মণিপুরগী পুৱারীদা থাশিগী অহিংগুম, অমম্বা মচুনা চুদুনা লৈহৌরগদবা খুন্নাই অসিদা শুংথোক থোকহন্নীংদবা থৌদোক‑ৱাথোক, অশি‑অনা কাঙলূপ অনীগী মরক্তা য়ানদবগী অকনবা লানফম অমা মৈনা ঙ্রং‑ঙ্রং চাক্তুনা মূত্থৎপা ঙমদনা চহী অহুমগী ময়াসি লাক্লি। চাক্লিবা মৈরীসি লৈঙাক পায়রিবশিংনা মূত্থৎপা ঙমদ্রি। সি এস ওশিংনা মূত্থৎপা ঙমদ্রি। মীয়ামগী কত্থোক্তুনা থবক তৌরিবা পোলিটিসিয়ানশিংনসু মূত্থৎপা ঙমদ্রি। মদুগী মহুৎ পূনশিন্নদবা, নুংশিনদবা, ঐগী ঐগী হায়বা অকনবা য়ূম্ফমদা অদুম লৈনখিবনা জাতিগী ওইনা, ইরমদম নুংশিবগী অপূনবা শক্তম ঙাকপগী মহুত্তা খ্বাইদগী পামজদবা তমথীবা প্রসিদেন্ট রুল ওইনা মহৈ লোক্তুনা ইরমদমসিদা হেন্না হেন্না মৈ য়াঙলি।
ঙসিদি সমাজ অসি খুন্নাই অসি লাননা মরম ওইখিবনা শেন্মীৎলোনসু অঙকপা ফংনা শোকচিনখ্রে। চাওখৎ মায়কৈদসু অমম্বা যুগ হায়বদো ওইখ্রে। ইমুং ইমুংগী চাক্কী, ফিগী অমদি হৌগৎলক্লিবা অঙাংশিং অমদি নহাশিংগী লায়রবগী, পেন্দবগী, শীংনবগী মমিদু নত্তনা মথম্মোয়শিংদা করিসু তাহৌদ্রে। আশা কায়খ্রবা মচাশিংগী থম্মোয়গী মৈরী অমদি মচাশিংবু শেমজবা ঙমদ্রবা মমা‑মপাশিংগী পেন্দ্রবা মখোল থোকঙমদ্রবা খোল্লাউতনা লমদম অসিগী লোইজিং‑লোয়া থুংনা নুংশিৎ ওইনা শীৎলক্লি। মসিগী মথক্তা থোকখিবা লানসিনা ময়ূম‑মকৈ লৈজখিদ্রবা মীওই লিশিং হুম্ফু হেন্না রিফ্যুজী ওন্দুনা মৈরী থোক্লবা লমদমসিদা মৈচাক হেন্না হাপ্লি।
ঙসিদি ইরমদমসে অৱাবা হায়বদো নত্তনা নুংঙাইবগী মঙ অপেনবগী ঈশৈ অমত্তা শক্নীংঙাই লৈত্রে। থম্মোয় শোকপা, শেৎন‑খাইনবা, শেৎপা চাবা মনীং থুংদ্রবা, পেন্দবা, মায়থীবা অমদি শীংননীংবা কয়াসিনা খুন্নাইসিগী লম্বী ওইরি, য়ূম্ফম শেম্লি। মীপূম খূদিংদা চরাঙনবনা পীক থল্লি। ৱাখল লায়না নারক্লি, শীংনবগী অচৌবা ফাথবা ঙমদবগী টেন্সনশিংনা কোক কোক্তা চঙখিদুনা লোইনমক অঙাওবগুম তৌরক্লি।
অসিগুম্বা ইরমদমগী লুরবা তানফম, অসুম লৈখা তারক্লিবা মীৎকূপ অসিদা ঐখোয় হিংননবা লম্বী করম্না থিগনি—কদোমদা চৎকনি—পুন্সিবু করম্না লৈতাহনগনি? মী অমগী পুন্সিদা হিংবমুক লুবসে কদায়দা লৈরমগনি? ঈংনা হিংবা, থম্মোয়বু শোইনাইহন্দবা, পুন্সিনা পুন্সিবু মথন্নতা ওৎচহন্দবা হায়বসি অচৌবা কলা অমনি। লৈঙাক্কী মপী‑মপাদগী হৌরগা হীরম খূদিংদা শোয়থবা ইরমদম অসিগী কপতুনা লৈরবদি ঐখোয়গী পুন্সি খূদিংমক্তা অৱাবগী অৱাবা ঙাক্তনি—হিংবা তাবনি পুন্সি, ঈংথহনবা তাবনি হিংনবগীদমক। পুন্সিদা কলা তৌবা তারবদি সাহিত্যদা খোরিরোলদা ঐখোয় পূম্নমক চঙজবা তাই। খোরিরোলগী তাইবংদদি কলাগী মতেং নত্তনা মখোয়বু ঈংহনবা নত্তনা অতৈ অমত্তসু লৈতে। ফজবা নোভেলনা, ফজবা ৱারীমচানা, ফজবা শৈরেংশিংনা ফজ‑ফজবা মখল কয়াগী লাইরিকশিং থম্মোয় চঙনা পাবনা পুন্সি খূদিংদা ঈংনা পোত্থাবা ঙমদুনা নুংশিবা সুরগা পুন্সিগী মেঙলবা ঈশৈ শকপা ঙমগনি। খোরিরোলগী তাইবংদদি পেন্দবা, অশাওবা, শীংনবা, থম্মোয়গী মৈচাক, অকি‑অখং পূম্নমকসে—ঈংলবা নুমিদাংৱাইরমগী নামিবা নুংশিৎ ওন্থোকপা ঙম্লি। মদুমক্ননি নুং ফাওবা ফজবা কলানা, খোরিরোলনা থম্মোয় পূক্নিং কয়াবু মহী চেলহনবা ঙম্মী হায়রম্বদো!
মথক্তা পঞ্জখ্রিবা পূম্নমক অসিগী পান্দমদা ফিক্সন এন্দ পোইট্রি ক্লব, মণিপুরনসু খুন্নাইসিগী য়াইফনবা, ঈংথনবা থবক কয়া তৌজরি। মেরা থানা লাকপসিদা মেরাগী থানিন নুমিৎতা ‘মণিপুরী শৈরেংগী নুমিৎ’ চাউনা পাঙথোক্তুনা—মীপূম খূদিংদা থাবলগী মপূং ফাবদুগুম ফাননবা মপাউ চেফোঙ (শৈরেং ইস্যু) মীয়ামদা পাবিননবা লান্থোকচরি। অশৈবা ময়াম নুংশিনবা ঊত্তুনা শৈরেং থীমিন্নরি। মালেমগী থাক্তা ঐখোয়গী পারী‑পুরীশিংবু ইকাইখুম্নবা ঊৎচদুনা সেমিনার শীঞ্জরি। মৈ চাক্লবা লমদম অসি খরদং ঈংনননবা ক্লব অসিনসু অচৌবা থৌদাং লৌজরি।