱারিবনো মরুপ। করম্বা মখলগী পাম্বগে? অপাম্বতা হায়য়ু। …মখোয় হৌজিক্তি মখূত্তা মানা মানা পাম্বা মখলগী শক্তাকচে অমমম লোইনা পায়নখ্রবনি।” চৎনরিবা লীনরিবা গ্রান্দ নেরেটিভতা মখা তারকই: “…মখোয়সিগী মরক্তগী অমত্তং ইশাগা শাগোন্নখিবদা নঙগী ৱাখলদা অচৌবা থৌনা অমা শোয়দনা লাক্কনি। লৈমিন্নরিবা জাতিশিংগী মমাঙদা চহী লিশিং কয়াগী পুৱারী লৈজরবতদা নত্তনা ইশাগী ইনাক‑খুল্লবা নাৎ লৈজরবা জাতিনি হায়দুনা চৎলুবা মফম খূদিং ৱা চাউনা ঙাঙবগী হক অদু শোয়দনা ফংগনি। অমরোমদসু ইপা‑ইপুনা থম্বিরম্বা এন্সেষ্টরেল লেন্দগী মপুদি ঐখোয়না ওইগদবনি হায়দুনা চীং‑মান অপূম্বা শম্বল ৱাংনা খাগত্তুনা নীং তম্না লৈবসু য়াগনি। মসিদগী হেন্দোক্তুনা নশাগী জাতিখক্তগী ওইবা লৈবাক অমা শেম্বগী হক অদুসু শোয়দনা ফংগনি। …” হায়রিবা গ্রান্দ নেরেটিভ অসিদা গিল্টি কন্সাইন্স অমা মনুংদা লোইচেন্নবা উবিগনি। মসি অইবনা উহন্নীংই। হায়রিবসি ফুমজিন্দুনা ময়াম্না থবক তৌরি। সমাজগী চৎনরিবা তৌনরিবা ময়ামসি মীওইবগী নুংগী ওইবা “থাজনবা” হায়বা ৱাফমদা চেৎনা থাজবা মিংনাইদবা কেরেক্টরদা করিমত্তা চৎনবা য়াদ্রে। নেরেটিভসিনা ফোঙদোক্নীংলিবসি মীওইবগী অশেংবা মচৎ “থাজবা” হায়বসি সমাজসিদা শুক্লৈ লৈতে। অদুনা অশেংবা মী, অইবগী লোন্দা য়েলহৌমী শুক্লৈ লৈতে হায়বনি। হৌজিক লৈরিবসিদি মপান্থোংদা পোলিটিকেল্লি চেজেৎ অমনা হেন্না মরু ওইবা মী অমগী মশক্তুনি। লোইশিল্লকপদা মিংনাইদবা কেরেক্টরনা অঙাওবগী শক্তম লৌরকপদা পোলিটিকেল্লি সমাজগী মীৎয়েং পূম্বা অরানবা ওইরকই—পরিচয়, শক্তাক‑চে মথৌ অমত্তা তাদ্রে। অরানবা করিসু তৌররোইদবা মীশক অমগুম ‘মীতোপকী মীৎয়েং, রিফ্যুজীগী ৱাহং‘ মঙোন্দা চন্নফম ওইদ্রে। মহাক নীং তমজরে। ৱারীসিনা ঊৎনীংলিবসি লোজিকেল্লি, মিংনাইদবা কেরেক্টরনা রিপ্রজেন্ট তৌরিবসি মী অমা ওইবগী অশেংবা মশকসি থাজবগা লোয়নবা কেরেক্টরনি হায়বসিনি। মীওইবা অমনা মীওইবা অমবু মী ওইনা উবিয়ু। মসিদা জাৎ, বিজাৎ, কুচু খেন্নবা, পোলিটিকেল্লি, রিলিজিয়সলি রিপ্রজেন্ট তৌরিবা সমাজ অসি মায়থীবা ওইরে। মরমদি অঙাওবা মানবা মহাক্কী মতৌদা কনামত্তনা মাবু হৌজিক মনীং তৌনা চৎপদা অথিংবা পীদ্রে। মনীংতম্বা পুন্সি মহীং অমদা লৈজরে। সমাজনসু খল্লমগনি। অদুবু তশেংনা মহাক অঙাওবা অমদি নত্তে। ৱারীসি মরালনা থল্লবা রিয়েলিষ্টিক ৱার্ল্ডদা আইদিয়েল ৱার্ল্ড অমা উহল্লকপনি লৌই। “থাজদবা তৌনু মনিশং! পূম্নমক নঙগী থাজবদা লৈরবনি। অৱা‑অনা তোরৈ‑ঈরৈ চন্দুনা লৈরম্লবা খুঙ্গং অসিগী মীপূম খূদিংমক ঙসিদি লোইনমক য়াইফরবনি। …” ৱাহৈ খরসিনা মনিশংবু দোক্টর চৎপগী ৱাফমদগী লাপ্না ইন্থোকখি। লাইওং খঙদনা নাদুনা লৈবনা চিংজিনগী মতমদা থবক শূদনা লৈবদা মাঙবা, হৌজিকপুদি চৎপা খরা ঙম্লি, হয়েং তোপ‑তুনা নাদুনা লৈখ্রবদি—অশিবগী অকিবনা মনিশং লাকশিল্লকই। অমরা অমরা মহাক মশা ফগৎতবা য়াদে হায়বা লাইনীং অদুনা মরম ওইদুনা মনিশং লৈকাইগী মচে অমগী মথক্কী ৱাফমশিংসিদা পূক্নিং লূপ্না থাজখি। মহাক্কী মীৎলমদা সমাজগী মশকসু উরকই: লাইনীং তিন্নদবনা মরম ওইদুনা মশাগী মরৈকায় অদুমক্তদা মখোয় মীচঙ সঙ্গ লৈজদবা হায়বদু ওইরে। ‘হয়েং তোপ‑তুনা নাদুনা লৈখ্রবদি…‘ হায়বা পূক্নিংগী লানফম জয় তৌনবগীদমক মনিশং পাষ্টরগী মনাক্তা চৎপা তাখি। লাইমিং লৌবা তাখি। হান্না চৎনরকপা চৎনবী কয়া থাদোকপা তাখি। …মনিশংগী মশাদা শিরিবা লীক‑কোল লৈতেংগী পোৎলমশিং লৌথোক্নবা হায়রৈ। য়ূমদগী লাইনীংথৌ খুরুম্লগা খোঙ থাংদোক্লকপদা পুন্সি চেঙজেলনি হায়দুনা হকচাংগা থাদোক্নবা ফত্তে হায়না খল্লিবা পোৎশকশিং অদু লোইনা লৌথোক্নবা হায়রকই। অঙনবা অয়ূক্তা হৌগৎতুনা ইরুজরগা লাইগী পূজা নংনবা লাইবক্তা লৈশা মচেৎ অমত্তং নমজবা অদুসু য়ারোই হায়রক্লে। দোক্টরনা ওপরেসন তৌরমদাই ইকোক কোক্না চঙবা ফিভমদু মঙায়। মতাং অসি য়ৌরকপদা মনিশংগী মফমদা অনৌবা পূক্নিংগী লানফম অমমুক মায়োক্নরকই: লীক্লম খূদিংমক থাজরুবগী পল্লেপফম খঙদবা ৱাখলগী অৱাবা অমদি হকচাং কয়াৎনুংদা ফাওরক্লিবা অনাবগী মৈচাক অনীগী মরক্তা মনিশং নুং‑পান ওল্লকই। “স্বর্গ অমসুং তাইবংপান্দা লৈরিবা ইবুংঙো মহাক্কী মতীক মঙাল পূম্নমক ঐখোয়দা পীবিরে। …থৱায় অশেংবগী মিংদা ঐখোয়বু বেপ্টাইস তৌবিরে। … মতম পূম্নমক্তা তাইবংপানগী অরোইবা মীৎকূপ অদু ফাওবা ইবুংঙো মহাক্না ঐখোয়গী ইরক্তা লেঙদনা লৈবিরগনি…।” ‘থৱায় অশেংবা…‘ হায়বা ৱাফম য়ৌরকপদা মনিশংগী থম্মোয় লকাদা পোকপদগী লূ‑তোংদা চূদুনা লৈখ্রবা মনাৎকী চৎনবীশিংনা পীরকপা পূক্নিং হকচাং তূনা শেংজবা ফিভম উরকই। মসি মঙগী তাইবংদা লান্থোরকই: ইমোইনু পূজা নুমিৎনি। ই‑না য়ূমথক কূপ্পা… ৱাই শীৎ নান্না তৈথোক্লে। …মনিশং পূক্নিংদা হৈনীংবা অমদি লাইনীং পরৈ চেৎচবগী নোল্লুকপা মতৌনা ইথন থল্লি। মনিশংগী থৱায়বু য়াকায়হল্লকই। লোয়ননা পূক্নিংগী অকনবা লানফমসু মৈশা হেঞ্জিল্লকই। পাষ্টরনা ইবুংঙো মহাক্কী লোম্বা নাইদবা মিংলেন শোল্লু হায়রি। নুংদনা নুংগী খোঞ্জেল অমনা মনিশংবু কন্না কৌরি: “মোংবা নরানয়াইদা হল্লক্লো মনিশং। নঙগী থৱায় মীরেন অচঙবদি নয়ূম মোংবা নরানয়াইদা লৈরগা করিগী লাপ্না থিরিবনো? …” মৈচাক অমা লৈরবদি মৈচাক্তু হেঙ্গৎনবা খূৎফম মথং মথং থেংনরকপগুম, পূক্নিংগী অকনবা লানফমসিদা চৈরাওবগী ৱাফম, নিঙোল চাক্কৌবগী ৱাফম, কালেন লাই হরাওবগী ৱাফম কয়া মথং মথং নীংশিংলকই। থৱায়বু হেন্না য়াকায়হল্লকই। কদোমদগীনো চর্চতগী খীংলকপা কাংশি মখোলদগী হেন্না তাবা ফংদ্রবা মফমসিদা তারক্লিবা খোঞ্জেল অসিবো? মানি মনিশংগী নাকোংনা তারিবা খোঞ্জেল অসি উমংলাই হরাওবগী খোঞ্জেলনি– ‘হৈরাংগোইনিদা চানবা হৈনিদা…।” থেসিস অমা লৈরবদি এন্টি থেসিস অমা লৈ হায়নবগুম পূক্নিংগী অকনবা লানফমসিসু মায়থীবা পীনবা লম্বীসু লাকশিল্লকই: “ইবেম্মা ঈশ্বর থাজবা মীতনা ঈশ্বরগী থৌজাল ফংবনিকো। ইচানুপা অমখক পোকচবদো শিরুবদগী হিংলক্লবনি। দোক্টরনা য়াররোই হায়দুনা য়ূমদা পুথরক্লবনি। ইচাগী থৱায়দো হকচাংদগী লাপ্না চৎলুরবনি। ইবুংঙো মাবু নীংজবগী মহৈনা পাষ্টরনা থৱায় অদু হকচাংদা অমুক কৌশিনবিবদগী ইচাদো হিংলকখিবনি। …” মসিনা পাষ্টরগীদা লৈরম্বা নুপী অমগী নেরেটিভনি। অদুবু অসিগুম্বা নেরেটিভসিদা মনিশংদা ফংলিবদি—য়ূমগী মখাদা লৈবা ফংদবনি, নুংশিরবা মচাশিং কোন্দুনা তূমজবা ফংদবনি, মপুরোইবা থোইববু তূম্ফম চাফম খঙহন্দবনি। অদুনা পূম্নমক্কী তূংনফম য়ূম নীংশিলকই। চীনবান থোক্তনা ময়ূম লাইবু পূক্নিং লৈতানা থৌনিজরকই: ‘অচৎ‑চত্তা, লেঙলি‑পাল্লিবা পূম্নমক নঙনা শেম্বিবনি। তাইবং মীওইবনা থেংনরিবা অৱা‑অনা খিবিকসু নঙগী খূৎশেম্নি। পূম্নমক নহাক্না কোকহনবিবসু ঙম্মী। লৈয়েং অসিনা ইবুংঙো নহাক্কী মিংখৈ নত্তনা অতোপ্পা মিংখৈ অমা শোঞ্জনবগী থৌনা অদু লৈজদ্রে। য়ূম অদুগী মখাদা ইবুংঙো নহাক্কী নরুম থূপ্না পুন্সিগী অরোইবা মীৎকূপ অদু ফাওবদি হিংজবা ঙম্বগী থৌনা অদুতদি পীনবিয়ু…।‘ “তাইবং মীওইবনা থেংনরিবা অৱা‑অনা খিবিকসু নঙগী খূৎশেম্নি; পূম্নমক নহাক্না কোকহনবা ঙম্মী” হায়বা ৱাফমসিনা মনিশংগী পূক্নিংগী লান অদু লোইরে তাকচরে। পূক্নিংগী অশোনবা ফিভম লান্থোক্তুনা পূক্নিংগী অকনবা ফিরেপ অমদা মনিশং ময়ূম মোংবা মরানয়াইদা হন্নবা থৌরাং তৌরে। লাইওং খঙদবা লায়নানা শিগনি ৱাজখিবদু—…করিগুম্বা শিবা তারবসু মপুরোইবা অমদি মচাশিংগা পূকমেন পাউমেন্নদুনা মখোয়গী মখূৎমক্না ইল্লকপা ঈশিং মরিক অমত্তা ওইরবসু থক্তুনা য়ূম অদুগী মখাদা অরোইবা নুংশাস্বর হোনখিবদু পাম্লক্লে।” য়ূম অমদি য়ূমগী লাইবু হেনবা করিসু লৈতে খঙলকপা মীৎকূপ্তা মনিশংগী মফমদা অকিবা অমত্তা লৈত্রে। ৱারীসিদা উৎলক্লি—য়ূমদা খূয়া তুশীৎনা চান্ন‑চিন্ননা পূক্নিং হকচাং ইশেং শেংনা অরোইবা নুংশাস্বর হোঞ্জবা হায়বসি থৱায় অশেংবনা মরানয়াইদা তিঞ্জবনি। (মসিদবু কদায়দগী পাষ্টরগী পাউমেন্নো?) য়ূমগী পূকমেন পাউমেন্নবদুনা খ্বাইদগী অশেংবা থৱায়গী পাউমেন্নি। মসিদগী হেনবা করি লৈরিবগে? লৈতে, অদুনা মনিশংগী মফমদগী অশিবগী ৱা থাপ্না চেনখ্রে। ৱারী অসিদা ঊৎলিবা অতোপ্পা মশক—‘থৌদোক অমা থোকপদা লাইনীং হোংহৌদবা মখোয় নাইতোম তারগনি‘ অমদি ‍‌‘হৌজিক্তি মখোয়না লাইরিকসু লেম্না তমহনবিরে। হয়েং তম্বা লোইরগা থবকসু তৌহনগনি হায়। ইবুংঙো মহাক্কী থৌজালদগী হৌজিক্তি য়াম্না ৱানা হিংবসু ওইদ্রে‘ হায়বসিনা ৱাফম অমসু ফোঙদোক্লি, মদুদি শক্তম অসিনা মরম ওইদুনা থৱায় অশেংবনা মরানয়াইদা তিনবদি নত্তে। ৱাফম অমনা—থাজবগী পনখৈনবু লানখ্রবদি পূক্নিংগী অপেনবা হায়বা অমদি লৈতে। অদুবু মনিশংগী মফমদদি পোক্লকপদগী লূ‑তোংদা চূশিনখ্রবা লাইনীং লীচৎপু থাদোক্লগা খাঙঙুথক্কী লাইনীং লীচৎ অমনা মহাক্কী থৱায় অশেংববু মরানয়াইদা তিলহনগনি হায়বসিদি থাজবগী ৱাংমদা লৈখ্রে। মরমদি মসিদা মেটরিয়েলিষ্টিককী মীৎয়েং নত্তনা থূপ্লবা নুংগী ওইবা ৱাফম অমা য়াওরি। পুন্সিনা লুনা লৌজবা, নীংজবা, চৎচবা কয়া লৈরি। অদুনবু ময়ূমলাইনা অৱা‑অনা পূম্নমক কোকহনবা ঙম্মী হায়রক্লিবনি। মসি সেল্ফ রিয়েলাইজেসননি। মসিনা মপূক্নিংগী লান মশানা ঙমজদুনা চিংনবগী লৈচিল মপূক্নিং অতিয়াদগী হাইদোক্তুনা তরু‑তরুবী পাঙ্গল্লবী থৱায় ওইনা মোংবা মরানয়াইদা হল্লকখি থৱায় অশেংবগী তিনফম ওইনা অকিবা হায়বদু য়াওদনা। চেক্লাগী কায়দোংফম খঙনা পোম্বীনা হঞ্জিল্লকপনি। হৌজিক ঐখোয়না উগদবদি মোংবা ইরানয়াই হায়বসিনি। মহাক্কী থৱায়বু য়াকায়হল্লিবা সনামহী, লৈমরেল, ফুঙ্গা‑লাইরু, ইমোইনু, লাই হরাওবা, নিঙোল চাক্কৌবা, চৈরাওবা অসিনচিংবা থাজনবা, ইথিক্স, লাইনীং‑লীচৎ, কলচরেল ফেব্রিক কয়াসিনা থৱায়বু শেম্লকই, শারকই, য়োক্লকই হায়বসিনি। মসিদা মীৎনা উবা ঙমদবা আত্মানুংদা ফাওবা নুংফাও অমনা পুন্সিবু খুন্নাইবু কল্লেক্টিভ বোন্দ অমদা চিংদুনা পুরিবনি। সমাজবু, পুন্সিবু মসিনা হিংহন্দুনা থম্লিবনি, কায়হন্দনা চেৎনা পুন্দুনা পুরিবনি। মসিদা অমকপা তৌশিন্নবা অমত্তা লৈতে। ঐনা ঐবু শকখঙবগী ৱারীনি। ৱারীসিদা ইজাতিগী ইফূরুপকী সংস্কৃতিগী অশেংবা য়ূম্ফমদা থৱায় অশেংবগী মরানয়াই ওই হায়বসি অইবনা ঊৎলক্লি। অশেংবা ইরানয়াই ঊৎলকপদা থৱায় অশেংবগী মিংদা মেটরিয়েল গেনদা কলচরেল এক্সপ্লোইটেসন তৌরকপগী মমিসি অইবনা ৱারীমচাসিদা ঊৎলক্লি। “মহাবল্লি উমংগী য়োং অমা নান্থোরক্লে হায়দুনা ৱা‑ৱা লাউনরিবদু অওইবা ওইরবোই নীংলুরে।” অওইবা নত্তে, থাসনাগী মচানি—শোঙলবা পীশুম, কূৎশিল্লগা পানবা অরাওবা মীৎ অনী, চহীগা চানদনা চোম্লিবা মতু, তুম্লবা মনাতোন। চম্লবা মপুরোইবা ইবোতোম্বীগী মফমদগী থাসনানা মমা ওইবগী হক ফংখিদে দোক্টরনা থাজবা কয়া পীরবসু। অদুবু ইরায় লায়না মখোয়গী ভারাদা লৈবা ময়াং শঙ্করদগীদি ফংজখি মমা ওইবগী হক। মহাক্কী ইহাঙ হাঙলম্বা মথম্মোয় মমা ওইবগী হক ফংজবদগী ইথন থনখি। অদুবু ‍‌‘মবূক্তগী তাবা মচা ওইরবসু করিগুম্বদা মচাগী মশক অদুনা মীমাঙদা ইকায়‑নুংশি য়ান্নবা ফংখিদবা নত্তে।’ ‍‌‘পূম্নমক মায়োক্নরগনি হায়দুনা থৌনা ফনা লেপ্লম্বা থাসনা কৈরোই‑লৈকাই মমাঙদা মায় হাইগত্তুনা চৎপা ঙম্লক্তে।’ করি অমুক হায়রুনি! ‍‌‘মণি ওইনা খল্লুবা পোৎশক অদুনা হূ তৈরবা তিংখং ওইদুনা মথম্মোয়দা য়ূখি। শিরসনু হায়বফাওবা খনখি। অদুবু হৌজিক্তি কৈশামপাৎ, নাগামপাল, উরিপোক, থাংমৈবন্দ, ৱাহেং লৈকাইদসু মচাগা শকমান্নবা অঙাং য়াম্না লৈরে।’ মসিদা থাসনাগী পূক্নিংসি য়েংবিয়ু: নাইতোম তারম্বা মচাগীদমক ৱাজরম্বা থাসনা মচাগী মমান্নবশিং অদুগী মশক উরুরগা ৱাখলদা মোমোন নোকচরদুনা হায়রকই, “ইচাগী মমান্নবশিংসে ওন্থোক্না নুংশিজখ্রে…।” অইবনা ৱারীমচাসিগী মমিং ‘লান্দারকপা’ হায়না থোল্লি। করি হায়রিবনো? অপাবশিংদা খঞ্জরো হায়দুনা থনম্বনি। মচেৎ‑মকায় ওইনা অইবনা মতাং কয়াদা ‍‌‘লান্দারকপা’ গী মশকসি ঊৎলকই: “…পৈশা পায়বা, ইনাকখুনবা, নুংঙাইবা চাওখৎপা মফমদা লৈবা পাম্বগী ওইরিনি।” “…লৈশাবীদি লায়রদনা মৌ ফাওবা ময়াং মহাজন পৈশা পায়বশিংনা লৌ বন্ধোপ পায়বগুম নমাদি ওন্দবীদা য়াম্না শীজিন্নরে হায়দা।…” “মীতৈ নুপীগী থৌনাসিদি থাবগী লোইবা নাইররোই। হীরম খূদিং থৌনা ফবগুম মীতোপ মীয়ানচাশিংগী ধারা‑নালা, চাদা‑নাউদা শন্দোকপিবদসু মখোয়সি থৌনাবু ফজনা লৈখৎলক্লি।” “…মীগী ৱাসি তোকসিদা, নোয় নোয়গী নচা নশুশিং অদুদুম য়োং মানবা মতু চোম্বা পোক্লক্তনবা নতূ নতূশিংদু কন্না শেন্নৌ।” মসিদা নত্তে, নুপী অনী খৎনবগী ইপিসোদ অমা হাপ্লিবসিদসু শীজিন্নরিবা দাইলোগশিংসিনা ফনা য়াম্না মতমসিগী নুপীশিংগী লীচৎ ময়েক শেংনা হায়রে। ৱারীমচাসিদা থাসনাগীদি লন‑থুম ঙাকপি‑শেনবিহৌনবা পিবা অমত্তং পামখিবনি; মসিগীদমক শঙ্করবু শীজিন্নখিবনি। অদুবু অতৈদি? নীংতম্বা পুন্সি অমগীদমক্তদি মীৎকূপ অমা শহর থাদোক্লগা উমং‑ৱামংদা ফি থোংদনা চেল্লুবা য়াই। অদুবু শহরগী মম্লবা কাশিংদা মনীং তম্নরক্লিবদি করিগীনো? মতমগী নুংশিৎসিদা মীতৈ নুপীশিং শূনীং‑চৎনীংবা য়াওদ্রব্রা; অহাঙবা চাকখাউ মেন্নবা হোৎনবদা ইজ্জৎকী ৱাফম লৈত্রবরা? ফমজা‑চানীংবা মীতৈ নুপীগী মশীং হেঙ্গৎলক্লবরা? ৱাহং কয়াসি হংহন্নীংবা পোকহনবা ৱারীমচানি। মথক্তা লৌথোরক্লিবা দাইলোগ খরসিনা মতমসিগী সমাজসিগী নুপীশিংগী ফিভম খরদি ময়েক শেংনা ঊৎলি; মসিনি মীতৈ নুপীগী ঈদা লান্দারক্লিবা। মসি নিশানা মীতৈ নুপা লাকহৎখিবা, নহারোলনা হাৎখিবা, সিফাইনা হাৎখিবা—মরমশিং অসিনা হেক্তা ওইহল্লকপদি নত্তে। বুইয়া ময়ূমগী নাপল থুদেক্নবা মঙোন্দগী হেনবা মীশক অমগী মচাদা মচানুপীবু থাজনবা ৱারেপ লৌখি হামিদ। বুইয়াগী নাপল, মচানুপা মুস্তাফাগী ওক্ত্রবা লীচৎ কয়াসিনা মরম ওইদুনা নুরেদাগী থম্মোয়দা মখোয়বু তূক্কৎচবগী মরু হুনখি। মপাগী মফমদসু অসিমঙায়। মসিমক্তনা মুস্তাফাগা সলিমগা মূক্নখি; সলিম মীরোৎ ওইবা তাখি। হামিদ মহাক্কী ৱাশক ঙাক্নবা হোৎনবদা মচানুপী নুরেদাগী পূক্নিংগী লমচৎ খঙখিদে; নুরেদাসু ‘নুংশিবা মহাক্কী মফমদা থৱায় হকচাং অনীমক চিংনদনা কত্থোকপদা অদুক থৌনা লৈখ্রগা অপোকপা মপাগী মফমদা পূক্নিংগী ৱা অমত্তসু ফোঙদোকপদি ঙমখিদে।’ মসিমক্তনা লুহোংলবা মতুং মহাক হল্লকপা তাখি। অঙাংগী মপা মশক তাকথোক্তবদগী বুইয়া ময়ূমগী থৌশিলদগী মহাকপু নূংদুম লৈতুম্না থাবা তাখি; থাবা হৌখি। অদুবু লুনা তৌজরকপা য়োকচরকপা মৌপ্ব ানা নুরেদাগী পুন্সি কনখি—“অঙাং অসিগী মপা ঐহাক্নি।” খাঙবা ঙমদ্রবা মথম্মোয়গী চৈনাখোল মৌপ্ব াদা তাইনখি। মসিমক্তনা নুরেদাগী মপাগী পুন্সি লোইখিনবগী মচাক ওইখি। মসিমক্তদা মুস্তাফাগী খোঙথাং হন্দোকখিবা লৈতে: “…নিকাহ হন্নবগী অয়াবা অদুতং নঙনা ঐঙোন্দা পীরবদি লম্বী অমদি শোয়দনা লৈগনি। নঙসু খঙলিবা নৎত্রা জলিল হাজি কনানো হায়বা?” জলিল হাজি মহাক্কী ৱারেপ অমমমনা নুরেদাগী পুন্সিগী লম্বীদা কায়নবগী অৱাবগী মৈচাক কয়া থেংনবা তাখি; সলিম কায়নবা তাখি; মপা কায়নবা তাখি; ফজদবা বদনাম ফংবা তাখি। অদুবু মরালতনা মপূং ফারবা মচা মুস্তাফাগী চৈরাক্তি, নাপলনা লাকহৎলবা জলিলগী চৈরাক্তি—লৈবাক সমাজনা পীবা ঙমখিদে। অদুবু নুরেদাগী পুন্সিদদি—? লৈকাইদগী ইন্থোকখি। অদুগা জলিল হাজিগী মচীন্দদি তোয়না হায়খি—“শরিয়তপু ঙাক্না চৎপদনা জন্নত ফংনবগী অথোইবা লম্বীনি।” অচাকপা মৈদা তৎতনা ঘী হৈখি। অদুবু নুরেদা থম্মোয় ফাজিনখি—‘তাইবং শেম্বিবা মপু মহাক লৈরিঙৈ করিগী মীনা মীবু লমন শিংলুগদগে? খুদানা মহাকপু খক ঙাকপিরোই।’ লৈকাইগী মতেং ফংদ্রবা চঙজফম লৈত্রবা মপুন্সি—অমম্ববু চেৎনা মথানুংদা কোনশিন্দুনা থম্নীংলকই। মঙলানগী তাইবংদা মচাবু কাবরদা ফুম্বিনবা হায়জরুই মীওইবগী মিনুংশি য়েংদুনা। অদুবু ইন্থোকপিরকখি। মসিমক্না তাইবংদা মহাকপু পুরকখি, মঙফাওনরকখি। মচাগী লাইবক পায়দুনা য়েংই; লাইহৌ খরা হনবগুম তৌই। তারকই—“…জলিল হাজি ঙসি অহীং দুনিয়াদগী খোঙশানখ্রে…।” মতমসিদা ‘অহীং অদু লোইশিল্লক্কদৌরে। মেঙলবা মশেক মঙাল অমনা তপ্না তপ্না অমম্বগী ফিজং হাইদোক্লে।’ চুম্মী, হাইদোক্লে; সলিম লাক্লে—“নুর নঙবু তারিব্রা? ঐ লাক্লে। থোঙ হাংঙো।‍‌” মসিমক নুরেদাগী মফমদদি জন্নতনি। কনাগুম্বনা হংবা য়াই—নুরেদানা মপাগী মফমদা মহাক্কী পূক্নিংগী ৱা হায়দোক্লম্বা তারবদি মহাক্কী অৱাবা নংলম্লোই। হোয়, মসিসু পাউখুম ৱাৎতবা য়াই। মপাগী অকনবা ৱাশক লৈখি। সলিমনা জলিলগী পুন্সিদগী হেনবা মী অমা ওইবা ঙমখিদে; মহাক্তি খুলদগী তান্থোকখ্রবনি। অমরোমদা মপাগী কল্লবা ৱাশক্কী মাঙদা নুরেদাগী চীনবান মেনবা তাখি। মসিমক্তনা মখোয়নীগী পুন্সিসু অৱা লোইচেন্নখি। অদুবু অইবনা উৎনীংলিবদি জন্নত হায়বসিনি। নুংঙাই‑য়াইফবা, তৌবা ঙম্বতনা মশাগী অশোয়বা খুমজিল্লগা, অতোপ্পবু চৈরাক পীরগা নুংঙাইজবা অদুরা? হোয়, তাইবংপানসিদা শোয়দবা ঙম্ববুদি কনা লৈ। অদুমকপু থম্মোয়গী অশেংবা লীচৎ হায়বসিনা জন্নতকী অশেংবা অর্থরা? নৎত্রগা তৌবা ঙম্বশিংদুগী য়াকাদা চৎলিবশিংদুরা? নৎত্রগা তৌবা ঙম্বশিং, মীবু ওৎপশিং, মশাগী অশোয়বা খুমজিনবশিং, মীনা ৱারগা নুংঙাইবশিং অসিগুম্বা মীওইশিং লৈত্রবা সমাজ অদুবুরা জন্নতকী অর্থ? ৱারীমচাসিদা খূদিংমকসি অইবনা ঊৎথোক্নবগী তাঞ্জা লৌরি। অরোইবদা ঊৎলি—লাঞ্জদবা শেংলবা থম্মোয় অনী পূনবগী অশেংবা নুংঙাইবা, অমরোমদা সমাজবু হুম্লগা পুবা নাপলগী পুন্সি অমা লোইখিবগী ৱা। মসিসু জন্নতকী অর্থ অমনি। সলিমনা মহাক লাকখিগনি হায়বগী ৱাশক ঙাকপসু জন্নতকী অর্থ অমনি। থামচানা বাজার মচা তোকথোক্লগা বাজার অচৌবা কাবদগী শেল্লেপ পূত্থরগা শেন্দোলনা খ্বাঙ কোয়রকপা, মদু থামচা খঙহন্দনা মপুরোইবনা লৌ শঙম অমা বন্ধোপ থম্লগা শিংখিবগী ৱারীনি ‘থমচেৎমানবী’। ৱারী অসিদা নুংঙাইরিবসি থামচানা পেৎ‑পেৎ মেৎপা থায়নগী ফোন অমা পায়রম্বদগী টচ ফোন পায়রকপগী ৱারী অসিনি। ৱারীসিদা ফোনগী মফম অমা চাউনা কল্লি। ফোন পায়বা পামজবা থামচানা করিগী ফোন পায়বদা পাখৎলকপা—মসিনি ৱারীসিগী য়াঙলেন। ৱারীসিদা বাজারদা চৎনরিবা লীচৎশিংসু ময়েক শেংনা ঊৎলি; মসিগী মতাইদা, থামচানা অনৌবা ফিজোল হোংলকপদা মপুরোইবনা চিংনবগী মিহুল অমা কন্না হুনবদুসু ফজনা ঊৎলি। অদুবু অইবনা মপুরোইবগী চিংনবগী মিহুল অদু লাকশিন্না পুথরকই: শেলনা মহুৎ শিনবা য়ারোইদবা পোৎশক অমা থামচাগী মফমদগী মাঙখ্রবজাৎলা হায়না খল্লুবা অদুমক্তি ওইরমদ্রে। তুংগী পোলোই য়েংদবী, শেন্নীং য়েংদা খূৎচাউ থাবী, কারবারগী হিসাব খঙদবী ওইরবসু থামচাগী পূকচেল তোমচৌ খঙদবমক্তি নত্তে। থামচাগী ফোন ওক্লুবদগী করিগী থামচানা বাজার কাখিদবনো হায়বদু খঙলকপা, থামচাবু মনম তৎপমখৈ ফূনীংবা তোমচৌ পূক্নিং ফাথরগা, থামচা খঙহন্দনা লৌ বন্ধোপ থম্লুরগা থামচাগী অতোনবা শেলফম শিংদোক্লুই; অদুগা ফোন খীংলকপদা হায়– ‍‌“পাখৎলুরনু, হৌজিক্তি কনামত্তনা ফোন তৌরক্লরোই।” য়াম্না নুংঙাইরিবদি মিংথোলসিনি—শেল্লেপ পাবী হৈতবী থামচাদু শেলদোন্না খ্বাঙ কোয়রবা ফিভমদু মনা মখৈ থুদেকখ্রবা কোবী থমচেৎমানবীগী মপুন্সিগা চাননা পুথরকপসিনি। থমচেৎমানবীনা মপূং মরৈ ফারকপদা থামচা লমখায় কৈথেল নীংশিংলকই। মশাসু জ্ঞান তাজরকই—মাগী নুপা তোমচৌদা ৱারৌরুবগী মহুৎতা মতাং চাদনা অচাওরম খজিক কারুবী মহাক্কী ৱাখলদু নিন্দা তৌনীংলকই থামচা। থমচেৎমানবীনা মনা য়াওদবা, থমচেৎমানবীনা মপূং মরৈ ফারকপা—থামচাগী পুন্সিগী অনেম‑অৱাংগা য়াম্না মরী লৈনৈ। তোমচৌনা করিগুম্বদা তত্তনা হায়খিবা ৱাহৈ খরা নীংশিংলকপা অসিমক থামচানা মাগী নুপা তোমচৌগী পুন্সিবু ময়েক শেংনা খঙলকপগী তাঙ্কক অমনি। ‘মথৌ লৈখ্রবা শঙ্গায়না মশাগী মখোকপুদি ঈৎচবা খক ঙমদবা’দুগা তোমচৌগী পুন্সিগা অমত্তা ওইনা উরকপনি। য়ূম্বান মওং তাদবা মথোং হূক্তবা নুপা কয়াগী অশোয়বা মেনখত্তুনা য়ূম পুনবা হোৎনবদা পুম থীৎলবী নুপী কয়া লৈবগুম চাগা য়েংদনা চাদিং তৌগনবী অচাওরম কাবী নুপীশিংনা তৌরিবা অশোয়বা থবক কয়াগী তেকচাক পুনবা হোৎনবদা মশাগী খন্নবগী মতম ফংজদ্রবা নুপাসু লৈরি হায়বদু ময়েক শেংনা ঊৎলিবা ৱারীমচানি—‘থমচেৎমানবী’। ‘উশিন’ হায়বা ৱারীমচা অসিদা ঊৎলিবসি, মিংথোল অসিনা ফোঙদোক্নীংলিবদু—লাঞ্জদবা অমনা, হোৎন‑কনবা লায়রবা অমনা অরানবা তৌবশিংগী দন্দি ফংহৌবা, অরানবা তৌবশিংনা লাঞ্জদবা মী অমগুম নুংঙাই‑য়াইফনা থোক্লকপা, প্রজা মীয়ামগী সেবা তৌরকপদা, অরানবা তৌরকপা মীওইনি হায়বা খঙদনা মীওই অদুবু কন্নবা হোৎনবা—সমাজগী মশক অমা য়েক্নবা হোৎনবনি। মসিদা অৱাবা তারিবদি লাঞ্জদবা মীওই অদুখক্তনি। ‍‌‘বিন লাদেন’ (বোম পোকখায়হনবা মী) দুনা নেতাগী শক্লোন লৌরগা লাকই ভোট খোম্বা। মহাকথক শোইনাইহৌরবা, অৱাফমদা তারুবা মহাক মশামক লমন শিংবদি ঙমজদে। মসি অইবনা অসুম্না ঊৎলি: …খূৎ লোন্নরিবা শক্তম অদুদি মীৎচান্নরুবা খূদিং মোমোন তৌরকই। হেন্নদুম চীং লেম্বা হেনগৎলকই। মহাক্কী মীৎমাঙদা মতম অসিগী লুচিংবা নেতাশিংগী শক্তম হন্না হন্না উরকই। মখোয়গী ঙসিগী ৱারীনা হয়েংগী তুংগী মীরোলগী ইতিহাস ওইহৌগদবদু খল্লুবদা মহাক ইতিহাসপু থাজবা ঙম্লক্তে। ইতিহাসকী লামায় খূদিং শীংকূপ শানা শেগায়নীংলকই। শীংনবদি ঙমজদে, অদুবু পেন্দবা শাউনীংবগী মৈরীদি মশক উদবা ফুঙ্গাগী মৈগুম ওমদুনা চাক্লকই। শোইনাইরবা মপুন্সিবু করেম্নরিবা চৎনরিবা মতমগী লীচৎ অইবনা য়েক্লিবসি য়েংবিয়ু: …ফম্ফমদগী মচী লেঙবা ঙমদ্রবা মহাক্কী মনাক্তা চঙলক্তুনা মিনুংশি ঊৎপা শাদুনা খূৎ শোক্লৈ। নেতা অদুগা লোয়নরকপা মীওই খরনা তেংবাংগী পোৎলম খরা মখোয়গী ইমাদা নমদুনা পীরম্নবা হোৎনরিবদু মহাক করিসু হায়বা ঙমখিদে। মীখল নুমিৎতা মহাকপুসু গাড়ী থারক্তুনা লৌরগনি হায়রম্বদু লাক্কনু হায়বফাওবা ঙমহৌদে। তাঞ্জাসিদা মমাগী অৱাবদু য়েংবিয়ু—বিন লাদেনদু খাগী শেৎপা খরা লাক্লগা থিরম্বদুদা, মাবু ফাবা য়ারোই হায়না মৈরা পায়বীনা কৌথোরকপদা, লৈকাইগী ৱারেপ শীংনরুবগী পাম্বৈ লৈত্রবী মমানা মাবু (স্বর চনীং‑চমাঙ শম্নদ্রবা) থাদোক্নীংদা থাদোক্নীংদা মৈরা পায়বী থোকপা তাখি; থোকখি। উশিন ওইহৌরবা পুন্সি অমগী পাঙ্গল থোকপা ঙমজদবা, চৎনরিবা সমাজসিগী ঈরাংসিদা শীংনজবসু ঙমজদবা পুন্সিগী মশক অমা অইবনা ময়েক শেংনা য়েক্লি। “রোজ করিগী পূক্নিং অদু লাঙতক্নরি। সংসার অসিদা পাপ তৌদবা মীওইবা কনা লৈবগে? করিসু ৱারুগনু। হোলি ৱাটর লৈরিবসিদি।” হোলি ৱাটরগী মিংদা সিষ্টর নেন্সিগী ইজ্জৎ ফাদরনা শান্নপোৎকুম শান্নখ্রে; মথংদা রোজ ফাদরগী খূৎতা তাখ্রে। তাইবং ফাওরক্কদবা মচানা হংলক্কদবা ৱাহংগী খনবদা, রোজ আত্মাঘাত তৌদুনা শিনীংখি। শেংলবা লাইনীং লীচৎ অদুবু নৌরিবা মচানা কি‑তূক্কৎচনা খনখিগনি খনবদা রোজ ৱাজখি। অদুনা শিরগে খল্লম্বা রোজ মচাগী মপা মশক তাক্লমগে খনখি। অদুবু সিষ্টর জেন্নি ফাদরগী খূৎতা অমুক তারে। হোলি ৱাটরদা ঈরু‑ঈরুরগা কয়া য়াম্না নুপী ওইবগী পুন্সি ফাদরগী খূৎতা তাগদৌরি? মসিনা রোজদা শীংনবগী থৌনা পীখি; শীংনখি। ফাদরবু মানা পামজবা দহী অমদি শঙ্গোমদা হূ য়ানশিন্দুনা লমন খুমখি। অইবনা ‘অশেংবা ঈশিং’ অসিদা ঊৎনীংলিবদি হোলি ৱাটরসিনা হকচাংদি শেংখিবা য়াই অদুবু মথম্মোয়গী পাপতি কোকপা নাইদনা, নুপীগী ইজ্জৎপু করিসু লৈতনা লৌদুনা মশাগী খুদোংচাবা লৌনবা ঈশিং ওইনা ফাদরনা শীজিন্নবদু, লোন্না থূপ্না চৎপা লীচৎতু এক্সপোজ তৌবদুনি। চীনদদি অফবা ৱাপাউ চেল্লগা ফাদরগী মিংদা নুপীজা ওইবীশিংবু খোয়চাক ওইনা শীজিন্নরিবা হোলি ৱাটরগী আইরনি অদু চিংথোক্লকপনি। খাঙদুনা লাকখি রোজ মেরি—‘ঈশ্বর লৈরিমক্তদা করিগীদমক মীওইবনা মীওইবগী মফমদা লমন খুমগদগে মেরি…।’ মখূৎমক্না অচৌবা পাপ অমা তৌখ্রে খঙলবসু, ঈশ্বরদা চঙজখ্রবা থৱায় অদুগীদমক্তদি রোজ ঈশ্বরনা থৌজানবিসনু হায়না প্রার্থনা তৌজখি। অদুবু ওইরিবা ফিভমদি: …মালেম অসিনা কোকথক্তা নন্থরক্লবসু মাগী পূক্নিংদা ফাওরিবা নীংতম্বগী ময়াই অসিবুদি খক নমহৎপা ঙম্লরোই। চহী লিশিং কয়া ফাদোক তারবসু ৱাখলদা ফাওরিবা অফা‑অপুন্নবা লৈত্রবা পুন্সি অমগী মহাও অসিবুদি মুন্দুনা পুখিবদি খক ঙম্লরোই। অহিংসা নীতি চৎচবা গান্ধীনা হায়রম্বা অমা লৈ—‘হূইনা মী তান্ন‑তান্নদুনা চীক্লক্লবদি হূই অদু হাৎকদবনি।’ মসি রোজ মেরিগী মতাংসিদা নীংশিংলকই। থম্মোয় মশক খঙনহৌদনা অহল‑লমনগী মায় ঙাকপদা নুপী ওইবীশিংনা থেংনবা অৱাবা ঊৎপা ৱারীমচানি ‘লম্মূক্নবা’। নুপী মানবী কয়া য়ূম্বান লম্বীদা খোঙদানরি; ‍‌‘মপা’ হায়বা মিংথোল ফংনরি। অদুবু মসি চাউরৈদদি ওন্ন‑তৈনবা ওইনা থোক্লি। মহাক্তি নুপীদা নুপী ওইনীংলি: …মহাক্কী অশেংবা থৱায়দি নুপীনি হায়বসি মহাক মশানা য়াজনীংই। মীনা খঙবিদ্রবসু মহাক্কী হকচাংগী নুংদা নুপী অমা শাগোন্নদুনা লৈমিন্নরি হায়বসি মহাক্তনা খঙই। পা‑পী ওন্নীংবদা ওনবা য়ারবা মতমসিদা পামজদবা হকচাং অমবু থৱায়না করিগী খোঙবু ওইনা লৈরুদগে। … ৱাখল অসিনা ফিরেপ ওইনা চাউরৈ ‘পা’দগী ‘পী’ ওনবা চৎখ্রে। সোমদা মমা ওইবগী হক পীবিদ্রবী মালিকা ময়ূমদা লাক্লে; ময়ূম্নদি হায়রি: “ইমাগী ইবেম্মা নহাক মৌগী শীংদা চল্লবীনি, অদুগীসু মথক্তা খুন্নাইগী চৎনবী হায়বা অমসু লৈরিবনি। পূম্নমক অদো নুপী অমা ওইনা মায়োক্নবা তাবনি।” মালিকা খুন্নাইগী চৎনবী ঙাকপা ওইনা হল্লকখি পেন্দবা লিশিং থম্মোয়দা কোন্দুনা। মমীৎতদি উরকখি চাউরৈগী ওইরক্কদবা ফিভম। তাঞ্জাদুদা ফোন লাকখি—‘চাউরৈ এক্সিদেন্ট থোক্লে।’ মালিকা চাউরৈগী মনাক্তা চৎপা তাখি; মথম্মোয়দদি শীংনবগী মৈনা চাক্লি। চৎপদি তারি অদুবু লম্মুক্নরি মালিকা—মহাক্না চৎকদৌরিবসি খুন্নাইগী চৎনবী ঙাক্নবরা নৎত্রগা মপুরোইবা অমগী সেবা চৎকদৌরিব্রা? মথম্মোয়দা হংজৈ—চাউরৈগা মহাক্কা করি মরী থোক্নরিবগে? লৈমিন্নরিঙৈ অতিয়াগা মালেমগা শম্নখিদ্রবা পুন্সি হৌজিক্না করম্বা মরীদা…? তশেংনা মহাক পা‑পী ওন্নরগা লাকখ্রবরা—অপাবশিংদা ৱাহং ওইনা থনম্মী। ‘ৱাশক’ হায়রিবা ৱারীমচা অসিদনা অইবনা মীপান তাংনা হিংদবী, মীগী পূক্নিং নুংঙাইতনবা থবক তৌবা পামজদবী, মশাগী ওইজবা থাদোক্লবী, সমাজদা চৎনরিবা লীচৎ‑শাজৎপুদি শীংনবী নুপী অমগী পুন্সি য়েক্লি। মসি য়েক্লকপদা লম‑থুম্না হেন্না মরুওইবা, মীওইবগী মিনুংশিগী মফম পীদনা নুপী ওইবীগী পুন্সিবু করিসু ওইনা উদবা সমাজগী চৎনবীবু এক্সপোজ তৌরি। রাধামণি য়ূম পাল্লে; লাইবক থীবদগী মচা ফংদ্রিঙৈ, মপা অমা ওইবগী গুণ চেল্লমদ্রবা মপুরোইবা লৈখিদবদগী, মনেমবোক্নদি পোকচবী মচা নিঙোলগুম থম্নীংখি; মচানুপাগী লন‑থুম সম্পত্তি রাধামণিগী মিংদা পান্নীংখি। অদুবু লৈমিন্নরিবা মচানুপাশিং, নিঙোলশিংনা য়ানীংবা পোকখিদে—‘মচাসু য়াওদে, নহান্না হনখিবা য়ারবনি।’ মপামদনা কমদৌরি—‘হল্লক্কদবী মচে‑মচলগী লন‑থুম অমত্তা খাইনীংদে।‘ মৌপ্ব া অতোম্বা অদুতংদি মিনুংশিগী মীৎয়েং থম্বি। মচা নিঙোলগীদমক মমা ওইবীশিংনা কয়াম ৱাজৈ হায়বদু মনেম্বোক ওইরিবা নুপী অমদি পোকচবী মমা ওইরিবী নুপী অনীসিগী কেরেক্টরদা অইবনা ফজনা ঊৎনবা হোৎনৈ। নুপী ওইবীশিংগী অৱাবা নুপী ওইবীশিংতনা খঙই হায়বদুনি। ইমুং অনীগী তাইওন্নবা, নুপী ওইবীবু মী ওইনা উদবা মীৎয়েংদগী চোংথোরকই—লন‑থুমদা মীৎয়েং তাদবী, ওইজবা থাদোকপী নুপীগী কেরেক্টরদা রাধামণি! লৈবু লৈশিনগে হায়রবদি করিগী ঙম্লোইদগে? অদুবু রাধামণি মীগী পূক্নিং ওৎপা পামদে মহাক্কী পূক্নিং ৱাজরবসু। কনা লৈজদ্রবশিংগী হোমদা লাকখি। কাইনথংদা মৌপ্ব া লাকখি; য়ূমদা হন্নবা হায়জরকখি। রাধামণি মহাক্কী ফিরেপ হোংখিদে। নুপা ময়ূমগী মী লাকখি। রাধামণি মহাক্কী ৱাশক হোংখিদে। হয়েং মহাক্না অরোইবা স্বর হোনবা মতম মপুরোইবগী হকচাংনা তুমখিবা মফমদু ফাওবদং থিন্দোকপিয়ু হায়জখি। অইবনা রাধামণিবু লৌবা লাক্লিবা নুপা ময়ূমগী মীশিংবু এক্সপোজ তৌরকই—‘কনামত্তা পাউখুম পীবা ঙমখিদে। তূমিন তূমিন লৈনখি।’ হোয়‑মায় পাউখুম অমত্তা লাকখিদে; করি পূকচেলনো? খাঙবা ঙমদ্রবা মিনুংশিগী পাউখুমদি নত্তে তূমিন লৈবা! ফংদসনু পাউখুম, ‘ভক্তিগী মমাঙদা মূর্তিনা কয়াম কুইনা খাঙদুনা লৈগনি’। কত্থোকপতনা মশরুক ওইরবা ফিদম অমগা লোয়ননা লৌরিবা ফিরেপ অদুমক শীংনবনি। কল্লবা শক্তি অমত্তনা লেঙহনবা ঙম্লরোইদবা, পিরাংতনা চামথোক্লবা নুপীগী থম্মোয় লকানুংদা লেঙদনা লৈরিবা অৱাংবা থাক্কী আদর্শ অমনি। ‘থাদোকপা’ হায়বা ৱারীমচা অসিদনা হৌজিক হৌজিক মণিপুরনা থেংনরিবা সমস্যা—রিফ্যুজীশিংনা লম মপু ওইরকপা, অদুগা য়েলহৌমীনা মশাগী লমদা লৈবা ফংজদবা অদু ঊৎলি। থাংবোই মপা‑মপুনা থনম্বা উমং‑ৱামং ঙাক‑শেনবা পামজবনি; অদুবু মহাক্কী মায়োক্তা এস দি ও তাওথাং অমদি মনাওনুপা ওল্লর, অমদি কৈরোই‑লৈকাই পূম্বা থাংবোইগী মায়োক্তা লাকখি: “ফরবসু ফৎত্রবসু মখোয় ঐখোয়গী জাতিনি। লৈবাক তোঙান্না লৈরবসু, ঐখোয় লোল তিন্নরি, ধর্ম তিন্নরি। ঈ মশেল হায়বদু ওইরিবনি। মখোয়গী লৈবাক্তি ঈরাং থোক্লে। শান্তি লৈত্রে। মতৌ করম্না ঐখোয়না মখোয়বু চঙজফম পীরোইদৌরিবনো? অসুক চাউখ্রবা উমং অসি শরুক খরদং মখোয়দা পীখিবদা করিসু কায়দবনিনে।” থাংবোই নিংথৌনি; য়াদে অদুবু তাওথাং এস দি ওনি, মহাক্না য়াই। অদুদগী মথং মথং উমং কোকথোকখি; পোপি থারকখি। ওল্লর শেল‑থুম পায়বা তম্পাক্তা ফজবা য়ূম শারবা কারবার চাউনা তৌবা মী অমা ওইরে। থাংবোইদি? মপা‑মপুগী লম উমং কঞ্জবা ঙমদ্রবা মী অমা ওইরে; অদুনা হায়রকই—‘খুল থাদোক্তুনা চৎপা তারে।’ মরমদি হৌজিক্তি উমং কনবগী ৱা তোখায়না থমখ্রগা ঙমখৈ ৱাংমদগী লাকপা মী মজাতি মফূরুপ কনবগী ৱাদা লাকখ্রে। লৌ মপু য়োংনা তানবগী ফিভমদা লাকখ্রে। থাংবোই চহী কয়া মরুম থূপ্না লৈরক্লবা য়ূম থাদোক্তুনা চৎলগনি খনবদা মথম্মোয় খাঙঙমদবা মৈনা চাকখি। ৱারীমচাসিদা অইবনা ঊৎলিবসি—জাৎ তিন্নবা কাঙবুদসু মান্নদবা ৱাখল্লোন্না লাঙ্গোয় চনবদুনি। থাংবোইগী মফমদদি স্পিরিট ওফ বিলোংগিংনেসকী থাক য়াম্না ৱাংই; অদুগা তাওথাং অমদি ওল্লরগী মফমদদি Parochialism, Gombeenism, মেটরিয়েল গেনগী থাক য়াম্না ৱাংই। অদুবু লুরিবদি থাংবোই অমদি মহাক্কী নুপী, মচানুপীখক্তমক তোখায় তাহৌবসিনি। মচানুপাসু মথক্কী তাওথাং, ওল্লরগী লম্বীদা খোঙ থাংখিবসিনি। মসিনা মরম ওইদুনা থাংবোই ময়ূম থাদোকপা তাখি। য়েলহৌমী ওইনা হৌমিন‑কামিন্নরকপা চীং‑তম অনীগী তৎপা নাইদ্রবা মরীসু অইবনা ৱারীমচাসিদা ঊৎলমদনা তোক্তে; ঊৎলি: “ঐখোয়গী থুংফমগীদমক করিগী অদুক ৱারিনো? তমদা ঐগী নুংশিরবা ঙাই য়াম্না লৈবনি। মখোয়না ঐবু উরগা নুংশিনা কোনবিগনি হায়বা ঐ খঙই।” ‘লৈনা কেনবদি হৌনশানি’ হায়রিবা ৱারীমচা অসিদনা রিফ্যুজী ওইনা লাঞ্জেন্নরক্লিবী নুপীমচাশিংগী অৱাবা পুন্সিগী মশক অদু য়েক্লি। লাঞ্জেন্নরকপদা চঙজফম লৌরিবা সিফাইশিংগী খূৎতা ইহান হানবা ওইনা লৈকা হীকথবা হৌরে। মথং অমুক মখোয় পোপিগী মশাইগোন্দা চঙজফম লৌখি হিংনবগীদমক; মফমসিদনা অমুক পোপিগী মপু কারামচাউবা নুপী লৈরবা নুপা কয়াগী খূৎতা অমুক লৈকা হীকথবা তাখি। মসিদগী নান্থোক্তুনা চৎখিবদা লাইবক ফবদগী য়ূম্লেপ চারা তমখিবা য়াই চহী লেংমান্নবা লেংমান্নদবা থিদনা। মসি নৎত্রগনা ঐচ আই ভিগা কোন্ননা মশা য়োল্লগা হিংবা তাই। মসিমক থোক্লিবা ওইরিবা ৱারীনি। অসিগুম্বা পুন্সি মহীংদা হিংবা পামদবদগী হোইনুনা মহাক্কী মরুপ অনীগী পুন্সিবু কল্লম্লগা মহাক্তি পুন্সিগী অরোইবা য়াহীপ তানখি। মশামক্তি করাম চাউবগী খূৎতগী নান্থোকচনবা হোৎনবদা মায় পাকখিদে; মসিনা মরম ওইদুনা করাম চাউবশিংগী মীৎতা—নুপী হৈনি, লৈনি; অদুবু পংহেক হেক পংচিন চিনবা য়াবা হৈ‑লৈ নত্তে তাক্নবা, নোরোক্কী পুন্সিদগী লাপ্না লৈজখিনবা হোইনু উপাই লৈতবদগী মশাগী অরোইবা লম্বী য়েংজখি। ফজবগী মগুণ, নুংশিবগী মগুণ, নুপীগী পুন্সিগী মশক অমা তাক্লমখি। নুপী শান্নপোৎ নত্তে ঊৎলমখি। পৈশাগী লম্বীদা, করাম চাউবগী লম্বীদা নুপী পৎ থৎলগা চিনবা লৈগী মশক্লা? তশেংবদি নত্তে; অদুবু ওইরক্লি। অদুনা অইবনা আইরনিকেল্লি হায়রক্লি—‘লৈনা কেনবদি হৌনশানি।’ ‘কৈথেল অমসুং থৱানমিচাকশিং’ হায়বা ৱারীমচা অসিদদি ময়ামদগী পূমতোপ তোপ্পা তোঙানবা অমনি। শম্না পোইটিক নেরেটিভ অমনি হায়বদা হায়মনবা থোক্লোই। পুন্সি খোঙচৎ অসি কৈথেল কাবগুম য়েকপনি। শান্তি লৈবা হূরান‑চীন্থী লৈতবা পুন্সি খোঙচৎ অমদি ওইনীংই, অদুবু কৈথেল কাবা হায়বসিমক্তবু তম্বা ঙম্বরা? মশা‑মশাগী শেন্দোং তান্নবা হোৎনবদা মশাগী ওইজবা তান্দবা লৈতে। মীগী খল্লুবা ঙম্বা নত্তে। করিগুম্বদা চৎমিন্নরিবা পুন্সি খোঙচৎসিদা কনা কনাবুসু ঙাইরুবা তৌদনা হৌনরুদনা মশা‑মশাগী পোৎতবু য়োল্লবদি খন্না চৎনদবসু নত্তে; করিগুম্বদনা চীন থীনদবা নত্তে; মসিদি চীনফা পুরবা মন্ত্র ওইরবনি। মসিদা নৎতনা খূবাক ময়ায়দা শগুন তৌবা লৈরিবনি। কনাবু থাজবা য়াবা কনাবু য়াদবা অরেপ্পা হায়রুবা ঙম্বা নত্তে; মাগী মাগী খুদোংচাবা লৌনবা ঙাক্তনি। খূবাক্তা শুনু য়াওবা হীদাক মনা নৈরিবা মোতিয়া ফাওবা মহাক্কী মোৎতাইনবা ফিজোলগী মরুমদা মরল‑মথুম অরোনবা কারবার কয়া লোৎলিবনি। অসিগুম্বা কয়ানা কৃক‑কৃক ইন্নবা কৈথেলনি। মসিসু অমরোমদদি ফজবগী মশক অমনি; ফজদে করম্না হায়গনি; মায়থীবা মায় পাকপা হায়বদুনা তোঙানবা ৱাফম্নি। মসি অতিয়াদা থৱান্মিচাক শঙ্গু‑শঙ্গু থোকপগুম্বনি। থৱান্মিচাকশিংসি পোত্থাদে। অদুগা পুন্সি কৈথেল কারিবা পুন্সিশিং অসিসু পোত্থাবা নাইদে। পোত্থাবা নাইদবা থৱান্মিচাক্কী পুন্সিগী খোঙচৎ অসিদা ৱারী লীরিবনা মীৎকূপ অমত্তা পোত্থাখিদবা মমাবু নীংশিং নীংশিংনা করিগুম্বদা শিবা নাইবা থৱান্মিচাক্কী ৱারীদা লৈখিদ্রবা মপা‑মপু নীংশিংই। কৈথেলগী ঙম্ন‑ঙম্নবা হোৎনবা, পোত্থাদবা থৱান্মিচাক, লেপ্তবা পুন্সিগী খোঙচৎ মাগী মাগী মতম য়ৌরগা চৎনখিগনি। অদুবু লেঙদবা খোঙচৎ অমদি কৈথেলনা মীপূম খূদিংমক তরাম্না ওক্লি; অতিয়াসু থৱান্মিচাক খূদিং ওক্লি। খোঙচৎতনি লেপ্তবা; থৱান্মিচাক মম্বা য়াই, ঙানবা য়াই। কৈথেলদা পুন্সিগী শেন্দোং ফংবা য়াই, ফংদবা য়াই। মসিদা অচীকপগী অর্থসু মাঙখিবা য়াই অদুবু শান্তিদি খৌরাংলি; ফজবদি আশা তৌরি।

ৱারোইশিন ৱারীমচা অয়াম্বদা কেরেক্টরশিংগী ইন্নর ব্যুটি, ইন্নর কনফ্লিক্স, ইন্নর এগোনি অইবনা লিরি‑খোইরি ঊৎলকই; মসি ঊৎলকপদা সমাজসিগী তৌনরিবা চৎনরিবা ঈরাং লীচৎ শাজৎ এক্সপোজ তৌরকই; অনীসি থানবা য়াদনা চৎলি। মসিমক ৱারীমচাশিং অসিগী তোপ‑তোপ্পা শক্লোন অমনি। প্রোটাগোনিষ্টশিংগী ইন্নর কেরেক্টর অদুনা থেসিস ওইরগা চৎনরিবা ঈরাং লীচৎ শাজৎশিং অদুনা এন্টি থেসিস ওইরগা বিচারদু প্রোটাগোনিষ্ট মশানা ঊৎলম্বসু য়াওই; অইবনা অপাবশিংদা থনম্বসু য়াওই; মসিমক লাইরিকসিগী শক্লোন অমনি।

মতেং লৌখিবা লাইরিকশিং ক) অপীকপা নুংশাস্বর (২০০৬) খ) ঙমখৈগী ৱাংমদা (২০১৩) গ) ইরানয়াইদা (২০২৩)

ঙসিসি লাংবন থাগী পানখৎলকপা নোংমাইজিংনি। মাইচুম্বগীদি নুমিৎ অসি মথৌ খ্বাইগী চিনবা ওইরি। লোক্তাক ইনলেন্দ ৱাটর ট্রান্সপোর্ট কমপ্লেক্স, সেন্দ্রাগী চীংখোঙদা লৈরিবা হিথাংফম অসিদা মাগী লৈতেং তৌরবা মোটোরবোট অমা য়াওরি। সেন্দ্রাগী হিথাংফমদা লৈরিবা মোটোরবোটশিং অসি পঞ্জাব গোৱানচিংবদা শীংদুনা শাহনবনি। মশা মশানা লৈজবসু য়াওরি। মমলনা লুপা লাখ মঙা পীবা, লাক্ষ অনীমখায় পীবসু য়াওই। লমকোয়বা লাকপা মীশিং মহাক্কী মোটোরবোটসিদা তোংহল্লগা লোক্তাক পাৎকী ঈমায়রোমদা পুদুনা লোক্তাক্কী শক্তমবু য়েংহল্লি। মোটোরবোট তোংবগী মমলসি মখোয়গী সোসাইটিদগী টিকেট ওইনা ককপদা পূং অমদা লুপা লিশিং অনীদগীনা লিশিং অহুম ফাওবনি অদুগা করাং ফাওবা য়ৌরগনা লিশিং অহুম চামঙাদগীনা লিশিং মরি ফাওবা লৌই। মখোয়গী সোসাইটিনা মোটোরবোট তোংবগী অতোংমল চৎনবা য়ানা লেপ্পনি। হৌজিক্তি হান্নদগী হেনগৎলে। মসিনা মহাক্কী অমত্তা ঙায়রবা হিংনবগী শেন্দান লম্বীনি। মহাক্না হিথাংফমদা লৈরিঙৈদা ময়োল লমগী ঈশিং‑নুংশিৎ অকোয়বগী ফিভমদা নুংঙাই‑য়াইফনা লৈজবা ইমুং অমগী মীওইশিং সেন্দ্রাগী লম্বীরোমদা লাকপা উই। মাইচুম্বনা মখোয়বু লাকপা ঙাইরি।

লাক্লিবসি ইবোতোনগী ইমুংগী মীশিংনি।

নোংমফাদোক মরক‑মরক্তা ওইরবসু ইমুং‑মনুং পূন্না লম থোক্তুনা কোয়বা চৎপসি মী খ্বাইনা তৌনদবা নত্তে। মসিনা ইমুংদুগী লৈমিন্নরিবা মীওইশিং অমগা অমগা নুংশি‑চান্নবা হেনগৎলি অমসুং ইমুং‑মনুং ওইবগী মরী ফগৎহন্নবগী মরম্নি।

ইবোতোননা মোইরাং লাই হরাওবা য়েংবা লাকপদা খঙনরকপদগী পুন্সি খোঙলোয় ওইমিন্নরকখিবী মেমথোই ঙসিনা মচানুপী মেমিগী মমা ওইরে। নুপীমচা অমগা মখোয় পূন্না সেন্দ্রাদা কোয়রুসি হায়না লাকপনি। ইবোতোনগী মচানুপী মেমিনা সনগ্লাস আনোক অমা ঊপশিল্লগা সেন্দ্রাগী ৱান ৱে রোদতা সেন্দ্রা তম্না মখোয়না তোংলিবা কারদু ফনা য়াঙনা থৌজিল্লকখি। মখোয়গী গাড়িদু হন্দক্তা লৈবা কুইদ্রিবনি। গাড়িসিদগী অমুক হেন্না চঙখোন্না ফজবদি মেমিনি। মশক ফজবতা নত্তনা মোইরাং থোইবীগুম মতিক মথৌনা লৈবীনি। মহাক্না সেন্দ্রা লম্বীসিদা ফনা য়াঙনা থৌজিল্লকখিবা গাড়িদু কনানসু থৎতে। থিংদে। মনীং তম্না থৌজিল্লকখি। তশেংনা মেমিসি অকি‑অখং লৈতবীনি, য়াম্না থৌনা ফবীনি। অঙাং ওইরিঙৈদসু নুপামচাশিংগা খৎন‑চৈনবদা মানা হেক্তা ঙম্লকপনি। মখোয়না সেন্দ্রা রোদতা লাকপদা ফূট তরারোম পাকপা মেদিয়ানসিদা উ পাম্বী মচা মচাশিং হৌবা উরি। মেদিয়ান অসি হৈপাল‑লৈপাল থাদুনা শেমগৎপসু উরি। কেগে মোইরাং লমদম, ইবুধৌ চীংঙু থাংজিং মশাইকোন লাইনা শেম্বা লৈবাক্নি। লাইয়াম খুন্দিনফম্নি, শাইওন লীলা হৌফম্নি হায়না অশৈবশিংনা, অহল‑লমনশিংনা হায়নৈ, থাজনৈ। তশেংনা মোইরাং লৈবাক্তা চৎপদি অঙাং ওইরিঙৈদা নুপীশিংনা মপামদা চৎপগুম্না নুংঙাইবা ফাওই।

ইবোতোননা লুচিংদুনা লাকখিবা খোঙচত্তু সেন্দ্রাগী চীংথক্তা হান্না থুংলুরে। য়েংলুরে। মখোয়গী মফমদা ফজবনা নুংঙাইবনা হায়ফম খঙখিদে। ঙসি নোংফাদোক লাকপসিদা মখোয়গী পূক্নিং শুহ্মৎখ্রে। চীংথক অসিদগী য়েংবদা ফজরবা লোক্তাক্কী ঈমায়, ঈমায়থক্তা ফূম মচা‑মচা লৈরিবশিং অমসুং পাৎপানগী খুঙ্গংশিং তাম্না উরি। সেন্দ্রাগী চীংথক্তা হৌরিবা হৈনৌ, খোংনাংনচিংবা উপালশিংদা মহুম শাদুনা লৈরিবা উচেক ৱায়াশিংগী খোঞ্জেলশিংনা অমুক্কা হেন্না পূক্নিং‑ৱাখল নুংঙাইহল্লি। অসিগুম্লবা মহৌশাগী ফজবশিং অসিদনি ইবোতোনগী মচানুপী মেমিনা মথূম‑মরাং হৌদুনা ফোটোবু নম্ব‑ও লোইরে! মেমিগী মতৌসে।

মখোয় লোক্তাক লেক টুরিজম দিভেলপমেন্ট কোওপরেটিভ সোসাইটি লিমিটেদকী কাওন্টরদগী টিকেট কক্তুনা হিথাংফমদা অমুক লাক্লে।

মাইচুম্বনদি মখোয়না লাকপদু ঙসাইদগী ঙাইরিবনি।

শকখঙদবা নুপাসিনা মখোয়বু ঙাইদুনা লৈরম্বসিদা মপা ইবোতোন্না হংলকই, “ইবুংঙোগীরা মোটোরবোট নম্বর ফাইভ হায়রিসি?”

“ওজা ঐগীনি বোট অসি। ময়াম্না তোংবিবা য়ারে।” মাইচুম্বনা মখোয়বু তরাম্না ওক্লি। লৈরিবা অতৈ মোটোরবোটশিংসিদা তোংদদুনা মহাক্কীদা ওইনা লাকপসিদা শীৎপা শেংবা, উফুল‑ৱাইফুলশিং কন্থোক‑নান্থোক্তুনা হোৎনজরি।

“ফরে ইবুংঙো। ঐখোয় নঙগীসিদা তোংবা তারে। লাক্লিবসে অতোপ্পা অমতা নত্তে। ইমুং অমগী মী ঙাক্তনি।”

“পাবুং, ঐখোয় মহাক্কীসিদা ওইনা তোংলসি হায়রা। ঐদি অসোমগীসিদা ওইনা তোংলুসি হায়রগা।”

“লৈশাবীসে মমীৎ য়ামখ্রেদা। মশকপুদি ফজৈ,” মাইচুম্বা মচীন্দা মুরুম‑মুরুম শোল্লি অদুগা অমুক হায়রকই, “ঐখোয়গী লৈরিবা বোটশিংসে অমনা অমদগী য়াঙবা হেনবা নত্তে। পাল্লিবা এঞ্জিনশিংসিগী হোর্স পৱার লোইনা চপ মান্নৈ।”

য়েংবদদি মাইচুম্বগীসি খরা মন্না উরে। অদুবু ইবোতোননা থোইদোক্না অমন‑অকায়গী ৱাখল খল্লুদনা হায়রকই, “ইবুংঙো, নচলসিনা খঙদদনা তৌরিনি, ঐখোয় ইবংঙোগীসিদা ওইনা তোংনিদা।”

মখোয় তোংমিন্নখ্রে। মাইচুম্বহোয়গী কো‑ওপরেটিভ সোসাইটিনা থৌরাং তৌদুনা থম্বা লাইফ সেভিং জেকেটসু মখোয় লীৎশিনখ্রে।

এঞ্জিন ঙংখৎতুনা মোটোরবোটতু লোক্তাক ঈয়ায়রোমদা থৌরক্লে। হিথাংফমদগী খরা থোরকপদা উরক্লে লোক্তাক পাৎকী অশেংবা মশক। ঈমায়থক্তা উচেক শঙ্গু‑শঙ্গু পাইরি। মখোয় মশেন চীক্ন‑চায়নদুনা, মশানা ফূজিন্ননদুনা কাওনবগুম তৌই। নাপী শীংনাং হৌবা ফূমদি মরক্তা চাক্তারম্বা উচেক শঙ্গু অমসু খঙহৌদনা পাইখৎলকই। মতৌশিংসিনা মেমিগী পূক্নিং হূহল্লে। কেমেরা পুথোরক্তুনা ফোটো কাপ্পসু লেপ্তে। পংকাপ্তা কাপ্পি।

মেমিগী পামজবসি খঙলদুনা থম্বাল হৌবরোমদা মাইচুম্বনা থৌজিল্লকই। মতম মতমগী ওইনা তোঙান‑তোঙানবা মফমশিংদগী লাকপা মীশিং মাগী মোটোরবোটসিদা তোংখ্রে। শক‑চু খেন্নরবসু লমকোয়ববু লাক্লবদি বোট তোংদুনা লোক্তাক পাৎপু য়েংজবসি লমকোয়বশিংগী পামজবনি। চৎনীং‑চৎনীংবা মফমদা চৎলবদি মাইচুম্বগী অতোংমলসু খরা হেন্না লৌই। মখোয়না তোংলিবা মোটোরবোটতু পাৎকী ঈমায়দা ফূগায়না শাৎলিবা থম্বালশিংদুগী মনাক্তা থৌজিল্লক্তুনা খূৎনা লাম্বা ফংবগুম তৌরক্লে।

“মমা, থম্বালসে ওন্থোক ফজনা শাৎলিহৈ।”

“হোয়! খরা হেকখিসিবা।”

“ইবুংঙোসিদা ওইনা হেকহল্লসি।”

মচানুপী মেমিনা অমুক হায়রকই, “পাবুং, সোমদা অমুক্তা য়েংলকউ। ফোটো নম্লক্কেবা।”

“মসিদি ফোটোদা হেক ঙাওরদনা!” মপা ইবোতোন ফিভম শেমদুনা লেপ্পি।

“ইমা, ইমাসু চঙশিল্লো পাবুং মনাক্তা।”

“মমা, নঙসু লাউদনা নচানুপীনা ফোটো নমগে হায়রিসে নমহৌসিনে।”

“অহল নত্তদৌনা হেক তৌই। নচানুপীগা চপ হেক মান্নৈ।”

পূন্না লেপ্লিঙৈদা মেমিনা ফোটো নমখ্রে। ফোটোগী মমি মনুংদা কোয়রাওনরবা থম্বালগী থম্নাশিং, অশাৎপা, অপোম্বা থম্বালশিংসু মেমিনা হৈ‑শিংনা য়াওহল্লে।

মাইচুম্বদা য়েংলগা ইবোতোন্না হায়রকই, “ননাক্তা লৈরিবা ইবুংঙোদুসু ফোটো নম্বিয়ুনে। হয়েংৱাই নীংশিং খূদম ওইহৌনবা। মহাক্না ঐখোয়গী থম্বালসু হেকপিদোইনে।”

“পাবুং, মাদি ৱাসু অমতা ঙাঙদে। ঐখোয়বু পাৎতা পুবিরক্লগা।”

“ঐদি দ্রাইভরনি। মায়ওন চুম্বনি। পীক্লিঙৈদগী শিনফম অসি হোৎনরকপনা বোট থৌবদা মমায় চুম্বা হৈ হায়দুনা মীয়াম্না ঐগী মিংসু মাইচুম্বা কৌই।”

ইচম‑চম্না হায়রকপসিদা ময়ামদু ৱা‑ৱা নোকই।

“ইবুংঙো মাইচুম্বা, নঙগী মোটোরবোটসে তোংবা নুংঙাইনে।”

“পাবুং, ময়াম্নবদুদি নুংঙাই হায়না পংহায় হায়বি। ঐসু ময়ামগী নুংঙাইনবা তৌবসি ইথৌদাং ওইরে।”

মীয়ামগী নুংঙাই‑য়াইফনবা খঞ্জবা মাইচুম্বগী ৱাখল্লোনসিদা মেমিগী পূক্নিং চিংশিনখ্রে।

“মশাগী মথৌদা পূক্নিং চঙবা মীশিংবু য়াম্না থাগৎলি। মীয়াম্বু নুংঙাই য়াইফনবা হোৎনবসি য়াম ফৈ। ঐদি অসিগুম্বা মীশিংবু কল্লকই। পাম্মি। তমজনীংঙাইনি।”

ঙসি মখোয়না লম কোয়বা লাকপা নুমিৎসি মেমিগী মফমদদি মাইচুম্বগী চম্লবা মতৌ অমসুং মহৌশাগী ফজবশিংনা পূমশুম শুমখ্রে। মখোয়গী মরক্তা নুপীমচা অমা য়াওরক্লিবসিনা মেমিগী মবুংগী মচানি। মেমিনা মাইচুম্বগী মনাক্তা ফমহন্দুনা ফোটো কাপ্পি। তাল্লকসিদা মপানা অমুক মচানুপী মেমিদগী কেমেরাদু লৌদুনা মমা মেমথোইনে, মচানুপী মেমিনে, মশুনুপী অদুনে মাইচুম্বগা মখোয় পূল্লপা ফোটো কাপ্পিখি।

“নখোয়গী ফোটো কাপ্পসি লোইরবনিনা, মাইচুম্বগা ঐগসু অমুক ফোটো কাপমিন্নগে,” হায়দুন মচানুপীদা কেমেরাদু পীরগা ইবোতোননা মাইচুম্বগা লেপমিন্নৈ। হন্দক্কী মীৎকূপসিমদি মখোয়গী মরক্তা মাইচুম্বসু য়াওশিন্দুনা শরুক য়ামিন্নরি।

মাইচুম্বনা থম্বাল অশাৎপা, পোমশাৎনবা মঙা‑তরুক মেমিহোয়গীদমক হেকপিরে। মখোয় অমুক হিথাংফম্লোমদা হল্লক্লে।

ইবোতোননা মাইচুম্বগী মনাক্তা চঙশিন্দুনা ৱারী শারকখি।

“ইবুংঙো মাইচুম্বা, নঙগী মোটোরবোট থৌবগী শিনফমসে অঙাং ওইরিঙৈদগীনি হায়বা।”

“উম য়াম কুইরে। ঐখোয় পাবনা তম্বিরম্বনি।”

“ওহ! নখোয় পাবা লৈত্রবা ওইরেকো।”

ইবোতোনদু মথৱায় খরদি নুংঙাইখিদে।

“উম, ঐখোয় পাবা লৈখিদ্রে, কুইদ্রি লাইওইখিবা। হন্দক্কী লাংবন তর্পনসিদদি লাইদা চাক্লূক খরা কৎচগদৌরি।”

“ইবুংঙো মাইচুম্বা, ফৈ‑ফৈ। ইপা‑ইপু নীংবা হায়বসি মহৈ চায়। নীংবা থুংই হায়রিবনি।”

মেমথোইনা মরক থৎচিল্লকই, “মখোয় বাবা, মাইচুম্বগীদি হি হোনবদা নীংবা থুংজরনি। ফজনা মহৈ চারনি। মাইচুম্বা নৎত্রনে?”

ৱাফম অসিদা মাইচুম্বদু ৱাখল ঙাইহাক তৌদুনা লৈ।

“ইমা ইবেম্মা, ঐখোয় পাবদো মন্ত্রী ওইরমদ্রে। মচা ঐঙোন্দা রাজনীতি তাকপি‑তম্বিরম্লবদি ঐসে হৌজিক মন্ত্রী ওইরমগনি।”

মহাক্কী ৱাফমসিদা ইবোতোন নোকথোরকই। মাইচুম্বসি মীনগা উশিৎ‑থৌওইদবা, থাক হন্থনা খনবা য়াদে হায়বসি ইবোতোননা খঙই।

“ফরে‑ফরে মাইচুম্বা, হিথাংফমসু য়ৌদৌরে। নঙগা ৱারী শাবসিসু নুংঙাই। ঙসি ঐখোয়না সেন্দ্রা টুরিষ্টতা লমকোয়বা লাকপসি নঙনা মথেল অমসু হাপ্পিরে। অদো নঙগী মোটোরবোট থৌবগী শিনফমসিবু কয়ামদি কান্নগে?”

“য়াম হেন্না কান্নবা নত্তে। মসিনদি নুপী থিবা ফংনি থাজদে। পুন্সিসে মরেক‑মহাও থোক্না হিংবা ঙম্লোই।”

অপনবা লৈতনা ঙাঙথোরকপা মাইচুম্বগী ৱাসিদা মেমিগী মমা মেমথোইনা মুরুম মুরুম শোল্লি—’সিবু ৱানিনা ঙাঙলিসিবু ইকায়বগা খঙদ্রজাৎলা? মকোক চাকপসিগা ৱারী শারিসে তনখিদ্রে মখোয় বাবাসে।

মাইচুম্বনা ঙাঙথোরকপশিংদা মপা ইবোতোনদি নোকপদা পূক্লি পায়দেদা খাকপনি।

মখোয় হিথাংফম য়ৌখ্রে। বোটতগী কূমথনরে। ইবোতোননা হায়রকই, “মাইচুম্বা, নঙনা ঐখোয়গী থম্বাল হেকপিবগী অৱামল পীরগে।”

“ঐগীদি পীদ্রসু য়ারেদা। ঐদি মতেং পাংজবনি।”

মাইচুম্বা মাগী মোটোরবোট মনুংদু তকথোক‑খোৎতোক তৌদুনা শীৎ‑শেংলি।

ইবোতোননা মণিপুর পব্লিক ৱার্ক্স দিপার্টমেন্টতা এঞ্জিন্নিয়ার ওইনা থবক হেক চঙবগা মশাগী চহী কুন্থ্রামঙা শুবদা য়ূম পান্দুনা মচানুপা অমগা মচানুপী অমগগী মপা ওইখি। অদুবু মচানুপাদু জাপানদা, জাপান এরোস্পেস এক্সপ্লোরেসন এজেন্সিদা মেটরিএল এঞ্জিন্নিয়ার ওইনা থবক তৌদুনা লৈখিবদগী জাপান নুপী অমা লৌদুনা জাপানদা লৈখ্রবনি। অদুবু মচানুপী অসিমদি লাইরিক‑লাইশু ফজনা হৈরবা মবূকচেল শেংবা অফবা মতিক চাবা নুপা অমদা থাজদুনা মণিপুরদা লৈমিন্নবা পামখি। তশেংনা মপা ইবোতোনদি মচা‑মশুশিংগা নুংঙাইনা হিংমিন্নবা পাম্লি। মাইচুম্বনা থম্বাল হেকপগী অৱামলদি ইবোতোননা মচানুপী মেমিবু তৌদুনা পীহল্লি। ইবোতোননা মাইচুম্বসি ইমুং‑মনুংগী মী ওইনীংলব্রা খঙদে। মতিক চাবা মী হায়বদুদি মাইচুম্বা ওইরমদে।

মেমিদু হিথাংফমদা লাক্তুনা মাইচুম্বগী মোটোরবোট মনাক য়ৌরকপদগী লৈরায় মপান্দা লেপ্পি। মহাক্কী খাউদগী লুপা চনী লৌথোক্তুনা পী।

“অদোমগী শেল সোমদা লৈরে লৌশিনবিরো,” মাইচুম্বগী মতৌ য়েংদুনা অমুক মেমিনা হায়রকই, “মথংগী নোংমাইজিং নুমিত্তসু লাকপা য়াই ঐখোয়।” অসুম্না হায়রকপসিদদি মাইচুম্বসু মায়থোঙদু মোমোন নোকচখি।

মেমিগী খোঞ্জেল অসিদা ঙাঙথোরকপদা তেনৱাগুম শেং‑শেং লাউবনি। অদুবু মাগী মায়থোঙদা উপ্লিবা সন গ্লাস আনোকতু লৌথোরক্তুনা শজি মীৎতাগুম ফজবী মমীৎ অনীদুনা তরু‑তরুনা, ঈং‑তপ্না, মোং‑হাদনা য়েংলকপা মীৎয়েং, নোক্লকপা মীনোক অমসুং মীবু চানবিবা, থৌগৎপিবা মতৌশিংদুনা মাইচুম্বসু ঙসিদি পূক্নিং মকা লাম্বা ফংজরি। থম্মোয়দা খঙহৌদনা নুংশি‑শৈহৌগী মিহুল চোংলক্লি। মেমিগী মপা ইবোতোননদি মখোয়নীগী মতৌদু লোন্না উহৌই।

মেমিদু মপাবুংগী মনাক্তা প্রপ‑প্রপ লাকই।

“পাবুং, মফমসি খূৎশেমগী ফজবদি কয়া উদে।”

“ইবেম্মা, মহৌশাগী ফজবসিদনি ঙসিদি ইপা‑ইচা পূমঙাও‑ঙাওরেদনা। খূৎশেমগী ফজববুদি মহৌশাগী ফজবনা হেল্লি।”

“মহৌশাগী ফজবসু নোংম‑নোংমগী অসুম ময়েং তারক্লি। মসিদনি নচানা থৱায় ৱারিবসে।”

“ঐখোয়না নেচরেল রিসোর্সশিংবু শীজিন্নথোকপদগী লোইরক্কদবা মতম হয়েংদা ঙায়রে। অদুনা ঐখোয়না হিংবদা চূশিন্নগদবা এনভাইরনমেন্ট অমা ঐখোয়গী ৱাখল‑লৌশিংনা পাঙ্গল শক্তি পুথোক্তুনা শেমগৎলগদবনি।”

“অখঙ‑অহৈশিংনা খূৎশেমগী মহৌশা অমা শেম্বিরক্লবদি ঐখোয় হেন্না নুংঙাইনা হিংবা ঙমগনি পাবুং।”

“ইবেম্মা, ঐখোয় মীওইবা খুন্নাইগী চাওখৎ‑খোঙথাং অসি লোইবা নাইদে। ঐখোয়না চাওখৎলক্লিমখৈ ঐখোয়গী লোইনাইদবা তাইবংপান ফংগনি হায়না থাজৈ। ঐখোয়নসু মহৌশাগী ফিভমবু শেমগৎপদি লেপ্লোইদবনি।”

“চুম্মী পাবুং, অদুবু মহৌশাগী খলবু ঙাক্কদবনি কনগদবনি হায়রবসু মোইরাং তুরেলসি য়াম্না মোৎলি। মসিনা টুরিষ্টশিংবু পূক্নিং চিংশিন্দে। অমোৎ‑অকায় ময়ামসিনা হঙ্গোইরমগনি।”

ইবোতোনদু হন্দক্তি খরা তপথনা হায়রকই, “ইবেম্মা, ইম্ফাল তুরেল, নম্বুল তুরেলসু চপ মান্নৈ। মোইরাং তুরেলদা নত্তে মোৎলিবসে। মণিপুরগী তুরেলশিং অয়াম্বনা মোৎলি। লূ‑নান্নবা শেংবগী থৌরাং পায়খৎপসু হৌরে। উম! ৱাফমসি ইপা‑ইচা খন্নরগুমসিদা। টুরিষ্ট সেন্টর অমবু অমুক হেন্না ফজহনবা হায়বসি লৈঙাক্না তৌগদবনি। ফরে ঐখোয় চৎলসি গাড়িদা কাখৎলো।”

মোইরাংগী মশা নানবা অহল‑লমনশিং সেন্দ্রাগী লম্বীদা নুমিদাংৱাইরমগী খোঙনা শাজেল ওইনা চৎনবা হৌরে। মোইরাং কৈথেলদগী খরা চঙশিল্লগা লৈবা নেতাজি সুভাশচন্দ্র বোসনা লুচিংবা ইন্দিয়ান নেসনেল আর্মি (আই এন এ) না মালেমগী অনীশুবা লাঞ্জাওদা মণিপুরদা ইহান‑হানবা ওইনা ইন্দিয়াগী মচু অহুমগী নীংতম ফিরাল চিংখৎতুনা পাইহল্লম্বা মফম আই এন এ ম্যুজিয়মদসু চঙদুনা য়েংলুরে। মশেক‑মঙাল য়েল্লম্বা কোরৌহনবনা নোংচুপ চীংশাংগী নাপোমদা তপ্ন‑তপ্না হাইথখিবদগী নুমিৎ তারক্লি। এঞ্জিন্নিয়ার ইবোতোনগা থেংনদুনা ময়োল লমদা ওঙখিবী মেমিগী মমা মেমথোইসি মোইরাং নিঙোলনি হায়দুনসু মতম্না য়ারক্তবনা মপাম য়ূমদদি কুইনা পন্থরমদ্রে। মখোয়না মোইরাংদগী হল্লকপদা খুঙ্গং অমগা খুঙ্গং অমগগী মরক্তা লৌবূক‑লহ্মাং ঙাক্তা ওইবা মফমশিং য়েংবদা উরি। নুংশিৎনা লিরি‑লিরি হুম্লকপদা নোম‑নোম লেঙ‑লেঙ চৎলিবা ফৌনাগী ফজবশিং, অথাপ্পদা উরিবা চীংশাং নাপোমদগী উচেক শঙ্গু‑শঙ্গুনা পাইরকপশিংদু মেমিনা গাড়ি মনুংদগী থোঙনাওরোমদা য়েংথোকপদা উই। লম্বী মপা লান্না পাইখিবা উরোক শঙ্গুশিংদুসু মমীৎ কূপ্তনা য়েংজৈ।

মেমিসি মরায়বক চুম্বী মৈতৈ নুপীনি। জাপানগী মিস মটশুসিমানা জাপানগী অহানবা নুপী ফাইটর পাইলোট ওইখ্রবা মতুংদা মণিপুরগী মীতৈ নুপী অহানবা, মতিক মথৌনা লৈবী ইন্দিয়ান এয়ার ফোর্সকী নুপী ফাইটর পাইলোট ওফিসার ওইনবা পরীক্ষা থাখ্রবনি। মহাক্কী য়াম্না লাইবক ফবা অমনা মীওইবনা পাক হেক চৎপা ঙমদবা সুন্দ্রংগী লমদম থিজিন‑হুমজিনবগী খোঙচৎতা মহাকসু য়াওরবা য়ানা লৈরে। মহাক্না মৈতৈ নুপীগী থৌনা লিংজেল মালেমদা উত্তুনা কংলৈপাক্কীদমক য়াম্না চাউথোকচনীংঙাই ওইবা অমদি লেমজনীংঙাই ওইবা মিংচৎ শোয়দনা পুরক্লগনি। হিথাংফমদা মহাক্কী অহানবা ওইনা খঙনখিবা মাইচুম্বদা শজি মীৎতাগুম য়েংলম্বা মীৎয়েং, নোক্লম্বা মোমোন মীনোক অদুনা থম্মোয়দা মিহুল চোংহল্লম্বা মাইচুম্বদি মহাক্না চৎখিবা মায়কৈ অদুবু য়েংদুনা লৈহৌরি।

হায়না হায়না মখোয়গী গাড়িদু ঙসি নোংমগী লমকোয় খোঙচৎ অসি লোইশিল্লবগুম খোঙজেল য়াঙনা থৌখি। অদুবু মেমিগী থম্মোয় খোঙচৎতি হৌবদা ঙায়রিবগুম তৌরি।

ইম্ফালদগী উরিপোক কাংচুপ লম্বীদা নোংচুপ পাংনা চৎখিবদা অহানবা থেংনরিবা চীংশাং পরেংসি লাঙ্গোল চীং কৌই। মফম অসিবু মায়কৈ অসোমগী মীয়ামনা ‘ইরোইশেম্বা চীংজিন’ হায়নসু খঙনৈ। লাম্লোং মরি ফাংবা মফম অমনি। খা মায়কৈদা নম্বুল তুরেল লান্থোক্তুনা চৎলবদি মকুই চীং, লাংজিং অচৌবা পাৎশোইনচিংবা মফমশিং য়ৌবা য়াগনি। অৱাং মায়কৈদা চীংয়াগী লম্বীদা অসুম চঙশিনখ্রবদি গেম ভিল্লেজ, লাঙ্গোল লাইরেম্বীগী মশাইকোল, লাঙ্গোল নিংথৌগী খুভম অমদি লাঙ্গোল হাওসিং কমপ্লেক্স অসিনচিংবা মফমশিং থেংনগনি। চীংজিনদগী অৱাং পাংনা চঙশিনখিবা ইরোইশেম্বা জূলোজিকেল গার্দেন তাবা লম্বীসিদা জূদগী খরা খজিক অসুম চঙশিল্লকপা গেম ভিল্লেজদি য়ৌদ্রিঙৈ মরকসিদা ওয়রোমদা অৱাং নোংচুপ ওইরপ্না চঙশিনখিবা লম্বী অমা লৈ। লাঙ্গোল চীংশাং পরেংসি ফাওদুনা চঙখিগনি। চীং কারক্তা লৈরিবা লম্বীসিনা অসুম শাংদোরকপদা লমদেং খুঙ্গং ফংগনি।

মী কূংনা চৎনবা লম্বী ওইদে। ইতাম তাম্মী, লম্বীসিগী য়েৎ‑ওয়দা চহী য়াম্লবা উচান পাম্বীশিংনা মনীং তম্না হৌরি। চীংগী উচান পাম্বী মরক্তা উচেক শঙ্গুশিং লাক্লগা শান্নরদে। ইচীক চীকই। নুংশিৎ ফাওবা খোঞ্জেল থোক্না শীৎপা মফম ওইদে। মীনা হঙ্গোইনবা লম্বী ওইবগা নুংথিলদা ফাওবা মী অনী সুনা চৎমিন্নদ্রবদি তনবা ফাওনৈ। মসিগীসু মথক্তা মণিপুরগী তংদু‑লৈতাদবা ঈরাং মরক্তা মমীৎ‑মমায় পুনশিন্দুনা পুরকপা মী কয়া মফমসিদা কাপতুনা হাৎখিবগী ৱারীশিংসু লৈ। নুপী অঙাংশিংনা লম্বীসি ফাওনা চৎপদা তশেংনা অকিবা ফাওনৈ। লম্বীসিগী অকি‑তুজুংবনা পীক থল্লবা ৱারী কয়া মনাক নকপদা লৈবা খুঞ্জা অয়াম্বনা খঙই।

ইং কুমজা ১৯৯৯ গী ন্যু ইয়ারগী নুংথিলনি। রঘু অমদি মহাক্কী মরুপশিং চীংয়াদা পিক্নিক তৌবা চৎলি। মমান্নবশিংগা চাবা, থকপা পূম্লোই লোইরদুনা মনাক নকপা চীংয়াগী লম্বীদুদা কোয়ঙাও ঙাওদুনা লৈ। খরনা জগোই শাই। খরনা ঈশৈ শকই, খরনা কোম্পাক্তা কোর্ফুদা তবলাগুম্না থীল্লি। মখোয় ময়ামদু মনীংতম্না নুংঙাইরে। লাঙলিঙৈ ঙাওরিঙৈদা নুমিত্তি থেঙজিল্লম্লে। নুংথিলগী পূং মরিমখায়মুক তারম্লনি। নিংথমথাগী মতম ওইবনা নুমিৎ তাগদৌরে। অনকপদুদা চীং লৈবাক কোত্থোকখিবগী চীংমায়দা খরা হঞ্জিনবা মফম অমদা লেঙঙম‑শাঙমদ্রবা মীয়ায় চল্লবা, চহী য়াংখৈমুক্কী লেং ওইগদবা নুপা অমা য়াম্না চোকথনা চীংদা ঙাথদুনা ফমদুনা লৈ।

রঘু অমদি মহাক্কী খোঙলোয়শিংনা নুপাদু উই। ময়ামদু ঙাওরবা কৌবনিনা কনানসু থৌওই‑ৱাওইরুদে। ঙাইহাক‑ঙাইহাক কান্ন‑কান্ননা নুপা অদুনা হেক‑হেক কৌরকই। শোন্থাংনরবা, পাঙ্গল ইথোক থোকচদ্রবা খোঞ্জেলদু কাইনথংদদি অরাংবা মরক্তুদা রঘুনা তারে।

মখোঙদু খজিক হাইরংননা চঙশিন্দুনা হংলুবদা মীয়ায় চল্লবা নুপাদুনা খুম্লকই, “ইবুঙো লোইতাংখুনৌ ফাওবদা থিনবিগেরা?”

অদুবু মখোয়দি গাড়ি পুদুনা পিক্নিক লাকপসু নত্তে। নম্বো‑থাবো পোশিন্দুনা, কোল‑লীক খরদুগা পায়বোই‑চিংবোই, থোং‑থাকপদা চঙগদৌবা পোৎলম খরদুগা খোঙনা য়া‑য়া লাঙমিন্নদুনা লাকখিবনি।

রঘুনা খুম্মী, “তাদা য়াম্না ঙমদনা উরে। কৈদৌরে? মফমসিদা কমদৌনা লৈরম্বনো নথন্তা, করি তৌরম্বনো?”

নুপাদুনা অসিতমক পাউখুম ওইনা হায়রকই, “ঐ লোইতাংখুনৌদগীনি ইবুংঙো। থিংবাইজম তোলেন কৌই। লম্বী লম্মাংনরে। কোকসু য়াম্না ঙাওই। মফমসিসু করি লমনো খঙদ্রে। অমুক্তি মমাঙ চহী খরগী চহী হৌবা নুমিৎ অমদা মফম স্বায়সিদা সিফাইসু মানবা অমুকসু মান্দবা খরনা ঐবু পুরকখ্রে। ঙসিদি ঐ কমদৌনা মফমসিদা য়ৌরখিবনো জ্ঞান তাদ্রে। অমুক্তা থিনবিয়ু ইবুংঙো।”

রঘু কমদৌসিগে থোইনা খন্দনা অদুম খুমদোক্লে, “তাদা ঐ য়ূম নকই ঙৈহাক্তং ঙাইবিরম্মু। গাড়ি পুরগা লাক্কে। শোয়দনা ঐ থিনজগে।”

অসুম্না হায়রম্লগা খোঙ হেক থাংদোরকপদা খংখাম খাম্লকই। নুপাদুনা হায়রকই, “ইবুংঙো নঙনা ঐবু থাজররোই। ঐগী ইচানুপীগী সনা শারুবা অমা লৌবা চৎলুবনি হায়বা হৌজিক্তদা নীংশিংলক্লে। সে নঙ পায়শিনবিয়ু। ঐগী ইতৌসিদা করি করিনো শোয়দনা খল্লমগনি নহাক্না।”

“নত্তে নত্তে, করিগী সনাদুবু ঐনা পায়গদগে। তাদা অদুম পায়বিরম্মু।”

নুপাদুনা য়াবা কৌবতা মরৈত্রে।

শিতৎ তৎপমখৈ য়াদ্রবদুদা সনাদু রঘুনা পায়শিনবিরে। মমায় লৈথোক্তুনা য়ূমদা গাড়ি লৌরুনবা লাকপা হৌরকপদদি মমান্নবশিংদি মাঙ থানা ফনা লাপ্না চৎনরম্লে।

য়াচঙলকপা ওইরে য়ূম য়ৌবদা মম্লে। রঘু থীন্থবা তৌদনা মহাক্কী বাজাজ সুপর অমনবদু থৌদোরক্লে। গাড়িগী মঙালদুসু তন্দনগী মঙালনবু হেন্না ঙাল্লমগনি। মহাক্না খঙজবা লম্বীনিনা পংথৌদা থৌরে। ঙসাইগী মফমদু য়ৌরকপদদি মীয়ায় চল্লবা নুপাদু চীংখোঙদুদা লৈরমদ্রে। রঘু তৌফম খঙদে। অমম্বা মরক্তুদা থিফম খঙদে। কোয়কৌ কৌদুনা য়েংই। খুম্লক্তে। নুংশিৎ শীৎলকপদা কৌরিবা খোঞ্জেলদুনা খোন্থাং ওইনা থোক্লকই। কৈদৌদৌরিবা! রঘু ৱাখল থোক্তে। মথন্নতা মুরুম‑মুরুম শোঞ্জৈ—‘হয়েংলা করিনো ময়ূম লোইতাংখুনৌদা চৎলগা থিনবিরুবা হায়বদুনি।’ অমম্বদুদা মথন্তা হৈনরক্ত্রদুনা থীন্থবা তৌদনা রঘু ময়ূম তম্না মহাক্কী স্কূটরদু থৌদুনা হল্লক্লে।

নোংঙাল্লে, তারিখ অনী য়ৌরে। হাজিরা শূজবনা শিনফম ওইবা রঘুনি। লাঙ্গোলদা থবক শূবা চৎলি। মহাক্কী তাদা থোকপা মিষ্ট্রি অমগী মতুং ইন্নদুনা চেক শূবা য়াওবনি। চহী লোইবগীনা বাই বাইনি হায়দুনা নুমিত্তুমসু ঙাওথোক্তুনা লৈথোক্লুরে। চহী হৌবগীনা ন্যু ইয়ার হায়দনা নুমিত্তুমসু অদুমঙায় মমান্নবশিংগা পিক্নিক চৎলিঙৈদা নুমিত্তুমসু লোইখ্রে। থকপগা চাবগা তৌদনা নুমিৎ নীনীদুমা কূহ্মৈ ওন্থোক্লিঙৈদা থবক চৎহৌবা নৎত্রে।

রঘুনা খল্লি—‘ঙসিসু থবক চৎত্রবদি মিষ্ট্রিনা ৱা থোক্লনি, শোয়দনা হাত্তোকখিবা তারে! চত্তবা য়ারোইদৌরি। হোরেন খরা ঙন্না হল্লক্লগা লোইতাংখুনৌদা চৎপা হায়বদুনি। ঙরাং অহলদুনা শিন্নরম্বা সনাদু থিন্দোক্লুদবা য়ারোই…!’ সনাদুনা মহাকপুসু নাখোঙ ইশা শাহল্লি। মরম শুক্লৈ লৈতনা থৌ চিলহনবা হায়দু হেক থোক্লে। রঘুগী য়ূম লমদেংদগী ওইবনা মহাক্কী থবক শূবা চৎপগী লম্বীসি লাঙ্গোল চীং কারক্কী লম্বীদু ফাওরগা চৎপনা য়াম্না শম্মী। নৎত্রবদি ওন্থোক্না কোইখ্রে। থবক থোক্লকপদা ঙরাং মীয়ায় চল্লবা নুপাদু থেংনখিবা মফমদুদা হাইফেৎ য়েংলম্মী। করিসু উদে। থবক লোইশিন্নবা হোৎনবদা নুমিৎসু ফনা য়াম্না থেঙখ্রে। মিষ্ট্রিনা সাৎ হৈবদি লোইশিন্দনা থনম্বা য়াবা নত্তে হায়দুনা চাক ফাওবা থবক শূনা শূনা চাবগা চপ মান্নখ্রবনি। নুমিৎ ঙন্না তাবা, নুমিৎ তাবগা মম্বনা হানখ্রবদুদা, ইথেঙ থেঙলবোই খল্লি রঘুসু। নুমিদাং হায়দু ওইরে। মথন্নতা চীঙ্গোলগী লম্বী কারক্তুদা গাড়ি থৌরকপদা কনানো অমনা খংকৌ কৌরকই।

“রঘু… রঘু… রঘু…!”

মহাক স্বায় লাউই। তু চুংই। কনা ওইরিগবা! মখোয় লৈকাইগী অহলশিং ওইরিদরা খন্দুনা গাড়ি খাম্মী।

“কনানো?”

নাশোন খরা তপ্না, য়াম্না শোন্থাংননা, চোকথনা খুম্লকই, “ঐনিনে! নোই তা তোলেননি। নঙ ঙাইরিবনি। নঙদি ঙরাং লাক্কনি হায়রম্লগা লাকসু লাক্ত্রে। ঐ ঙরাংদগী সিদা সুম লৈরি।”

রঘু মশমদু চপ য়ুংই। কোকচাউবী কায়। তু চুংই মশা পূম্বা! মথন্তা খল্লি—‘ঙরাং ঐনা য়ূম য়ৌরগা গাড়ি থৌদুনা লাকপদদি লৈহৌদ্রে অদুগা হৌজিক্না অমুক কমদৌনা লৈরম্লিবা!’

মহাক গাড়িদগী কূমথদে। গাড়িগী ষ্টার্টতি মূৎখ্রে।

রঘুনা খঞ্জান্নরিঙৈ তাল্লক্তুদা মমি শামিনরবা খোঞ্জেলদুনা স্বর চনীং‑চামাং শম্নদবগী খোঞ্জেলদা হন্দকমুক্তি খরা কল্লপ্না কৌরকই, “রঘু ঐ য়াম্না ঙমদ্রে। ৱাবনসু লোইরে। অমুক্তা চিংখৎপিয়ু। নঙবু সনাদুদি থিল্লুরব্রা? য়ূমগী মীনদি ঐবু হংলক্তব্রা?”

রঘু কিগে তৌরুরবনি অদুবু নুপাদুগী ৱাহৈশিংদুদা থোইনদি কিদ্রে। মিহুলগী খোঙজেলদি মীৎকূপতুফাও ফাজিন পুনশিনবা ঙমদমখৈ চোংলি। নুপাদুবু চিংখৎপিগে হায়দুনা ৱা ঙাঙলকখিবা মায়কৈ অদোমদা চঙশিল্লকপদদি কনাসু লৈরমদ্রে। রঘু কোকচাউবী অমুকসু কারে। খোঙগ্রাউগী ফূরিৎখাউদগী মৈখেৎতু লৌথোক্নবা হোৎনবদা হুমাং কাংলে। উচিন‑নাচিন্না মৈখেৎতু মরু মরি‑মঙা পূল্লপ খেৎলুবদা উরে—ঙরাং মানা উখিবা মীয়ায় চল্লবা নুপাদুনা শেৎখিবা ফূরিৎ‑ফিরোল অদুখক্তমক ঈনা পূমঙাং ঙাংনা তৈরমদুনা চীংয়াদুদা তাদুনা লৈরম্মী। রঘু লৱাই লুতোন শাৎখ্রে। থীন্থবা তৌদনা মফমদুদগী কমদৌনা হল্লকখিবা… গাড়ি কমদৌনা থৌরকখিবা… করম্না ময়ূম য়ৌরকখিবা জ্ঞান‑মেন অমত্তা তাহৌদ্রে।

ৱাখল খজিক ঈংথরকপদদি রঘু পন্থবা তৌদনা লৈকাইগী মমান্নবা অমা নমহৌ হৌরগা নুমিদাংদুদা লোইতাংখুনৌ তম্না লাক্লে। লৈকাইগী হাংদুনা লৈরম্বা দুকান অমদা থিংবাইজমগী য়ূম হংলগা তোলেনগী য়ূম তম্না চঙলক্লে। মীয়ায় চল্লবী মৌ অমা থোক্লক্তুনা মাঙ্গোলদা ফিদা থাই। মখোয় অনীসু চঙশিন্দুনা ফম্লে। লৈশা পুংকক ফাগৎলক্লিবী নুপীমচা অমসু নুপীদুগী নাকন্দা লেপ্লরৈ। রঘুনা ঙরাংদগী থেংনরকখিবা ৱারীশিংদু অমতা চীত্থদনা লীরক্লিবদু তানা তানা মীয়ায় চল্লবী মৌদু মমীৎ‑মনা পূম্লং লংখৎখ্রে। নুপীদু ইখঙ খঙহৌদনা কপথোরক্লে।

কপ্না কপ্না মশাদু অকিবনা পূময়োম য়োমশিনবমখৈ নুংহিক্ননা হারকই, “ঐ তোলেনগী নুপীনি। নাকন্দা লেপ্লিবী লৈশাবী মচাশিনা ইচানুপী অহলনি। ঙসিদগী চহী অনীগী মমাঙদা সিফাইগা খূৎ থোক্নবনি হায়বা থৌদোক অমদা মহাক্তি লৈখিদ্রে। ১৯৯৭ কী ন্যু ইয়ার নুমিৎ ওইরমগনি। মহাক্কা ঐখোয়গা অরোইবা ওইনা থেংনখিবা নুমিৎ! মচানুপীগী সনা অমা ইম্ফালদা শাবনি। সনাদুসু লৌরক্কনি হায়রম্বনি। লৌ য়োনবগী য়াম্লবা শেলসু পুদুনা চৎখিবনি। প্রাইভেট বেঙ্ক অমদা শেলদো থমজিনগনি, প্রাইভেটতনা মথোয় চাউই হায়দনা কোয়লাঙ লাঙলম্লগা থোকখিবনি। ঐখোয়না ন্যু ইয়ার নুমিত্তবু কনাগী বেঙ্কনা হাংলমদোইনো ছুতি থারমগনি হায়না খামজবদা মখোয় বাবাদুনা তাবিদবমখৈ চৎখ্রগা মহাক্কী থৱায় য়াওদ্রবা হকচাং ওইনা…! শিরবা মতুংদদি শেলশিংদুসু মীফত্তশিংদুনা লোইনা লৌখ্রবনি। ইচাগী সনাদুসু ফংখিদ্রে। মখোয় বাবাগী ফিরোল ফাওবা মহাক্না শেৎখিবা অদু ওইরমখিদ্রবনি।” ৱারীশিংদু লীনা লীনা নুপীদু হীক্না হীক্না কপ্লক্লে।

রঘুনা লীরিবা ৱারীশিংদো কদায় ফাওবা তাহৌখিবা! মশা পূম্বা কিমনখিবনা মহাক্তি ৱান্থরক্তুনা জ্ঞান মাঙলম্লে। মহাক্না ৱাখল লাকপদা মাগী ফমুংদা হীপ্লম্মী। ময়াম চঙনা লায়কন্নরবা মতুংদা য়ূমদা থিল্লক্লম্বনি হায়দুনা রঘুগী নুপীনা রঘুদা তম্মী।

হৌজিক্তদা রঘু জ্ঞান তারকই। মথন্নতা করিনো খরা মুরুম মুরুম শোল্লি—‘ওহ সনাদি পীরমদ্রেদো… করম্বা মতমদা শিখ্রবা মীনা পীরম্বা সনাসিবু অমুক লোইতাংখুনৌদা চৎলগা থিন্দোক্লুগনি ঐদি… অদুগা চীং কারক্কী লম্বীদুদা ঐবু অমুক হন্না চৎখিগদ্রা!” মশা পূম্বা হুমাংনা পূংলূপ লূপ্লে। মথন্নতা মখূবাক মনুংদা কন্না পাইশিল্লিবসিনা করিনো! তপ্না খূবাক্তু হাংদোকচৈ। ময়েক শেংনা উরে। মান্নি, শিখ্রবা মীনা পীরম্বা সনাদুনি!

চাকশঙদা চাক থোংলিবী মমা তানবা শুমাঙ মতোন্দগী খোঞ্জেল ৱাংনা ৱাংনা লাউরদুনা করি করিনো ৱাহৈ কয়া পংঙাঙদা ঙাঙলি। অতম্ননা মমাদা ঙাঙবসু নত্তে। পোৎথা‑পোৎথা থম্মোয়গী পেন্দবা ৱাকৎ খরা হায়জবনি।

মপান্দা মচানুপাগী চোইঙাংশিংদু মুন্না তাবগী মতমদি লৈতে। থোংলিবা চাক্তু লোইশিল্লগা মচানুপা মবূক থন্না পীজরম্লগা মাগী মথৌ চৎখিদোইনি। থোংলিবা চাক্তু লোইশিন্নবা হোৎনবদা মচাগী ৱাকৎশিংদো থৌওইনা নাচঙনা তাবা ঙমদ্রবসু মচাগী ৱাহংগী পাউখুমদি অদুমক মরক মরক্তা পীরি।

তোম্পোকনা হঞ্জিন হঞ্জিন্না মমাদা পুখৎলিবা ৱাফমদি করিসু নত্তে। মচীন‑মনাও য়াম্বসু নত্তে। মথন্তা পোকপনি। মচা অমখক্কী নীংবা ফাওবা থুংহনবা ঙমদবসি করিগীনো? মীনা তৌবা ঙম্লোইদবা থবক তৌবিয়ু হায়বসু নত্তে। মসিদা ৱারিবসি মচাবু নুংশিবা খঙদবা মমাগী মচৎনি হায়বসিনি। শুমাঙ মতোন্দা হৌরিবা হৈনৌ পাম্বীগী মখোঙদা অতম্ননা ফম্লগা মমাদা হায়রিবা ময়ামদু মমানদি খোয়জংনা তাবা নত্তে।

“ইচীন‑ইনাও অনী শুবসু নত্তবা। ঐখক পোকপদা করিসু তৌবা ঙমদে। মমল য়াম্বা ফিরোল ফূরিৎ লৈয়ু হায়বসু নত্তবা। শূপ্নতগী থোংলিবা চাক্তো অহাওবা থোংবিয়ু হায়বনি। চাক ফাওবা অহাওবা পীজবা ঙমদ্রবদি কৈদৌবগী ঐবু পোকপিরম্লিবনো?”

কোরৌগী মঙালদি মমা‑মচাগী ৱারীদু তানা তানা অসুম অসুম শাবা হেনগৎলক্লি। চাউরাক্না পূং নিপাল্লোমদি তারম্লনি। মতমগী খোঙচৎনা হৌখ্রবসু অরাপ্পা খুঙ্গং অমগী পুন্সিদগী করিসু হোংদোকপা ঙমদ্রি। লৌ‑ইংখোল লৈ। চহী অমগী চানবা ফৌ কোৎতা হাপতুনা থম্মী। নোংজুথা মতমদা শীজিন্নবা অনকপা চীংদগী শীং চল্লগা থম্মী। লৈঙাক্কী ওইবা থবক তৌদবনা মমা লুখ্রাবীনা মচানুপা তোম্পোক চাউনবা য়োকচরকপনি। মমাসু লাইরিক হৈতে, মচানুপাসু ক্লাস আইট ফাওবা তম্লম্লগা অদুমক তোকখ্রে।

মচানুপাগী চান‑থক্নবা শেম‑শাবা লোইরগা নুমিৎ খূদিংগী লৌ ৈয়খ্রবা লৌফমশিংদা ফূদিৎ খপ্পা চৎলিবনি। মদুদগী ফংলকপা ফৌশিংনা মখোয়গী থাগী শেন্থোক ওইরিবনি। পাখঙ পুংকক ফারবা তোম্পোক ঙসিসু পীক্তা পীক্লিবা অঙাং মচাদৌনা মমাগী মমীৎতা উরি। মচাগী মতৌদা মমানা হরাওজরি।

তোম্পোক্না মশাগী চহী তরামঙারোম শুবা মতমদা চীংদা উনা ননবদগী মপা লৈখিদবনি। চীংদা উ খায়রগা উপাক পুথোক্তুনা য়ূম‑কৈগী লৈত‑লায়রা পুবা মপা লৈখিদ্রবসু মমানা ঙসি ফাওবা মপা লৈত্রে হায়বসি খঙহন্দনা লাকপনি। মচাগী মওং‑মতৌতবু য়েংলগা নুংঙাইজরি। মচা লুনা তৌজবী লুখ্রাবী ইবেল্লৈনা ঙসি ফূদিৎ খপতুনা মচাগী পুন্সিগী মঙলান শাগৎলি।

“ইচীন‑ইনাও অনীশুবসু নত্তবা। ঐখক পোকপদা চাক ফাওবা অথোৎপা পীজবা ঙমদ্রবদি লোইরেনে। মচা ময়াম পোকপা পোকপী মমা‑মপাদি করি ওইরম্নি। এন্সাং অহাওবা থোংবিদ্রবসু চাক্তি হাওহনবিয়ু হায়জবনি। মসিদা হাউগদৌরিবসে ঐতা নত্তে, ইমাসুনি। ইমাসু হাউনা চাজৌ হায়বনি। অহাওবা চারক্ত্রিবসে ফনদি য়াম্না কুইরে।”

মচানা ঙাঙলিবা ময়ামদো শাউবগী মহুৎতা হরাও হরাওনা তাজরি। অপঙবা মচাগী মতৌদা হরাওরবসু ঙাইহাক্কী মতুংদা মথম্মোয়দা নুংঙাইতবা অমসু য়াওরি। নোক্নীংবা অমদি শাউনীংবা মরক্তা মচাগী পূক্নিংবু ফাথরদুনা থেমজিল্লি, “ইমানা হেন্না অহাওবা চানীংলিবনি। ঐনা চৎলিবা থবকসে নোংমা নোংমগী লাইবক্নি। ফূদিৎ খপ্পা হায়বসি লৌপুশিংনা হরাওবা থবক্তি নত্তে। লৌফমদুগী ফৌদু হাউব্রা হাউতব্রা হায়না থিবগী মহুৎতা ফৌ য়াম্না ফংগদবা লৌফমদা চঙবনি। অদুগা ফূদিৎ খপকে য়াদবা লৌপু য়াওদবসু নত্তে। য়ান‑য়ানবা নোংমগী লাইবক হায়বদুনি। হন্দক্তি অহাওবা ফৌ থাবা মফমদা চঙলগেকো। লাকও। লাকও চাক চাথোক্লসি। ইমা থবক মতম থেঙখিদৌরে”।

মমাগী ৱাদু তাবদা তোম্পোক য়াম্না হরাওরে। মশা‑মউ ফরবা তোম্পোক মমা লুখ্রাবীনা থবক‑ইনখাং অমতা শুহন্দনা থম্লি। মপা ঙন্না কায়নখ্রে হায়বগী অৱাবা অমতা খঙহন্দনা লুনা‑চান্না তৌজবনি। চহী কুনতরেৎ কুন্নিপাল শুরবা মচানুপাবু অঙাং মচাদৌনা কোন্থোং ৱাংমা লানহন্দনা থমজরি।

মমা‑মচা চাক চামিন্নদুনা মচানুপাদা নুংঙাইবা ৱারী কয়া লীবিরি। পাখঙ ফারবা তোম্পোক্না অপীকপা অঙাং মচাদৌনা ঙাঙলিবা ৱাদু মমানদি হরাওনা তাজরি।

“ইমাগী ইবুংঙো! ইমানা থবক চৎখ্রিঙৈ লম্বী লমজাওদা চৎথোক্কনু। হৌজিক মতমগী মীশিংসে য়াম্না ফৎত্রবনি। খৎন‑চৈনরক্কনি। অদুনা য়ূমদগী চৎথোক্কনু। ৱারক্লবসু তূমদুনা লৈয়ুকো।”

“তূমদুনা অসুম লৈবসু ৱারকই। লৈরক‑কোনশাং ফাওবদি থোকপা ফৈদনা। মীয়াম্না ঐসে থবক তনবা অমদৌনা খনবসু য়াওই। অৱাংগী তাতোমাল, ইপু থোইবা, ইনে পিশক, ইনে থরোশংবীখোয়না নমা লুখ্রাবীনা পুরকপা ঙাইদুনা ফমজা চারিবদু ইকায়দ্রা হংই। মখোয়গী ৱাঙাঙদো তাবা নুঙাইতে। শূবা য়াবা করি করিনো খরা পীরম্মু।”

মচাগী ৱাদু তারগা মমানা “নঙদি করি খুম্মিবা” হংজৈ।

“থবক লৈতে। থবক লৈরবদি ঐনা হেন্না শূনীংইবনি হায়বদা মখোয় লোইনা নোকই।”

“অদুম্না খুমগদবনি ইচাসিদি। ইচাদি অঙাং ওইরিদা। থবক শূগদবা মতম য়াম্না ৱাৎলি।” পূক্নিং থৌগৎতুনা মমানা খুম্মী।

“অদো ইমা! ঐসু ঙসিদি ফূদিৎ খপ্পা চৎপদো লাক্কে। ইবানিনা শূরবদি ফৌসু য়াম্না ফংগনি।”

“কদায়দৈ, কদায়দৈ। ফূদিৎ খপ্পা হায়বসি নুপীগী শিনফম্নি। নুপানা য়াওবা য়াদে। ইমা লৈরিবসিদি। ইচানা শূবগী মতমসু লাকখিনি। নঙোন্দা ঙাঙলিবা মখোয়দো থবক লৈতবা, মীৱা ঙাঙনীংবা ঙাক্তনি। মখোয়গা মান্নবা য়াদেকো। ইমা ৱা হায়গে। ঈশিং শাহন্নবা তেক্সি অমুবদুদা মংগ্রা অফূৎপা য়াওবনি। হোরেল নঙনা ৱারক্লগা মদু চাথোকউ। নূং‑হৱাই অঙৌবসু লৈবনি। ইমা থবক চৎলুখিগে। য়ূমদগী হেন্দোক্লমগনু।”

মচানুপাদা ৱারী শান‑শানা মহাক্কী তঙাইফদবা পোৎলমশিং পুরগা থোঙ্গাল্লোমদা থোকখি। মমানা চৎখিবা মায়কৈদা মুন্না য়েংজরগা মপূক্নিংদা খল্লি—‘মচা ঐবু কয়াদা লুনা তৌজরিবা। ইমানা মশা শোন্দ্রিঙৈগী মতমদদি ঐ থবক শূবা য়াদে। ইমানা মপাঙ্গল শোল্লক্লবা মতমদা ঐনা অমুক থবক শূরগা ইমাবু নুংঙাইহনগনি।’ মাঙ্গোল‑শাইগংদা ফম্লগা মকোক হোৎতুনা ৱাখল মচা‑মচা খল্লি।

কালেনগী নুংশাসু অদুমক শারি। তাইবংগী থৱায় পানবশিংসু মাগী মাগী মথৌ পাঙনরি। তোম্পোকতি চাক চাশিল্লগা নুংশা য়াইরম্বদগী তূম্নীংলক্লমাল্লে। শুমাঙ মতোন্দা হৌরিবা হৈনৌ পাম্বী কাখৎতুনা মুনশংনরবা হৈনৌ অনী অহুম হেক্লুরে। মখূৎ খূৎচাওদুনা হৈনৌ অমা পোপ‑পোপ থুগাইদুনা চারে। উচিন‑নাচিন হৈনৌদুমা চাবা লোইরগা থোঙ্গাল্লোমদা থোকখি।

মহৌশাগুম তোম্পোক্না য়ূমদগী অৱাংলোমদা লৈবা লৈকাইগী লম্পাক, ঈকোন অমদি শঞ্জাবুং লৈবা অদোমদা কোয়থোরক্লে। শা‑শনশিংনা শজিক চারি। খরা অমনা ৱাইনরি। কূম্মৈ ময়ামদু তোম্পোক্না ঈকোন মপালদা হৌরিবা উপাল মখাদা ফম্লগা থৱায় তানা য়েংজরি।

লম্বীদা লাক্লিবা অচৎ‑অওকশিংনা মথৌ অমগুম ফৌরামুক পাকপা তোম্পোক্কী মনঙ্গল, শাবান অদুদা কল্লক্না য়েংবসু য়াওদবা নত্তে।

অখঙবা মীওইশিংনা করেম্নবোই, লক্নবোই ঙাঙ‑ঙাঙদুনা চৎলি।

“কৈ তরানা চাবদসু লোইবা ঙম্লরোইদবা নুপা অমনা চাকঙন চারগা থবক‑ইনখাং অমতা শূদনা মতম মাঙহল্লিবসে পাম্মূখ্রেদা!”

“মমা লুখ্রাবী অদুনা অয়ূক নুংথিল নাইদনা শারবা নুংশা মরক্তা থবক চৎখ্রগা মানা য়াইফৌ ফৌরগা লৈরিনে। ঐগী ইচা ওইরম্লবদি মা খঙগদবনি…”

মা মানা থোকপা করি করিনো হায়রম্লগা চৎনখ্রি।

খঙদবা মীওইশিংনা “ওন্থোক্না চূং‑ফিরাল চাখ্রেদা। মশক‑মতৌনা ফজরিবা। ইচা ইয়াবু ওইনীংইদা” হায়রম্বসু য়াওরি।

মশক‑মতৌ ফজবা, শাবান‑মুর্ত্তি চুম্বশিং য়েংলুবদা পেন্নবা হায়বসিসু মীওইবগী মচৎনি। হায়সু হায়বনি তোম্পোক্কী মরমচৎ তুনানবনা অমা ওইরগা মহাক্কী শাবানবু উবদা ঙাওদবা মীদি অমতবু য়াওদ্রে। মঙোন্দা খোয়দাজবা মীগী মশীং হেনগৎলকপগী মথক্তা লৈশাবী মশীংসু নোংমা নোংমগী হেনগৎলক্লি। লৈঙাক্কী থবক তৌবা নৎত্রগা মরল‑মথুম য়েংলগা চান্নবা নুপা থিনৈ হায়বা মতমসিদা তোম্পোক্কী ওইনদি মগুণশিং অসি অমত্তা মথৌ তাদে। মমানা ফূদিৎ খপ্পা চৎখ্রিঙৈদা তোম্পোক্কী মনাক্তা লাক্লিবা লৈশাবী ময়ামসিদি উদবা নখোয়নদি নচীন থী হায়গনি। লৈশাবীনা য়োম্বা হায়বদুমক্নি।

মহৌশাগুম তোম্পোক চাকঙন চাথোক্লগা অৱাংথংবগী লৌবূক্কা ঈকোনগা শম্নবা অৱাংগী লম্পাক্তা নুংশা য়াইনা ফম্লি। মীনা করি হায়নবা, মীনা করি ঙাঙনবা মঙোন্দা অমতা চঙদে। মাগীদি নুমিৎনা চীংখোঙদা চঙখিবগী ফজবা য়েংজবা, হৈনৌ পাম্বীদা কারগা হৈনৌ হেক্লগা মীয়ামদা পীবা অমদি চাবনি।

লৈবাক পূংজাও থীন্না লাঙনরি। ঙসিসে লৈঙাক্কী পুকোক পুরেন লাক্তুনা চাওখৎ‑থৌরাংগী থবকশিং য়েংশিনবগী খোঙচৎতা মীয়াম্না শরুক য়ানবা পব্লিসিটি চৎখ্রবনি। হন্দক্কী লৈঙাকসে মখোল ফজনা থোকই। থবক্তগীদি খোঞ্জেলনা হেন্না হৌই হায়নবসু অদুম য়াওই। অদুবু পূম্নমক্তু তোম্পোক্কী ৱাখলদদি য়াওদে। লৈঙাক্কী চেঙ, লৈঙাক্কী মতেং, লৈঙাক্কী মহী‑মনাই মথৌ তাদবা মীশক্নি। মাগী হায়ববু লুখ্রাবী মমানা হায়বা ইনবনি। মতমগী মী অমদি ঙসিসু ওইদ্রি।

পুকোক পুরেন লাকপদা মাগী মাগী থোঙ্গালদা সনাবুল পুথোক্তুনা, মৈরা মৈনম কৎপগী মথক্তা লৈগী জগোই শাহল্লগা মখূৎ লোন্নদুনা ইকায় খুম্নবা উৎনবা মতমদুদা তোম্পোকতি থৌশা ৱাশাদনা লমজাওগী নাকন্দা ফূরিৎ লৌথোক্লগা নুংশা য়াইদুনা লৈরি। মহাক্কী মতৌদু উবদা লৈঙাক পুরেন শাউবগী ঙমখৈ লৈখিদ্রে। মীয়াম্না মঙোন্দা ঊৎলিবা ইকায়খুম্নবা অদুগী মহুৎতা করিসু থৌশাদনা মনীং ওন্থোক্তুনা ফম্লিবা মহাক কনানো হায়না মপূক্নিংদা খল্লম্মী। শাউবগী পনখৈ লৈত্রবা লৈঙাক পুরেন অদুনা মহাক্কী মনাই‑মশলদা তম্বা নুপা অদু পুরকউ হায়না য়াথং পীখি।

মনাই‑মশলশিংদুনা তোম্পোকপু মখূদাং পায়রগা লৈঙাক পুরেনগী মনাক্তা পুরকই। তোম্পোক মচীনদা মুরুম মুরুম শোন্দুনা অশাওবা উৎলকই।

“হাই নুপা! নহাক কনানো?” পুরেনদুনা হংলকই।

“ঐ লুখ্রাবী মচা তোম্পোক্নি।”

“লম্পাকসিদা থৌশা‑ৱাশাদনা লৈবাক্কী মীয়াম্না ইকায়খুম্নরিবা ঐনা লাকপদা ফম্লিবদু করিগীনো? নঙ ঐবু খঙব্রা?”

“ঐহাক অদোমবু কনানো হায়বা খঙদে। কনানসু ঐঙোন্দা মশক তাক্তে।”

“হায়য়ু নহাক মফমসিদা করি তৌরম্লিবনো?”

“ঐহাক অপোকপী ইমানা হল্লকপা ঙাইবনি। ইশম শম্না নুমিৎ তাবা ঙাইরিবনি।”

তোম্পোক্কী ৱাহৈদু তাবদা তিল্লিবা মীয়ামদু মখোল হৌনা নোক্লকই। লৈঙাক পুরেননা চৈহৎতুনা মখোয় ময়াম তূমিন্না লৈনবা খঙহল্লি।

“হাই নুপা! নশা‑নউসু অদুক ফখ্রবা নঙনা থবক শূদুনা লুখ্রাবী নমাগী মতেং পাংগেদি হায়দ্রগা নুমিৎচূ্প্পা লম্পাকসিদা ফমদুনা নুমিৎ তাবা ঙাইরিবদি করিগীনো?”

“ঐগী অৱাৎ‑অপা অমতা লৈতে। ইমানা ঐগীদমক করিসু ৱাৎহন্দে। ঐগী ইমানা হায়বা নত্তনা কনানসু হায়বা ঐ তানীংদে। ঐবু থাদোক্লো। ঐ শাউনবা হোৎনগনু‍‌!” তোম্পোক্না করিসু নাচুংদনা পাউখুম্লকখি।

লৈঙাক পুরেন শাউনীংবদি লায়রদুনা মহাক্কী পাউখুমদুদা নোক্লকই। মনাই‑মশলশিং অদুদা লুখ্রাবী মচাদু গাড়ীদা হাপচিল্লো হায়না য়াথং পীখি। পুলিস ময়ামদুনা তোম্পোকপু ফাদুনা গাড়ীদা হাপচিন্নবা হোৎনৈ। অদুবু মখোয় মরিগা মূক্নবদা তোম্পোক্না ঙমতক তৌই। অতৈ পুলিসশিংসু য়াওশিন্দুনা গাড়ী মথক্তা ঈনখৎখি।

খোঙচৎ অমুক হৌরে। লম্বী‑লমজাওদা লৈঙাক পুরেনগা লোয়ননা চৎপদা মীয়াম্না উৎলক্লিবা ইকায়খুম্নবা অদু উবদা তোম্পোক অঙকপা ফাওই। ময়াম্না লৈ খূজোক খূজোক চাইরকপা অদু উবদা করিনো হায়বা শুকখঙ খঙদনা মপূক্নিংদা মওল মওল খল্লকই। ময়াম্না উৎলিবা ইকায়খুম্নবা অদু মঙোন্দা উৎলকপা ওইরবোই মথম্মোয়দা ফাওরম্মী। খুঙ্গং কোয়না চৎপা খোঙচৎ লোইরবা মতুংদা লৈঙাক পুরেনগী বঙ্গলোদা হল্লক্লে। তোম্পোকতো বঙ্গলো মনুংগী হৈকোল লৈকোলদো ঈশিং চাইহল্লু হায়না য়াথং পীরকখি।

শাউনীং শাউনীংনা পুলিস ময়াম্না ধমকি তৌরকপদুদা তোম্পোক হৈ‑লৈশিং অদু মথং মথং ঈশিং চাইবা হৌরকই। মরিংজেল খাবা তোম্পোক্না মীৎকূপ খরগী মনুংদা ঈশিং চাইবা লোইশিনখিবদু উবদা ময়ামদু পূমঙক ঙক্নখি।

সোমদনা লুখ্রাবী মমানা ফূদিৎ খপ্পা চৎলুরগা মচানুপা লৈরমদবা অদুদা পাখৎচদুনা মচাবু কোয়থি থিরকই। লম্পাক্কী মতাইদা লৈরিবা পূখ্রি অদুদা তাখ্রবরা হায়দুনা কোয়না চৎতুনা য়েংবদা শমিন অমতা উদ্রে। কৈরোই লৈকাইদা চৎতুনা থিবা হৌরক্লে।

লৈকাইগী ৱাকায় ঙাঙজনীংবশিংনা তম্লকই, “লৈঙাক পুরেননা ঙসি চাওখৎ‑থৌরাংগী খোঙচৎ অমা খুঙ্গং অসিদা লাকপদা নচানুপা কতন অদুনা থৌওই‑উশিৎতবা উৎলুবগী ফাদুনা পুখ্রেদনা। অঙম‑অথৌগী চৈরাক খরদি ফংবা তারেদো।”

লৈকাইগী মচে‑মচলশিংনা তম্লকপা পাউদু তাবদগী লুখ্রাবী মমানা পাখৎচদুনা লৈঙাক পুরেনগী মনাক য়ৌনবা প্রপ‑প্রপ লাক্লে।

লৈঙাক পুরেনগী থোঙজিল য়ৌরবদা লুখ্রাবী মমানা করি হায়গদগে হায়বা খঙদ্রে। গেটতা তারম্লিবা পুলিসশিং অদুদা লৈঙাক পুরেনগা উনহনবিয়ু হায়জবদসু কদায়দগী অঙাওবীনো হায়না চঙহনবিদ্রে।

পাম্বৈ লৈত্রবদা লুখ্রাবী মমানা মচা তোম্পোক্কী মমিং পন্দুনা লৈঙাক পুরেনগী থোঙজিন্দা কপ‑লাউবা হৌরকপদগী ঙসাই ফারকপা নুপা অদুগী মমানি হায়বা খঙনরক্লে। থোঙ ঙাক্লম্বা পুলিস অমা চঙখিদুনা লৈঙাক পুরেনদা পাউ তম্লুরে। চঙলকউ খঙহল্লকপদগী লুখ্রাবী মমাদু পুরেনগী নাক্তা পুশিল্লক্লে।

লুখ্রাবী মমাদু উবদা লৈঙাক পুরেননা হায়রকই, “অহল ওইরবী ইতৈমা। করিগীনো মশা‑মউ ফবা নচানুপা অসি থবক‑ইনখাং শূহনগেদি হায়দ্রগা নুমিৎ চুপ্পা মীরেম ওইনা থম্লিবা? অহল ওইরবা নঙনা নচাসিবু মাঙহল্লিবা করিগীনো?”

“লৈবাক ঙাকপা অথৌবা। মপা মশক খঙদনা য়োকচরকখিবা ইচা অপঙবনি। অশোয়‑অরান য়াওরম্লবসু ঙাকপিয়ু। মতুং তৌদনবা মমা ঐনা ৱারকচরগে?”

লুখ্রাবীগী ৱাদু তাবদা লৈঙাক পুরেন শাউরকই।

“মহাক অশোয়‑অরান য়াওই হায়বা নত্তেনে। চাওখৎলবা মতমসিদা করিগীনো হায়বা থবক অমত্তা শূহন্দনা থম্লিবা। অহল মতম ওইরক্লবা নহাক্না নচা‑নশুবু অচুম্বা লম্বীদা পুবিবগী মহুৎতা নচা অসিবু মাঙহল্লেনে।”

“লৈঙাকপা, ঐগী ইচানা লাল্লম্বা পূম্বা ঙাকপিয়ু। মতুং তৌদনবা মমা ঐনা ৱারকচগে। মমা ঐঙোন্দা শিন্নবিয়ুনে” হায়রগা মখূৎ লোন্নদুনা খুরুম্লম্মী।

“নচা অসি মফমসিদা থম্লগা থবক শূহনসি। অমুক হন্না নয়ূমদা পুখ্রনু। থবক শূহল্লগা শেল থোক্নবা হোৎনসি। ইতৈমসু অহল ওইরে। নুংঙাইনা পোৎথাবিরুরো।”

লৈঙাক পুরেন্না ঙাঙবা য়াবা ঙাঙলম্লগা তোম্পোকপু পুথোরক্নবা হায়খি।

লুখ্রাবী মচা তোম্পোকনা মমা উবদা অঙাং মচাদৌনা কপ্লকই। মমা‑মচাগী পূক্নিং নুংশিবা মীকপ‑মীরাওখোলনা বঙ্গলোদা পূমনিন নিনখি।

মমা‑মচাগী মতৌদু ঙাইহাক য়েংলবা মতুংদা লৈঙাক পুরেননা হায়রকই, “অশি‑অনা য়াওবসু নত্তে। নমা নচানা অদুক থম্মোয় শোক্না কপ্লিবদুবু করিগীনো? হাই শাফবা, নহাক্কী নশা‑নউদু মফম চানা শীজিন্নরসি। নহাক মফমসিদা অদুমক লৈদুনা থবক শূরসি। অশোনবী নমাগী মতেং পাংলো। নমাসে অহল ওইরে।”

ঙাঙনি ঙাঙলোই খঙদবা তোম্পোক য়াম্না মুন্না খল্লগা খুম্লকই, “লৈঙাক পুরেন, ঐগীদি করিসু কায়দে। অপোকপী ইমানা করি পাম্লিবা। ইমাগী অপাম্বনা ঐগীসু অপাম্বনি।”

মচাগী ৱাদু তাবদা মচানুপা মীকপ থোক্লেকো খনবদা লুখ্রাবী মমা হরাওজখি। মমানা হায়রকই, “অথৌবা, ইচাসে নখূৎ চানা ৱারকপিরো। ঐনা পাংবা য়াবা মতেং পাংজরক্কে।” মচাগী মকোক্তা নান্থবিরদুনা হায়রকই, “ইমাগী ইবুংঙো, ইচানা ঙসি অনৌবা মপোক অমদা হল্লক্তুনা ইমাবু মীকপ থোকহল্লিবা অসিগুম্না শূনীংদনা নুংঙাইবতা পাম্বা নুপাশিংগী অনৌবা লমজিং মৈরা ওইনা ঙাল্লকউকো।”

মচাবু চিংনা য়েংলম্লগা লুখ্রাবীদু বঙ্গলোদগী তপ্না তপ্না থোকখি।

শূক্না মম্লবা, অথেঙবা অহীংদা খোংবা জীব মচাশিংগী নিং‑নিং চ্রীক‑চ্রীক খোঞ্জেল নত্তনা তাখিদ্রবা মতম অসিদা তারিবা নাহে খোঞ্জেল, খ্বাইদগী হেন্না ৱাবগী মখোল, খোঞ্জেলসে তাবদা নীংশিংলকই জগাসে ঐখোয়না য়াম্না অঙাং ওইরিঙৈদা নুপা অমা মন্দোমচা থোকপা নুপী অমদা ওক্তবা লমচৎ চৎলুবগী মথন্তা থৌরী য়ান্দুনা শিখিবা, অথেঙবা অহীংদা চৎপা ঙম্নদবা জগানি। ইথন্তা খল্লকই—ঐবু থাংবা থোক্ত্রবা ইখোঙ অনীসে থাঙ্গৎতুনা কন্না হেক্তা চেনখ্রসিরা। তাঞ্জাসিদা নীংশিংলকই—ঐগী থেঙনা থেঙনা হল্লকপগী হৈনবীসে খরা থাদোক্নবা হায়জখিবদো। হৌজিক্তা নুংশিরকই। নাহে খোঞ্জেলগী মখোল কনখৎলকই। খোঞ্জেলসি তাবদা খঙই নুপীগী খোঞ্জেলনি। খুঙ্গংসিদা লৈরিবা মীওই অমতনা অথেঙবা অহীংদা নাইতোম চৎপা ঙমদ্রবা জগাসিদা করম্না নুপীগী খোঞ্জেল। ঐহাক ঙাইহাক লেপ্লগা য়ুংখৎলিবা লৱায়গী শমসে ইখূৎ অনী চঙদুনা তপ্না নান্থৈ। অকিবনা য়োমশিল্লবা পূক্নিংসে তপ্না ফাথৈ। কিনা কিনা মনাক নকশিল্লি চাউরবা উপালদুগী মখোঙদা। শারবা কালেনগী নুংথিলদা উরুমতা থিদুনা লাকখিবা উপালসিগী মখোঙদা চঙবদা ঙসিদি কয়াদা কিরিবা। কিরবসু কিনা চঙদবা য়াদবনিনা অদুম চঙশিল্লদুনা য়েংলুবদা ওন্থোক্না ফিভম কায়রবা মশা ৱাই শংদ্রবী নুপী অমনা ওন্ন‑থোইনা ৱানা খাঙদুনা লৈরম্মী। হন্না হন্না হংলুই—“কনানো নঙবো? কদায়দগীনো, মফমসিদনা করম্না লৈরিম্লবনো?” হন্না হন্না হংলবসু পাউখুম অমত্তা পীরকখিদ্রে। হেন্না হেন্না অৱা নাহেবগী খোঞ্জেল নৎতনা মঙোন্দগী করিসু তাবা ফংখিদ্রে। খরগা হেন্না মনাক নকশিল্লুবদা খঙই—মহাক্কী শকফমসে থাবুম তরা নাউপুদুনা মমা ওইবী অমগী, অঙাং উনগদবগী শকফমদুনি। মপা ওইবনা কোয়চেন চেল্লগদবা, লৈকাইগী অহল মাইবীনা পূমকোয় কোয়শিল্লগদবা, নৎত্রগা হোস্পিটালগী দোক্টর নর্সনা শেন্নদুনা লৈরগদবা মহাক্কী ওন্থোকপা ফিভম অসিদা উপালসিগী মরুমদা নাইতোম থামৈগী মচেৎ ওইরবা থাজ, মঙাল হেনগৎলক্লিবা থৱান্মিচাকশিংবু য়েংলদুনা অৱাবা কোক্ননবা হোৎনরম্লিবোই খল্লুবদা কিরম্বা পূম্নমক কাউথোক্তুনা মহাক্কী মতেংতদি পাংলগে লেপখি। মহাক্কী ফিভম মতৌ মনাক্তা থম্লিবা মল্লবা ফিগী ফিয়োম, মুৎশি মুৎশিরবা থাবলগী মঙালদা ঙৌরোক ঙৌনা উরিবা হকচাংদা থোংলিবা মঞ্জুনরবা ফি অসি উবদা খঙই মহাক শোয়দনা অঙাওবী ওইরমগনি।

মহাকপু হোস্পিটাল ফাওবদদি পুরগে খল্লদুনা মঙোন্দা ঙাইহাক লৈরম্মু হায়রম্লগা য়ূমদগী গাড়ী লৌথোক্লুদুনা য়ূমগী কনাগুম্বা মীওই অমতদসু হায়রমদনা মাবু হোস্পিটাল তম্না অদুম পুদুনা লাকখি। হোস্পিটালগী লম্বীদা খল্লকই—করিনো ঐনা তৌগদবসে। মরোলসু থোকখিদ্রবা, কৌবসু খুমখিদ্রবা জ্ঞানসু খরা খরা মাঙবা মাল্লবা, মহাক্কী অৱাবগী শক্তম, হুমাংনা চোৎলবা মায়থোঙ অমদি হকচাং, অৱাবগী নাহে খোঞ্জেল নত্তনা করিসু তাখিদ্রবা…। মহাকপু কদায়দগীনো, করম্না তৌখিবনো, কনাগী নুপীনো হংলকপদা করিনো ঐনা খুমগদবসি। খল্লুবদা চরাঙনৈ ৱাখলসু। থেঙজিল্লক্লবা মতম ওইবনা, কনাগুম্বা অমত্তা চৎনদ্রবনিনা লম্বীসু ইকোম কোম্লে। রিম্‌সকী গাইনি ৱার্দ য়ৌশিল্লক্লে। হোস্পিটালগী ভেরেন্দা য়ৌনা গাড়ীদু অদুম থৌজিল্লে। খরা পাখৎনা হায়খি—“মতেং অমুক্তা পাংবীয়ু, অঙাং উনগদবনি, য়াম্না ৱাবমাল্লে, অমুক্তা মতেং পাংবিয়ু।”

ৱাহৈসি তাবদা পূকচেল চাউরবা ময়াম চেনশিল্লক্তুনা হায়রকই, “টিকেট অমত্তা ককপিরকউ, ঐখোয় পুশিল্লগে।” মখোয় মরি‑মঙা চঙদুনা ও টি তম্না অদুম পুশিনখরে। মরৈ খরা তৌনরবসু অনাবগী মমিং ‍‌‘অঙাওবী’ হায়না কাওন্টরদুদগী টিকেট কক্লক্লে। ও টি তম্না চেনশিন্দুনা টিকেট পীশিল্লুরে। হীদাক‑লাংথক্কীদি থোইনা ৱাদ্রে। কোয়চেন চেনবিরিবা ফার্মাসিগী অঙাংশিংদুনা ঐবু সিগ্নেচর অমতং তৌহল্লগা মখোয়না ফননবা অদুম শীনখ্রে।

তৌফম খঙদনা ঙাইহাক লেপ্লিঙৈদা, ওপরেসন থিয়েটর মমাঙগী এলুমিনিয়ম থোঙদু মচেৎ অমতং হাংদোক্লগা পুন্সিগী লুরবা ঈপাক্তগী চিংখৎপিরম্বী, থম্মোয়সিবুদি মচেৎ কয়া থোক্না কায়হনখ্রবা খোঞ্জেলদুনা হংলকই, “অনাবসিগী ইমুং‑মনুং য়াওবিরিবরা?”

ঙাইহাক ৱাখল লমফৈ চৎলুরবসু খুমখি, “য়াওজরি, করি হায়বিগদবনো হায়বিয়ু?”

ঐগী খোঞ্জেলসি তাবদা মহাকসু থোঙদু খরগা হাংদোক্লগা য়েংনীংনা ঐবু য়েংখিবা মাল্লি। খোয়থুম্নরবা খোঞ্জেলদুনা নীংশিংহল্লি মতম কুইনা অকাওবগী লৈরোলনুংদা মরোল নাইনা লৈরোল চনখ্রবা মালাসনা! কাইরং মালাগী খোঞ্জেল। ও টি রুমদগী থোরকই মশা নাঞ্জবী য়েংবদা চূং‑ফিরাল চারবী দোক্টর নুপীদু।

থোরক্তুনা হায়রকই, “ঐগী কাদা অমুক্তা লেঙশিনবিরকউ।”

দোক্টরগী কা তম্না চৎপদা দোক্টরগী থোঙ মথক্তা থেৎতুনা লৈরম্মী—ডা দব্লিয়ু য়াইফবী। ঐহাক খংনীং নীংশিংলকই—ও! ঐনা চিংননা খল্লুরিবসিদি ডা য়াইফবী, মালাসনাগী মনাওনুপীনিদনা।

ঐহাক ৱারবা পোৎলূম অমা থাংথবগুম ৱাখলসে পূময়াং য়াংই। কাদুদা হেক ফমথবগা—“দাদা! অনাবসিবু করম্না, করি মরী থোক্নবিবগে, কদায়দগী করম্না? কোইবিগনু দাদা, ঐহাক য়াইফবীনি মালাগী মনাওনুপীদুনি।”

“ও দোক্টর! থোঙদা থারিবসি উবদা ঐহাকসু নীংশিংলম্লিবনি। ঐখোয়গী খুঙ্গংগী মতাইদা হৌবা লাইওইরবা উপাল অমগী মখোঙদা ঐনা লম্বীদা হল্লকপদা থেংনরুবনি। মহাক্কী অৱাবা মতৌসি উবদা মীমান্নদ্রবী ওইরবসু মহাক্কী থৱায়তদি কনবা ঙম্ব্রা য়েংগে খঞ্জদুনা পুজরকপনি। অনাবগী ফিভমসিবু করম তৌরিবগে দোক্টর?”

“অঙাং অনীগী মমা শোয়দনা ওইরগনি। মমাগী ফিভমদি খরা লুনা লৈরি দাদা। ঐখোয় খূদিংমক্কীদি ঈশ্বর মানা মপুনি ঈশ্বর খুরুমসি। দোক্টর ময়াম চঙদুনা কন্না হোৎনরি, ফরকপসু ওইরকসনু।”

“দোক্টর য়াইফবী লৈবিরম্বসি ওন্থোক্না নুংঙাইজখ্রে, কন্না অমুক্তদি হোৎনবিয়ুকো।”

“হোয়, য়ারিবমখৈ শোয়দনবা হোৎনগে। ময়াম চঙদুনা হোৎসু হোৎনরি। পূম্নমক্তি ঈশ্বর মপু মাগী থৌজালনি। ঐ চঙলুখিগে দাদা।”

ঙাইহাক লৈরগা ঐবু কৌরকই মনুংদা চঙলক্নবা। হায়রকই, “করম তৌসিগে দাদা অনাবসিনা হোস্পিটাল য়ৌরকপসে খরা থেঙখ্রে, কন্না হোৎনরবসু কনবা ঙমহৌদরে।”

করিমত্তা থোক্নদ্রবসু থেঙলবা অহীংদা উপালদুগী মখোঙদগী হোস্পিটাল ফাওবা লোয়নদুনা লাকখিবা মানা অঙৌবা ফিনা মশা পূম্বা কূপশিল্লগা, নর্স অনীনা মতাইদা য়েৎ‑ওয় অনীদা মচা অনীদু পম্লদুনা লেপ্লম্বদু উরুবদা ঐগী মীৎলু অনীদগী লেপ্পা লৈতনা পিরাং শীন্থদুনা মখোল থোক্না কপচখি।

“দাদা থোইনা হেন্না খঞ্জিল্লুরনু হয়েং নোংঙানবগা মিদিয়া কৌরগা ইমুং‑মনুং কনা কনা লৈবনো হায়দুনা অমুক্তং খঙহল্লসি। হয়েং ফাওবগীদি ঐহাক ফননবা অদুম শীল্লগে। ঐসু অঙম্বা থাক্তা হোৎনগে। ঐগী কাদা লাকপিরো, ৱারী অমতা শানসি।”

খল্লকই—নুংঙাইখিদ্রেদা। কনাগুম্বনা মচা অমতং য়াওনবা লাইফম খূদিং চৎচবা অখঙ‑অহৈ মাইবা দোক্টর তানদুনা হোৎনবা য়াবা হোৎনরবসু মচা ফংদবা য়াওরিবনি। অদুগা মীরোলসু তাদ্রবী, নোংজু‑নুংশাগী খেন্নবা লৈত্রবী মঙোন্দা থা তরা নাউপুহল্লম্লিবা অঙাং অনীসিগী মপাদু কনাবু ওইরিগবা। মহাকপু হিংলমখিগদরা, শিরম্লগদ্রা! পাখঙবু ওইরিগদ্রা ময়ূম‑মকৈ পাল্লবা নুপাবু ওইরিগদ্রা! মহাক্তুসু অঙাওবা ওইরমগদরা? হিংলম্লগনা মাগী মঙলান্দা করি ফাওরমগনি। অঙাং অনীসিগী মরায়বকসিদনা করি তম্লমগবা!

খল্লিঙৈদা য়াইফবীনা হায়রকই, “দাদা করিগীনো লেপতুনা লৈরবদি। চঙলকও মনুংদা।”

মনুংদা হেক চঙবগা দোক্টর য়াইফবীনা হায়রকই, “দাদা চেচে মালাদো হৌজিক ফাওবা অঙাং য়াওদ্রি, দদাগীদি অঙাং কয়া লৈরে।”

“অঙাং নুপা অনীতনি,” ঐনা খুমখি।

“ও! অঙাং নুপী য়াওদবা? দাদা অঙাং অনী অসিগী ইমুং‑মনুং থোরক্ত্রবদি অঙাং নুপা অসি চেচে মালাদা য়োকহনবগী অয়াবদু দাদানা পীবিরবদি য়াম্না নুংঙাইনি। দাদানা য়ারবদি চেচেদো ঐ হৌজিক লাক্নবা হায়খিগে।”

“য়াইফবী করিসু কায়দেদা! মপা কনানো খঙলরোইদবা, মমানা নুংশিনা ইনবিবা তাইবং পুন্সি চেঙজেল ওইগদবা খোম্লাংগী মহাও খঙলরোইদবা অঙাং অনী অসিনা অফবা মীরক তিনবা মী অমমম ওইনবগী লম্বী অদুদি মীওইবগী মরক্তা লাইগী ঙমথং ওইরিবা দোক্টর নখোয়না শীনবিবদা ঐহাক্না করিগী য়ারোইদগে। অদুবু থাবুম কয়া নাউপুদুনা অৱাবা কোঙ্গাই খাঙলক্লবী মাগী ইমুং‑মনুংগী মীওই অমতং থোরক্লবদি নুঙাইখ্রনিদা। ইমুংদুগী মীদুদা থম্মোয় শেংনা নিজরগা তাঙনা ফংজবী ইচানুপী ওইনা অদুগা নখোয় চেচেনসু তাঙনা ফংজবা মচানুপা ওইনা য়োকচরবদি য়াম্না নুংঙাইনি।”

“দাদা চেচে কৌরগেকো।”

“কৌরসু য়াইদা!”

মতম কুইনা থেংনরুদ্রবা কাউনরুরবা মতুংসিদা থৌদোকসিনা ঙসিদি নৌহৌননা অমুক নীংশিংবা ওইনা থেংনবা তারবরা। কায়খ্রবা থম্মোয়গী মচেৎশিংসিদা নৌনা দাগফম অমুক তাগদৌরিব্রা?

ঙাল্লম্বা থা থৱান্মিচাক কয়াসু মপুগী শিন্থা লোইদুনা অয়ূক্কী ঙাঙ্রানরবা মচু খরা খরা লাকপা হৌরক্লে। নোংঙাল্লকপগী উচেক‑ৱায়া কয়াসু মখোল থোরক্লে। ঙাইহাক লৈরদি ঙসাই তৌখিবা ফোনদুদা য়ূমগী মীসু য়ৌনরক্লগনি।

মালাসনা য়াম্না মোং‑হাদনা হোস্পিটাল তম্না চঙলকই। পুন্সিনা ময়ায় চল্লক্লবা ফাওবা মানা লৈশারিঙৈ শক্তমদু ঙসি ঙাওবা হোংলমদ্রি। য়ূম পাল্লবসু অঙাং য়াওদ্রবদি ফিভম হোংদনা ফজদুনা লৈবসে নুপী ওইবীশিংগী লীচৎ ওইরমাল্লে। ফনা য়াম্না য়েংনীংলবসু য়েংলুবা য়াবা মতাংদি নত্তে। মাগী মপুরোইবসু য়াওরকপা উদে। দোক্টর য়াইফবীনসু ঐহাক লৈ হায়বসি মঙোন্দা হায়দোক্ত্রিবা মাল্লি। য়াইফবীগী কা তম্না মহাক অদুম চঙখি।

নর্স অমনা ঐগী নাক্তা চঙলক্লগা হায়রকই, “অঙ্কল, ঐখোয় মেদামনা মনুংদা অমুক্তা চঙবিরক্নবা হায়রকই।”

ঐহাক থোইদোক্না খঞ্জিল্লুদরে। চহী কুন উনদ্রবসু অমুক্তংদি উজরবদি খনখিবনি। হেন্না খঞ্জিনফমসু থোক্তরে। করি হেন্নবু খল্লুগনি। মাসু ময়ূম পাল্লে ঐসু ইচা অনী লৈরে।

ঐনা কা মনুংদা চঙবগা মহাক ফম্লম্বদগী ফূক হৌগৎলক্লগা ঙক্না হংলকই, “দাদা করম্না?”

ঐনা খুমদ্রিঙৈদা য়াইফবীনা অদুম খুমখ্রে, “চেচেনা য়োক্ননবা হায়নরিবা অঙাং অসিগী মমাসে দাদানা হোস্পিটালসিদা পুবিরকখিবনি। মমানা তাইবংপান থাদোকখ্রবসু পীক্লিবা থৱায় অনীসিদি কনবা ঙমহৌরে। দাদা, চেচেগা ৱারী ঙাইহাক শানবিরম্মু। অঙাংশিংসিগী মমাগী মরমদদি হঞ্জিনবিরুরগনু চেচেদা ঐনা হান্ননা লোইনা হায়খ্রবনি।”

হৌখ্রবা ৱারী থৌদোক মহাকসু নীংশিংলকপরা? ঐঙোন্দা হাইফেৎতং য়েংলম্লগা মালাসনা তপ্না লূকথখি। নোংজুথানা লাকপদা চুরকপা নোংনা মালেম পূম্বা চোৎহনবগুম মাগী পিনা ঐখোয় অনীদা ঙায়হৌরবা কাসিগী লৈমায়দা তাহন্দ্রবসু নৌরবী মাগী খূৎতা পায়রকপা অঙৌবা রুমালদা মীৎলু অনীগী পিগী ঈরিকশিং তৈথোকখিবদু পাম্মূজনা য়েংলুবা মীৎ অনীসিনদি উহৌই।

তপ্না হংলকই, “নুংঙাইরিবরা? দাদা য়াম্না নুংঙাইরি হায়বগী পাউসু মীনা তম্বদগী তায়।”

ঐনা হংখি, “নঙসু ঐগী মপাউ হংবরা? পুন্সিসে ৱাদুনা ঙাক্তা লৈয়ু হায়বা তম্লমদবা মাল্লি। ঐগীসু নুংঙাইবা খরদি থুংলম্বরা খল্লি। থায়না নৎত্রে খরা শাফরে। মালাসনা, হৌখ্রবা পুন্সিদো নৌনা নীংশিংলুবদা ইকায়বা ফাওই। নফমদা অমুক্তা শেংদোক্কে খনবনি। ঐনা মতমদুদা নঙগী ননাক্তা লাকখিবদো মরুপ‑মপাংশিংদগী তোংননবা গাড়ী ৱায়রগা লাকখিবা ঙাক্তনি। নোংমনা ইবোমচাদগী নোংমনা রোবিন্দ্রো নোংমনা কিতন নোংমনা ননাও নোংমনা ইয়াম্বা বিজেনদগী ৱায়রগা ঐগী শাদুনা লাকখিবনি। ইকাইখ্রবজাৎনিদা মীগীনি খঙলবা ঐগীসু ওইবা য়াররোইদবা অদু ঐনা থৌরবদি ঐগী মান্ননবা হায়দুনা ঐ থৌগে হায়দুনা থৌরিবনি।”

ঐগী হৌখ্রবা থম্মোয় শোকপা ৱাশিংদু তারগা মলাদো করি খল্লমগনি ঐ করিসু য়েংলুদ্রে। অদুবু ঐদি অদুম্মক মখা তারি, “নোংমসু নঙগী থাবল চোংফমদা ঐখোয় ময়াম জিপ্সি অমা থৌরগা লাকইদনা। থাবলনা লোইরকপদা নখোয়সু য়ূমদা চঙলমদাই, ননাক্তা অদুম ঙাইহাক লৈরবসু য়াবদো ঐগী মান্ননবা হায়দুনা ঐনা থৌননবা হোৎনখিদনা। হৌখ্রবশিংদো নীংশিংলুবদা নঙনা লাপথোকখ্রবা মতুংদতা খঙলকই, ইমান্নবশিংগী মমাঙদা ইকায়বা হেনগৎলকই। মতমদুদা থা অমগী মনুংদা অমুক্তনি নঙ ঐ উনরিবা। থা অমদগী থা অমা ঙাইবা… নঙগী শক্তম উনীংবনা ওন্থোক্না ৱাজখি। নীংশিংলি—কৃষ্ণজন্ম নুমিৎনি। ঐনা ইমান্নবশিংগা নঙগী থোঙ্গাল য়ৌরকপদা নঙনা ফজনা কেশিল্লবসু কেদ্রবসু চন্দন থিল্লবসু থিন্দ্রবসু, নাপ্পগী শম্লাং খোমগৎলবসু খোমগৎত্রবসু অদুম ফজদুনা লৈবা অদুম য়েংনীংবা শক্তমদু পুরদুনা, শাদানবগী মখোল তাবদা নুংশিরবা মহুম হুন্দোক্লমদুনা পাখত্তুনা পাইখ্রবা চেক্লা অমগুম নঙনা ননাওনুপীশিং হুন্দোক্লমদুনা চেনশিনখিবা। য়াইফবীনা রোমাগা থোরক্লগা ‘দাদা, ঐখোয় চেচে লুহোংবগী নুমিৎ লেপ্নরে, চেল্লুরবনি’ হায়রকখিবদো তাবদা হান্নদগী অদুম মুদুনা লৈজবা মায়থোঙদা করি ওইরমগনি হায়বদুদি খঙখিদরে। নুমিৎ অদুদা কায়খিবা থম্মোয়দুদি পুন্সিদা অমুক হন্না থোক্তবা ওইজগে হায়দুনা মপু মঙোন্দা নুংতিগী লাইশোন ওইনা শোঞ্জরি।”

মালাসনাদো ঐগী ৱাশিংদুদা থম্মোয় শোকখিব্রা শোকখিদব্রা ঐ খল্লুদ্রে।

খোঞ্জেল নীক্নদি হায়রকখি, “লাঞ্জদ্রবা দদাদা লান্না খল্লুবদুনা ওইরম্লে হৌজিক ফাওবা ঐনা মমা অমা ওইবা ফংজদ্রিবা। অহেনবতবু পাম্লুবা, থবক ফংহৌদ্রবা দাদাদা লৈরবদি লেমহৌরিবা পুন্সিসে মফম খঙলরোই খন্দুনা দিল্লীদা থবক তৌবনি হায়বা কুইনসু খঙনবা নত্তবা ইমান্নবী নোংলৈমনা শীনবিরকপা মঙোন্দা মতম কুইনা লোৎতুনা চেকশিন্না থমজরকপা নুপী ওইবীগী ইকাইখুম্নবা অদো হোটেল অমদা পীথোকখি। নুমিৎ অদুমক্তদা ঐহাক মাগী মতুং ইন্দুনা চৎখি। দাদাগী চম্লবা শেংলবা পুন্সি লম্বীদা ঐগা অমুক উনরবদি নুমিদাংৱাইরমগী ফজরবা ঙাঙ্রানরবা মচুবু অহীং য়ৌশিল্লক্কদৌরিবা অমম্বনা মাঙহনবগুম মাঙখ্রগনি খন্দুনা দাদাগা উনখিদবনি।”

হেন্না থম্মোয় শোক্না মালানা মখা তারকখি, “মাসু থবক তৌরমদরে। হিংদবদি য়াদবনিনা ঙম্নবা হোৎনদুনা লেল্লি। পুন্সিদি অকা‑অকুম নাই। চম্না হিংজবা হোৎনবা কনবা মীওই অমগী মতুংদদি নুংঙাইবনা কোয়ইন ইন্নদুনা চৎলি হায়বসে ঙসিতা খঙলকই। ইচা অমতবু লৈজরবদি খন্দুনা লাইফম কয়া চৎলুই, ইমুংদা ইশৌতা লাংনরগা তোকই। নিশাগী ঈপাক্তা তাউরবা মাগী পুন্সিদা ঙসিগী অঙাং অসিনা অনৌবা মঙাল অমা পীরক্লবদি নুংঙাইখ্রনি।”

“মালাসনা, হৌখ্রবা পুন্সিবু নৌহৌননা অমুক নীংশিংলগুমসি। নঙগীসু তাইবং মপুনা অঙাং অমা পীবিরগনি। ঐগীসু মবুং অনীগী মচন্নুপী অমা ফংলগনি। পূম্নমকসে লাইবক্তা তম্লম্বনি খল্লসি। ঐখোয় য়ূমগী মীসু য়ৌরক্লগনি। পূন্না ৱারী অমুক শাখিসি।”

সনাতোম্বী মচানুপা অনীগা লোয়ননা চঙলকই।

“বাবা, দোক্টরবু কদায়দা লৈগে? অঙাংগী মমাদুনা কদায়দা লৈরিবগে? মমাদুগী খল্লুবদা য়াম্না নুংঙাইতে। কদায়দগীনো কনাগী ইমুংনো মরী‑মখোঙ অমত্তা খঙদ্রবরা? পুলিসতদি পাউ পীখ্রবরা?”

হেক লাকপগা সনাতোম্বীনা পাখৎনা মরী মরী ৱাহৈগী নোং চুথরকই।

ঐনা তপ্না খুমখি, “দোক্টর য়াইফবীনা ফনবা লোইনা শীনখ্রে। ঙাইহাক লৈরগা লোইনমক খঙলগনিদা।”

“দাদাগী ইনম্মরা?” য়াইফবীনা হংলকই।

লেঙশিনবিরকউ হায়দুনা ডা য়াইফবীনা সনাতোম্বীবু কৌশিল্লি।

“ফম্বিয়ু ইনম্মা। সোমদা ফম্লিবসিনা ঐগী চেচে মালাসনা।”

সনাতোম্বীনা য়াম্না খঙনা ঙকচান্ননা হায়রকই, “ও… মালাসনা! কোইননুসিকো। হৌজিক্তি ঐখোয়না মমা মশক খঙহৌদ্রবা অঙাং অনীসিগীদমক ফননবা হোৎনবা তাবনি। ঐখোয় তামোগা হান্না খঙনরম্লবসু নঙনা য়ূম হান্না পানখ্রবনিনা হৌজিক্তি ঐগা অমুক থেংনদুনা অঙাং অনীসু লৈরে। নঙদি নশকসু য়াম্না ফজৈ।”

মালাসনানা তপ্না খুম্লকই, “দাদাসে মবূক য়াম্না ফবনি, শাউসু শাউগন্দবনি।”

“হোয়দা হোয়দা, মানা ফবদুনা ঙসি ফাওবা নোংমতা খৎন‑চৈনবা য়াওদনা নুংঙাইনা লৈরিবনি। অদুগনে নঙনা নহানৱাই ন্যু ইয়ারদা পীরকপনি হায়বা অথাবা হাওফি অদুদি মতু তেক্তনা ইল্লিবনি। মরক মরক্তা নঙগী ফোটোসু য়েংবনি।”

হায়নরিঙৈদা অয়ূক্কী পূং নুপাল তাখ্রে। দোক্টর য়াইফবী চঙলক্তুনা হায়রকই, “অঙাং অনীসিগী মতাংদা করিসু য়েৎনবা লৈতরে, পুখিবা য়ারগনি।”

মালাসনাগা নর্সতগী অঙাং নুপাদু লৌরগা চেৎনা কোনশিঞ্জৈ, সনাতোম্বীনা মচানুপা অনীগা লোয়ননা অঙাং নুপীমচাদু হরাওনা পমদুনা নোকমিন্নজরি। অঙৌবা ফিনা কূপশিন্দুনা থম্লিবা ঙাইহাক লৈরগা ম্যুনিসিপালিটিনা পোৎলোইখ্রগদবা মচা অনীগী মশক উখিদ্রবা মমাগী খুয়া থম্বাল শোক্তুনা মখোয় অনীমক্না মীৎলু পিরাংগা লোয়ননা কাদুদগী পূন্না থোক্লকখি। মাগী মাগী গাড়ীদা কাখৎনদুনা চৎননবা থৌরাং তৌনখ্রে। মালাসনানা গাড়ী মনুংদগী মিংশেল ফাওনা লুরুক্ননা য়েংলকখিবা মীৎয়েংদুগী ৱাহন্থোক ঙসি ফাওবা ঐনা থিরি।

অয়ূক্তু থোঙ্গাল মপাদা গাড়ী মচা খরা হেক খামখি। মচু মচুগী ফিজোল শেৎপা মখোয় নুপামচা খরগা নুপীমচা অমগা কোন্থোঙ হাংলগা মরী মরী শুমাঙ তম্না চঙলকই। ঙসাইমখৈ ইচীক চীক্লম্বা শুমাঙ তাবা লম্বীদু মখোয় লাকপদা লীলা তৌফমদু ঙায়খ্রে। নোকপু নোকপ‑ও খেবু খেব‑ও পূমঙাল ঙাল্লি। মখোয়দু ঙসি লাক্কনি হায়না নহান ইবোহলদা ফোন তৌদুনা খঙহল্লকপনি। ইবোহলনা ময়ামদু ওক্লদুনা হায়রকই,

“নখোয় লাক্লেদনা, ঐদি চাক থোঙ্গৎপা হৌরবনিকো।”

“হোয় মাম্মো,” মেমনাওবীনা খুম্মী, অতৈদি কনামত্তা খুম্লমদে। ফোন অপাকপা অমমম পায়নরগা মাঙ্গোলদা মরী মরী কারক্লিবশিংদু মেমনাওবীনে, মাগী মবুং নিক্সননে অদুগা মখোয়গী লৈকাইদগী মবুংগী মমান্নবা অনীগনি। হেক থুংলবগা মেমনাওবীগী মবুং নিক্সনগা লাকমিন্নবা নুপামচা অনীদুগা মবাইগী কাদা গ্রোং‑গ্রোং চঙখ্রগা ম্যুজিক প্লেয়রদা দুং দাং দুং দাং তৌবা ঈশৈ অমা হৌরেমখৈ খোঙ্গৎখ্রে। মখোয় অনী অমনা রিমোট অদু লাক্ন‑লাক্নদুনা মানা মানা পাম্বা ঈশৈ মতেক মতেক পঙথাদা থানৈ। লাকমিন্নরিবা নুপামচা অমদি ফমুং কাখৎখ্রগা লোংনা হীপ্লগা ফোনদা গেম শান্নদুনা লৈখ্রে। চাকখূমদা চাক থোংলিবা ইবোহলনা চাকশঙদগী পাখঙমচাশিংগী মতৌদুদা লাউরকই,

“হৈ অঙাংশা নোয়বো! ঈশৈদো অমত্তদি মপূং ফানা খোংলকউনে।”

কনামত্তা খুম্বিরক্তে। মেমনাওবীদি ৱা‑লান অমত্তা হায়রম্বা তৌদনা হেক লাকপগা মফি শৎ হোংদোক্লগা ইমুংদগী য়াঙ্গেন শুমজিৎ পুথোরক্তুনা মাঙ্গোলদু প্রপ‑প্রপ ৱাই শীৎপা হৌখ্রে। মানা হেক মফমসিদা য়ৌরকপগা চাইদুনা লৈরম্লিবা মাঙ্গোলদু উরুবদা নুংঙাইত্রমাল্লে। ৱাই শীৎনা শীৎনা মাঙ্গোলদা থেৎলিবা লৈ হূক্লবা মনেগী ঊফুল শেংদোকপিদ্রবা ফ্রেম চনবা ফোটো অদুদা য়েংখৎলি। চহী মঙামুক্তি শুরম্লগনি মনেনা লৈখিদবা। মপূক্নিংদা নেনে হায়না কৌথোকখিবগুম্না তৌই। মনেগী মশক্তু মুন্না য়েংলগা নুংঙাইতবা পোকচৈ। ৱাই শীৎপা হেক লোইবগা পূখ্রিদা চৎলগা ঈশিং বাল্টিন অমা প্রপ‑প্রপ শোক্লুদুনা মাঙ্গোলদু নুরা অমনা শৃৎ নান্না ৱাই তৈথোকখরে। ইবোহলনা ইমুংদগী থোরক্লগা হায়রৈ,

“মাঙ্গোলসে ৱাই তৈদবা কুইরেদা।”

নুপামচাশিংদু হৌনা থারিবা ঈশৈগাদু অমত্তা হেক মূত্থৎলমদনা ফূক হৌগৎলগা অসুম লমজাওরোমদা মরী মরী থোকখ্রে। খঙহৌদনা হৌরকপা নোংলৈগুম্মী। কদায়দনো কৈদৌবনোগা করি অমত্তা হেক হায়রমদে। মখোয়দু মশক‑মশা উখিদ্রে। ৱাই তৈরিবা মেমনাওবীনা ফূক হৌগত্তুনা ঈশৈ অদু মূত্থৎলুই। উন‑ৱাইমুক খংচীক চীকই। ৱাই তৈবা লোইরগা মেমনাওবী চাকশঙদা প্রপ‑প্রপ চঙশিন্দুনা মাগী মাম্মোনা য়েন্সাং শেম্লিবদু অমুক য়াওশিল্লদুনা হায়রকই,

“নেনে লৈতবসে ইচীক চীকই, মাম্মো। ঐদি সিদগা অমত্তা লাক্নীংদ্রে।”

“নহাকসু অদুম্না ফাওবোইরেকো?”

“উম, মাম্মো নেনেদো য়াম্না নুংশিরকই।”

ফরে খল্লুরনু ইবেম্মা, আ নমাসু নখোয়গা লাক্কনি হায়রগা কৈদৌরবা?”

মেমনাওবী মনেগী মরমদা ৱারী সুম শাবদুদা মমায়দু ইমক মকশিল্লদুনা হায়রকই, “য়ূমদা মী কনাম‘ লৈহৌদে, মাম্মো। মাসু চত্থোক্লবদি ইংখোলগী মনা‑মশীং পূম্বা শন্না লোইনা চাথোক্লম্মনি হায়দুনা চৎসি য়াহৌদে।”

“নমাদুসু নোংমা অমুক নঙগা লাকমিন্নৌ।”

“উম, মাম্মো! মাসু সিদা চৎসিকাইনা নোংমত্তা হৌদোরক্ত্রে, নেনে লৈতবদগী সিদা চৎনীংদ্রমাল্লে।”

“অদুবু হেক য়াব্রনে? মাম্মোখোয় ময়াম লৈহৌরিসিদনা।”

মেমনাওবীগা ইবোহলগনা চাক থোংব‑খোৎপা লোইশিল্লক্লে। নুপামচা অহুমদু কদায়দগীনো চাকচা মাঙদুদা চোর্ফোন চরোং চরোং পানবা চাউরপ তৌবা মশা অমা থুদেক্লগা পুরকই। চাবা য়াবসু অমত্তা ওইদ্রি। খঙদে থুদেকপগা থুগায়বগা মখোয়দো। অদুদগী মখোয় চাক অমুক চামিন্নরে। চাক চাবা তোক্তুনা মখূৎ হেক হাম্বা লোইবগা মখোয়দু কাদা চঙদুনা ঈশৈ খোংগৎখ্রে। মেমনাওবীদি চাকচাফমদু চগুম শেংদোকপা লোইরগা ৱাই তৈহৌরি।

ইবোহলনা হায়রকই, “মেমনাওবী, মাম্মো তৌগে য়ানি, নখূৎ‑নশাগাদো মোৎলনিনে।”

“য়ানি য়ানি, মাম্মো।”

চাক চাবগী কোল–লীক ময়ামদো মেমনাওবীনা হায়নরুবা তৌদনা য়েনখাদা পুথোক্তুনা ফেঙখ্রে, ওন্থোক্নসু চঙখোনখ্রে। ইবোহলদো চাকশঙগী থোঙজিন্দা লেপ্লগা লৈ। কোল ফেঙফমদা কোল ফেঙদুনা লৈরিবা মেমনাওবীদা অমুক য়েং, মচানুপাগী কারোমদা ওনশিল্লগা ঈশৈ খোংদুনা গেম শান্নদুনা লৈরিবা নুপামচাশিং অদুদা অমুক য়েংলগা লৈ। ইবোহলনা ঙাইহাক য়েংলম্লগা হায়রকই, “মেমনাওবী, নঙগী থবক লোইশিল্লো, নখোয় থেঙখিনি। নমানা পাখৎলম্লনি। নুমিৎ তাখিনিকো।”

বেকগ্রাওন্দদু মমি শেংফাত্তবা থৱান্মিচাকনা ওই। রিফরেন্স নম্বরসু মচা তানা ইরি। সিগনেচরদুসু অতোপ্পনা হেক্তা শেমজিন শাজিনবা ঙমদনবা য়াম্না চেকশিন্না তৌই। ৱারোলদুসু ৱাকোয় শূদে। পৈশা মশীংদু ময়েক শেংনা ই, কন্টেক্ট নম্বরদুগা। খূৎয়েক পীরিবা মমিংদু তরং‑তরং হেক্তা চোংথোকপমখৈ ৱারোলদুগী মখাদা থম্মী—

‘শানোংবা লাই’

লৈরাংনা সেল্ফ হেল্প গ্রুপ তিন্নবা হল্লকপদা মচানুপানা পীরকপনি। অঙাংনিনা চুম্নগী বার্তোন ওইরবোই নীংদুনা লৌশিনহৌবাজাৎনি। চেদু উবদা লৈরাং কিবদি লায়রদুনা পূমঙক হেক ঙকই। মী ওন্ননা পীরম্লব্রা হায়রসু ‘লাইশ্রম তাঙবা‘ কৌবা মাগী নুপা নত্তনা লৈকাইদুদা কনামত্তা লৈতে। চুম্মী। ফাগিনিদা অসিগুম্বা দিমান্দ লেট্টরসিদি, কীদনি য়োল্লগা পীগদবদা মঙায়রে। লৈরাং থোইনা ৱাশিল্লুদে মহাক্কী সনা মরুপকী ফাওদোকখ্রগা শেন্থং হুল্লক্তবশিংদুগী কোক ওইনা থাদরি।

নোংঙানবদগী থোকখিবনি, নুমিৎ তাদ্রিমখৈ হঞ্জিল্লক্লোই। চহী তরামঙা শুরবা অল্টো কার অমা থৌরিবদু থাউ হান্নীংঙাইবু লৈরিব্রা খঙদে। সঙ্গদি অমুক্তোইবা ‘ইয়াম্বা তাঙবা লৈব্রা‘ হংখিবসিনা‘ নুংশিৎমুক কূংই। নুমিৎ পূমতা তারে হনজিল্লকপদু। হল্লকপগসু চিঞ্জখ্রপোৎনি ফোনদু শুকথা থাদে। লুদা লুরবা ৱারীদুমঙায়। লৈরাংনা মরক থৎলুবগাসি খুম‑লাক তৌপোত্তে। ফোন ৱারী শাবা লোইবগী তাঞ্জা অমা য়েংলগা লৈরাংনা ৱা ইঙাঙ ঙাঙদবীদা ঙসাইগী তরু‑তনাল্লবা দিমান্দ লেট্টরদু পীশিল্লি। তাঙবা মুন্না য়েংলগা হংলকই, “করিনো সিনা?”

‘য়ুনাইটেদ পীপলস মুবমেন্ট, শানোংবা ফেক্সন‘। লূপতুগী মমিংদু উবদা মথন্তা নোক্নীংবা ফাওরকই, অদুদগী মখোয়না ইরিবা পৈশা মশীংদুগা! থৌওই‑ৱাওইদবীদা তাঙবা ফোন হেক্তা খীংজিল্লি। পায়রক্তে। মাগী নুপীদমুক ওনশিল্লকই, “অঙাংনা শান্নবৈ ওইরমগনিদা।”

“অঙাংসু দিমান্দ লেট্টরগা শান্নরব্রা হায়সে?”

“অঙাং শান্ননবা অশাবা পৈশা অশাবা নোংমৈ ময়াম থোরক্লসিদি…!”

ঙাঙনরিঙৈদা হন্দুনা তৌরকই।

“হেল্লো!”

“কনা ওইরবনো?”

“ঐ তাঙবনি, লাইশ্রম তাঙবা!”

“ও! চেদু পাবিরব্রা?”

“পাজরে, সোমগী লূপসিবু!”

“লেট্টর হেদনি পীজখিবদু!”

“হান্না অমুক ফাওবা তাদবদুদা…!”

“কৈদৌঙৈ উনসিগে?”

“কৈনো হায়বিরিসিবু?”

“করি ৱাহংনো? দিমান্দ লেট্টরদুবু মঙানি চাক্কৌবগী বার্ত্তন ওইনা উরুরবো?” খোন কনখৎলকই।

তাঙবা তপথরকই, “মী ওন্নরমগনিদা!”

“য়ারে নুমিৎ মঙানিগী মনুংদা ঐখোয়না হায়রিবা শেলফমদু পীগদবনি নৎত্রবদি নচানুপী করম্বা স্কুলদা তম্মী, পূং কয়াদা চৎলি কয়াদা হল্লকই হায়বা শীৎ নান্না খঙই।” পাউখুম পীবগা নংহৌদে ফোন থমখি। চেসি ফাগিদি নৎত্রে। অওইবা ওইরগনা ঐঙোন্দবু করিগী দিমান্দ? অঙাং স্কুলগী টুইসন ফী থা মঙাগী শোৎলগা খাঙলিসিদা! লুপা লাখ তরা! নোক্নীংবা ৱানি, লৈকাইগী মীনা তারগা করেম্নরক্কদবা ৱারীনি।

তাঙবা নুপাদু থিবা য়াবা থিরে। করিগুম্বা লীখুন অমত্তা ফংদে, লূপতুসু! নুমিৎ মঙানি হৌখ্রে। লাক্ত্রে। ফোনসু তৌরকখিদ্রে। নোক্নীংদ্রা লৈবাকসে! ঙমদ্রা মৈতৈসে! লূপনি ককাইনা মী অমত্তংনবু শেম্ব্রা করিনো? মখল মখলনিদা! দ্রামা মতেক অমগুম্বনি। হৌখ্রে, শকখঙদবদু অদুম খঙখিদ্রে।

সেল্ফ হেল্প গ্রুপকী চে‑চাং হোৎকদবশিংদু মাঙ্গোলদা লোইনা পুথোক্লগা থম্মী। থৌ য়াম্মী ভি এল এফকী সেক্রেটরিনি লৈরাং! চে‑চাংশিংদু ফাক্তোক্ত্রিঙৈদা তুলশিপূংদা ধূপ থাউমৈ কৎপগী ৱাই তৈ। চেনা য়োমশিনবা ময়োম অমা তুলশি মখোঙদা হেক ওক্নরুরে।

লৈরাংনা তাপ খূনগৎলগা ফাক্তোক্তুনা য়েংলুবদা হেন্দ গ্রেনেদ লূম‑লূম লাউবা অমা য়াওরম্মী। শ্বায় লাউই। কোকচাউবী কারকই, পোক্তা পোকখায়রদবগুম! য়োম্লম্লিবা চেদুদা চাউনা ইরম্মী—ফার্ষ্ট ৱার্নিং!

‘তুলশিপূংদা গ্রেনেদ অমা লৈরম্লে‘ ৱা‑ৱা লাউই। লৈকাই তরা লান্না শন্দোকখি। নুপী‑অঙাং, নুপা নহা লৈরক শুমাঙ মীনা পীক থল্লি। হেন্দ গ্রেনেদ য়েংবা লাক্নরিবা! ঙাইহাক লৈরগা পুলিসকী টীম অমা লাক্তুনা হেন্দ গ্রেনেদতু লৌখৎখ্রে। প্রেসকী কাঙবু অমসু লাক্তুনা ফোটো য়াম্না কাপখি। তাঙবদসু করি করিনো য়াম্না হংলি। তরংনি! ফাগিনা অশেংবা ওইরকপদুদা! বোম লৌখৎখ্রে, লৈকাইগী মীশিংসু হন্নখ্রে, পূমচীক চীকখ্রে। নুমিদাংদু তাঙবগী গ্রেনেদকী ৱারীনা ঈ‑পাউ পূম্নমক্কী হেদলাইন ওইরে।

তাঙবা টিভিগী পাউ তাফম খঙদে, থোঙ্গালদা হূই খজিক্তং খোংবদা মনীংথোঙদা থোক্তুনা য়েংই। শুক্লৈ লৈতবা লূপ অমনা শুকওই ওইরোইদবা মীশক অমদা দিমান্দ তৌরকপসিদনি তাঙবনা কোক চাক্লিবসে। লৈতব্রা হায়রসু গ্রেনেদ থনম্লি। করিনি খল্লগা তৌরিবনো লৈকাই মমাঙদসু ইকায়বনা লোইরবনি। কোলেজগী প্রোফেসর বেঙ্ককী মেনেজর শেল পায়বা ময়াম লৈরিশিংদু তৌদ্রগা তাঙবা ঐঙোন্দবু লাখ তরা ককাইনা…!

“নুপা! মোয়গীসে ফাগি নত্তে, উনরগা ৱারী শানথোকপনা ফগনি।” লৈরাংনা হৌদোরকই। তাঙবা খুমদে। ঙাইহাক লৈরগা ফোন তৌশিল্লি। পায়রকই।

“ঙসাই অয়ূক লাইদা কৎলম্লিবদুনা অহৌবনি, মথং মথং থেংননবা শেম শাবিয়ু!” হেক পায়রকপগা লাক্লকই।

তাঙবা তপ্না হৌদোকই, “অমুক্তং উনরগা ৱারী শানসি, ঐনা খনবদা মীশক ওন্নরমগনি খল্লি।”

“ঐখোয়গা ৱারী শাননীংলবদি শেলদু হান্না থৌরাং তৌ!”

ফোন থমখি। অমুক তৌশিল্লি, পায়রক্ত্রে। “হুম! লাখ তরাকাইনা পৈশাবু ফাগিদৌনা!” মতোমতা শোল্লি। নোংঙাল্লগা মাগী নুপীনা শীন্দুনা সেল্ফ হেল্প গ্রুপকী নুপী ময়াম পূনশিল্লগা লৈকাইগী মৈরাশঙদা ৱাকৎ মীফম ফম্মী। মচী‑মচীদা পংঙাঙদা ঙাঙনৈ— “নোংঙানবদগী গাড়ী তোংলগা পংচত্তা চৎপনি, তাল চাদ্রদি লোন্না পৈশা য়াম্না তাল্লমদোইপোৎনি।”

“অদুনবু, লাখ তরাগী দিমান্দ তৌরক্লি নৎত্রো? নোংমগী থবক শূরগা হিংজবা নোয় ঐখোয়দা তৌরকপ্রনে?”

অমনমুক শমথরকই, “কদায়দৈ তান্দোইনোদা লাইরিক‑লাইশু নীংথিনা হৈবসু নত্তবা, মপা‑মপুনা কৈরাক থারকপসু নত্তবসিদা! তাল চাদ্রদি মানবু তৌশিন্নবা ওইরমগনি!”

নোংমা নীনীসি খরা ঈংথখ্রে তৌরগা পুলিস লাক্লগা তকখৎপা অমুক হৌরক্লে। কনাগা নুংঙাইনদবা লৈ? করি করি থবক তৌরকই? কনা কনা তিন্নরকই? ভোট চেনবা য়াওরকপ্রা? ঠিকাদারগা তিন্নরকপ্রা? মহৈরোয় লূপকা য়াওরকপ্রা? মথং মথং…! মঙোন্দা পীরম্বা দিমান্দ লেট্টরদু জেরোক্স কোপি অমা লৌখ্রে, মাগী ফোন নম্বরদুসু!

পুলিসনা হংলকপশিংদু মেন‑মান তাদনা পংখুম খুমখি। অশেংবা পাউখুমদি নুমিদাং মতোমতা খনবা হৌরকই—‘কনানা ওইবা য়াই তৌরক্লিবা ময়ামসে?‘ খনবা য়াবমখৈ খল্লসু পাউখুম ফংদে। মমৈথংদা য়াম্বুংদা শীৎ নান্না ৱারী লিথোক্লে। য়াম্বুংসু হান্ননা খরমখৈদি তারম্লে। মহাক্কীদি পূমতাই তাইওন্নবদা পুলিসনবু ওইরমগনি চেকশিল্লুবু হায়রকই! তাঙবা মদুসু খনজান্নৈ। অশেংবদু খঙদ্রবনিনা পংখন খনবসি অরানবনি করম্না হায়গনি?

য়ূমদগী কয়া চৎথোক্ত্রে। নোংঙানবদগী নুমিৎতাবা ফাওবা য়ূমগী মখাদা ঙাইহাক লৈতবা মহাক্না নুমিৎচূপ্পা শুরু‑শুরু নৈশিল্লগা লৈরকপসিনা হেন্না অৱাবা অমনি। নীনী হুম্নি শুরকপদদি ইংখোলগী থবক্কা খরা খরা শূরক্লে। মচানুপী অতোম্বী চহী তরুকমুক্তা ঙায়রিবীদুনা স্কুলগী ভেনদগী প্রপ‑প্রপ কূমথরক্লগা মপাদা চে মচেৎ অমা পীরক্তুনা হায়রকই, “পাপা, পাপা, কাকা অমনা পাপাদা পীয়ু হায়দুনা পীরকপনি।”

চে মচেৎনি ফাক্তোক্তুনা য়েংই। তাঙবা শ্বায় লাউই।

“নচানুপীসে নুংশিরেনেকো!

—শানোংবা লাই”

মসিদগী হেন্না করিগুম্বা মরোল অমত্তা ইরক্তে। ফোন নম্বর অনৌবা অমগা হাপ্লকই। তাঙবা ভেন দ্রাইভরদা থুনা ফোন তৌই। মহাক্কদি কনাগুম্বা অমত্তা থেংনদে হায়রকই। মথংগী নুমিত্তগীদি মচানুপী অতোম্বীসে মহাক মশামক্না থিনবা লৌবা তৌরে।

“কয়াম কুইনা শুমাইনা সুম লৈখিগদৌরিগে?” মাগী নুপী লৈরাংনা হৌদোরকই। তশেংবগীদি তূম্ফম‑চাফম খঙদ্রে। য়াম্বুংনসু মতেং পাংফম ইখঙ খঙদা। অঙাংশিংগী চৎথোক‑চৎশিন তৌবা ফাওবা পংকিদা কিনরে।

“মখোয়না হায়বা শেলদু য়াওদ্রদি উনরোই মূক্তনা লৈখ্রেদনা! হৌজিকপু কদায়দগী লাক্ষ তরানো? লেন তাখিবগী হোরিবা জিঙ্ঘসি ফাওবা শিনবা ঙমদ্রিঙৈসিদা!” লৈরাংনা ঙাইহাক খল্লগা হায়রকই, “নুপা! য়াগদবা অমা লৈরে, পৈশাদো থৌরাং তৌরে হায়শিন্নরগা উনরসি। উবু উনরবা ঐ তৌগে। হাৎকে হাৎচখিসনু ইচা শোক্কদৌ শরুকপুদি!”

তাঙবসু মুন্না খল্লি। লৈরাংনা হায়রিবদু য়াই। মদু নত্তনা লম্বী অমত্তা লৈতে। অকোনবগী ফোন নম্বরদুদা মাগী নুপীগী নম্বরদগী তৌশিল্লি। উননবা মফম, মতম হায়নরে।

লৈরাং শোয়দ‑ঙামদনবা লাইনীংথৌ সনামহী খুরুমজৈ। কনামত্তা খঙহন্দে। নিংশাস্বর খোঙফম য়েংলগা থোরক্লে। মন্ত্রীপূখ্রি চুম্ব্রৈ মখোঙদা লৈবা রেষ্টুরেন্ট অমদা থেংনৈ। নুপাদু মশা নাল্লি, কুচু‑কুমেন পাল্লি, চহী য়াংখৈমুক্কী লেঙ্গা ওইগনি। শানোংবা ওইরিদ্রা নৎত্রগা অনৌবা পার্টিদুগী লুচিংপুরেন ওইরিদ্রা? তাঙবা খন্না খন্না চঙশিল্লি। লৈরাংসু নাকলদা লেপ্পি। তাঙবনা কৌরুই, “শনোংবা ওইবিরব্রা?”

মুন্না য়েংখৎলকই, ফম্মু হায়না ইঙ্গিৎ তৌরকই। অয়ূক্কী পূং তরামুক তাবদা ঙায়রি রেষ্টুরেন্টতু অতোপ্পা ভিজিটর লাক্নদ্রি। কাদু ইচীক চীকই, ম্যুজিক অমা তপ্না তপ্না খোংই। টেবল অমদা মায় মায় ওনশিন্নরগা ফম্মী। তাঙবা ৱারী হৌদোরকই, “সার…!”

নুপাদুনা মরক থৎলকই, “শেলদি কদায়?”

“সার ঐখোয়গী ৱাসে…” লৈরাংনা হায়নীংলিবদু লোইদ্রিঙৈদা অমুক্কসু থৎচিল্লকই, “ঐ নুপীগা ৱারী শানবা পামদে।” তাঙবনা মাগী নুপীদা ইঙ্গিৎ তৌই, তূমিন লৈয়ু হায়বগুম! লৈরাং চপ লেপখ্রে। “অদোমগীসে মী ওন্নরমগনি খল্লি, অমুক্তংগা য়েংবিয়ু!” তাঙবনা অমুক্কা হায়জৈ।

“নঙনা খল্লিবদুনা হেন্না ওন্নরে, শেলদি কদায়? লোইশিল্লসি।” তাঙবা খুম্লকই, “করিগুম্বা ঐনা লুপা লাখ তরাগী মপু ওইরম্লবদি শিফম নাফম খঙদবা শিনফম খরা পায়রিবসে পায়রম্লোই হায়না খল্লি!”

“নঙ তশেংনা লৈতব্রা?” নুপাদুনা পূকচেল তিংনা হংলকই। “লৈতে!”

“মদু ঐনা করম্না থাজগনি? ঐঙোন্দা য়েংলগা হায়য়ুনে ঐসিবু লাখ তরাগী মপু ওইদে হায়বসি নঙবু থাজব্রা?”

তাঙবা চপ লেপ্লগা মুন্না য়েংই নুপাদুদা। “থাজরম্লোইনে?” নুপাদুনা মখা তারকই। ঙাঙনরিবদু লৈরাং লৌশিনবা ইঙম ঙমদে। তাঙবা ৱা অমত্তা ঙাঙদনা ঙাইহাক তূমিন্না লৈ। নুপাদুনা মাগী বেগতগী ইনভেলপ অমা লৌথোরক্লগা টেবল মথক্তা থম্মী। অদুগা হায়রকই, “সে, চেসি লৌশিল্লু, নঙনা ঐঙোন্দা থারকপা লুপা লাখ তরাগী দিমান্দ লেট্টরদুনি।” চেদু থনম্লগা নুপাদু হৌগত্তুনা চৎখি। মতৈ‑মনাওদু ওনশিন্নদুনা তিংঙক‑মাইঙক য়েংদুনা লৈহৌই।

খম্বীগী মশুনুপা তোন্দোনবদু পেনা খোংবা ফজনা হৈরে। মখূৎ চৎলে, খোল্লৈ‑খোন্দা ফজনা শৈহেক চুম্না শকপা ঙম্লে। মশুনুপানা অসুম্না মতম ইচঙ চঙদনা থোইদোক হেন্দোক্না ফিভমসি য়ৌরকপদা মশু‑মবেনগী থম্মোয়দা হরাওজরবসু ইমুংসিদদি নোংম‑নোংমগী মৈশা লাংবা হেনগৎলকই। মমা‑মপাগী অথিংবা মরক্তা লোন্না খরা ফোংনা খরা শিন্দম্বা চৎচরম্বদু য়াররোই হায়না চাননা থিংলক্লে।

মচানুপানা খম্বীদা হায়, “ইমা নশুনুপা অতোম্বা, ঐখোয় তোন্দোম্বসে পেনা খোংবা তম্বা চৎপসি তোকহল্লসিবা?”

“এ করিগী! অসুক ৱানা তমজদুনা খরা হৈজরক্লবা মতমসিদা করি তৌরে হায়রিবনো?”

“ইমা হৌজিকপু পেনা খোংবা তম্বসিনা কৈদৌনদোইনো? নহানৱাই ইমাখোয় পাবখোয় মতমদা অদুক চৎনরম্বগী ৱানি, হৌজিক্কী মতমসিদদি চন্নদ্রে। চন্নফম লৈত্রবনি। অদুগীসু মথক্তা নশুনুপীসি লাইরিক‑লাইশুদা মপূক্নিং চঙদ্রে। কান্নদবদা পেনা খোংবা তম্বসিদা ওইনা মপূক্নিং চঙদুনা লৈরে।”

“য়ে অদুবুদি মাসু লাইরিক তম্না তম্না পেনা অসুম তমজসনু। মসিনা চানি হায়বৈ ৱাসু নত্তে। নপানা সুম পামজরম্বগী মশু অমতং শিনফমসিবু হৈজহৌনবা হায়না অদুগী অদুক ঐনা ইশুবু পেনা তমহনবনিদা।”

শানরিবা ৱারীদুগী মরক থৎলদুনা মমৌনুপীনা খুল্লকই, “কদায়দগী কদায়দগী লাইরিক তম্বগা পেনা খোংবা তম্বগা পূনশিন্নবা য়াপোৎ নৎত্রে। খূদৈ‑খুরাং শেৎপা, হনু‑হন্থী খরা পূল্লগা ওজানি গুরুনি হায়দুনা মীমাঙ‑পুমাঙ নাইদবমখৈ মীখোঙ শোক্তুনা হেক্তা খুরুম্বা হৌজিক মতমসিদদি য়াম্না চানদ্রে। ওদ ওইরে। মাগী মতৌসিদা মী খূদিংনা নোক্নরবনি,” নোকফেৎ তৌরদুনা খম্বীনা হায়।

“অহল‑লমন মশক খঙবা, তাকপি‑তম্বিবা ওজাবু উরগা খুরুমজবসিবু করি কায়রগেনে ইবেম্মা?”

“কায় কায়, য়াম্না কায়। মমান‑মমান্নবশিংনা দোক্টর, এঞ্জিন্নিয়ার, সাইন্টিষ্ট ওইনি হায়দনা কন্না হোৎনরিবা মতমসিদা মানা হনু‑হন্থী মতমগী ৱাখলদুদগী হেন্দোক্ত্রে। মকোকসে অফবা অমতা খনবা ঙমদ্রে। মপুন্সিসে মাঙলোমদা চৎত্রে মনীং হন্দুনা লৈরে? নূংগী যুগকী ৱাখলদা।”

নুমিৎতুদগী নমদুনা থিংখি। মচাগা মমৌগনা মশুনুপাবু কূপশেন শেন্দুনা থমখ্রে। চুম্না পেনা খোংবা তম্বা চৎপা য়ারোই হায়না থিংবতা নত্তনা মবোক্কী মনাক্তা তূমজ‑হীপচ তৌজবদু ফাওবা থিংদুনা চঙহল্লকখিদ্রে। লাইরিক‑লাইশুদা হেন্না মায় ওনশিন্নবা অতম্ননা শীনখ্রে।

মশুনুপা তোন্দোম্বনসু মবোক্কুম হায়জৈ, “লাইরিক তম্না তম্না অহাঙবা মতমদা পামজবা পেনা খোংবগী শিনফমসিসু অদুম তমজগে।”

মমাগা মপাগনদি চৈদুম চৈহৎপি।

“হৌজিক মতমদা পেনা খোংবনা কৈদৌদৈনো? শীজিন্নফম চন্নফম লৈত্রবা পোৎসিগা শাগোন্নরগা পুন্সিদো কাঙখথাঙ ওইরগেরা?”

মমৌনুপীনা লাই অমা য়াওই। হায়গে মতাগুম মচীন পেন্না‑পেন্না হায়, “হৌজিক মতমসিদবু পেনা শকফম্বু কদায়দা লৈরিবগে? পেনা খোংবনা ফাওগে ফাওরবদা লাইবুংদা… আ… লাই হরাওবগী লাই শুমাঙদা মঙায় অদুসু মাইবা‑মাইবীগী খৌবুনাইদৌনা।”

ৱাফমসি ফাওবদি খম্বী তাদুনা লৈবা ঙমশিল্লক্ত্রে তশেংনা শাউনীংলক্লে। ইমুংসিগী হৌরকফম্বু কাউথোক্তুনা অসুক উশিত্তনা ঙাঙবসিমক্তি লাইওইখ্রবা মপুরোইববু করেম্নবগুম ফাওই। মপূক্নিং নুংশিরকই।

খম্বীগী মপুরোইবা মেরা মতম অমগী পেনাগী ওজানি। ওজাবু খঙহৌ‑উহৌবশিংনদি হৌজিক ফাওবা শোন্নরি। ওজা মেরাগী খোল্লৈ‑খোন্দা শৈহেক্তু নম্বিনবা মী হৌজিক ফাওবা থোরক্ত্রি হায়বা য়াই।

চুম্মী, তশেংনমক ওজা মেরা পেনাগী লমদদি লম্বা লৈতনা লৈপাক নিংথৌনা শকখঙবিরদুনা মাবু সনা কোনুংগী পেনা লোয়শঙগী ফমথোন মকোক ওইহন্দুনা থৌগায় পুহল্লম্মী। মদুমক্না হৌরকফম মখুঙ্গংবু থাদোক্তুনা সনা কোনুংগসু নক্নবা হায়দুনা ৱাংখৈ কৈথেল অশাংবীসিদা য়ূম হোংলক্তুনা লৈরকখিবনি। মতমদুদগী ওজাগী মচানুপাসিসু ইম্ফালদা মপূং ফানা মহৈ তমহনবা ঙমজরে। ওজা মচীনমক্নসু হায়জৈ।

“খুঙ্গংদা পোকচবা লৌমী মচা ঐবু ইপাদুনা পেনাগী শিনফমসি নীংথিনা হৈহনবিদুনা মহৈ চাহনবিরে অদুম্নমক ওইদুনসু ঐনা লাইরিক‑লাইশু নীংথিনা হৈহৌদবগী লৈরিবা অৱাৎপা অসিমদি ইচানুপাগী মফমদা থোকহল্লোই। ঐহাকথকসিদা ইচাবু অফবা স্কুলদা মহৈ নীংথিনা তমহন্দুনা অচৌবা ওফিসার অমদি ওইহন্নীংই।

মশাগী অনীংবসিমক থবক ওইনা পাঙথোরকই ওজা মেরানা। ময়ূমদা পেনাগী শিন্দম শঙলেন লিংখৎতুনা মচা‑মনাই কয়াদা শিন্দম্বিরবসু মচানুপাবুদি শিনফমসিদা পুশিন্দে অহোয়নদুম অফবা ইংলিশ স্কুলদা মহৈ তমহন্দুনা মহৈ‑মশিংগী মঙাল নীংথিনা তানশিনহল্লকই।

মতমদু খম্বী য়াম্না নুংঙাইরম্মী। মাগী মী ৱাত্তে মচা‑মনাই ময়াম্না পীক থল্লি। মপুরোইবনা তানশিঞ্জরকপা শেল‑থুম মীয়ামগী ইকাই খুম্নবিবা খ্বাই ময়ামদুনা ইমুংসি ওখাক মপাল ফরম্মী। ইমুংসিনা মপাল ফরিঙৈ, মপুরোইবনা মরায় চায়থরক্ত্রিঙৈদা অমতং পোকচবা মচানুপাবু লোয়শঙগী থবক তৌবী শকসু ফজবী নিঙোল অমবু মমৌ ওইনা ফংজখি।

নুংঙাইরবা পুন্সিসিগী নুংঙাইবা মরক্তা মপুরোইবগী পুন্সিদা ইপেন পেঞ্জদবা অমদি অদুম্মক লোয়নখি। মপুরোইবনা পামজখিবা পেনা খোংবগী শিনফমসি হৌরক্লিবা মশুশিংগী মরক্তগী অমতংদি হৈহন্দুনা মাগী হৈজবা পূম্বা শিন্নরম্বদুনা পাথাং‑পুথাংগী লীক্লম কায়দনা চত্থজহৌবা পাম্বগী নীংজবসিমক্তি ফংখিদ্রে। অহোয়নদুম ওন্ন‑তৈনবদা মচা‑মমৌনা শিনফমবু কয়া হকচিন্না লৌবিদ্রে।

মখোয়গী মতৌসিদা ইপেন পেঞ্জদ্রবা ওজা মেরানা মাগী নুপী খম্বীদা ইত‍ৎ তত্তনা হায়, “ঐগী শিনফমসিদা ইশু‘মতংদি মতুং ইলহঞ্জনীংবনি অদুবু উপায় লৈত্রে। চুম্না ইতুং ইনবিগদবতা নত্তনা শিনফমসি ফাওবা ইকাই খুম্নবিদ্রে। অদুনা হয়েং ঐনা থূপখ্রবা তুংদা নঙনা ঐগী ইখূৎসু অসিবুদি নীংথিনা ঐনা তৌরিবা অসিগুম্না পূজা তৌদুনা থম্লকউ। নঙনা শেন্নবা ঙম্লক্ত্রবা মতমদা নঙনা থাজবা কনানো ঐনা তম্বিরম্বা ইতুং ইল্লিবশিং অসিগী মরক্তগী অমদা মফম খঙনা শিন্নরম্মু।”

ঙাক্লি। খম্বীনা মপুরোইবনা মফমদা শিন্নরম্বদুমক ঙাক্তুনা লাক্লি। মপুরোইবা লৈখিদ্রবা মতুংদা মপুরোইবনা হিংলিঙে তাকপি‑তম্বিরকপা ওজা‑গুরুশিং খুরুমজদুনা পেনা ঔরাইফম কাসিমক্তদা মপুরোইবমক্নি খঞ্জদুনা মপুরোইবগী মিতম অমদি খূৎশু পেনাশিং নুংতি নুমিৎ খূদিংগী থৌনিজরদুনা খুরুম্লি।

মপুরোইবনা লৈখিদবা নুমিৎকী কুমওন খূদিং কাসিদা চারামক হেন্না ইরাৎ পূজা তৌজরি। খম্বীনা অসুম্না নুংতিগী খুরুমজবা চহীগী ওইনা পূজা তৌজরিবা অসিদা মশুনুপা অতোম্বদি তত্তনা য়াওজৈ। খম্বীনসু মধৌগী ৱারী মশুনুপাদা ইতৎ তত্তনা লীবি। মধৌগী ৱারীবু খোয়জংনা তাজরিবা মশুনুপা তোন্দোনবনা নোংমা মবোক্তা হায়রকই, “বোবোক ঐসু পেনা খোংবসে যায়া হৈনীংই, বোবোক্না অমুক্তা তমহনবিয়ুবা।”

নুমিত্তু খম্বী মকোক্তগী মখোঙ ফাওবা তু চুংখিবা খঙহৌদে। মশুনুপা তোন্দোনবসি মপুরোইবনা লৈখিদ্রবা মতুংদা তাইবং ফাওরকখিবনি। মসিমক্না মানসু লৈখিদ্রবা মপুরোইবনা হল্লকপনি খঞ্জদুনা মশুনুপাবু অতৈ মশুশিংদগী থোইনা হেন্না লুন‑চান্না তৌজরকপনি। ইথা থাজদনা চহী নুপাল মাপলতা ঙায়জরিবা মশুনুপাগী ৱাহৈসিনা খম্বীনা মপূক্নিংগী নীংজবদু থোইনা হেন্না চূশিন্নহল্লে। ৱাখলদা মওন‑মওন খল্লকখি। নুমিত্তুদগী অহীং কয়া তূমদনা খল্লবা মতুংদা অচেৎপা ফিরেপ অমগা লোয়ননা মপূক্নিংদা চপ য়ুংনা লেপখি। মশুনুপাবু শেম্লগে, লাইওইখ্রবা মপুরোইবগী খূদুং ইলহন্দুনা মপুরোইবনা পামজরম্বদুমক পাঙথোক্লগে হায়না। পন্থখিদে মপুরোইবগী মতুং ইল্লম্বা হৌজিক্না পেনা খোংবগী শিনফমসিদা তাকপি‑তম্বিবগী থবক তৌরিবা ওজা ইবোমচাগী মফমদা চৎতুনা তানরুই। ওজানসু হরাও হরাও তৌবিদুনা মশুনুপাবু মহৈ তম্বিবা হৌখি। খম্বীনসু মথৌ অমা ওইনা নুংতিগী মশুনুপাবু থিন্দোক‑থিঞ্জিন তৌদুনা শিন্দম্বা মপূং ফানবা হোৎনজরকখিবনি। মশাদা পীথোরকপা অমা য়াওবগুম থোইনা হেন্না খূমাঙ চাওশিল্লকখি। চহী অনী লেপ্তনা মহৈ তমজরক্তুনা মপূং ফারমদাইসিদনি ঙসি মচানুপাগা মমৌগনা মশুনুপাবু পেনা খোংবা তম্বা চৎপা য়ারোই হায়না থিংলক্লিবসি।

মমা‑মপাগী অথিংবা মরক্তা মশুনুপা তোন্দোনবসু হন্দ্রে। মমা‑মপাবু কিবদগী মখোয়গী মমাঙদা অদুক পেনা খোংববু লায়থোক্তুনা লাইরিক‑লাইশুদা পূক্নিং চঙবা শারদুনা মমা‑মপা লৈতবা মতমদা তাঞ্জা য়েংদুনা লোন্না লোন্না পেনা খোংবা তম্বা চৎলি, লেপ্তনা হোৎনরি। খম্বীনসু নুংদা লোন্না মশুবু মতেং পাংলি পোরম য়াৎলি।

নহান নোংমা থামুক্কী মমাঙদা মশুনুপা তোন্দোনবনা মবোক্তা লোন্না তম্মী, “বোবোক মীগী লমদা আ জর্মনদা চৎতুনা উৎকদবা থৌরম অমা য়াওরুনবা অথোয়‑অহেন তান্নবদা ঐনা মকোক তারে। ভারতকী ওইনা ঐবু চৎনবা খল্লক্লে, চত্তবা য়ারোইদৌরি করম তৌসিগে?”

“চুম্লব্রনে হায়রিসিবো? কৈদৌঙৈ চৎকদবনো?”

“মথং থাগী তারিখ ৫ দা চৎকদবনি।”

“শেলদি কয়াম চঙগদৌরিবা?”

“শেলদি য়াম্না চঙগনি অদুবু ঐখোয়না পুথোক্লোই ভারত সরকারনা পুথোকপিগদবনি, ঐখোয়গী হায়ববু ইশাগী খূৎপায়শেল ওইনবা খরা পুগদৌ মঙায়, অদুসু ঐগীবুদি ওজানা পুথোকপিগে হায়।”

“নঙ ওজাসু য়াওগদৌরিব্রা হায়রিসে।”

“ওজাগা থারগা ঐখোয় মরিনি মণিপুরদগী চৎতৌরিবসি। অদুবু ঐ য়াওদ্রবদি মখোয়সু চৎপা য়ারোইদৌরিবনি। করিগুম্বদা লাইবক ফদুনা মফমদুদসু মকোক থোংলবদি শেলসু য়াম্না ফংনি হায়রি, করম তৌসিগে বোবোক?”

“ইশুবু চৎনীংব্রনে?”

“বোবোক ঐদি য়াম্না চৎনীংঙে, অদুদা বাবাখোয়নদি য়ারোইদৌসিনি!”

“নমাগা নপাগদা হায়রুরগা অরেম্বা তাদুনা নীংবা কায়নবনি, কান্নদে মখোয় তাহল্লরোইসি।”

“হোই বোবোক।”

মশু‑মবেন লোন্না ৱা তানখিবা নুমিতুদগী তোন্দোনবা লাইরিক‑লাইশু তম্বদা হেন্না পূক্নিং চঙখ্রে। নুংতিগী মপানা থিল্লম্বা প্রাইভেট তম্বদু সাইকল থৌদুনা মতোমতা চৎচরে। স্কুলসু মতম চানা চৎলে হল্লক্লগসু মাগী কাদা লাইরিক‑লাইশু ঔরাইদুনা লৈরে। মবোক্কী মনাক্তসু শুকচঙবু চঙদ্রে। খম্বীসু অদুমঙায় মশা নুংঙাইতে হায়দুনা নুংতিগী অয়ূক্তা, নুমিদাংৱাইরমদা গোবিন্দ খুরুম্বা চৎপদু নত্তনা ময়ূমদগী মপাল কয়া থোক্ত্রে। মশু‑মবেনগী হোংলক্লিবা মতৌদুদা ইমুংসিগী মীপূম খূদিংমক হান্নগুম ৱা‑লাং কয়া ঙাঙনদ্রে। মচানুপাগা মমৌগদি মখোয়গী অনীংবদু ফংজরদুনা মশাদু নে তাজরে। মকোক শানরম্বদু ঈংজরে। মখোয়গী ঈং‑তপ্পগী মওংসে কুইদে। ঙসি অয়ূক খম্বীনা গোবিন্দ খুরুম্বা হল্লকপদা মচানুপাগা মমৌগদু মশুনুপা তোন্দোনবা থিবা খঙদ্রে মাঙখ্রে হায়দুনা ঈরাং লাঙনরম্মী।

খম্বী লাকপা উবদা মচানুপানা হংলকই, “ইমা ঐখোয় তোন্দোনবদুবু কদায় চৎকনিগা হায়রমগে ইমাবু খঙব্রো?”

“খঙদেনহে। মাবু অয়ূক অয়ূক লাইরিক তম্বা চৎপদাইনে, চৎলম্নি কৈদৌরে?”

“চৎত্রে, চৎত্রে লাইরিক তম্বদো চৎলমদ্রে। মাগী ওজাদো হৌজিক ঐখোয়না ৱাকিং চৎপদা থেংনরকই। ওজাদুনা তম্লকপনি তোন্দোনবদি লাইরিক তম্বা লাকখিদবা ঙসি তরানিমুক শুরে, স্কুলদসু লাক্তবা ফনা কুইরম্লে।”

“অদুদি মাদি কদায় চৎখ্রবা? লাইরিক‑লাইশুগদি লৈব্রো মাগী কাদা?”

“লৈ লোইনা লৈ, সাইকলদি লৈরমদে। নহানমখৈ ঐখোয়না অয়ূক ৱাকিং চৎলিঙৈদা মানা টুইসন হেক হেক চৎলম্বদুদা ঐখোয়দি লেপ্তনা অদুম চৎলিবোই নীংলুবনি অদুগদি মাদি চৎলমদ্রেনে।”

“মচেখোয়, ময়াম্বখোয়গী মনাক্তগদি লাক্তে হায়বরো?”

“মীগী বোর্দিংদুদা মানা চঙবগা য়াপোৎ নত্তেদা অদুমকপু মমানা ফোনদা হংলবনি নোংমতা লাক্তে হায়। কদায়দনো মানা চৎলিসিবো?”

ময়াম ইরাঙ লাঙনৈ। লৈরম্বা য়াই চৎলম্বা য়াই খনবা খরা অদুক মমানা ফোন তৌদুনা হংনৈ কনাসু খঙবা উবগী ৱা য়াওনদে।

খম্বীনা হায়, “চৎলু কোইরেঙ্গৈগী নঙ মামহনগীদা হংলু অদুদদি মা হেক হেক চৎপদাই?”

“হোয়নে মখোয়রোমদদি হেক হেক চৎপনিনে মদো।”

মপানা ফোন নম্বর থি, ফংদ্রে। উপায় লৈত্রদুনা কান্নররোই চত্তা চৎলুরসি হায়না মতৈ‑মনাও গাড়ী থৌদোরকই।

মমৌনুপীনা খম্বীদা হায়জরম্মী, “ইমা ঐখোয় অমুক চৎলুখিগে। ঐখোয়না চৎখ্রিঙৈদা কৈগুম্বা লাক‑লাক্লদি মখোঙ মখূত্তো পুল্লগা খরা থম্বিরম্মু।”

খম্বী মশাদু তহা‑তহাজদে। চত্থোক্লুবগী মখোঙ মখূত্তু শেংদোক‑চামথোক্লদুনা মপুরোইবগী মিতম ইরাৎচরিবা কাদুদা চঙনবা থৌরাং তৌরি।

এরোপ্লেন অমা খোঞ্জেল লূম্না অতিয়া তম্না পাইখৎলকই। খম্বী শুমাঙ মতোন্দগী য়েংনীংনা য়েংলি মাগী মীৎয়েংগী ৱাংমা লানখিদ্রিবা ফাওবা। নীংশিংলকই—মপুরোইবনা মহৌশা মপাল লমদা পেনাগী থৌরম য়াওবা হেক হেক চৎখিবদু। নীংশিংবগী শাফূদুনা থিংঙমদ্রবা পি ঈহৌরকই, পিরাংলক্তা খম্বী ৱাখলনা লাকশিন্দুনা উরকই মশুনুপা তোন্দোনবা অমদি মাগী ওজাগী শক্তম। তারক্তনবা থিঙ্গৎলিবা পিদু পুরদুনা চঙলকই মপুরোইবগী মিতম কাদা খম্বী। মানা গোবিন্দদগী পুরকপা নির্মল্যগী লৈদু কচ্চরদুনা পেন্না কপচৈ।

“ইবুংঙো ঙসিদি মপুগী শিনফম খুদুং ইনহঞ্জখ্রে, ইশুবু শোয়দ‑ঙামদনা মায় পাকহনবিয়ুকো।”

শিলহৈবা খুঙ্গং অসিগী পি ঐচ সি অসিদা নৌনা লাকপা এম ওনি। মমাঙগী এম ও অদু ট্রান্সফর চৎখিবদগী কনামত্তা লাকখিদবা থা তরারোমগী মতুংদা মহাকপু থারকপনি। বমদিয়ারদগীনি হায়গুম তৌই, অশেংবদি কনাসু খঙনদে। শিলহৈবা চহী কুন্থ্রাতরেৎ নিপালমুক্কী লেঙ্গানি। চূং‑ফিরাল চায়, ঈং‑তপ্পি, কুচু ঙৌই। মাগী কূক লৈতে, মশানা থোংজৈ। মশানা কৈথেল চৎতুনা এন্সাং‑নাপী লৈজৈ। মশানা মশাগী ফি শূজৈ। “তামো, চাক চারব্রো?” মেমথোইনা হংই। মেমথোই শিলহৈবগী ক্বার্টরগা থংননা লৈবনি। খুলগী কোলেজ অমদা বি এ তম্লি। শাওং‑শাদা নীংথিজবীনি। পূকচেল লোমদে। নাইতোম পোকপীনিনা মমা‑মপানা নুমিৎ‑থাগুম য়েংজরিবীনি। শিলহৈবগী অৱাৎ‑অপা মেমথোইগী মমা‑মপানা হেক হেক য়েংশিনবি। করিগুম্বা কালদা মেমথোইনা শিলহৈবগী চাক থোংবিবসু য়াওই। “চাদ্রিয়ে মেমথোই। ওফিসকী থবক খরা লৈরি মসি লোইরগা থোংলগে।” “য়াম্না থেঙলে ঐ থোংবিয়ুরো?” “এ থোংবিনু থোংবিনু, নঙ ৱাগনি।” “চাক থোংবদি নুপী ঐখোয়গী ইথৌ ওইদুনা লাক্লবনি করিগী ৱাগদৌরিবনো?” “নঙবু কোলেজ চৎত্রবরা?” “ঙসিদি চৎত্রে।” “কৈদৌরবা?” “মূদ লৈত্রবা।”

নোংমা নীনী লৈরগা লৈকায়গী নুংশিরৈ মেমথোইহোয়দা কোয়রকই। মেমথোইগী মমা তম্ফামনীগা ৱারী কুইনা শানৈ। “তম্ফামনী, ঐখোয় দোক্টর অসিবু পাখঙলো?” নুংশিরৈনা হংই। “খঙদেনে। ঐখোয়নসু নোংমতা হংলুদে, মাসু হায়দে।” মেমথোইদা ওনশিল্লগা হংলকই, “নঙবু খঙব্রনে মেমথোই?” “ঐসু খঙদেয়ে ইমা,” মেমথোই শঙ্গোয়দা ফি শানা শানা লাউরকই। “মসিগী দোক্টর অসে মশকসু ফজৈ, মবূক‑মপাউসু ফৈ, ঈং‑তপ্পী। চীংনা লেম্লিবা। অমুক্তা হংঙুদনা?” তম্ফমনীনা হায়রকই, “করিগীনো নঙনা মদু খঙনীংলিববো?” “হেরা পাখঙ ওইরবদি ঐগী ইচানুপী থোইবীদু পীগে তৌবনে।” মেমথোই তাদনবা মখোল পীকথরগা অমুক হায়রকই, “নঙবু নচানুপী অসি মঙোন্দা থাজগেনা খনবকাদি লৈতেকো?” মেমথোই নুংশিরৈনা হায়রিদু তায়। খল্লি—ওন্থোক্না পক্ত্রেদকো তৌরিসে! “হেরা! কদায়দগীনোদা,” তম্ফামনীনা হায়রকই। “অদুদি নঙ খরা অমুক্তা হংবিরকউদনা?” “হোয় হোয়।” মেমথোই শাউনীংলকই। মশাদা হায়জৈ—‘মচানুপী য়াপোবীদো! য়ারক্লনি। করি থোকএনা তৌজশারিনো!’ “তামো, ফিদো ঐ শূবিরগে?” “এ য়াদে য়াদে। শূবিনু।” “করিগীনো ঐখোয়গা য়াম্না নক্ননীংদবগী ৱারা?” “অদুগী নত্তেয়ে। ঐসে মীগী লমন্না খ্বাঙ কোয়রে, হৌগৎপা ঙমদ্রে। অদুগী মথক্তা মীনা নঙবু থীনা ঙাঙনবিগনি। নখোয়গী বোয়ফ্রেন্দনা ঐবু হাৎকেকা হায়বিরোইদ্রাও?” “চরোদা অসিবু ৱানেনা!” মেমথোই ফিদু শূদোকপিরে অদুগা থৌরীদা য়ান্দুনা ফৌদোকপিরে। “এন্সাংদো ঐ শেমদোকপিরম্লগে।” “ফরে ফরে। এন্সাংসিখক শেমদোকপিরম্মো। চাক থোংবিগেকাদি হায়রক্লনুকো।” “হ! মসিগী নুপাসিদি!” মেমথোইনা এন্সাং শেম্না শেম্না হংই, “তামোগী য়ূমসি কদায়দনো?” “কিয়াম সিফায়।” “অ… তামোবু য়ূম পাল্লবরা?” মেমথোই ইকায়রপ তৌনা হংই। “পাল্লে। অহুম্লক্তুম শুরে।” “হৈমা! অশেংবৈরো?” “অশেংবৈ নত্তদি করিনো?” “অহানবদুদি কৈদৌরবা?” “লুহোংবা কুইদ্রিঙৈ অতোপ্পা নুপা অমদা চেনখ্রবা।” “অস! নুংঙাইতেদা। অসুক ফখ্রবা তামোবু থাদোক্লগা চৎখ্রিবনিনে?” “মাগী হান্না কোয়নবা নুপাদুদনি, মশানা পামদুনা চৎচখিবদু ঐনা করি হায়রুদৌরিবনো?” “অনীশুবীদুদি…?” “অদুনা লৈখিদ্রে।” “কমদৌনা?” “টাইফোইদনা নাদুনা লৈখিদবনি।” “ওহো! নুংঙাইতেদা।” “শিখ্রবদি শিখ্রেদনা। শিখ্রবা মীগীদমক ৱাদুনা সুম লৈবা য়াব্রো?” “অদুগা হৌজিক্কী ইনম্মসিদি কদায়দগী?” “খুলদুদগীনি।” “ফরমগনি।” “ফখ্রে ফখ্রে চীন থী হায়নি। মশক্নগা ফজরিবা, লাইরিক্নগা হৈরিবা। ঐবু ওন্থোক্না লুনা তৌবিখ্রপোৎনি। ইকায়‑হঙ্গোইদনা হায়রবদা খম্বনকাসু চাউখ্রপোৎনিদা!” মেমথোই মচীন খুম্লগা নোকই। হায়রকই, “ও য়াম্না ফৈনে।” মখা তারকই, “অদু মাবু সিদা অমুক্তা পুবিরকউদনা?” “আদা অঙাংশিং কনানা য়েংশিনবিগনি?” “তামোগী অঙাংবু কয়ানো?" “তরেৎ—নুপী তরূক নুপা অমা। নুপা তানবদা তরেৎ শুদোকখ্রিবনি।” মেমথোইনা নোকমি নোকমি হায়রকই, “ওন্থোক্না য়ামখ্রেদা! য়াম থাজদেয়ে দোক্টরনবু। ফেমিলি প্লান্নিংকা অমত্তা তৌহৌদ্রবরা?” “এ লাইনা পীবনি।” মেমথোই থীক‑থীক নোকথোরকই; ইসু ইকায়খি। “লাইসু য়াম থাজরিজাৎনিনে!” “হোয়। থাজদবা য়াব্রো? লেঙলি‑পাল্লিবা ময়ামসিবু ঙাকপি‑শেনবিবা তাইবং মপু অমা লৈফম থোক্ত্রো?” “চুম্মী চুম্মী।” মেমথোই এন্সাং শেম্বা লোইরদুনা চৎলগে হায়রম্লগা থোরক্লে। খঙহৌদনা মংলকপা নোংনা থাজবু লুমশিনখিবগুম মাগী মায়থোঙ লাংশিনখ্রে। ময়ূম য়ৌরে। মেমথোই মথ্বায় নুংঙাইতনা ফমুংদা হীপথখ্রে।

মতম খরদি শিলহৈবনা মেমথোইবু উখিদ্রে। মাগী কার্টরদসু চঙলকখিদ্রে। মমানা শিলহৈবগী অৱাৎ‑অপা হংবিরুচো হায়বসু ৱায় হায়দুনা কয়া চৎখিদ্রে। করিগুম্বা লম্বীদা থেংনরবসু কৌনীংগুম কৌনীংদগুম তৌরক্লে। ঙসি মেমথোইগী মমা নারে হায়দুনা মমাগী হীদাক লৌবা পি এচ সিদা লাকই। “ঐখোয়রোমদকা লাকপিখিদ্রে, কৈদৌরগে?” শিলহৈবনা হীদাক পীনা পীনা হংই। “কৈসু তৌদে।” “মরম অমদি লৈরমগনিদা।” “ঐনা সুম নখোয় কার্টরদা লাক্লবদি ইনম্মহোয় ইমাখোয়না করি খনখিগদগে?” “মদুসু চুম্মী। অদুগীসু মথক্তা নঙগী চান্নজবা অমা…!” “মদু হায়রক্কনু তানীংদে।” “লৈবু লৈত্রা হায়রিসিবো?” “লৈ। কুন্থ্রামুক!” মেমথোই ফৎ হাইদোক্লগা চৎখ্রে।

মেমথোই শম্বল লান্থোক্লগা শিলহৈবগী কার্টরদা চঙলকই। শুমাঙদা লেপ্লগা মখ্বাঙ মেৎলদুনা লাউরকই, “তামো! মপান্দা থোক্লকউ লাউ।” শিলহৈবা পাখৎপা অমগা লোয়ননা করি তৌরবগে হায়দুনা মপান্দা প্রপ‑প্রপ থোক্লকই। “করি তৌরে মেমথোই?” “করিনো তামোনা তৌরিবসে?” “ঐবু কৈদৌরবগে?” “তামোনা করিগীনো হা য়ূম অহুম্লক পাল্লে অঙাং তরেৎ শুরেককাইনা হায়জিল্লিববো?” শিলহৈবা জ্ঞান তারক্লে। মেমথোইগী মতৌদুদা মহাক নোক্নীংলকই অদুবু নোক্নীংবা ফাজিল্লগা হায়রকই, “চুম্মী কৈদৌরগে কনানা চুমদে হায়রগে?” “ওইদবা ঙাঙগনু।” “অশেংবনে।” “ঐখোয় খঙলোই সিনিনে? ফৈ ফৈ।” মেমথোইনা মখোয়রোমদা লাউখি, “হো ইমা! সোমদা লাকপিরো।” শিলহৈবগী মমাদু নোকমি নোকমি চঙলকই। মচানুপাগী মনাক্তা লাকপদা মাগী কার্টর কদায়দা লৈবগে হংবা মেমথোইহোয়দা তাল চারুদুনা চঙলকপদা মেমথোই অমসুং মেমথোইগী মমাগা কুইনা ৱারী শাদুনা লৈরম্বনি।

মতম কয়াগী মমাঙদগী লৈঙাক্কা মখোয়গী লূপ অদুগা থেংখাং কয়ারক থোক্না পীরায় ঙাক্লদুনা শানরকপা শান্তিগী ৱারী অদু অরোইবা তাঙ্কক য়ৌশিল্লক্লে। ৱারোইশিন অমা পুরক্লগনি। মসি তাবদা মহাক শাথীনা নীংবা কায়খি। মহাক্কী তুংগী পুন্সি অদু ইমম মমশিনখিবগুম পূক্নিংদা ফাওখি৷

মহাক মখোয়গী মপা‑মপুনা থম্বিরম্বা লম্মীৎ‑তুম্মীৎ, মহৌশাগী লন অমদি পোত্থোক্নচিংবশিং অদু মখোয়না মপু ওইগদবনি, মখোয় মশানা মরোমদোম ঙাক‑শেঞ্জগদবনি হায়বগী ঈহৌ শাগৎলিবা লূপ অমগী য়াম্না মরু ওইবা মীশক অমনি। ইচঙ থৌবা লাল্লোয় অমনি। মমিংনা ‘ষ্টেফেন‘ [অশেংবা মমিং নত্তে]।

তুপী অফনবা অমা ঊপ্পি। চপশাং শাংবা মমায়দুদা অমম্বনা তংখায় লাংবা মচু মান্নদবা গ্লাসকী আনোক অপাকপা অমা উপ্পি। মরাং তুরাংবা কেমোফ্লাজকী শেগা কোৎপা জেকেট অমা লীৎলি। ফূরিৎখাউ মশীং খঙদনা পাল্লি। ফূরিৎ ফিগা থাদে। মখূৎ খূদাং অমদি মপাম্বোমদুদা শা মকোক মানবা, তিল‑কাঙ মানবা টেটু চবাক চবাক য়েকই। মশম ফৈ। জতা তাবা য়ানা নৎত্রগা শগোল মমৈ শন মমৈ শানা পুনবা য়ানা শাংই। মনা অনীমক্তা ধাতু নৎত্রগা প্লাষ্টিককী লৈতেংগী নানপ্পী অমমম চিন্নবা কন্না হোৎনরম্মী। হূৎলুরগা লায়জৌমনবদগী তোকখ্রে। শেৎলিবা জীন খোঙ্গ্রাওদু খূউ খূরাই মপাদা, ফৈগন্দা, নিঙ্গোং মপাদা মচেৎ মচেৎ হোই। মথন্তা শেগায়জরকপা মান্না থৌওইনা শেগায়বনি। লায়রবগী শম্বল মানবা চরন চরনবা খদাং অমদি নাতোন শুমাঙগী কোয় খাকই। নাতোন শুমাঙগীদুমদি থেক্কৎনবা কন্না হোৎনরি। খূদোম্বীগা খূবীগনা উরু‑উরু লৈদুনা তাশিল্লগা হেক‑হেক থেক্কৎলি। মশক‑মশা খঙনদবা মী নৎত্রগা লম্লানবা কনাগুম্বা উবদা মাগী মীৎয়েং‑নায়েংদু পৈনা নৎত্রগা খানা নৎত্রগা শূক্তোক্তুনা ঊপ্লিবা আনোক্তু নাখাঙদা ঈন্থরগা ফ্রেম ৱাংমা লান্না য়েংই। লাইরিক‑লাইশুগী ৱা তোঙান্না থমখ্রগা নোংমৈ অশূবীনা লম্লক্কী শা‑উচেক কাপ্পা, চীংচেপ্তা লমওক তান্নবা, লাং থাক্তুনা উচেক‑ৱায়া ফাবা, শজি শন্দং ফাবদি শাথীনা হৈ শিংই। গিটরবু য়াম্না পামজনা উই। শেগাদা য়েপতুনা নত্ত্রগা নঙ্গন্দা পোবা মান্না য়ান্দুনা চৎকল্লি। পুংকক চাউবা য়োংনাউ অমা মতম অয়াম্বদা লোয়নৈ। মখ্বাঙদা থৌরী থুদুনা য়োংদু মহাক্না লেংবান্দা নৎত্রগা মকোক্তা তোংহন্দুনা পুই। মহাকথক্তা মায়থীখিবগী নীংঙমহৌদবনা য়োংনাউদুগী মনা অনীমক্তা প্লাষ্টিককী নানপ্পী অমমম চিনবি। য়োংদা সনা চিনবিবগী ফজবা নুংশিবদি মহাকখক্তনা খঙজরসনু।

য়োংদু মহাক্না তম্বিবা য়াবা কয়া অমা তম্বি—চোং‑ফনবা, পূংলোনগী তাল চানা জগোয় শাবা, য়াথংগী মতুংইন্না শলাম কোৎপনচিংবা। ইশম শম্না হায়রবদা সর্কসতা য়াওবা শিকারগী য়োং অদুগুন্না মহাক্নসু মহাক্কী য়োং অদুবু হৈ শিংহন্নীংই। মীমাঙদা লেন্নজনীংই। করিগুম্বা মতমদা য়োংদু মহাক্না কি‑হঙ্গোইবা অমত্তা য়াওদনা মহাক্কী মকোক্তা হীক হেক হেকসু কাইহল্লি। মদুনা য়োংদুগী হৈ‑শিংবগী খূদম‑চাংদম ওইনা ৱারী লীজৈ।

ঈহৌ অমা নৎত্রগা মদুগী ৱারোইশিন হায়বসিদা তোঙান‑তোঙানবা ৱাখল মীৎয়েং নৎত্রগা মোৎ লৈবা হায়বসিদি হৌনশানি। মখোয়না হৌরিবা ঈহৌ অদুগী ৱারোইশিন অমা পুরক্লগনি খনবদা মথৱায় ৱাজবা নুংনাংজবদি ষ্টেফেনখক্তসু ওইরমদে। নীংহন্নরক্লবা মখোয়গী লাল্লূপকী লাল্লোয় খরসু অদুম মরৈরম্মী। উরক্তা মৈ তীক্তুনা খুন্দিন্নবদা মকা ফোংনরকপা য়াওই।

“…অদুদি ঐখোয়গী খূৎলায়শিংসি পীথোকখিবা তাবনিনে!”

অমনা ইপা পাখৎনা হায়রকই, “এ! খূৎলায়দি পীরোই। খূৎলায় পীবা য়াদে। খূৎলায় পীখ্রবদি ঐখোয় করি চাদুনা হিংগনি। করম্না লম্বী থৎকনি। গাড়ীনা তক্তুনা শিরোইদ্রা!”

অমনসু ৱা পাংশিল্লকই, “চুম্মী খূৎলায় পীবা য়াদে। খূৎলায় পায়দ্রবদি ইপা‑ইপুগী লম অসি ঐখোয়না করম্না ঙাক্কনি। মীনা অমুক লৌখিরোইদ্রা? খূৎলায় পীরোই!”

অমনা ৱাখল তানা হায়রকই, “মদু ঐখোয়না লেপ্পা য়াবা নত্তে। ঐখোয়গী লুচিংবশিং লৈরি। মখোয়না লেপকদবনি। নৎত্রবদি চৈরাক ফংগনি...।”

মদু তাবদা ময়ামদু করিগুম্বা খরা ইখঙ খঙনবগুম ঙাইহাক তূমিন‑তূমিন লৈনৈ।

পংলাপ লাপ্তনা উয়ুং পাম্বী অদু হৌরি। মহূ‑ময়াই কনবা পাম্বীনি।

উয়ুং পাম্বী অদুবু উবদা খংপ্রেক খংই ষ্টেফেন। তু খ্যাও চুংই।

উয়ুং পাম্বী অদুনা ষ্টেফেনদা হায়রকপগুম তৌই—কান্নরোইদা ষ্টেফেন! অদুগী শরুক শা চাউ, য়ু থকউ, মৈজাও থাদুনা তীকউ, গিটর খোংউ, ঈশৈ শকউ, জগোয় শাউ। লাইমিং লৌখিবা হায়বসি লুবনি। পূংলোনগী মতুংইন্না জগোয় শাউ ৷

চুম্মী, উয়ুং পাম্বী অসি মখোয়গী পূক্নিং‑ৱাখল শেংদোকফম্নি। ৱাখল লৌশিংগী হৌরকফম্নি। মহূ‑ময়াই কনবা পাম্বীনি। পাম্বী অসিবু খঙদবা মখোয়গী লূপ্লোয় লাল্লোয় কনাবু লৈরমগদগে? লূপকী চৎন‑কাঙলোন ঙাক্ত–ইন্দবা, য়োৎলম কাল্লুবা খূদিংমক উয়ুং পাম্বী অসিগী মখোঙ য়ৌরকখিবা ঙাক্তনি।

ষ্টেফেনসু নোংমা উয়ুং পাম্বী অসিগী মখোঙদা লেপখি। মপূক্নিং নুংশিনা। ঈহৌগী মিংদা মহাক্নদি লূপকী য়াইফনবনি খঞ্জদুনা লম্বীদা লাকপা মালগাড়ীশিং থৎতুনা পৈশা খোমগৎলুব্রা হায়ববু লুট তৌবা ওইনা থোকখিদুনা ৱা য়াম্নরকপদগী মহাকসু উয়ুং পাম্বী অসিদা পাং তিংদুনা পুল্লগা ফূখি ৷

উয়ুং পাম্বী অদু উবদা মমীৎ‑মনা খংশিং শিংই ষ্টেফেন। নীংবা কায়রম্বগা স্বায় মাঙখি।

শান্তিগী ৱারী অদু নাকন অনীমক্না য়ানরদুনা খূৎয়েক পীনখ্রে।

য়ান‑ৱারোলদা করি য়াওরি, করি ইরি হায়বা থোইদোক্না খঙনদ্রবসু মখোয়না শীজিন্নরুবা খূৎশু‑খূৎলায়শিংদি অকক্লবা মতম খরগী মনুংদা অপীবা মফম খরদা খূৎশিন্নখিবা তাই।

খূৎয়েক পীনখিবগী পাউদু তাবদা মহৈ‑মহৈ পংহদা হরাওনৈ।

য়ু পুরকপা য়াও, শা পুরকপা য়াও, লূপ্লোয় লাল্লোয় ময়ামদু মখোয়গী খুন্দিন্নফম উরক্কী ফৌদেন মচাদুদা পূল্লরে। খরনা অকংবা উশা‑ৱাশা খোমজিল্লি, খরনা শা শেম্মী, খরনা মৈ হৌগত্তুনা শা লৌই। য়াইফৌ ফৌই। শা মুনবা ঙাইঙমদবা খরনা য়ু পুথোক্তুনা থক্নরকই। নুংঙাইবা ফোঙদোক্নদুনা অমনা অমদা য়ু লান্নৈ৷ থকমিন্নৈ।

মৈ হৌফমদুগী মনাক্তা ফৈদু তুদুনা লৈবা উক্রোং অমগী মথক্তা ফমদুনা ষ্টেফেন গিটর খোংলি। নাকন্দা মাগী য়োংনাউদুসু মঙোন্দা ঙাথরদুনা উইরি। গিটরদা পূক্নিং চঙলিবা ষ্টেফেনগী শা মতু মান্না মচু শঙলবা মশম অদু চোজাইননা মমায়দা উপথরক্লি। মঙক অদু নাক্তা অমুক অমুক ফেৎ‑ফেৎ হাইরদুনা চোইনা তারক্লিবা মশম অদু হাইগৎপা লাক্নরি। থগায়মুক শাংবা মাগী নোংমৈদুসু উক্রোংদুদা ঙাদুনা লৈরি। নুংঙাইবনা থূহ্মৎলবা লূপ্লোয় অমনা ষ্টেফেনদা য়ু লানশিল্লকই। ষ্টেফেনসু থকই। মথং মথং লাল্লকপদা য়োং অদুদসু নুংঙাইবা অমদি নুংশিবগা লোয়ননা য়ু তেঙ্গোৎ অমা লানশিল্লি। য়োংদুসু য়ুদু তাপ লৌদুনা গৎ‑গৎ থকই।

নুংঙাইবা মপূং ফাহন্নীংবা খরনা থাউ তিন অমনবা, কোম্পাক খুদেং পূখম অরৈ অরৈবা পুথোক্তুনা থীনবা হৌরকই। জগোয় শাগৎনরকই। নোংমৈ পায়বা য়াও, মৈহুম পায়বা য়াও চোং ফন্দুনা জগোয় শানরকই। লূপ্লোয় অমনা য়োং অদুবুসু জগোয় শাউ হায়বগী ইঙ্গিত্তা নোংমৈ মতোন্না চক চক থিন্দুনা হৌই। কোম্পাক খুদেং থীনবগী মখোলদা য়োং অদুসু তাল থাদুনা মঙক নোম্মী। মশা থেক্তুনা তাল থারকই।

নুংঙাইবনা থূহ্মৎলবা, মাগী য়োংগী জগোয়দা পেল্লবা ষ্টেফেন মাগী নোংমৈদু তাপ পায়খৎলি। নোংমৈদুগী কোচি হাংদোক্তুনা নোংথক্তা অমুক অনীরক ব্রং‑ব্রং কাপখৎলি। ময়াম খূবাক প্রোক‑প্রোক খূই। নোংমৈদু জগোয় শারিবা য়োংদুদা অমুক পীশিল্লি ষ্টেফেন। য়োংদুনসু নোংমৈদু লৌই। নোংমৈদু পায়দুনা ঙাইহাক জগোয় শাই। খূবাক খূবা হুইসেন খোংবগী চরাঙনবা মরক্তা য়োংদুনা নোংমৈদু খূৎপায় চানা পায়রগা মায়কৈ খঙদনা ব্রং‑ব্রং পংকাপ্তা কাপথোরকই। নোংমৈ মরূনা পানবদগী মৈজাও হৌরিবা মৈফমদু মৈরিক ব্রং হৌই। তিল্লম্বা লাঙলম্বা খূদিংমক মমীৎ‑মনা লংখৎনৈ। য়োংনা নোংমৈ কাপ্লকপনি খঙলকপদগী কোম্পাক খুদেং থীল্লম্বা, তিন থীল্লম্বা, জগোয় শারম্বা ময়ামদু ৱা লাউনা কায়দুনা চেন্নৈ। মথৱায় হিংলগা লোইরে মতাগুম উজাউ মরুমদা, লৈকূৎ‑লৈরায়দা পাকথনৈ। মীৎকূপ খরগী মনুংদা মফমদু তুমীৎ‑কাঙ ফাওবা পাইদবমখৈ পূমচীক চীকই।

মতম অমদা মাবু উরক্তগী কোয়তান তান্নদুনা ফাখিবা মখোয়না মাগী নোংমৈ খূৎকাপ্তা কিদুনা অমুক লোৎখিবদু উবদা য়োংদু নোকফেৎ তৌই। মরেপমুক ৱাংবা নোংমৈদু পায়দুনা ঙাইহাক মূকখায়দুনা লেপ্পি। মশাদা নাপল অমা কারকই—“ননসেন্স! খরা চাশিন‑থকচিল্লগা ঐঙোন্দা জগোয় শাও কাইদনা, মপা‑মপু মশক খঙদবা শারদনা! ষ্টুপিদ। ঙরাং নহান্দা মমৈ কেনখ্রগা লমসি মখোয়গী মপা‑মপুগী লমনি কায়নসু হায়জবা শাই। য়ান‑য়ানবা পংলৈ লৈমিন্নরগা লোইরে...।”

অদুদগী য়োংদু হাইরং‑হাইরং নোংমৈদু পুরদুনা উরক্তা চঙখি।

নিশা হু হল্লি ষ্টেফেন। উপায় লৈতনা লেপ্লিবা মতৌদুদা উয়ুং পাম্বীদুনা—“ষ্টেফেন খূৎলায় পীশিনবগী ৱাফমদু খঙলেদনা...!‘

ষ্টেফেন মিহুন চোংবা হেনগৎলকই।

উ মরুমদা, লৈকূৎ‑লৈরায়দা পাকথদুনা লোৎলম্বশিং চিবোন চিবোন ঙাঙনরকই—“অমসিনা নোংমৈ পুদুনা চৎখ্রিবসি অনৌবা লূপ অমা অমুক শেম্লক্তননে।”

মহাক রিলীফ কেম্প অমদা লৈরে হায়বগী পাউদি তারে। লৈতাফম খঙদনা লৈরম্বা ৱাখল অদু খজিক্তং নে তাবগুম তৌই। কনাসু লৈজদ্রবা মীশক অমগুম মফম অদুদা মহাক্না তুফক‑তুফাই চন্না লৈরমগদবা মতৌদুগী খল্লুবদা নুংঙাইফমদি খঙদে। নোংমগী শিদনবা চারিবা চাক‑এন্সাং লৈমায়দা থাদুনা হীপ্লিবা ফমুং অমদি নুমিৎ খূদিংগী য়াওন্নরিবা অনী শুনা শেৎনীংঙাই লৈত্রবা ফিজোল অদু মীৎতা উরকপগুম তৌই। অদুগী ৱাবুদি রিলীফ কেম্প হায়বসিতবু নুংঙাই য়াইফবা ৱাত্ত‑পাদবা খূয়া‑তুশিৎনা হিংলিবশিংগী লৈফমদি নত্তেদনা। মখোয় কনাসু মফম অদুদা লৈনীংনা হরাও‑হরাও লাক্নখিবদি নত্তে। কৈশুমশঙগী মতৌগুম নোং অমুক ঙানবদগী নুমিৎ অমুক তাবফাও হিংনবগী পাম্বৈ অমফাও লাম্বা ফংদনা লেল্লিবা মখোয়গী তুংগী লম্বীদি ঙসিসু তম্বা ঙমদ্রি।

“বাবা, হীদাক সিদা লৈরে।”

থোইবা মচানা পীরক্লিবা গুলী অদু লৌরগা য়ানুংদা লংশিল্লি। গ্লাসতা য়াওরিবা ঈশিং অদু য়াউম অমগা গুলী অদু য়োৎশিল্লি। মতম অমদা পাঙ্গল ফনা চেন‑চোংদুনা হিংলম্বা পুন্সি অদুমদি নৎত্রে। পাখৎপা, শাউনীংবা পেন্দবা পূম্নমক থাদোক্তুনা পূক্নিং লৈতানা লৈনবা দোক্টরনা হায়রকখিবা ৱাহৈশিং অদু নীংশিংই। হকচাংগীদমক খল্লগা হায়রক্লিবা ৱাহৈশিং অদু থবক্তা ওন্থোকপগী তঙাইফদবা লৈ হায়বসি মহাকসু য়ানীংই। অদুবু মহাক্কী ওইরিবা পূক্নিং ৱাখলগী ফিভম অদুদি পূম্নমক অদুদগী তাইওন্নবা অমনি। পূম্নমক কাউথোকপা ঙম্লবসু হকচাং তংখায় ওইদুনা পুন্সিগী খোঙলোয় ওইরিবা মীশক অমবু করম্না হেক্তা কাউথোক্কনি। মহাক সংসার অসি থাদোক্তুনা চৎখিবমক্তি নত্তে হায়ববু মহাক্কা লাপথোক্নখিবদা ফংহৌরিবা চৈনা অসিদি ৱাহৈনা করম্না ফোঙদোক্কনি।

মহাক্কী ঈং‑তপচবা মতৌদো মীৎমাঙদা লোপ্লিবগুমতা খল্লি। অসুক কুইনা লৈমিন্নরক্লবা অদু ফাওবা নোংমতা অশাওবগী ৱাহৈ অমফাও মহাক্কী চীন্দগী হায়রকপা তাখিদ্রি। লৈমিন্নবা হায়বসিদি চফূ‑উয়ান ফাওবা কেনৈ হায়নরিবনি। করিগুম্বদা শাউনীংবদগী অকনবা ৱাহৈ কয়ানি ঙাঙখিবা। মহাক্না শাউবতবু য়েংলগে হায়দুনা মহাক্না শাউনবা জাৎ‑জাৎকী ৱাহৈ কয়ানি হায়খিবা। অদুবু মহাক্কী ঈংন‑তপ্না ঙাঙবা মতৌ অদুদি করিসু হোংবা লৈখিদে। ঈংলবা লাইজগী শক্লোনগুম মহাক্না লেঙদনা লৈরিঙৈ ইমুং অসে শান্তিগী তূংনফম ওইরম্বনি। মহাক্কী নীংথিজবা চেংলৌ অমদি চীনবানদগী হায়রকপা নুংশিবা ৱাহৈশিং অদুনা কল্লবা লীচিং ওইদুনা মনাক্তদা চৎনীংখি। মহাক্কা থেংরুঙৈ লম্লৈমনা চেন্দুনা পুবগুম মতম অয়াম্বদা মহাক্কী মনাক্তদা লৈনীংখি।

মহাকপু নুংশিরুবগী লীচিংনা কনখিবনা চীং‑মানগসু শকখঙনরে। তৌরুবা শিনফমনা ঈরুজনীংবগা থোংগ্রা তেকপগা হায়বদু চপ চানা থোক্লে। চীংগী মনুং হঞ্জিনবা মফমশিং য়ৌদবা লৈরক্ত্রে। চীংদা তোয়না চৎলি হায়দুনা তিন্নবা মরুপ‑মপাংশিংনা মহাকপু চীংথোইবা হায়না কৌনখিবনি। লুনা তিন্নবা কোইনদবা মরুপশিংনা হায়, “চীংগী লম্লৈমা ওক্নখিবদগী ইতাও নঙসে মঙদফাও চীং‑মানদা উদুনা লৈরে হায়নরেকো।”

ৱাহৈশিং অসিগী পাউখুম ওইনা মহাক্না নোক্লগা খুমখি, “চীংদা চৎনীংদবা নখোয়দি কদায়দগী চীং‑মানগী ফজবা খঙলদগে। অশেংবা নুংশিবা ফংগে হায়রবদি নখোয়সু চীং‑মানদা চৎলো। ঐগী ইতুং ইল্লকউ…।”

চীংগী লমদা ঠিকা তৌমিন্নবা মীওইশিংনা মখোয়‑মখোয়গী কান্নবখক্তা য়েংলগা থবক শূবা লোইশিল্লমদনা শেলদমক লৌথোক্লগা চৎনখিবশিংদু থোইবা য়াম্না শাউনীংখি। মহাক্কী পূকচেল খঙবা চীংগী ঙাইশিংনদি মহাকপু য়াম্না থাগৎনৈ। মহাক্না চৎলুবা মফম খূদিং মহাক্কী ঙাই ৱাত্তে। ঙাইশিংগী য়ূম য়ূমদা চত্তুনা চাকসু তোয়না চামিন্নৈ। নোংমা মহাক্কা লুনা তিন্নবা ঙাই গুইতেগী য়ূমদা চাক চামিন্নখি। নুমিৎ অদুদনি বোইনুগা শক খঙনখিবদু। বোইনুগী মখূৎনা থোংবা মথেল ময়ামদো থৱায় তানা মহাও লৈনা চাখিবনি।

“ইম্ফালগী ঠিকাদার পাখঙসে য়ূ খুঙাও থীখ্রেদা।”

মবুং গুইতেনা হায়খিবা ৱাহৈশিং অসে অমত্তা চীত্থদনা নোংমা বোইনুনা থোইবদা তম্লকখি। মমাঙথক্তা মশীং খঙদনা গ্লাস কয়ারক থেংগায়নখ্রবা ঙাই গুইতেগী ৱাহৈশিং অদু তাবদা মহাক খজিক্তং ইকায়বা ফাওখি। মতুংদদি গুইতেগা পূন্না অমুক য়ু থকমিন্নররোই হায়না খল্লি। মচন্নুপীগা নুংশিনরুবদগী ব্যবহার থোক্তে খন্দুনা গুইতেগী মমাঙদা য়ু থক্তনা হোৎনবদা মায় পাকখিদবা অদুনি। মহাক্কী মতৌদু খঙলবা গুইতেনা হেন্না কোইদবা মতৌ অমদা মখূৎ পায়দুনা চিংশিল্লগা য়ু গ্লাস অদু মখূৎমক্না লাল্লকখিবনি। উপাই লৈখিদে থোইবা ঙাই গুইতেগী মখূত্তগী য়ু গ্লাস অদু লৌবা তাখি। মবুং তিন্নরগা মচন্নুপী কোয়বসে অহানবদদি খজিক্তং ইকায়রম্বনি। মমৈথংদদি নুংশিনবদা লাপথোক্নবা য়ারোইদবা অচেৎপা মরী অমা শেমখিবনি। লৈনরিবা মরী অদু হেন্না চেৎশিনখি। লৌথুপ‑লৌকোই লৈতবা চম্লবা মখোয়গী মীওক‑মীচান ফবা মতৌদুনা থৌরী ওইদুনা কয়াদা চেৎনা পুনখ্রবা।

“বাবা পাউচে হায়বদো সিদা লৈরে।”

থোইবা হীপ্লম্বদগী হৌগত্তুনা চৌক্রিদা ঙাইহাক্তং ফম্মী। টেবল মথক্তা তাদুনা লৈরিবা পাউচেশিং অদু মথং মথং লৌখত্তুনা য়েংলুরি।

য়ূম কয়া মৈনা তুম্না চাক্লি। থৱায়দং হিংহৌরগা লোইরে হায়দুনা মীয়াম অমা মায়কৈ খঙদনা লাঞ্জেন্নরি। পুন্সিদা ৱানা তানশিঞ্জরকপা মরল‑মথুম পূম্বা হুন্দোক্লম্লগা শূপ্নতগী মশাদা শেৎলিবা ফিজোল অদুখক্তংগা লোয়ননা শাফগদবা মফম য়েংদুনা চেনশিন্নরি। উপাই লৈরক্ত্রবদা অনকপদা লৈরিবা লোনশিনখ্রবা সিফাই কেম্পশিংগী গেট অদু হাংদোকপিনবা হায়জরুই। মশাগী ইকাইখুম্নবা মাঙহনবিখ্রবা নুপীজা ওইবী কয়াগী পেন্দবগী তেংথাখোল। হিংসা পাম্বশিংগী মনীং তম্বা শাজৎপু কূহ্মৈগুম য়েংলিবা সিফাইশিংগী মফমদা মীয়ামগী পেন্দবা ৱাহৈ কয়া। তোখাই তাবা পাম্লিবশিংগী ইফোং ফোংলবা দিমান্দ। তানা তানা তাশিন্নদ্রবা, উনা উনা উশিন্নদ্রবা লৈঙাক মপুগী অচান‑মীরায় নাইবা থৌওংবু পেন্দ্রবা মীয়ামগী ৱাকৎকা লোয়ননা মীতোপ্না য়েলহৌমীগী লম মুনবা য়ারোই হায়বগী খোল্লাউ…।

পাউচেগী লামায়দা ইরিবা ৱাহৈশিং অদু অমুক মখা তানা পানীংবা ফাওদ্রে। নুমিৎ খূদিংগী ফোঙলিবা পাউচেশিংগী লামায় খূদিংদা উরিবসি লৈঙাক অমা লৈরি হায়বগী খূদম উদ্রবা তৌনীং তৌনীংবতা তৌবদা থিংবিনবা কনাসু লৈত্রবা কাং‑খোং চাইরবা শক্তম ঙাক্তনি। পাউচেশিংগী লামায় হাংদোক্লুবা খূদিং মহাক্কী মীৎতা উরিবসি য়েক্নবনা খুন্তাক লানশিনহনখ্রবা পূনশিনবদা ৱারগদবা মচেৎ মচেৎ থোক্না কায়রবা লৈবাক অমগী ওইরিবা ফিভম অদুনি। নীংশিংবা থোক্ত্রিঙৈ মতমদগী মীরোল কয়া চঙনা অমতা ওইবগী চেৎলবা লীপুন অমগা লোয়ননা শাগৎলকখিবা জাতি অমবু অসুক তেনখ্রবা মীৎকূপ খরদা কয়াদা লায়না থুগায়নবা হোৎনরিবা। মীওইবা খুন্নাইগী মায়োক্তা লেপ্লিবা মখোয়বু ৱারকপিনবা কনাসু লৈত্রবরা? মসি খক ওইথোকপা য়ারোই। চম্না হিংজরিবা মখোয়গী মফমদদি অমত্তা ওইবা নুংশিনবগী মরী অদু ঙসিসু লেঙদনা লৈরি। ৱাখল অসিমক্না লমজিং ওইদুনা মহাক্তি মহৌশাগুম লৈথোক্লুই চীং‑মান্দা নীংঙাইদনা। খল্লুদে নোংমতসু অসুম্না য়েংথীনবগী মৈরী অমনা লাক্ন‑ফানবা ঙমদনা চাক্লক্কনি হায়বা।

অনৌবা থবক অমা শূবা হৌনবগীদমক মহাক চীংগী খুল অমদা চৎলম্মী। মহৌশাগুম মহাক্তি মফম অদুদা ৱাখলদা অফা‑অপূন্নবা লৈতনা নীংঙাইদনা লৈথোক্লুই। য়ূমদা হনবা নৎত্রগা হন্দবা মহাক্কী ৱাখলদা থোইদোক্না খেন্নবা লৈরমদে। অদুবু য়ূম অদুদা বোইনুনা মৌ ওইনা লাকখিবা নুমিত্তুদগীদি হান্নগুম য়ূমদা হঞ্জিন্নীংবা মতমদা হঞ্জিনবগী হৈনবী অদুদি য়াখিদ্রে। য়ূমদগী খোঙ থাংদোরকপদা থবকশিং অদু মুহোরীদা শিন্নরম্লগা থুনা হল্লক্নবা বোইনুনা কন্না হায়হৌবনি। মীনা হায়বা ৱা লৌদবা ঙম্লবসু বোইনুনা হায়বা ৱা লৌদবা ঙম্বগী থৌনা অদুদি মতম্না মুন্দুনা পুখ্রে। অদুগুম্বা তাঞ্জা অমদনি মহাক্না লৈরিবা খুল অদু হিংসানা লাঙ্গোয় চনখিবদু। মতম অদু খুদোংথীবা অমা হেক্তা মায়োক্নবগী ফিভম্নি। লুনা তিন্নবা ঙাই অমনা নুমিৎ খরা মহাকপু চঙজফম পীদুনা থম্লবা মতুং সিফাইশিংগী মতেংগা লোয়ননা য়ূম য়ৌনা থিল্লকখিবশিং অদুগী মরক্তা মহাকসু য়াওরকখিবনি।

কায়রবা থোঙ থোঙনাওগী মিংশেলশিং অমদি ফক্লাংদা তারিবা মশীং থিঙমদ্রবা দাগফমশিং অদু উরুবদা থোইবা ঙক্তবা ঙমখিদে। নোংলৈ‑নুংশিৎ অখাক‑অরাও নংখ্রবা উপাল অমগুম শকফম কায়রবা য়ূম অদুনা মহাকপু হেন্না নুংশা থীহনখি। মহৌশাদি মহাক্না অসুম্না লংফৈদগী হল্লকপা খূদিং বোইনু মৈ ওক্কদৌবগী ঙাইদুনা লৈরম্বনি। নুমিৎ অদুদদি বোইনু ইমুংদগী থোরকখিদে। থোইবা পূক্নিংদা চিংনবনা লাঙ্গোয় চল্লকই। তাঞ্জা অদুমক্তদা মচানুপা নিংথেম মায়থোঙ অদু ইমক মকশিন্না মনাক্তা চঙলকই। মমাগী মরমদা করিগুম্বা খরদি মপাগী মফমদা তম্নীংখি। মপাগী মতৌদুদা হায়দোকফম খঙদনা ফুম্বংননা লৈরে। মপানা হংলিবা ৱাহংগী পাউখুমদি পীরক্তনা নিংথেম মমীত্তা ঈরাতমক চেন্দুনা লেপ্লি। লোৎশিন্দুনা থম্বা ঙম্লক্তবদগী থোকখিবা থৌদোকশিং অদু মপাগী মফমদা অমত্তা চীত্থদনা তমথোরক্লে। মচানা তম্লক্লিবা পাউ অদু তারবা তুংদা থোইবা ৱা অমত্তা ঙাঙদনা তূমিন্না লৈমায়দা ফমথখ্রে।

জ্ঞান তারকপা মতমদনি মহাক্না হোস্পিটালদা লৈরম্বদু। অশাওবনা লাকহৎখ্রবা অফ‑ফত্ত খন্থবা ঙমিখদ্রবা, মচীন মেল্লুবা ঙমদ্রবা মীয়াম অমনা মহাক্কী লোয়নবীমক্কী মফমদা শীজিন্নখিবা অকনবা ৱাহৈশিং অমদি লান্না উরিবা মীৎয়েং অদুমদি থোইবা তশেংনা য়ানীংখিদে। হৌরকফম জাতিনা মরম ওইরগা য়ূম অদুগী মপু ওইরিবা মীশক অমবু য়ূম অদুগা করিসু থোক্নদবগুম কয়াদা লাপ্না ইন্থোকপিখ্রবা। কল্লক‑য়েংথীনবগী তমথীরবা নোংলৈ অমনা ঈংন‑চীক্না লৈজরম্বা অপীকপা ইমুং কয়া কাং‑খোং চাইহনবিখ্রে। কয়া অমনা তাঙ্গোই তানা উৎকী মপৈ ওলহনখ্রে। মহুমদা হঞ্জিনবা ঙমদ্রবা উচেক‑ৱায়াগুম চঙজফম লৈতবনা মীগী শাইজিন‑শায়াদা তাংদুনা হিংলিবা মখোয়গী অৱাবাসে মখোয় তশেংনা য়েংবা ঙম্লিব্রা? ৱাহং অসে হংদবা ঙম্লক্তে থোইবা।

বোইনুগী মবুং গুইতেসু মহাক্কী ইমুং‑মনুংগা লোয়ননা শহর অসি থাদোক্তুনা চৎখ্রে হায়বগী পাউ তারে। মফম অসিদা য়ূম লিংদুনা লৈরকপা চহী য়াম্লবনি। মহাক্না তানজবা অমদি লেপশিঞ্জবা মরল পূম্বা মফম অসিদা পূল্লপ থনম্লগা চৎখ্রে। অমরোমদা ময়ূম‑মকৈ পূম্নমক উৎ ওলহৌরবা শূপ্নগী মশাখক্তমক শিদনবা চেল্লকখিবা মখোয় কয়ামা তোঙান‑তোঙানবা মফমদা চঙজফম লৌদুনা লৈররি। থৌদোক অসিনা মীওইবগী পুৱারীবু কয়াদা মশক থীহল্লবা। মীওইবা মশেলগী মরক্তা য়েংথীনবগী পল ৱাংনা খাগৎলিবা হিংসা পাম্বা মখোয়বু করিগী অদুক মনীং তমহনবনো? শকউদবা খূৎ অমনা মসিতবু থোক্নবা থৌওইনা শীল্লিব্রা? থোইবা মহাক্কী ৱাখলদা হংলিবা ৱাহংসে লোইবা নাইদে।

মতমদো নীংশিংলি। মচানুপা নিংথেম পোকপা কুইদ্রঙৈ মতমনি। নোংমা মচানুপা নিংথেমগা লোয়ননা বোইনুগী মপাম খুলদা চৎলম্মী। নিংথেমগী নুংশিবা মতৌ অদুনা বোইনুগী মপামগী মী পূম্নমক লোইনা শুমহৎখিবনি। মখোয় ময়াম্না নুংশিনা চূপ্পিবদা নিংথেমগী তনৌ‑তনৌবা খজাইদু পূমঙাং ঙাংখি। নিংথেমবু নুংশিনা চূপ্পিরবা তুংদা বোইনুগী অপোকপা মপানা হায়রকই, “ইশুগী মিংসে য়াম্না অর্থ লৈবা অদুগা য়াম্নসু নুংশিবা মিংনি। ইশুসে লৌশিং জ্ঞান য়াম্না লৈবা, মীনসু য়াম্না নুংশিবা মীশক অমা ওইগদৌরিবনি।” নুমিৎ অদুদগী হৌনা মমানা মপামদা পুবা খূদিং নিংথেমবু ‘তুপা নিংথেম’ হায়না নুংশিনা কৌবিখি। মখোয়না নুংশিনা কৌবিখিবা মিং অদুগী ৱাহন্থোক য়াম্না লৈখি। ঙসিদি নিংথেম চাউবা শারেপ ফারে। মথন্তা পোক্লবসু নৱাংদে। হায়ন‑তানবদা ৱাখল লৌশিং লৈবা মমা মপা অনীগী ৱাখলগী পোত্থাফম ওইরে। অদুবু নোংমতং মচাগী মশক উদবদা লৈঙমদবী মহাক্না মচাগী মশক উদনা শাংলবা নুমিৎ কয়া লেল্লমগদবা মতৌদো খল্লুবনা থোইবা থম্মোয় পুবা ঙম্লক্তে।

য়ূমগী মৌ অমা ওইনা বোইনুনা চৎলিবা নীতি‑নিয়মশিং অমদি থৌগল্লোন অদুনা ইমুং অদুদা লৈমিন্নরিবা মীপূম খূদিংমক্কী মফমদা তমজনীংঙাই ওইবগী ইথিল অমদি পী হায়বসি ৱাহৈনা ফোঙদোক্নদ্রবসু পূম্নমক্না খঙনৈ। বোইনুগী চীন্দগী নোংমতা থোইবগী মফমদা য়ু থকপা তোক্লো হায়না হায়খিবদি লৈতে। অদুবু থোইবা নিশাদগী তপ্না তপ্না লাপথোকপা হৌরকখি। অশেংবা নুপী অমগী গুণসে কনদি কনবজাৎনি। তৌরুবা শিনফম্নগা চাবা থকপা ফবনে মশানগা পামজবগা মরুপ‑মপাং সঙ্গনগা য়াম্বনে মতম অমদা পার্টি য়াম্না তোয়খি। য়ু থকপা তোক্লে তাবদা বোইনুগী মবুং গুইতেনা নোংমা হায়খিবা ৱাহৈশিংদু নীংশিংলকই, “মঙাও থীখ্রবা নুপা অমা অসুক থুনা জ্ঞান তাহনখিবা অসিদি অঙকপা অমনি। ঐগী ইচলসে ওন্থোক্না শিংখ্রেদা।”

মতম অদুদা উখিবা নুংশিবা থাজবা অমদি পূন্না হিংমিন্নবগী ফজরবা শক্তম অদো ঙসিদি মমি শামখ্রে। তপ্না তপ্না কীন্থবা হৌরক্লে মীওইবগী ফজরবা মূর্তিসে। থাজবা পূম্নমক মাঙখ্রবদা নক্নরম্বা পূম্নমক্না য়েক্নবা ওনখি মীৎকূপ অমদা। উনবা য়াদ্রবশিং থেংনবা মফমদা খূৎ থোক্নরি। থৱায় কয়া পিখম্নরি। য়েক্নবা অমগী হকচাংদগী শীন্থরকপা ঈখেং অদু উরগা য়েক্নবা অমনা অপেনবা ফাওরি। ঈতনা লৌখোং ওইনা চেন্থরি। অদুবু শীন্থথরকপা ঈগী মচু অদুদি অমত্তা ওইখি। তম্বা ঙমদ্রবা লাইবক্কী খোঙচৎ অমনা পীক্লিবা লান করিনো খঙজদ্রিবা অঙাংশিংগী মফমদা খূদোল ওইনা তম্লরি। ঈ মশেলগী লান অসিদা লাইবক্না তাথীবিরবা মখোয়সু থৌনা ফবা লান্মী অমা ওইনা চোংথোরক্নবা শেম শানরক্লি। লান অসি খাম্নবা কনা অমত্তা লৈত্রব্রা?

মতম অমদা মীওক‑মীচান ফরম্বা চীংশাং পরেংশিং ঙসিদি ঙম্নমক শাজৎ হোংখ্রে। ময়াদা মৈবুল লিশিং লিশিং কামথোরক্লিবা তমথীরবা চীংলাইগী শক্তম লৌরক্লে। চীংমায় থন্না হৌরম্বা তলা পামেল ৱাংথোইবশিং কদায়দবু চৎখ্রবগে? মনীং তম্না হৌরক্লিবা হূ পাম্বীশিংনা মখোয়গী মহূৎ শিনখ্রবরা? অৱাংবা চীংদোলদগী অনেম্বা তমগী মায়কৈ তম্না চেন্থরকপা লূরবা ঈচেলশিংসু মচু হোংখ্রে। হিংসা পাম্বা নুংশি হৈত্রবশিংগী ঈহিং তৈরবা খূৎনা থদৎপিখ্রে লেপ্পা নাইদনা চেল্লম্বা নুংশিগী ঈচেল অদো। মখোয়গী মখূত্তা শিন্নবা তারবা মীওইবগী পুৱারী?

“বাবা, মীৎতো অমুক্তা পাঙঙো। চা সিদা লৈরে।”

মচানুপা নিংথেমনা মশা নোমদুনা হৌদোরকপদুদা তূম্লুবদগী মীৎকপ থোক্লকপগুম থোইবা মীৎ পাঙথোরকই। ফনা কুইনা তূমিন্না লৈরুরবা তুংদা মচানুপা নিংথেমদা হায়রকই, “ইবুংঙো, নমাগী পাউ করি তায়? কয়াদি কুইরে য়ূম অসিদা নমাগী মশক উবা ফংলক্ত্রিবা অসে। ঐখোয়গী খনবদা নমাদো তূম্ফম চাফমগা অমত্তা খঙলম্লোই। নঙগী অংকল গুইতেসু মফম অসি থাদোক্তুনা চৎখিবা নুমিৎ অদুদগী মৱা‑মপাউ অমত্তা তাখিদ্রে…।”

“ইমানা লৈরিবা মফমদু ফোনসু নেটৱার্ক ফজনা ফংদে হায়। অদুগীসু মথক্তা ইমানা লৈরিবা রিলীফ কেম্প অদু খূ্ৎলায় পায়বশিংনা ঙাক‑শেন্দুনা লৈবনা তমগী মীদা মখোয়গী পাউ পী হায়দুনা ফোন তৌবসু য়াদমাল্লে। অংকল গুইতেগা লৈফমসু পূন্দবনা ইমাগা পাউ ফাওনবা ঙমদবনি হায়রকই।”

য়ূম অসিগী চূম‑শো পূম্নমক মখূত্তা শিন্নদুনা ইমুং অসিগী ভার পূম্নমক পুরিবী মহাকপু কাঙখদা চঙবা লিন ওইনা উবিখি মখোয়না। য়ূম অসিদগী মহাকপু নমদুনা খোঙ থাংদোকহনিখবা মীৎকূপ অদুদা মহাক্কী ৱাখলদা ফাওরমগদবা চৈনা অদো মখোয় কনানসু খঙবিখিদে। মহাকপু মীতোপ ওইহনবিখিবা নুমিৎ অদুদা মাগীদমক মমাঙদা লেপতুনা পাম্বোম তিংনবগী তাঞ্জা অদু ফংখিদে। মহাক্কীদমক পাঙ্গল মপূং ফাদ্রিবা মচানুপা নিংথেমখক নত্তনা কনাসু উদ্রবা মতমদুদা পাঙ্গল শোনবী মহাক্না করিবু হায়বা ঙম্লমগনি। য়ূমগী মপু ওইরিবী মহাক্না লেঙদনা লৈরিঙৈ মতমদুদদি য়ূম অসে ফজবা পূম্নমক্কী তূংনফম ওইরম্বনি। য়ূম অসি ঙসিদি ইহাঙ হাঙহৌরে। ফজবা পূম্নমক লোইনা মাঙখ্রে। থৱায় পান্দ্রবা হকচাং পোলাংগা য়ূম অসিগা করিদবু খেন্নরিবগে?

টেবল মথক্তা লৈরিবা চা অদু থক্কনি হায়বা কাউখ্রে। মনিল কারম্বা চা অদু তপ্না তপ্না ঈংথরকই। নিংথেম মপানা অসুম্না মতম পূম্নমক্তা অৱাবা শকফম অমদা উংদুনা লৈবদু য়েংবা ঙম্লমদে। মপাগী হকচাংগী ফিভম অদু নোংমা নোংমগী অসুম শোকচিল্লকপদু উবদা নুংশা থীবা ফাওরকই। রিলীফ কেম্পতা লৈখ্রবী মমাবু নীংশিংলকপা খূদিং মহাকসু মপা উহন্দনা লোন্না কপখিবনি। মীতোপ ওইনা ইন্থোকপিখ্রবী মমাগী মনাক্তা লেপ্লুনবগী পাঙ্গল থৌনাসু লৈখিদে। মমা‑মচাগী মফমদা লৈনরিবা তৎনবা য়াররোইদবা মরী অদু নুমিৎ অদুগী মীয়াম অদুনা খজিক্তফাও খঙবিখিদে। অহোয়নদুম তাবদা খাঙবা ৱারবা অকনবা ৱাহৈ কয়ানি মখোয়না হায়খিবদো। খাঙঙমদবা চৈনা পূম্নমক লোৎশিন্দুনা মপাগী মফমদা উহন্দনবা হোৎনদুনা লাক্লি। চাউবা শারেপ ফারক্লবা ফাও ঙরাংতগী পীক্লিবা অঙাং নাৱাগুম নুংতি নুমিৎ খূদিং মাবুতা লাইনীং ওইদুনা খুবৈ অমা নান্থোক্তনা শেন্নজখিবদো সংসার অসিদা লৈরিবা কনা অমত্তনা মহুৎ শিনবদি ওইথোক্লরোই। নুপা ওইবা মতৌনা পূম্নমক লোৎশিন্দুনা থম্নবা হোৎনরবসু নিংথেম মমাবু নীংশিংলকপা মীৎকূপ্তদি পি শীন্থরক্কনু য়াখিদে। চাগনি থক্কনি হায়বা খঙদনা অৱাবা ৱাখলতনা পোৎলূম ওইদুনা লৈরবা মপাগী মমাঙদা পূম্নমক লোৎশিন্দুনা খাঙলিবনি।

ফোন অমা খীংলকই। নিংথেম ফোন অদু পায়খৎলি। ফোন তৌরক্লিবা মীশক অদু মমাগা পোকমিন্নবা অংকল গুইতেনি হায়বা খঙলে। ইম্ফাল থাদোক্তুনা চৎখিবা নুমিৎ অদুদগী উনখিদ্রবনি। য়াম্না থাজদে। করি পাউবু ওইরিগবা?

নিংথেম পূক্নিংদা লাঙতক্নবা অমগা লোয়ননা ফোন অদু ওকই, “হল্লো, অংকল!"

“ইবুংঙো, অংকলগী নিংথেম। ঐহাক হৌজিক নমাগী মনাক্তা লৈ। নমাগী অৱাৎ‑অপা খরা য়েংশিনবা লাক্লম্বনি। বাবাদো ফোন অমুক্তং পায়হল্লকও।”

“হোয় অংকল।”

নিংথেম ফমুংদা হীপ্লিবা মপাগী মনাক্তা প্রপ‑প্রপ চঙলক্তুনা ফোন অদু পীরকই।

“ইমাগী ফোননে বাবা। ইমাগা ৱারী শানৌও।”

থোইবা উইশিল্লম্বা মীৎ অদু তপ্না পাঙথোরকই। মচাগী খূত্তগী ফোন অদু লৌই। হায়গে নীংলম্বা ৱাহৈশিং অদু হায়দোকফম খঙদনা ঙাইহাক লকক তৌই। কংশিল্লুরবা মীৎলু অনীদু পিনা থূমহৎলকই। শাংলবা নুমিৎ কয়া মহাক্কীদমক খনবদা তূম্ফম চাফম খঙদনা লেল্লক্লবনি। মহাক্কী মফমদা হায়গদবা ৱা কয়া অমনি। থোইবা চীনবান অদু লেঙনবা হোৎনরকই।

“বাবা, কৈদৌরবগে ৱা অমত্তা ঙাঙদ্রবদি! হকচাংদো খরা কনখৎলব্রা? হীদাক চাং নাইনা চাবা কাউগনিকো বাবা। ঙসিদি ওন্থোক্না লাইবক ফবা নুমিৎ অমা হায়বদো ওইরে। ঐগী অৱাৎ‑অপা য়েংশিনবিগনি হায়দুনা উপা গুইতেসু ইনাক্তা লাকপিরে। ঐনা ফোন তৌরক্লিবসে রিলীফ কেম্পতগী লাপ্না চৎথোক্লগনি। বাবাগী নাক্তা ঐনা লেঙদনা লৈরবদি হকচাংদো থুনা কনখৎকদবনি। ঐগী মঙদা য়ূম অদো তোয়না উই। লাইগী পূজা কৎপগী থবক্তো ইবুংঙোবু খরা তৌহনবিয়ু। হায়সু হায়বনি। ঙাই মশেন খৎনবসে কুইমনখ্রে। চঙনদবা কৌনদবসু খক ঙম্লোইদবদা। অদো বাবা ইবুংঙোদু মতমগা ফত্তবসিদা মফম‑মরাং খঙদবা মমান্নবশিং তিন্নদনবা খরা হায়বিয়ু। বাবাগীদমক ঐহাক্না মতম পূম্নমক্তা ঈশ্বরবু চেৎনা নীংজরি হায়বসিদং কাউবিগনু…।”

খূৎতা পায়রম্বা ফোন অদু তপ্না থাদোরকই। ৱাদি অমত্তা ঙাঙলকখিদ্রে। মীৎ অনীদু অহিংবা অমগী মতৌগুম তরু‑তরু পাঙলি। ফোনদা হায়রকখিবা ৱাহৈশিং অদু লোইবফাও তাখিদ্রমাল্লে। নিংথেম চিংনবা অমগা লোয়ননা মপাগী খূত্তগী থাদোরক্লিবা ফোন অদু লৌখৎলি।

“বাবা! বাবা কৈদৌরবগে? …! ইমা বাবাসে ৱা অমত্তা ঙাঙখিদ্রে।”

নুপী অমনা থম্মোয় ফূক্না কপ্পগী খোঞ্জেল মোবাইল ফোনদগী তারকই।

বিদ্যালয়দা মেত্রিক পরীক্ষা লোইখিবগী নুংঙাইবা অদু সেমিনারগী মপা শিবগী পাউ অদুনা কূপশিনখি। লৈরোন চনবগী থৌরম য়াওনবা ঐখোয় অনী স্কুলদগী ছুটি ফংলম্মী। হন্দক্কী অসিগদি মখোয়গী খুলদা চৎপসি অহুম্লকশুবনি। অনীরকশুবা চৎপা অদুদি জেনরেল ইলেক্সন নকশিল্লকপদগী ঈরাং য়াম্না লৈখি। অহানবা অদুদি—অহানবা চৎখিবা অদুদা য়াম্না ইকায়বা থৌদোক অমা ঐনা মায়োক্নখি। মদু ঐনা চহী অহুম মরিরোম অসি লোৎশিন্দুনা লৈরক্লি। মদু ঙসিদি হেক্তা ইশিল্লগে। মখোয়গী মপাগী মচানুপী অতোম্বীদু শংলৈ কৌই। লৈশাবী অরিবীনি। মশক্তুদি লোইরেহে। মাগী অচৌবা অনৌবা য়ূম অমা সেরৌ ময়াদা লৈ হায়। চহী খরগী মমাঙদা লমজাউ‑লমহাঙ ওইনা লৈরম্বদু কদায় কদায়দগীনো শেঞ্জাও পায়বা ময়াম অমগী লৈকাই ওনখ্রে। হৌজিক্তি শহর মচা অমগী মচু‑মমেন শঙজিনখ্রে—তশেংনা সিটি ওনখ্রে তম্মী। সেমিনারগী ময়ূমদা অমুক ঐখোয়দা অমুক খুল্লংগুম্না লৈরুগদবনি। অদুবু মনেগী ময়ূম অদু কনাসু লৈতে নোংমতং শঙলুসি হায়দুনা ঐখোয়নী চৎমিন্নরম্মী। য়েংবদদি ইচম চম্বা মথোল অমগী বিল্ডিং মচা অমা ওইনা উরবসু মনুংদা চঙখিবদদি ৱাহ! হায়রিবসিনি। ইনেদু ভোট লেপ্লিবনা য়ূমদুদা লৈরমদে। ঐখোয়নী চাউরবা ফমুং অনী অদুদা অমমম হীপ্নরম্মী। থেঙলবা ফাওবা ইনেদু লাকখিদে। ঙাইনা ঙাইনা ঐখোয়নী তূমথনখিরম্মী। ঐ মঙ অমা মঙলম্মী। পর্ফ্যুমগী মনম্না হায়রবী, জ্বায়‑জ্বায় তানা পার্লরদা নীংথিনা তিংহল্লবা ঙাংতক তৌনা লেংপাক য়ৈনা শাংলপ তৌরমদৌ মানবা শম্লাংনা ঐগী খৌরীদা য়েৎলবগুম তৌরম্মী। অমোনবা খূৎশা অনীনা ঐগী হকচাং শীনবা থুংনা নাল্লদুনা ঐবু মঙলৈবাক অমদা পুবিবগুম তৌরম্মী। থোৎ‑থোৎ লাউরবা চীনবান অমনা ঐগী নাতোন নাকচিদা চীনয়াদা থেংলি থেংলি তৌরদুনা অশাবা অমেঙবা নিংশানা হিগা য়ৈবিবগুম খোঙদগী তোন ফাওনা লুম্বু লুম্বু শাহল্লক্লি। নিংথম চঙলকপগী ফৈজূপ কাওথোক্নীংদ্রবা অহিং মমৈ অদুদা ফৈজূপ কাওথোক্লদুনা ইথোৎ‑থোৎলবা খুবোম অনীনা ঐগী খোঙদা নুংশিনা নান্থোকখিনি মতৌগুম য়েৎলক্লি। অমোনবা থবাক অদুনা নান্থখিনি নিংঙাই তৌরিবগুম তপ নপ্লদুনা ওইনরদুনা কেথরিবগুম…। পুন্সিদা অসিগুম্বা নৌথেম অসি খঙহৌদনা ঐগীনি হায়না কদায়দগীবু কেল্লক্তুনা ইতম্বাকসিদা…। “কনানো!” ঐনা মীকপ থোক্লদুনা হংলম্মী। “তূমিন্না লৈরোনে, ঐনে… ইনেনে।” খোন্নৌ অদু ওন্থোক্না লাঙতক্নবা অমনি। ইকায়বগা অঙকপগা থৌরী চিংনবগী খোঞ্জেল অদুনি। “ইনে! ঐ সেমিনারগা তূম্লুরগে?” অমম্বদুদা ঐনা মীৎ উইশিল্লদুনা ইকায়বা অদু খাঙলদুনা হায়রম্মী। “হোয়, তূ্ম্মুকো; ‘দো ইনেসে য়াম্না ঈংলি ঙাইহাক্তংদি তূমখো‑ও।” ইনেনা য়াম্না তোঞ্জনা হায়রকখিবদো ঐনা থৌশাদবা ঙমখিদে। কাওথোকমিন্নরুরবা ফৈজূপ চিংখৎলদুনা ইনেনা য়াম্না কিজনা ঐবু কোনবিরক্লম্মী। ইকায়বনসু শিনীংবা য়ৌরে। অদুবু মীশুম অদুদদি কমদৌনা তূমথদবা ঙম্লুগনি। ঐ তূমথখিরম্মী। অয়ূক্তা, ঐনা মীকপ থোরকপদা থংনরিবা কাদা মীওই খরা ৱারী শাবা তারক্লম্মী। ইনেগা সেমিনারগী মপাগগী মখোলগদি ঐ খঙলে অদুবু মৈতৈলোন শেংনা ঙাঙদবা নুপা অনী অদুদি কনা কনানো খঙদে। “ঐখোয়না নখোয়বু নীংবসে নখোয়না খঙদেকো।” (মরোল শেংফাত্তবা অমনি।) “খঙই! অদুবু ৱাফম অসিদি অরুবা অমনি। য়েক্নবা ওইসি হায়রিবা মখোয় অসিদি ঐখোয়গা পোকমিন চাউমিন্নরকপনি? মখোয়গা য়েক্নবা ওইবদা অফবা ওইরোই।” সেমিনারগী মপানা খুম্মী। “য়াহ। মখোয়নদি নখোয় ঐখোয়সি মীতোপনি হায়দুনা রিফ্যুজী অমগুম খনবা হৌরেনে।” “মদুদি মতম্না পুরকপনি।” “চহী কয়াগী প্লান অসিদি কায়বা তাবরা! ফরেনে নচন্নুপী শংলৈনা ভোট লেপকদবা অসিদি কমদৌবা তাবা—অদুসু হায়রো। হৌজিক হেক্তা থবক হৌরসি হায়বদি নত্তেকো। ঐখোয় শাগৈ মান্নবা য়াম্লেকো! মীচঙ, পৈশা লান্মী ঐখোয়গী য়াম্না লৈরে।” অমনা অমুক হায়রিবনি। “ঐ হায়গেকো; মোইরাংদগী লমকা ফাওবগী মনুংদা লৈরিবশিং অসিদি য়ামদে। তোর্বুং, বাংলা, তেরাখোংশাংবী, সাইতোন, ৱাখা, লম্বোন হায়রিবশিং অসি মাঙহনবা ৱারোই। মখোয়সি ঐখোয়গীদা চোংশিল্লকপনি, লৌশিনবসু য়াইকো। কুম্বীরোমদা, ইম্ফাল রিভরগী মনীংথংবা তোর্ব্বান্দা লৈরিবা নাপৎ, তাংজেং, অহল্লুপ, কোমবিখোক হায়বশিংসে ঐখোয়দা ইয়েৎতা য়েৎলি—মখোয়সি লৈহন্দ্রবদি শজিক্তগী হৌরগা শুগনু, সগাং কোম, মোইরাং লমখায়দগী লমকা ফাওবদি ঐখোয়না ওক্যুপাইদ তৌবদা লায়রেনে।” “লায়রোইকো।” সেমিনারগী মপানা মখা তারকখি, “চহী খরগী মনুংদা লাকখিবা নখোয়না মখোয়গী চহী লিশিং লিশিংগী হিষ্ট্রি খঙবা ঙমখিরোই। শিবা কিদবা, নহা কয়া থোরক্কনি। মদুদা মমা‑মপাশিংসু য়াওরক্কনি। অরোনবা লান্মী কয়াসু লৈরমগনি—ইপঙ পঙবা মীওই কাঙলূপ অমনি খনগনুকো।” “এ! মখোয়বু করিগী কিফম থোক্কনি? ঐখোয়গীসু হেল্পিং হেন্দ ময়াম লৈরে। ঐখোয়না হন্দক মখোয়গী মী শিবদা মৈ থাবা য়ারোই, লৈবাক্তা ফুমগদবনি হায়না ওর্দর তৌরুবা অদুদি অঙাওবা খরনা থোকহনবনি।” “ৱাসি য়াম্না লুবনিকো।” ইনেনা কুইরবগী তুংদা তপ্না খুম্মী। “হোমলেন্দ তানবসে ঐখোয়না হৌদোকপা নত্তেকো! ইন্দিয়াগী গুজরাটকী কুছ লমদম হোমলেন্দ তাল্লি। লদাখকী লেহ অমসুং কার্গিলসু লদাখ হায়না তাল্লি। মধ্য প্রদেশকী চিন্দৱারা, নরসিংহপুর অমসুং সেত্তানি হায়রিবা দিষ্ট্রিক্টশিং অসিবু মহাকোশাল হায়না দিমান্দ তৌরি। চান্দেল, চুরাচান্দপুর, জিরিবাম, কামজোং, কাংপোকপি, নোনে, ফেরজোল অমসুং তেংনৌপল ঐখোয়গী ওইফম থোকইনা।” মরোল শেংদবা অমনা হায়। “নথিং…!” সেমিনারগী মপানা খোল কল্লপ হায়, “ঐখোয়গী হৌজিক ওইরিবা সোসিএল কন্দিসন অসি হান্না য়েংসি। পোপিখক্কী মঙলান্দা ঐখোয়না দ্রগ্‌স এন্দ সেক্স ফ্রী ওইরকখিবা কুইখ্রে। উমং কোক্তুনা লম একর অমদগী লুপা লাক্ষ অমা ফংই— অপূনবা লম একর লাক্ষ অমগী লুপা লাক্ষ লাক্ষ চাম্মনি ফংলিবসি হায়না হরাওরি।” “ঙাইখোদা,” অমনা মরক থৎলি। “ঐখোয়গী শেল লাক্নবা লম্বী অসিদি আ য়ৌরেনা। মদুদা ব্লেম তৌগনু। বিজিনেস অসিদা ঐখোয়না মালেমগী সেলেব্রিটি কয়া য়াওনা খূৎশম্নবা ঙম্লে। অদুবু হৌজিকমক এক্সনদা লৈরসি হায়বা নত্তে। ইস্যু বেজ অমা লৈরক্কনি। মতমদু ঙাইগনি; এজিটেসন কয়া লাক্কনি—এট দেট টাইম ৱি কেন দু।” “ঐখোয়না কোক্লুরিবা চীংশিং অসিবু অশংবা চীংমায় ওইহল্লু হায়বা ঐখোয়দগী হেন্না পাঙ্গল লৈবা অমা নোংমা লাক্লোইদবগী মরম লৈব্রা? ঐখোয়গা নক্না তিন্নরিবা সেন্ট্রেল ফোর্স অসি ঐখোয়গা পুন্সিগী লৈমিন্নবা য়াগদ্রা? ইমুং অমগী মমা‑মপা, মচে‑মচল, মবুং‑মৌপ্ব া লোইনমক অয়ূক্কী ব্রেকফাষ্ট চাবদৌনা দ্রগ চামিন্নরে। সেক্স ফ্রীগী রেসিও হেনগৎলক্তুনা মৌ কয়া মাগী নুপানা দিভোর্স পীনরে। লৈশাবী অমত্তসু লৈত্রে। লমচৎ কাম্বা, থকসি‑খাসি লৈত্রবা ঐখোয়গী সোসিয়েল কন্দিসননি হায়বসি কাউরব্রা!” “এ! নঙগী ৱাসিদি করিনো অমা তৌখ্রেদা।” অমনা হায়। “খল্লুনে! এইদ্‌স নারবা, হেপাটাইসিস নারবা ঐখোয়গী নহাশিং, কোক্কী লায়না নারবা ঐখোয়গী নহাশিং; মখোয়না নোংমৈগী ট্রিগর করম্না চিংগনি? ঐখোয়গা অমত্তনি, ঐখোয়গী ইচীন‑ইনাওনি খঞ্জরিবা থংনবা ষ্টেট অসিনা ঐখোয়বু চঙহন্নীংদ্রে। খরা লৈরবদি শুমজিৎ পায়দুনা তাল্লক্লনি। ঐখোয়সে, য়াম্না তমথীবা মহীক মখল অমা ওইনা অকোয়বশিংনা উবা হৌরবনি। অসিগুম্বা ঐখোয়গী লাইবক থীবা মতৌ অসিবু চহী দিকেদ কয়াগী মনুংদা কোকহনখিবা ঙমগদগে।”

সেমিনারগী মপানা ঙাঙলিবদু নুপা অনীদুনা তারিবরা তাদবরা খঙদে—মরী মরী থোক্নরকপা হৌখি। ইনেসু ঐখোয়না চা থক্লিবা অদুগী মনাক্তা চঙলকখি। ঐদি মাবু য়েংবা ঙমদে—ইকায়বনা মায় অসি য়াওদ্রবা মানখি। মাদি নোকফেৎ নোকফেৎ তৌরগা অদুম লৈ; অদুগা তপ্না হায়রকখি, “নখোয় অনী হয়েং চৎলো।” “ইস!” য়াম্না থুনা ঐনা অসুম্না খুমখিরম্মী। সেমিনারগী মপা শিবগী ফ্যুনরেল থৌরমদু য়াওবা ফংলম্মী। মপাদু কনানা করিগী হাৎপনো হায়বা খঙদ্রবসু পোপি থাবগী মায়োক্তা লৈখি হায়বসিদি নাখৈ শেংখি। নুপী অদুদি ভোট কারদুনা এমএলএ ওইরম্লে। মমীৎতা অমুবা আনোক অমা উপলিবদুনা মানা ঐবু য়েংলকপা য়েংলক্তবা মফম খঙদে—ঐদি মাবু ইকায়বনা… ইকায়বনা। ভোট কারবী মানা মবুংবু কনবা ঙমখিদে। সেমিনারগী মপাগী শুমাঙদা লৈহৌবা শঙশাং অদু শীদোকখিরম্লে। ফার্ম হাওসতা চৎপগী লম্বী ময়াদা লৈহৌবা শঙশাং অনী অহুম অদুসু অমত্তা লৈবা উরক্তে। মকোলদা মপীনা মরোল তম্বিবগুম মৈতৈলোন তমহৌবা ময়ামদু মপী ফারদুনা কদায় কদায়দা পাইনখ্রবগুম মশক উরকখিদ্রে। খঙদ্রে—মখোয়না কদায়দা লৈখ্রবা! অৱাংবা চীংমায়শিংদা ইকোক কোক্না করিমত্তা হৌবা ঙমদবগুম লৈহৌবদুদি নৎলমদ্রে—চীংমায় খরদদি অপীক অপীকপা উ পাম্বী মচাশিংনা ইশং শংলদুনা তপ্না শীৎপা নুংশিৎকা লেঙ্গোন্নরম্বা উরক্লে।

মসিবু করম্বা ফাথবা ঙমজদ্রবা পূক্নিংগী ইথিলনো হায়বদু ইশানা খঙবা ঙমজদ্রে। ইশাগী ওইজবা থিবা অপাম্বা অমদগীরা নৎত্রগা তশেংনা মতম শাংনা ট্রেন তোংদুনা চৎনীংদবগীরা? ইথন্তা হংজরিবা ৱাহংনি। ঐহাক ইম্ফালদগী খোংশাং তান্না বসতা চৎখিবা কাঙবুদুদগী হৈ‑শিংনা লৈথোক্তুনা য়াওহৌদ্রে। অদুনা খোঙচৎ অদু কাঙলূপ অনী থোক্না চৎনরে। ওজা ভানুকুমারনা লুচিংবা কাঙবু অমনা ইম্ফালদগী খোংশাং ফাওবা বসতা চৎখ্রে। খোংশাংদগী মণিপুরদা ইনৌ নৌনা হন্দক্তা হাংদোক্লিবা ট্রেন লম্বী অদুদা ট্রেন তোংলগা অসামলোমদা চৎকদবনি। ৱাখলদা ঐনা ইথন্তা অঙ্ক খোৎলি। অসামদগী বাংলাদেশলোমদা চঙবা য়াবা লম্বীসিবু কয়া লৈবগে? লম্বী অহুম নৎত্রনে? অহানবদা, ধুব্রীদগী বাংলাদেশকী কুরিগ্রাম য়ৌখিবা চাউরাক্না কিলোমিটর ১৩৪ শাংবা লম্বীসিমা। অনীশুবদা, কাছারদগী বাংলাদেশকী সিলেট তাখিবা চাউরাক্না কিলোমিটর কুন্থ্রাহুমদোই খরা হেন্না শাংবা লম্বীদুমা। অহুমশুবদা, ন্যু করিমগঞ্জদগী বাংলাদেশকী সিলেট দিভিজনগী দিষ্ট্রিক্ট অমা ওইরিবা মৌলভি বাজারগী মনুংদা লৈবা ভানুঘাছ তাবা য়াবা কিলোমিটর ১১৮ রোম শাংবা লম্বীসিমা। মসি বস নৎত্রগা টেক্সি ফারগা চৎপদা পূং অহুম্লোমদি শোয়দনা চঙগনি। পন্থুংফমদি ভানুঘাছ ওইরিবনিনা ঐনা ইথন্তা খঞ্জরকই। কাঙবু অদু ন্যু করিমগঞ্জ ফাওবা ট্রেনদা চৎলগা মফম অদুদগী অমুক ট্রেনদা নৎত্রগা বসতা ভানুঘাছ য়ৌনা লাক্কদৌবা শোয়দনা ওইরমগনি।

ঐগী থৌইনশিনদগী ঐখোয় মরি অমদি তোঙান্না ইম্ফাল এয়রপোর্টতগী আগরতলা ফাওবা প্লেন তোংদুনা লাক্লে। ত্রিপুরাগা বাংলাদেশকা লোন্নবা ঙমখৈদা লৈরিবা বাংলাদেশকী আখাউড়া হায়রিবা শহরসিদগী ভানুঘাছ য়ৌনা চৎকদবনি।

ভানুঘাছতা মতম চানা য়ৌরগা লোইরে। ঐনা লোয়নজনীংবা মীশক অমগা লমশাং চৎমিন্নবগী অসিগুম্বা তাঞ্জাসি পুন্সিদা পাক হেক্তা লাকপা নত্তে। ত্রিপুরাদা মরুওইনা মৈতৈশিংনা খুন্দারিবা খুঙ্গংশিংগী পুন্সি মহীং, য়ূম্লৈ‑কৈরৈনচিংবা য়েংবা ওইনা কোয়বা য়াবা মফম কোয়হৌরসি হায়দুনা হোটেল অমদা বূক তৌদুনা নুমিৎ নীনীদি আগরতলাদা লৈরে। কা অমদা নুপা অনী। অতোপ্পা কা অমদা লাকমিন্নরিবা নুপী অনীদু লৈহল্লে। পূক্নিংদা ইথন্তা ৱাহং অমা হংজরকই। খোঙচৎ অসিদা ঐনা অসুক য়াম্না ইচঙ থৌরিবা, চোকথবা নাইদ্রিবসি মহাক য়াওবগীরা? মসি শোয়দনা চুমগনি। পাসপোর্ট শেম‑শাবগী, ভিজা তান্নবগী, এরোপ্লেন টিকেট ককপগী চেন্থোক চেনশিন অয়াম্বদি ঐনা খূৎচাবী অঙাং অমা শীজিন্নদুনা লোইনবা হোৎনখিবা ঙাক্তনি।

মণিপুরগী তোঙান তোঙানবা মফমশিংদা লৈবা ৱারীমচা ইবশিংনা শেম্বা ‘মণিপুর শোর্ট ষ্টোরি সোসাইটি‘ হায়রিবা খোরিরোলগী লূপ অসিদা ঐহাক্তি মিং চন্দুনা য়াওজরকপা কুইদ্রি। অইবা অইবী য়াংখৈ হুম্ফুমুক্না পূনশিল্লগা শেম্বনি। ওজা শান্তিরানীদি লূপ অসি লিংখৎখিবদগী মরুওইবা থৌগায় পুরক্লিবী লুচিংবী অমনি। চহী খূদিংগী তোঙান তোঙানবা মফমদা ফংসন শীল্লি। তোঙান তোঙানবা মফমশিংদা খুন্দারিবা মণিপুরীশিংনা মৈতৈলোনদা মশা মশানা ইজবা ৱারীমচাশিং পানৈ। হন্দক্কী খোঙচৎ অসিনা বাংলাদেশকী ভানুঘাছতা তারে। ইম্ফালদগী চৎকদৌরিবা মীশিংবুদি তরামঙা কুনলোমদনি।

ত্রিপুরাদা মৈতৈশিংনা ইচাই চাইনা খুন্দাদুনা লৈরিবা লৈকাই অম‑নী কোয়রুসি হায়দুনা কোয়রুই। খ্বাই, লাংচিংমুরা, ধর্মনগর, বামুতিয়া… অসিনচিংবা খরা। মেখালী পাড়া হায়না খঙনবা মফম অমদসু চৎলুই। মৈতৈশিংনা ত্রিপুরাদা খ্বায়দগী হান্না খুন্দারম্বা মফমনি হায়নৈ। হৌজিক্তি মৈতৈ অমত্তা মফমদুদা লৈত্রে। বেঙ্গলিশিংনা চা বাগান ওন্থোকখ্রে। মৈতৈশিংগী নীংশিং খূদম ওইহৌরিবা হায়ববু চন্দ্রাবলী পূখ্রি হায়না খঙনবা পূখ্রি অমা লৈহৌরিবদু মঙায়রে। মসি ত্রিপুরাগী নিংথৌ অমনা মাগী মৈতৈ মহারাণী অমগী মিং থোনবিদুনা তৌবিরম্বা পূখ্রিনি হায়না ৱারী ওইনা লীবিরকই। চুম্ব্রা লানব্রা খঙদে। রবর প্লান্টেসন ফার্ম খরদা অমুক চৎলি।

মদুদগী নীরমহল য়েংলুসি হায়দুনা মেলাঘর য়ৌনবা লাক্লে। রুদ্রসাগরগী পাৎয়ায়দু য়ৌনা হি তোংলদুনা নীরমহলদা থুংলে।

মায়কৈ খূদিংমক্তা উবা ফংলিবসি শাফূ কল্লবা ঈচেল অমদৌনা বেঙ্গল্লোমদগী চেনশিল্লক্লিবা কলচর অমনা খূবাম চেৎনা পায়শিনখিদুনা য়াম্না ৱানা নিংশাসোর হোল্লিবা লমদমসিগা শাগোন্নরকপা য়েলহৌঙৈগী ফূরুপ অমগী শক্তম্নি।

পূক্নিংদা খল্লকই: ও মহারাজ বীর বিক্রম কিশোর মাণিক্য বাহাদুর! চহী মরিফুতরাহুমদোইগী তুংদসু নহাক্না শাজরম্বা নীরমহলদি রুদ্রসাগর কৌবা পাৎ অসিগী ঈয়ায়দা হৌজিকসু অদুম্মক ঙৌশ্রোক ঙৌনা মচী লেঙদনা চীং‑লেম্না লেপ্লি। তোঙান তোঙানবা কাখল কুনমরিনা মতম অমগী নুংঙাই য়াইফরম্বা নিংথৌকোলগী ৱারীশিং লীরদুনা নীংঙাইদনা তূমখূল তাল্লি। অদুবু নঙগী হৌজিক ওইরিবা নরানয়াইদি মতম অমগী শক্তমদু নৎত্রে। মীতোপশিংনা মহুম‑মকোল শাজিনবিখ্রে। য়াম্না শাথীনা শকফম হোংখ্রে।

ৱাটর পেলেস হায়না খঙনরিবা পাৎয়ায়দা শাবা চাউরবা মহল অদুগী নোংচুপথংবা শরুক, অন্দর মহলদুদা উরি—মতম অমগী তখেল নিংথৌশিং অমদি নিংথৌগী মহারাণী অমদি ইমুং‑মনুংশিংগী পোৎথাফম অমদি অতৈ কাশিং। নোংপোকথংবা শরুক্তনা জগোই ঈশৈ, লীলা দ্রামা অসিনচিংবা উৎপা য়াবা, শান্নবা য়াবা ওপন এয়র থিয়েটর অমা।

য়েংবা য়াবা খরা য়েংলুরবা তুংদা মহলগী মপান থোরক্তুনা ওজা শান্তিরানী (ঐনদি শান্তিদমক কৌই) ইবান্নী অচীকপা মচী অমদা ফম্মিন্নরে। নীরমহলগী মায়কৈ মরিমক ইকোয় কোয়শিল্লিবা রুদ্রসাগর কৌবা পাৎ অদুগী পূক্নিং হূরবা মহৌশাগী শক্তম অদু য়েংমিন্নদুনা ৱারী শানৈ। “আ‑দগী দৃশ্যসি নুংশিদ্রা য়েংঙুদো, তামো।” মখূৎ খুদোম্বীদু পাৎলোমদা থিল্লগা ওজা শান্তিরানীনা ঐঙোন্দা হায়রকই। য়েংথোক্লুবদা ঐনা উরকই। ইরোই অনীখক পাৎ অদুদা ঈরোয়দুনা ঐখোয় অনীনা ফম্লিবা মফম অদোমদা লাক্লি। “উম, ফজৈ। খুঙ্গংগী পুন্সিবু নীংশিংহল্লি, “ঐনা হায়।

তশেংনমক পাৎয়ায়দা ঈরোয়রিবা ইরোই অনীদুগী শক্তমদুনা ঐগী হৌখ্রবা মতম অমগী খুঙ্গংগী পুন্সিবু মীৎমাঙদা শং‑শং উহল্লকই; লোয়ননা হৌখ্রবা ইকায়‑নুংশি য়ান্নখিবা থৌদোক খরসু নীংশিংবগী ঈরোলনুংদগী ফাওগৎহল্লক্লি।

ঐনা ওজা শান্তিগা পুন্সিগী অহানবা থেংনখিবসি ঐখোয়গী খুঙ্গংদা পাঙথোকখিবা খোরিরোলগী থৌরম অমদনি। মতমদুদা মহাক য়ক লাউনা ইনখৎলক্লিবী লৈশাবীমচা হায়বদুমক্তি ওইদ্রে। চহী কুনতরুক কুনতরেৎতগী খজিক্তং লৈশিল্লে। মশক‑মতৌ ফজৈ। থীক‑থা ফৈ। পাখঙশিংগী মীৎয়েং থম্ফম ওইবা ময়ূম‑মকৈ পান্দ্রিবী লৈশাবীনি। ইব‑খোৎপগী লমদা মচীন তুমখৎলকপী অমা ওইবনা খোরিরোল শূরিবশিংগী মরক্তা মমিংসু হাইরপ চৎচরে। থৌরম হৌবদগীনা লোইবা ফাওবা ঐনা লোন্না লোন্না মঙোন্দা হূরান্দুনা য়েংজখি। মাগী ঈং‑তপ্লগা চীং‑লেম্বা মায়থোঙ অদু। ঐনা তকশিনবদগী থৌরম লোইরকপদা ঐখোয়গী সাহিত্যগী লূপ অদুগী সেক্রেটরিনা ঐখোয় অনীবু শক খঙনহল্লি। ইবান্নী খূৎ লোন্নদুনা খুরুম্নৈ। মিং, লৈফম অমসুং লৈকাই তাক্নরে। “লাইরিক ফোঙবদা পাউজেল‑চে পীজরক্কে। লাকপিয়ুকো, “ঐনা হায়। “য়ৌহনবিরকউ। শুকশোয় শোয়দনা লাকচগনি।” হাইফেত্তং নোক্লগা খুম্লকই। লংত্রিক লংবা য়াতোনগী শরুক খজিক্তং উই। মুশিন মুনা জ্বায়‑জ্বায় তারকপা তুংগী শম্লাংনা মতা ফরবা নীংজোলদা বূপ‑বূপ য়ৈরদুনা ঐগী মাঙদা নোম‑নোম চৎখি। কল্লকচবা, অপাম্বা অমসুং মিহৌজবগী ইয়ান য়ানশিন্নরবা পূক্নিং‑ইথিল অমগা ইরোয়ননা ঐনা চাক্না মাগী তুংদা য়েংজহৌই।

“নঙগী হায়রসিদনা? থবক হায়রা কদায়দনো ওজা ওইরি হায়বনি। তোলোব চাবীনি। মশক হায়রা ফজরে।” থৌরম মপুগী ফিদাদা ফমখিবা ঐখোয়গী ওজা অমনা হায়রকপনি।

“হোয়নে, পাখঙ শরী হায়বদু তাদ্রিঙৈ হোৎনহৌরো। ঐখোয় মতেং পাংগে।” ইমান্নবা অমনা মতেং পাংশিল্লকই।

সিভিল এঞ্জিন্নীয়ারিং তম্লুরবা তুংদা ঐনা থবক ফংদনা ঙাওচৎনরিঙৈ মতমদুনি। খোরিরোলগী থৌরমশিংদি পামজরুবদুনা শুকচীৎ হেক চীৎথদ্রে।

শকখঙনরবা তুংদা ওজা শান্তিরানীগা ঐগা খরা হেন্না নকশিন্নবা য়াবগী খুদোংচাবা তাঞ্জা কয়ামরুম লাকখি। মসি ইবান্নীগী ইব‑খোৎপা পামজরুবগী মান্নবা ইহুল অদুননি। শৈরেং অমসুং ৱারীমচা পামিন্নবা, কনাগুম্বা অইবা অমনা অনৌবা নোভেল অমা ফোঙলকপদা মদু ফজৈ নৎত্রগা ফজদে হায়নদুনা ক্রিটিসিজমগী লমদা তাথোক‑তাশিন তৌনবা অসিনচিংবা।

ময়াম্না হায়নবদু চুম্মী। মহাক ইম্ফাল শহরগী মনুংদা লৈবা হায় স্কুল অমগী গ্রেজুয়েট পোষ্টকী তোলোপ চাবী ওজানি। মখোয়গী য়ূমসু ইম্ফাল শহরগী ময়োলমক্তা লৈ।

নোংমা নুংথিল অমদি মানা ওজা ওইরিবা স্কুলদুদা ইথন্তা চৎলি। মানা ক্লাস লৌরিবদু লোইবা ফাওবা ঙাইদুনা ঐহাক লৈরে। খোরিরোলগী থৌরম অমা য়াওমিন্নরুসি হায়দুনা হৌবা লাক্লিবনি। থৌরম মফমদু য়ৌনা মাগী কারদুদা মানা থৌরগা ঐনা তোংলগা চৎমিন্নৈ।

নুমিৎ অদুগী অচীকপা তাঞ্জাদুগী খুদোংচাবা লৌরগা ঐনা ঐগী থম্মোয়গী ওইবা ৱা খরা ফোঙদোক্লুই। “মরূপ অমা ওইনা অসুম তিন্নসি, তামো। ঐহাক নুপাশিংগা অখন্নবা মরী থম্ননীংবগী ৱাখল অমদি য়ূম‑কৈ পান্নীংবগী ঈহুলকাদি লৈজদ্রি। য়াম্না লাপ্লি।” ইরায় লায়না ৱাফমদু অমরোমদা থৈদোক্তুনা খুমদোরকখি। ঐ ইথন্তা ইকায়জখি। খল্লকখি: করিনুংগী হায়জরুরবনো! অমুকসু খনখি: মানা লৌরিবা ফিরেপ অদু চুম্মী। ঐদি থবকসু ফংদ্রি। শেন্থোক লৈজবা নৎত্রি। খোঙ অনীসিনা ইথন্তা লেপচবা ঙমজদ্রি। মহাক্কুম্না কার তোংলুবদি লায়রদনা অমনবা স্কূটর অমা ফাওবা তোংবা ঙমজদ্রি। নুমিত্তুদগী ঐনা ওজা শান্তিগী পুন্সিগী অপাম‑পামদগী মরমদা করিগুম্বা খরদি খঙবা ঙম্লে। অরাপ্পা খুঙ্গং অমদা কাইদোংফম ওইবা, থবক‑ইনখাংসু তৌদ্রিবা, শেলসু থোকচদবা ঐগুম্বা অমগা লিটররি সার্কলগা মরী লৈনবা থবক থৌরমদা পূনবা নত্তনা লন্নাইগী ওইবা মরী লৈনবা পামদে হায়বদো মানা উৎলকখ্রে।

খূৎ থেক্তুনা পারুবদা নীংশিংবা থোক্ত্রবা মতম অমা হৌখ্রবগী তুংদসু ঙসি ফাওবা ঐহাক ওজা শান্তিগী মরমদা ঈ‑পাউ লৌরি। মহাক করি তৌরি? করি করি হোৎনরি? করম্বা খোরিরোলগী মশাদা খূৎ থারি? করি করম্বা লাইরিক ইরি? কনা কনাগা লোয়নরি? অসিনচিংবা। ঐনা পব্লিক ৱার্কস দিপার্টমেন্টতা সেক্সন ওফিসার অমা ওইনা থবক চঙবা, এসিষ্টেন্ট এঞ্জিন্নীয়ারদা প্রোমোসন কারকপা, য়ূম্বান লম্বীদা খোঙদারকখিবা অদুদগী অমুক ইগজিক্যুটিভ এঞ্জিন্নীয়ারগী ফম পায়রকপা… পূম্নমক অসি মথং‑মনাও অমদি মরোল মরোল নাইবা পুন্সিগী তাংকক অমমম্নি। মাগী পাউদি? ইমান্নবশিংনা ঙাঙনরকপদগী তাখি। লমদমসিগী শক্নাইরবা অইবা অমগা মরী লৈনবগুম তৌই।

ঐখোয় মরি আগরতলাদগী অাখাউড়া তানা টেক্সি তোংদুনা লাক্লে। পাসপোর্ট, ভিজানচিংবা মরী লৈনবা চে‑চাংশিং উত্তুনা লেন্দ কষ্টমস ওফিস লান্থোক্লে। ইন্দিয়াগী পৈশাদগী বাংলাদেশকী টাকাদা লুপা খরা কায়থোক্তুনা ওন্থোক্লে। ঐনা ঐগী ফূরিৎখাউদগী লুপা লিশিং তরাগী পৈশা কায়থোক্লগা ওজা শান্তিদা দরকার ওইরক্কনি, পায়শিল্লু হায়দুনা পী। হঞ্জিল্লক্কে তৌবদা ঐনা হায়, “য়ারে, য়ারে। পীরক্লনু।” “পৈশা য়াম পায়রমাল্লেকো।” নোকমি নোকমি তৌরগা হায়রকই। চহী মতাং অসিদসু মানা অসুম্না মোমোন তৌবসি হৌজিকসু অদুম ফজরি। “এঞ্জিন্নীয়ার হায়বসে তোলোব খরা চাউনা চাবনি।” ফাগি ওইনা ঐনা নোক্তুনা হায়। হায়নখিবা মতুং ইন্না মফমদুদা ঙাইবিরম্বা বাংলাদেশকী অইবা অমনা মহাক্কী কারদুদা ভানুঘাছ ফাওবা ঐখোয় মরিবু পুবিরে।

মণিপুরী কলচরেল কমপ্লেক্সতা নোংমা নীনী চঙনা পাঙথোকপা থৌরমদু লোইরবা তুংদা ময়ামদু মহৈ মহৈ কোয়বা চৎনৈ।

ওজা শান্তিরানী ঐখোয় অনী পূন্না কোয়মিন্নৈ। অইবা অমগী য়ূমদা কোয়রুবদা উরকই—ইম্ফালদা অমদি মণিপুরগী অয়াম্বা মফমদগী মমি শামখ্রবা মৈতৈগী য়ূমজাও অমা। য়ূমদুগী নোংপোকথংবা শরুক্তা লৈবা শঙ্গোল অমদা শন লাবা অনীনা তেন্না ককথৎলগা থাউথী চাইশিনবিরবা চরূশিংদু বাগোসতগী মচীন্না লৌখৎ লৌখৎলগা চারি। শনবী অমনা অশংবা হানৌ শজিক খরা শাইগুপ শাইরি। চরূ ইকূ অমনা মনম ইপোন পোল্লদুনা পূখ্রি অমগী মপান্দা নুংশা য়াইরদুনা লেপ্লি।

য়ূমলোন্নরিবা ইমুংদুগী মাঙ্গোল্লোমদা অমুক য়েংলুই। উরকই—মৈতৈ লৈশাবী অমনা ফিশাকোন্দা ফম্লদুনা ফি শারি। মানা পাঙন্দেম লংবগী থোক্লকপা খোঞ্জেলদু ওন্থোক্না নুংশিখ্রে। লৈশাবীদুগী মমা ওইরমগদ্রা? মীয়ায় চল্লবী নুপী অমনা মাঙ্গোলদুদা ফম্লদুনা তরেংদা লংচাক নাইরি। লৌ য়ৈরুবা কুইদ্রিমাল্লে। মখোয় মাঙ্গোলদুগী কাচিন অমদা ফৌ বোরাখাউ অনী অহুম লোনখৎনরগা লৈবা উই।

মপান্দা অমুক থোরক্লে। ওজা শান্তিরানী ইবান্নী অচীকপা লম্বী অমদা খোঙথাং তপ্না থাংলগা অকোয়বদা উরিবা মহৌশাগী ফজরবা শক্তমদু য়েংমিন্নৈ।

খুঙ্গংশিংবু শম্নহল্লিবা লম্বীশিংগী নাকল অনীমক্তা অকাশি উপালশিংগী অশংবা উনাশিংনা তপ্না শীৎলকপা নুংশিৎকী শাহুমদা চিরোল তৌনরি। মীৎয়েং তাম্না শন্দোকখ্রিবা লৌবূকশিংদা শন খরা শজিক চাদুনা লৈবা উরি। নুপীমচা খরনা মখূত্তা শনৈবী ৱাশা অমমম পায়রদুনা লৌবূক্তগী খুঙ্গংগী মায়কৈ তম্না শনলূপ খরা হোইগৎলক্লি। লৌবূকশিংগী অহাঙবা অতিয়াদনা উচিথেম্বী কৌবা উচেক অম‑অনীনা শাখপ তোয়না পাইরদুনা লৌবূক্কী ঊচি ফানবা শাদানবা থোরক্লি।

তাঞ্জাসিদা ইবান্নীনা লেপ্লিবা লৌবূক ময়াদুদা খঙহৌদনা অতিয়াদগী পাইথরকখিবা উমাইবী অমনা মাগী খূবাম্নুংদা ঊচি অমা চেজেৎ পায়শিল্লগা নোংমদোনথক্তা অমুক পাইখৎখি। পূক্নিংদা খল্লকই: মানি। মাঙদা উরিবা মৈতৈ খুঙ্গংশিংগী মহৌশাগী ওইবা শক্তমশিং অসে ঐগী মৈতৈ পোকপী ইমাগী অদুঙৈগী মাঙখ্রবা শক্তম অদুনি। মীৎমাঙদা শন শেল্লিবী খুঙ্গংগী চনুরাশিংসে ঐগী খাইদোক্নখ্রবা ঈরেমখাক অদুনি। মাঙলুরবা ইপা‑ইপুগী চৎনবী অমসুং নাৎনা য়োম্লিবা ফিজিগী লন অদুনি।

ভানুঘাছতগী খরা লাপতক চৎলগা লৈরিবা চা বাগান অমগী মনাক্তা লৈবা পাৎ অমগী অকোয়বদা ইবান্নী খোঙনা কোয়না চৎমিন্নৈ। ৱারদুনা উপাল অমগী মখাদা, উপাক্কী ফানশাং অমদা ফমথমিন্নরে। ঐনা ৱারী হৌই, “হৌজিক ফাওবা য়ূম পান্দ্রিবসে কৈগীনো?” খুম্লকই, “য়ূম পান্দনা লৈবসিনবু মফরম্লে।” “মদুদি ঐগী ৱাহংগী পাউখুমদু নত্তে। হংলিবা ৱাহংদি পান্দ্রিবদুগী মরমনি।” মাগী পাউখুম লাক্ত্রিঙৈ ঐনা অমুক মখা চৎথৈ, “কনানা খঙনি? য়ূম পাল্লবা তুংদা পংনুং নুংঙাইরম্বসু। লম্বী অদুদা খোঙদারুদ্রবনিনা নহাক্তি মদু খঙলরোই।” “হো মোৎ চানবা নুপা ফংদ্রবা। অদুনা পান্দ্রিবা।” নোক্লগা খুম্লকপনি। মহাক্না অসুম্না নোকপদা হৌজিকসু মতম অমগী রাশি অদু মাঙখিদ্রি।

অতোং‑অকূৎ নাইবা, লোইরোই লোইরোই অমুক কাখৎপা অমুকসু লোইরোই লোইরোই কূমথবা চীংগী নাপোম ওইনা তৌবা চা বাগানদু ৱারী শানা শানা লান্থোকমিন্নরকই। “ঙরাং তামোনা পাখিবা ৱারীমচাদুদা য়াওবা নুপীদুগী কেরেক্টরদু ঐদি চিংনদবা ঙমদে। ঐগী পুন্সিদা য়ূম্ফম ওইবা ৱারী মানশিল্লকই।” চৎনা চৎনা মানা হায়রকই। “নত্তেদা। ফিক্সননি। মান্নরম্মসু কায়ব্রনে? ফত্তবা কেরেক্টরসু নত্তদুবু‍‌!” ঐনা খুম্মী। মহাক কোমকূৎ অমদা তুশিল্লুরমাল্লে। লাউরকই, “অয়ো ইমা। শিরে।” ঐনা ইরেঞ্জনা কোনখৎপিরে। “এ! খ্বাঙসে কৈনোম তৌখ্রমাল্লে। লেঙবকা য়াদ্রে। য়াম নাইয়ে।” মায়থোঙদা চৈনাখোল উৎলদুনা হায়রকপনি। “ঙাইহাক তূমিন্না ফম্মুসে। ঐ নমবিরক্কে।” ঐনা হায়রুই। “নমবিরক্কনু কৈসু। মীনা উখ্রগা ইকায়জৈ।” শাউরংননা হায়রকই। শাউরিবদু ঐঙোন্দদি মান্দে। মথন্তা শাউজবা ওইরমাল্লে।

মণিপুরী কলচরেল কমপ্লেক্স বিল্ডিং অদুগী ফার্ষ্ট ফ্লোরগী খ্বাইদগী মতাই থংবদা ভি আই পি সুট অমা লৈ। কা অদুদা ওজা শান্তিরানী য়াওনা নুপী খরা লৈবনি। মখোয় ফোনদা ৱারী তৌনরিমাল্লে। নোক‑খেদুনা য়া‑য়া নোক্লকপগী খোঞ্জেল তায়। ঐখোয় নুপা খরনা কা অমা লান্থোক্লগা লৈরিবা দোর্মেটরিদুদা তূম্মী। চাক চাদ্রিঙৈ ওজা শান্তিরানীখোয়না লৈরিবা কাদুদা চৎলগা ৱারী ঙাইহাক তৌরুগে খল্লম্লিবনি।

ৱাখলদরা নৎত্রগা মঙলান অমদরা হায়বা ঙমদ্রে। খোঙথাং তপ্না থাংলদুনা ঐহাক ওজা শান্তিরানীহোয়গী কারোমদা চৎলি। ঐনা কাদুদা চঙলকপদা ওজা শান্তিরানী ফমুংদুদা মতোমতা হীপ্লম্মী। অতৈ কনামত্তসু উদে। মহাক্না হীপ্লিবা ফমুংদুগী মচী অমদা য়াম্না হঙ্গোইনদবগুম ঐনা গীৎ লাউনা ফমথরুবদা মহাক করিসু থোইদোকপা য়ানীংদবগী ৱাহৈ অমত্তা হায়রকখিদে। তশেংবদি মদু মথোঙ হূক্তবা, নুপী ওইবীশিংগী মফমদা থকশি‑খাশি ৱাৎলবা, খোঙ্গুল তাজদবা ঐগী থৌওং অমনি। অদুবু মহাক্না অদুগুম্বা ঐগী মথোঙ হূক্তবা লীচৎ অদুবু য়ানীংদবগী মতৌ অমত্তা মায়থোঙদা উৎলকপা উখিদে। ঐনা হংলুই, “খ্বাঙ নাবা খরা ফরব্রা?” “খরদি শাফরে। চৈনাখোল খরদি অদুম লৈরি,” মানা খুম্লকই। “উপ্পুসে। ঐ নম্বিরক্কে।” মহাক কৈসু থোইদোকপা য়ানীংদবগী মরৈ‑মরা তৌরক্তনা উপতুনা লৈখ্রে। নম্বিরকউ হায়বগী মতৌনি। তুশিল্লুবগী চৈনাখোল কোক্ত্রিবা মহাক্কী চেংলপ তৌবা খ্বাঙ অদুদা ঐগী য়েৎথংবা খূৎনা থাউ খরা তৈবিরগা তপ্না তপ্না নানবিদুনা, মেত্তুনা শান্নৈ। নংগনগী শিংলি‑নাউরীশিংদু তপ্না তপ্না মেৎপিরগা ইবান্নী ৱারী তৌই। ঐনা মঙোন্দা ব্যবহার অমগা লোয়ননা ‘শান্তি‘ হায়বা মিংদুগী মমাঙদা ‘ওজা‘ হায়না কৌরম্বা অদুগা মহাক্না ঐঙোন্দা মিংগী মমাঙদা ‘তামো‘ হায়না কৌরম্বা লৈশি‑লৈথোন ওইনা শীজিন্নবা মিংথোলশিংদু হৌজিক অমত্তা শীজিন্নদ্রে। ঐনা হায়রুই, “ফাগি নত্তে, শান্তি। খরা থেঙলবসু নহাক য়ূম পানবনা ফগনি। য়ূম পাল্লু।” শাউবু শাউমাল্লে। খুম্লকই, “ঐনা য়ূম পান্দনা হৌজিক ফাওবা লৈবসিদা নঙোন্দা করি নুংঙাইতবা লৈরবগে? কনাদনো ঐনা য়ূম পানগদৌরিববু?” ঐনা হায়, “মরম লৈ। মরম হায়ববু য়াহৌ থেঙলুবা ঐহাক্না মায়থীরে খঞ্জদুনা মায় লৈরকখ্রবা তুংদসু, লম্বীদুদা কনামত্তগী খোঙ্গুল তারমদবদুনি।” মানা খুম্লকই, “নুপা হায়বা জাৎসে কয়াদা পঙখ্রবনো!” মখা চৎথরকই, “অদুরা, নঙনা নঙগী সাহিত্যদা য়াম্না শীংথাজরিবা নুংশিবা হায়বদো? অনীরক শুনা হংনীংখিদবদো? অহানবা থেংনবা মীৎকূপতবু করম্বা নুপীনা নুপা অমদা ইরায় লায়না ‘নুংশি‘ হেক্তা হায়রক্কদ্রনে?”

মোবাইল ফোনদা “ক্রিং‑ক্রিং” খীংলকপা মীৎকূপতুদা ঐহাক মীকপ খংথোক থোরকই।

ভাব তারকই। ঙাইহাক উরোল‑উরোল তূমথরুরমাল্লে। খল্লকই: হৌজিক্কীদুবু মঙলা নৎত্রগা তাইবংলা? কয়াদা নুংঙাইখ্রবা মঙনো! মঙ ওইহন্নীংদে। ইম্ফালদগী পুরকপা সিম কার্দতু চৎনদ্রে হায়দুনা বাংলাদেশকী সিম কার্দ অমা শিন্দোকখ্রবনি। ঐগী নুপীনা য়ূমদগী তৌরকপনি। পায়খৎলি।

মাগী খোঞ্জেলদু আ থনুংদা চঙখ্রমাল্লে। মি‑মি লাউনা, ইশি শিথবগুম তায়। কপলুরব্রা খঙদে। হায়রক্লি, “নঙগী ৱারী পাবকা লায়রি। য়াম্না থুনা য়ূমদা থোরক্তবা য়াদ্রে।” তপথরগা ঐনা হংলুই, “কনাগী কৈদৌবা য়াওরগেনে হা?” “হো, নচানুপীদু কোয়বা চৎখিবদৈ হঞ্জিল্লক্ত্রে। চেনখ্রমাল্লে।”

কনাদসু তাইনফম খঙদ্রদুনা মথন্তা ইশৌ লাংজরগা ফোনদু গীৎ মেৎলগা থমখিবা মাল্লি। ফাওনখিদ্রে।

কোরৌ মঙাল লাক্ত্রিঙৈদা ঙাইহাক্তং মনীংতম্না শান্নজরম্বা অয়ূক্কী লীক্লাগুম নোংমা নীনীগী ঈচেলদুদা চেন্থরম্বা ঐগী পূক্নিংগী ঈথক‑ঈরাং পুবা ইপোমশিংদু তপ্না তপ্না মাঙখ্রে।